1. Loko u yanakanya hi Yehovha, i yini xi ku buyelaka a miyakanywini?

 XANA u same u yanakanya leswaku Yehovha a tsrhamisise kuyini? Loko u vulavula na yene hi xikhongoto, ku buya yini miyanakanywini yaku? Nambi leswi swi kalaka swi nga koteki ku vona Yehovha, a Bibele dzri mu tlhamuxela hi tindlela ta ku hambanahambana. Yehovha a vitaniwa ‘dambu ni xitlhangu’ a tlhela a vitaniwa “ndzrilo lowu helisaka”. (Amaps. 84:11; Heb. 12:29) Mutsrali wa kukazri wa Bibele loko a tlhamuxela Yehovha, a hlaye leswaku a fana ni zribye dzra safira, ku nga zribye ledzri phatima ku fana ni woru kun’we ni nkwangulatilu lowu phatimaka. (Ezek. 1:26-28) Ndlela leyi Yehovha a tlhamuxeliwaka ha yone yi nga ha hi yentxa hi tala hi ku hlamala nambi ku txhava.

2. I yini lexi sivelaka van’wana ku tsrhindzrkela ka Yehovha?

² Leswi swi kalaka swi koteki kuva hi vona Yehovha swi nga ha hi kazratela ku kholwa leswaku yene awa hi zrandzra. Vhanu van’wana va yanakanya leswaku Yehovha a nge txhuki a va zrandzra hi kola ka leswi va khalutiki hi ka swiyimu swa ku kazrata a wuton’wini byavu. Swi nga yentxeka va ngi ngi va ni papayi lweyi a va zrandzraka. Yehovha awa ma twisisa matiwela yezru ni ndlela leyi ma hi khumbaka ha yone. Akuva a hi pfuna, a tizrisa Zritu dzrake ledzri tlhamuxelaka matsrhamela yake ya ku xonga.

3. Ha yini hi fanela ku lavisisa hi kusuhi a lizrandzru dzra Yehovha?

³ A zritu dzra dzrin’we ledzri tlhamuxelaka Yehovha ku yampswa i Lizrandzru. (1 Yoh. 4:8) Yehovha i lizrandzru. A susumeteliwa hi lizrandzru ka hinkwaswu leswi a swi yentxaka. A lizrandzru dzra Xikwembu Nkulukumba i dzrikulu nakone dzri ni ntamu lakakuva a dzri kombisa ni ka lava kalaka va nga mu zrandzri. (Mat. 5:44, 45) Ka xidondzro lexi, hi ta kambisisa swa kukazri mayelanu na Yehovha ni lizrandzru dzrake. Loko hi ya hi dondzra hi Xikwembu Nkulukumba wezru, hi ta ya hi mu zrandzra.

 YEHOVHA A HI ZRANDZRA NGOPFU SWINENE

4. Xana a lizrandzru dzra Yehovha dzri yentxa u titwa hi ndlela yini? (Tlhela u vona mufoto.)

⁴ “Yehovha i Xikwembu Nkulukumba lweyi a nga ni ntwelawusiwana ngopfu swinene.” (Yak. 5:11) A Bibele dzri mu fanisa ni mamana lweyi a nga ni lizrandzru. (Eza. 66:12, 13) Yanakanya hi mamana lweyi a hlayisaka n’wanake hi lizrandzru. Yene awa mu tlakula hi lizrandzru nakone a vulavula na yene hi lizrandzru. Loko a dzrila kumbe a twa ku vavisa, a mu nyika leswi a swi vilelaka. Loko hi xaniseka hi nga tiyiseka leswaku Yehovha awa hi zrandzra. Mupsalma a tsrale leswi: ‘A ku taleni ka minhlatiyelo yanga, a swimiyeto swaku swi nyonxise hika dzranga.’—Amaps. 94:19.

5. Lizrandzru dzra ku dumbeka dzra Yehovha dzri tlhamuxela yini kwaku?

⁵ Yehovha awa dumbeka. (Amaps. 103:8) A nga hi heleli mbilu loko hi txhuka hi yentxa mintxhumu ya ku biha. Minkama yin’wana a Vaisrayele a va khunguvanyisa Yehovha, nambitasu ntsrhaku ka loko va tisolile a va kombe leswaku awa va zrandzra hi ku va byela mazritu lawa: ‘U ni lisima mahlweni kwanga, u ni ku twala, nangwesu ndzri ku zrandzrile.’ (Eza. 43:4, 5) A lizrandzru dzra Xikwembu Nkulukumba a dzri txintxanga. Hi nga tiyiseka minkama hinkwayu leswaku a na hine. Nambiloko hi yentxa swihoxo leswikulu, Yehovha a nga hi tsrhiki. Loko hi tisola hi va hi tlhelela ka Yehovha, hi ta swi vona leswaku a ha tama a hi zrandzra. Yene a dumbisa leswaku a ta dzrivalela ‘ku nge ha mpimo’. (Eza. 55:7) A Bibele dzri tlhamuxela lidzrivalelo dzra Yehovha swanga “ku wisa” ka Yehovha. —Mint. 3:19.

