1-2. He swini swikazratu leswi malandzra ya ku dumbeka ya Yehovha ma nga ha lavisanaka na swone?

 LOKO hi humeleliwa hi swa ku biha, a wutomi byezru byi nga txintxa swa kola ni kola. Hi xikombiso, Makwezru wa ku dumbeka lweyi a vitaniwaka Luis, a a kumane ni mavabyi ya kankru lawa a ma nga tolovelekanga. Dotori a mu byele leswaku a a ta fa ndzreni ka tihwetinyana. Monika kun’we ni nuna wake a va khomekile hi ku tizrela Yehovha xikan’we. Kambe siku dzrin’wana, Monika a gungule leswaku nuna wake lweyi a a li nkulu wa bandla, a a tizrela Yehovha nakasi hi hala tlhelo a a ni mahanyelo ya ku biha ku dzringana malembe manyingi. Olivia, makwezru lweyi a kalaka a nga txhatanga, swi sindzrise kuva a zruzra hikusa a ku buya xidzedze lexikulo a mugangeni wake. Loko a tlhela, a ye kuma leswaku xidzedze xi hohlote yindlu yake. Hi nkamanyana wutomi bya Luis, Monika na Olivia byi txintxile. Xana wa tiyanakanya na u li ka swiyimu leswi va khalutiki ka swone? Xana ku ni leswi swi samiki swi ku yentxekela leswi txintxiki wutomi byaku swa kola ni kola?

² Nambileswi hi nga malandzra ya ku dumbeka ya Yehovha, hi kumana ni swikazratu ni mavabyi ku fana ni vhanu hinkwavu. Handle ka leswo, swi nga ha sindzrisa kuva hi tiyiselela ku kanetiwa kumbe tinxanisa ta lava nyenyaka vhanu va Xikwembu Nkulukumba. Nambileswi Yehovha a kalaka a nga siveli kuva hi humeleliwa hi swikazratu, yene a dumbisa ku hi pfuna. (Eza. 41:10) Hi mpfunu wake, hi nga swi kota ku tama hi va lava nyonxiki, ku teka swiboho leswinene ni ku tama hi dumbeka kwake nambiloko hi kumana ni swikazratu. Ka xidondzro lexi hi ta vona mune wa tindlela leti Yehovha a ti tizrisaka akuva a hi pfuna loko hi li ka swiyimu swa ku kazrata a wuton’wini byezru. Nakone hi ta kambisisa  leswi hi fanelaka ku swi yentxa akuva hi buyeliwa hi mpfunu lowu Yehovha a hi nyikaka wone.

YEHOVHA A TA KU BEKISA

3. Loko hi lavisana ni swiyimu swa ku kazrata, i yini leswi swi nga hi kazratelaka ku swi yentxa?

³ Xikazratu. Loko hi kumana ni swikazratu, swi nga hi kazratela ku pimisa hi ndlela leyinene kumbe ku teka swiboho leswinene. Ha yini? Hikusa hi nga ha twa ku vavisa kukulu a mbilwini. Hi nga ha titwa na hi tshikelelekile miyanakanwini hi ku hlatiyela, hi nga swi tivi leswaku hi ta yentxa yini. Vona ndlela leyi vamakwezru vabidzri va xisati lava hi khaneliki a vone va titwiki ha yone ka swikazratu leswi va lavisaniki na swone. Olivia a li: “Ntsrhaku ka loko xidzedze xi hohlote yindlu yanga, ni titwi na ni li nkangala ni pfumala xa ku xi yentxa.” Loko Monika a vulavula hi leswi nuna wake a mu yentxeliki a te: “Ni titwe na ni kanganyisiwile, a swi fana ni loko ni tlhaviwe mbilu, a swi patsra ni ku ni kazratela ku hamba mintizro ya siku ni siku. A ni nga swi yanakanyi leswaku swi nga ni yentxekela.” Xana Yehovha a hi dumbisa ku hi pfuna hi ndlela yini loko hi li ni swikazratu?

4. Hi ku ya hi Vafilipiya 4:6, 7, I yini leswi Yehovha a hi dumbisaka swone?

⁴ Leswi Yehovha a swi yentxaka. A dumbisa ku hi nyika leswi Bibele dzri swi vitanaka “ku zrula ka Xikwembu Nkulukumba”. (Dondzra Vafilipiya 4:6, 7) Ku zrula loku, ku hlayiwa ku zrula ka miyanakanyu ni ka le mbilwini loku tisiwaka hi ku va ni wuxaka bya le kusuhi na Yehovha. Ku zrula loku ku “tlula ku twisisa hinkwaku”. Matitwela lawa ya ku zrula ma tlula mayanakanyela yezru. Hi xikombiso, xana u sama u khongota hi ku hiseka ka Yehovha, ntsrhaku ka leswo u hlamala hi ku zrula loku u viki na kone? Matitwela lawa i “ku zrula ka Xikwembu Nkulukumba”.