6. A buku dzra Zekariya 2:8 dzri hi dondzrisa yini ha Yehovha?

⁶ Dondzra Zekariya 2:8. Leswi a hi zrandzraka, Yehovha a kahlula a twisisa matitwela yezru nakone a hlunyele ku hi sizrelela. Awa vaviseka loko a hi vona na hi kazratekile. Nakone hi nga tiyiseka leswaku awa hi hlamula loko hi khongota hi ku: ‘Ndzri bekisi swanga hi nxanga [nyingi] ya tihlo’. (Amaps. 17:8) Tihlo i xizro lexi nga ni wunyenyeti swinene nakone xi nga xa lisima ka mizri wa mhunu. Kutani loko Yehovha a hi fanisa ni nyingi ya tihlo dzrake, swo fana ni loko a ku: ‘Lweyi a ku xanisaka, wene tiko dzranga, a xanisa ntxhumu lowu hlawulekiki kwanga.’

7. Ha yini hi fanela ku tiyisa ku dumba kwezru ka lizrandzru dzra Yehovha?

⁷ Yehovha a djula leswaku u tiyiseka leswaku awa ku zrandzra wene hi ku kongoma. Kambe yene awa swi tiva leswaku hi kola ka swikazratu leswi u u nga na swone, u nga ha ganaganeka  leswaku yene awa ku zrandzra. Kumbexana swoswi swi nga yentxeka u lavisana ni swiyimu leswi dzringaka ku kholwa kwaku ka leswaku Yehovha awa ku zrandzra. I yini lexi nga tiyisaka ku dumba kwaku? I ku dondzra ndlela leyi Yehovha a kombisaka ha yone lizrandzru ka Yesu, vatotiwa na hine hinkwezru.

NDLELA LEYI YEHOVHA A KOMBISAKA LIZRANDZRU DZRAKE HA YONE

8. Ha yini Yesu a a tiyiseka hi lizrandzru dzra papayi wake?

⁸ Ku dzringana nkama wa ku leha swinene, Yehovha kun’we ni n’wanake lweyi a zrandzrekaka va kombisane lizrandzru ledzrikulu. A wuxaka byavu i bya khale swinene ku tlula bya vhanu hinkwavu. Yehovha a kombise lizrandzru dzrake ka Yesu hi ndlela leyi xiyekaka swinene, hi lani hi dondzraka ha kone ka Matewu 17:5, Yehovha a a ta va a hlaye leswi: ‘Hi yene lweyi ni mu yamukelaka.’ Kambe, yene a a djula leswaku hi yi tiva ndlela leyi a mu zrandzraka ha yone Yesu, xileswo a mu vitane hi “N’wananga, lweyi a zrandzrekaka”. Yehovha a a tikhuza hi wumhunu bya Yesu ni hi leswi a a ta nyikela wutomi byake. (Efe. 1:7) Nakone Yesu a a nga ganaganeki leswaku Papayi wake awa mu zrandzra. A lizrandzru dzra Yehovha a dzri li dzra ha kakunene ka Yesu lakakuva a a tiyiseka leswaku awa mu zrandzra. Hi ku phindaphinda a a hlaya na a tiyisekile leswaku Papayi wake awa mu zrandzra.—Yoh. 3: 35; 10:17; 17:24.

9. He xini xiga lexi kombisaka lizrandzru dzra Yehovha hi vatotiwa? Tlhamuxela. (Varoma 5:5)

⁹ Yehovha a tlhela a kombisa lizrandzru dzrake hi vatotiwa. (Dondzra Varoma 5:5.) Xiyisisa xiga lexi liki: ‘A hi hananaka wone.’ Xitlhamuxela mazritu xin’wana, loko xi tlhamuxela xiga lexi xi li: ‘A wu te ku hine swanga hi nfula.’ Xikombiso lexi, xi dzri beka livaleni lizrandzru ledzrikulu ledzri Yehovha a nga na dzrone hi vatotiwa. A vatotiwa va swi tiva leswaku vone hi “lava zrandzriwaka hi Xikwembu Nkulukumba”. (Yud. 1) Mupostola Yohane a kombise matitwela yake loko a tsrala leswi: “Vonani ku kula ka lizrandzru ledzri Papayi a hi kombiki dzrone, lakakuva hi vitaniwa vana va Xikwembu Nkulukumba!” (1 Yoh. 3:1) Xana Yehovha o kombisa lizrandzru dzrake ka vatotiwa ntsena? Im-him, Yehovha a kombise lizrandzru dzrake ku hine hinkwezru.

10. He xini xikombiso lexikulu xa lizrandzru dzra Yehovha ha hine?

¹⁰ He xini xikombiso lexikulu xa lizrandzru dzra Yehovha? I xitizrulo. Hi xiyentxo lexi, Yehovha a kombise lizrandzru ledzrikulu ku tlula ledzri mhunu mun’wana ni mun’wana a nga dzri kombisaka. (Yoh. 3:16; Rom. 5:8) Yehovha a nyikele n’wanake lweyi a zrandzrekaka, a mu pfumelela kuva a fela vhanu hinkwavu akuva a swidoho swavu swi dzrivaleliwa ni ku va swi koteka leswaku hi va vanghanu vake. (1 Yoh. 4:10) Loko hi yanakanyisisa hi hinkwaswu leswi patsrekaka ka xitizrulo lexi Yehovha na Yesu va hi hakeleliki ha xone, hi ta ya hi yi twisisa ha hombe ndlela leyi va zrandzraka ha yone mun’wana ni mun’wana wezru. (Gal. 2: 20) Yehovha a nga hakelanga xitizrulo akuva a hetisisa wululami byake ntsena. Kambe a xi hakele hi kola ka lizrandzru ledzri a nga na dzrone ha hine. Yehovha a kombise lizrandzru dzrake ha hine, hi ku nyikela ntxhumu lowu a wu hlawulekile ngopfu swinene kwake, ku nga Yesu. Yehovha a pfumelele kuva n’wanake a hlupheka a tlhela a fa hi nkonta yezru.

11. Hi dondzra yini ka Yeremiya 31:3?

¹¹ Hi lani hi swi voniki ha kone, Yehovha a nga hi zrandzri swi gamela mbilwini ntsena, kambe a kombisa lizrandzru dzrake hi ndlela leyikulu. (Dondzra Yeremiya 31:3.) Yehovha a hi kokele kwake hikusa awa hi zrandzra. (Dzringanisa na Deuteronoma 7:7, 8.) A ku na mhunu ni ntxhumu lexi nga hi hambanisaka ni lizrandzru ledzro. (Rom. 8:38, 39) Xana lizrandzru ledzro dzri yentxa leswaku wene u titwa hi ndlela yini? Dondzra Amapsalma 23, nakone vona ndlela leyi Davhida a titwiki a yone hi lizrandzru dzra Yehovha ni ndlela leyi dzri nga ku yentxaka u titwa ha yone.

 XANA LIZRANDZRU DZRA YEHOVHA DZRI KU YENTXA U TITWA HI NDELA YINI?

12. U nga yi katsrakanya hi ndlela yini ndzrima 23 ya Amapsalma?

¹² Dondzra Amapsalma 23:1-6. Amapsalma 23 i lisimu ledzri kombisaka ku dumba lizrandzru ni ku zron’weka ka Yehovha. Davhida mutsrali wa psalma ledzri a tlhamuxela wuxaka byikulu lebyi a byi li kone makazri kwake ni Mubyisi wake, Yehovha. Davhida a a titwa a sizrelelekile loko a tsrhika Yehovha a mu kongomisa, nakone a a mu dumba hi ku helela. Davhida a a swi tiva leswaku Yehovha a a ta mu komba lizrandzru masiku hinkwawu. I yini lexi mu yentxiki a tiyiseka hi ku helela?

13. Ha yini Davhida a a tiyiseka leswaku Yehovha a a mu hlayisa?

¹³ “A ndzri pfumali ntxhumu”. Davhida a a titwa a hlayisekile hikusa minkama hinkwayu Yehovha a a mu nyika leswi a swi vilelaka. Nakone, Davhida a a swi tiva leswaku Yehovha i munghanu wake ni leswaku awa mu yamukela. Hi leswo swi mu yentxiki a tiyiseka leswaku ku nge na mhaka leswi a swi ta mu humelela a nkameni lowu taka, Yehovha a a ta tama a mu hlayisa a tlhela a mu nyika hinkwswu leswi a a ta swivilela. Leswi Davhida a a tiyiseka leswaku Yehovha awa mu zrandzra nakone awa mu hlayisa, swi mu pfune kuva a nga vileli ha ntxhumu kambe minkama hinkwayu a nyonxa a tlhela a yaneliseka.—Amaps. 16:11.