5. Xana ku zrula ka Xikwembu Nkulukumba ku bekisa miyanakanyu yezru hi ndlela yini?

⁵ A ndzrimana yoleyi ya yin’we yi hlaya leswaku a ku zrula ka Xikwembu Nkulukumba ku ta “bekisa” kumbe ku sizrelela “timbilu tenu ni miyanakanyu yenu”. A zritu ledzri liki “ku bekisa” dzri tizrisiwe loko ku khaneliwa hi masotxha lawa a ma bekisa doropa ni ku dzri sizrelela ka minhlaselo. Lava a va tsrhama ka doropa dzroledzro a va yetlela hi ku zrula hikusa a va sizrelelekile hi ku tiva leswaku a masotxha a ma yime swipfalwini ma zrindzra. Hi ndlela leyi fanaka, ku zrula ka Xikwembu Nkulukumba ku bekisa mbilu yezru ni miyanakanyu yezru, leswo swi hi yentxa hi va ni ku zrula hikusa ha swi tiva leswaku hi sizrelelekile. (Amaps. 4:8) Ku fana na Ana, nambiloko swiyimu swezru swi nga txintxi hi nkama wolowo, hi nga va ni ku zrula ka kukazri. (1 Sam. 1:16-18) Nakone minkama yinyingi, loko hi titwa hi zrulile, hi xiya leswaku swa nabyala ku yanakanya hi ndlela leyinene ni ku teka swiboho.

6. Hi nga yentxa yini akuva hi pfuneka hi ku zrula ka Xikwembu Nkulukumba? (Tlhela u vona mufoto.)

 ⁶ Leswi hi fanelaka ku swi yentxa. Loko u kazratekile, vitana ‘mubekisi’. Hi ndlela yini? Khongota swi phela lakakuva u kuma ku zrula ka Xikwembu Nkulukumba. (Luk. 11:9; 1 Tes. 5:17) Luis lweyi hi khaneliki ha yene ku sunguleni, a tlhamuxela ndlela leyi yene kun’we ni nkatake Ana, va lavisaniki ha yone ni xiyimu lexi a va li ka xone loko a byeliwe leswaku nuna wake a o to hanya tihwetinyana ntsena. A li: “Ka xiyimu xa ku fana ni lexi, swa kazrata ku teka xiboho mayelanu ni lihanyu ni swin’wana. Kambe hi kota ku va ni ku zrula ntsena hi leswi hi khongotaka.” Luis ni nkatake va hlaye leswaku, va khongote swi phela makhambi ya ku phindhaphindha va kombela leswaku Yehovha a va nyika ku zrula kwake, ku zrula ka le mbilwini ni wutlhazri akuva va kota ku teka swiboho leswinene ni ku vona ndlela leyi a a va pfuna ha yone. Loko u lavisana ni swikazratu, phikelela a ku khongoteni, xileswo u ta kuma ku zrula ka Yehovha nkama lowu ku bekisaka mbilu ni miyanakanyu yaku.—Rom. 12:12.

YEHOVHA A TA KU TIYISA

7. Xana hi nga titwisa kuyini loko hi lavisana ni swiyimu swa ku kazrata?

⁷ Xikazratu. Loko hi lavisana ni swiyimu swa ku kazrata, swi nga hi kazratela ku va ni matitwela, mayanakanyela ni mayangulela lawa hi ma toloveliki. Ku fana ni boti ledzri yingayingisiwaka hi mavimbi ya lwandle, na hine matitwela yezru ma nga ha txintxatxintxa. Ana, a tlhamuxela ndlela leyi a titwiki ha yone ntsrhaku ka loko Luis a file. Yene a li: “Loko ni sungula ku titwa wuswanga a ni pfa ni titsretsra ni tlhela ni hlatiyela. A ni vaviseka swinene hi leswi a fiki.” Handle ka leswo, Ana a a titwa wuswake nakone na a kazratekile hi leswi a a ta yentxa mintxhumu leyi a yi yentxiwa hi nuna wake. Minkama yin’wana, a a titwa na a li lwandle hi siku dzra xidzedze. Xana Yehovha a hi pfunisa kuyini loko hi sungula ku va ni matitwela lawa?