14. Xana Yehovha a nga hi hlayisa hi lizrandzru hi ndlela yini?

¹⁴ Yehovha awa hi hlayisa hi lizrandzru, ngopfungopfu loko hi humeleliwa hi swa ku biha a wuton’wini. Claire, a lweyi a tizriki Betele ku tlula 20 wa malembe, a titwe na a hele ntamu loko ndangu wake wu kumana ni swikazratu hi ku landzrelelana kambe a nga swi koti ku wu pfuna. Papayi wake a ve ni acidente vascular cerebral,  mun’we ka vamakwavu vake va xisati a susiwe bandleni nakone ndangu wake wu ve ni swikazratu swa timali wu tlhela wu luza muti. Xana Yehovha a va hlayise hi lizrandzru hi ndlela yini? Claire a li: “Yehovha a nyike ndangu wezru leswi a wu swi vilela siku dzrin’wana ni dzrin’nwa. Makhambi manyingi Yehovha a talisa ku hi nyika ku tlula leswi a hi swi vilela! Makhambi manyingi ni talisa ku yanakanya hi minkama leyi Yehovha a ni kombisiki lizrandzru nakone ni yi nyika lisima minkama leyo. Ku dzrimuka leswo, swi ni pfune kuva ni ya mahlweni ni tizrela Yehovha hi nkama wa swikazratu.”

15. Ha yini Davhida a titwe na a tiyisiwile? (Tlhela u vona mufoto.)

¹⁵ ‘A hanyisa hika dzranga’. Minkama yin’wana Davhida a a hela ntamu hikola ka swikazratu ni mindzrigo leyi a a kumana na yone. (Amaps. 18:4-6) Xileswo, a lizrandzru ni ku hlayisiwa hi Yehovha swi hanyise hika dzrake. Yehovha a kongomise munghanu wake lweyi a a kazralile a ‘wudelweni lebya lihlaza’ ni ‘matini laya ku zrula’. Leswo swi yentxe leswaku Davhida a kuma ntamu a tlhela a ya mahlweni a tizrela Yehovha hi ku nyonxa.—Amaps. 18:28-32.

16. Lizrandzru dzra Yehovha dzri hanyise hika dzraku hi ndlela yini?

¹⁶ Hi ndlela leyi fanaka, ni namunhla i ‘lizrezre la Yehovha loli yentxiki leswaku hi nga suvi’ loko hi kumana ni mindzringu ni swikazratu swa wutomi. (Aŝid. 3:22; Kol. 1:11) Vona xikombiso xa Rakel. A titwe na a heli ntamu loko nuna wake a mu siyile hi nkama wa ntungu wa COVID-19. Xana Yehovha a mu yentxele yini? Yene a li: “Yehovha a yentxe leswaku ni titwa na ni zrandzriwa. A ni nyike vhanganu lava a va heta nkama wa ku leha na mine, a va ni buyisela swakuda, va ni zrumelela ma mensaji ni tindzrimana leti a ti ni txhavelela, a va n’wayitela nakone a va tsrhamela ku ni dzrimuxa leswaku Yehovha awa zron’weka ha mine. Ni mu tlangela hi ku hindzrahindzra Yehovha hi leswi a ni nyikiki ndangu lowukulu lowu nga ni lizrandzru”.

17. Ha yini Davhida a a nga txhavi ‘khombo ni dzrin’we’?

¹⁷ ‘A ndzri na ku txhava khombo ni dzrin’we, hikusa u na mine’. Minkama yinyingi wutomi bya Davhida a byi li nghozini, nakone yene a a ni valala vanyingi va ntamu. Nambitasu, a lizrandzru dzra Yehovha dzri yentxe leswaku a titwa a sizrelelekile. Davhida a a titwa na a li kusuhi na Yehovha ka swiyimu hinkwaswu, nakone leswo swi mu zrulisile. Xileswo a kote ku yimbelela a ku: ‘[Yehovha] a ndzri huluxile a ku txhaveni kwanga hinkwaku’. (Amaps. 34:4) A ku txhava ka Davhida a ku li ka hakakunene, kambe a lizrandzru dzra Yehovha a dzri li dzrikulu swinene ku tlula ku txhava kwake.