8. Hi lani swi kombisiwaka ha kone ka 1 Petro 5:10, Yehovha a hi tiyisekisa yini?

⁸ Leswi Yehovha a swi yentxaka. Yene a dumbisa leswaku a ta hi tiyisa. (Dondzra 1 Petro 5:10) Loko ku sungula xidzedze na boti dzri li lwandle, dzri nga ha sungula ku yingayinga dzri ya hala ni hala hi ndlela ya ku txhavisa. Akuva boti dzri tiya, ku tizrisiwa swihupa leswi bekiwaka ka matlhelo hinkwawu ya boti. Swihupa leswo swi nga yentxa leswaku a boti dzri nga yingayingi, hi ndlela leyo lava nga ka boti va nga titwa na va sizrelelekile va tlhela va titwa ha hombe ka liyendzro dzravu. Kutani, switizro swinyingi leswi tizriseliwaka ku tiyisa boti swi tizra ha hombe loko boti dzri li ku fambeni. Hi ndlela leyi fanaka, Yehovha awa hi tiyisa loko hi tama hi dumbeka ka swiyimu swa ku kazrata.

9. Xana switizro swezru swa ku hamba wusetxhi swi nga hi pfuna hi ndlela yini ku tama hi tiya? (Tlhela u vona mufoto.)

⁹ Leswi hi fanelaka ku swi yentxa. Loko u tsikelelekile  hi kola ka swikazratu, yentxa hinkwaswu leswi u nga swi kotaka akuva u tama u khongota, u va kone mintlhanganwini ni le ku zrezreni. I ntiyiso leswaku a wu nga ti kota ku yentxa mintxhumu yinyingi ku fana ni khale, kambe dzrimuka leswaku Yehovha a nga yimelanga kuva hi yentxa swa ku tlula leswi hi nga swi kotaka. (Dzringanisa na Luka 21:1-4.) Ka xiyimiso xaku xa moya, tinyike nkama wa ku hamba dondzro ya ximhunu ni ku yanakanyisisa. Ha yini? Hi ku tizrisa nhlengeletanu yake, Yehovha a hi nyika madzrungula lamanene ya Bibele lama nga hi pfunaka ku tama hi tiya. Akuva u kuma leswi u swi vilelaka u nga tizrisa switizro swa ku hamba wusetxhi hi lidzrimi dzraku, swa ku fana ni Biblioteca dzra JW Library^®, Índice das Publicações da Torre de Vigía ni Nkongomiso Wa Ku Hamba Wusetxhi Wa Timboni Ta Yehovha. Monika lweyi hi khaneliki ha yene, a hlaye leswaku a tsrutsrumele switizro swa ku hamba wusetxhi akuva a kuma switsratsriyo nkama lowu a kumaniki ni swikazratu ka matitwela yake. Hi xikombiso, a hambe wusetxhi hi zritu “mahlundzru”. Ka nkama wun’wana a tlhele a hamba wusetxhi mayelanu ni “wumbuye” kumbe “ku dumbeka.” Ntsrhaku ka leswo, a a dondzra ku ko a titwa ha hombe. Yene a hlaye leswi: “Nkama lowu na ni hamba wusetxhi, a ni titwa na ni hlatiyelile. Kambe nkama lowu a ni ya ni dondzra, a ni titwa na ni xingazriwa hi Yehovha. Loko ni ya ni dondzra, a ni xiya leswaku Yehovha a twisisa matitwela yanga hinkwawu nakone a a ni pfuna.” Mpfunu lowu wa Yehovha wu nga yentxa leswaku na hine hi tama hi tiya ku ya tlhasela loko hi titwa na hi zrulile.— Amaps. 119:143, 144.

YEHOVHA A TA KU SEKETELA

10. Xana hi nga titwisa kuyini ntsrhaku ka loko hi lavisane ni xiyimu xa ku kazrata?

¹⁰ Xikazratu. Loko hi humeleliwa hi swa ku kazrata, hi nga ha titwa na hi heli ntamu hi tlhelo dzra nyana ni dzra matitwela ku dzringana masiku ya kukazri. Hi nga ha titwa ku fana ni mutsrutsrumi, lweyi a ku sunguleni a a tsrutsruma ngopfu kambe swoswi a khutaka. Swi nga ha hi kazratela ku yentxa mintizro leyi a ku sunguleni a yi hi nabyalela ku yi yentxa. Kumbe u nge na ku navela ka ku yentxa mintxhumu leyi a yi ku nyonxisa khale. Ku fana na Eliya, swi nga ha hi kazratela ku sekeleka, ho djula ku yetlela ntsena. (1 Tih. 19:5-7) Xana Yehovha a dumbisa ku hi yentxela yini loko hi titwa na hi heli ntamu?