18. Xana ku tiyiseka hi lizrandzru dzra Yehovha swi nga ku tiyisa hi ndlela yini loko u txhava?

¹⁸ Ku tiva leswaku Yehovha awa hi zrandzra swi  hi nyika ntamu hi ndlela yini loko hi li ka swiyimu leswi txhavisaka? Phayona dzra kukazri ledzri vitaniwaka Susi, dzri tlhamuxela ndlela leyi dzrone ni nuna wa dzrone va titwiki ha yone loko n’wanavu a tisungile. Yene a li: “Loko u humeleliwa hi swa ku biha a wuton’wini byaku, swi ku khumba hi ku helela nakone swi ku yentxa u txhava ku va ku humelela swin’wana swa ku fana ni leswo. Kambe a lizrandzru dzra Yehovha dzri hi yentxe hi titwa na hi sizrelelekile.” Rakel, lweyi hi vulavuliki hi yene, loko a dzrimuka a li: “Ka wusiku bya kukazri na mbilu yanga yi tlhavekile hi ku vaviseka nakone na ni kazratekile ni tlhela ni txhava, ni khongote ka Yehovha hi zrito dzra le henhla na ni dzrila. Hi nkama wolowo, ni twe Yehovha na a miyeta mbilu yanga nakone a ni zrulisa, swanga hi mamana lweyi a miyetaka xibebetana, na mine ni kote ku yetlela. A ni nge wu dzrivali nkama lowo.” Nkulu wa bandla lweyi a vitaniwaka Tasos a hete mune wa malembe djele hi ku va a yale ku ya wusotxheni. Yehovha a mu kombise lizrandzru ni ku mu hlayisa hi ndlela yini? Yene a li: “Yehovha a ni nyike hinkwaswu leswi a ni swi vilela nambi ku tlula leswi a ni swi laviselile. Leswo swi tiyise ku dumba kwanga ka leswaku ni nga mu dumba hi ku helela. Handle ka leswo, hi ku tizrisa moya wa ku xwenga, Yehovha a ni nyike ku nyonxa nambileswi a ni li ka xiyimu xa ku kazrata. Leswo, swi ni pfune ku vona leswaku loko ni ya ni mu dumba Yehovha ni ta ya ni dzri vona lizrandzru dzrake ha mine. Xileswo, ni sungule ku mu tizra swanga phayona dzra nkama hinkwawu na ni le djele”.

TSRHINDZREKELA KA XIKWEMBU NKULUKUMBA WAKU WA LIZRANDZRU

19. (a) Ku tiva leswaku Xikwembu Nkulukumba awa hi zrandzra swi nga khumba leswi hi swi hlayaka hi ndlela yini? (b) He wini nthlamuxelo wa lizrandzru dzra Yehovha lowu wu ku khumbaka hi ku kongoma? (Vona bokisi ledzri liki “ Mazritu Lama Hi Pfunaka Ku Vona Lizrandzru Ledzrikulu Dzra Yehovha.”)

¹⁹ Mimfambu leyi hi vulavuliki ha yone yi kombisa leswaku, Yehovha i “Xikwembu Nkulukumba wa lizrandzru”! (2 Kor. 13:11) Yene a zron’weka ha hine hi ku kongoma. Ha tiyiseka leswaku ha ‘tsrandzreliwa makazri hi lizrezre.’ (Amaps. 32:10) Loko hi yanakanyisisa hi ndlela leyi Yehovha a hi zrandzraka ha yone, a ya a va wa ha kakunene kwezru nakone hi titwa hi li kusuhi na yene. Hi nga tsrhindzrekela kwake hi xikhongoto na hi nga txhavi txhumu hi tlhela hi mu byela hi ndlela leyi hi dzri vilelaka ha yone lizrandzru dzrake. Hi nga mu byela hinkwaswu leswi swi hi kazrataka, na hi tiyiseka leswaku a ta hi pfuna.—Amaps. 145:18, 19.

20. Xana lizrandzru dzra Yehovha dzri hi tsrhidzretela kwake hi ndlela yini?

²⁰ Ku fana ni leswi a ndzrilo wu hi kufumetaka hi siku dzra xizrami, a lizrandzru dzra Yehovha na dzrone dzra hi kufumeta. A lidzrandzru dzra Yehovha dzri ni ntamu swinene. Xileswo, yamukela lizrandzru dzra ku kufumela dzra Yehovha a wuton’wini byaku. Ingiki hinkwezru hi nga tlangela lizrandzru dzrake hi ku hlaya mazrito lawa: ‘Ndzri zrandzra Yehovha’!—Amaps. 116:1.