11. He yini ndlela yin’wana leyi Yehovha a hi pfunaka ha yone? (Amapsalma 94:18)

¹¹ Leswi Yehovha a swi yentxaka. Yene a dumbisa leswaku a ta hi seketela. (Dondzra Amapsalma 94:18.) Swanga hi leswi mutsrutsrumi lweyi a tivavisiki a djulaka mpfunu akuva a kota  ku famba, na hine hi djula mpfunu wa Yehovha akuva hi tama hi mu tizrela hi nkhinkhi. Ka swiyimu leswo, Yehovha a hi dumbisaka leswi: ‘Hikusa, mine Yehovha, ndzri Xikwembu Nkulukumba waku lwa tiyisaka voko dzraku dzra xinene, lwa ku byelaka leswaku: U nga txhavi, ndzri ta ku pfuna.’ (Eza. 41:13) Hosi Davidha a wu vonile mpfunu lowo. Loko a lwisana ni swikazratu ni valala, yene a byele leswi Yehovha: ‘A voko dzraku dzra xinene dzri ndzri tiyisile.’ (Amaps. 18:35) Kambe xana Yehovha a hi seketela hi ndlela yini?

12. I vamani lava Yehovha a nga va tizrisaka kuva va hi pfuna loko hi hele ntamu?

¹² Hakanyingi Yehovha a tizrisa vhanu van’wana akuva va hi pfuna. Hi xikombiso, loko Davhida a titwa na a hele ntamu, kuve munghanu wake Yonathani lweyi a mu yendzreliki akuva a mu txhavelela ni ku mu tiyisa. (1 Sam. 23:16, 17) Hi ndlela leyi fanaka, Yehovha a tizrise Elixa akuva a pfuna Eliya. (1 Tih. 19:16, 21; 2 Tih. 2:2) Namunhla, Yehovha a nga ha tizrisa maxaka, vanghanu kumbe vakulu va bandla akuva va hi tiyisa. Nambitanu, loko hi lavisana ni swiyimu swa ku kazrata, hi zrandzra ku tsrhama wuswezru. Nambi ku khanela ni mhunu a hi swi nyonxeli. Matitwela lawa i ya ntumbuluku. Hi nga wu yamukelisa kuyini mpfunu wa Yehovha?

13. I yini leswi hi fanelaka ku swi yentxa akuva hi pfuneka hi nseketelo wa Yehovha? (Tlela u vona mufoto.)

¹³ Leswi hi fanelaka ku swi yentxa. Zama ku tipatsra ni vambeni, u nga tsrhami wuswaku. Loko hi tsrhama wuswezru, hi nga ha sungula ku yanakanya hi swikazratu leswi hi kumanaka na swone, nakone ku tsrhamela ku yanakanya hi leswo swi nga ha yentxa leswaku hi teka swiboho leswi hoxiki. (Amapr. 18:1) I ntiyiso leswaku hinkwezru ku ni nkama lowu hi djulaka ku tsrhama wuswezru ngopfungopfu loko hi li ka xiyimu xa ku kazratu. Nambitasu, loko hi tolovela ku tsrhama wuswezru hi ta kumeka kule ni vhanu, vhanu lava Yehovha a va tizrisaka leswaku va hi seketela. Kutani nambiloko minkama yin’wana swi kazrata ku yentxa leswo, pfumela ku pfuniwa hi maxaka yaku, vanghanu vaku ni vakulu va bandla. Va vone na va li ndlela leyi Yehovha a yi tizrisaka leswaku a ku pfuna.—Amapr. 17:17; Eza. 32:1, 2.

YEHOVHA A TA KU TXHAVELELA

14. Xana he swini swiyimu leswi nga ha hi yentxaka hi txhava?

¹⁴ Xikazratu. Minkama yin’wana hi nga ha lavisana ni swiyimu leswi hi yentxaka hi txhava. A Bibele dzri khanela hi malandzra ya Xikwembu Nkulukumba ya le nkameni wa khale, lama txhaviki hi kola ka valala ni swikazratu swin’wana. (Amaps. 18:4; 55:1, 5) Hi ndlela leyi fanaka,  na hine hi nga ha lavisana ni nkaneto a xikole, a ntizrweni, a ndangwini ni nkaneto lowu pfaka ka wuhosi. Nakone swi nga yentxeka mhunu a txhava ku fa hi kola ka mavabyi ya kukazri a nga na wone. Ka swiyimu swa ku fana ni leswo, hi nga ha titwa na hi nge na ntamu wa ku tisizrelela ku fana ni xin’wanana. Kutani Yehovha a hi pfunisa kuyini ka swiyimu swa ku fana ni leswi?

15. Hi ku ya hi Amapsalma 94:19, i yini leswi Yehovha a hi tiyisekisaka swone?

¹⁵ Leswi Yehovha a swi yentxaka. Yehovha awa hi txhavelela ni ku hi zrulisa. (Dondzra Amapsalma 94:19.) Ndzrimana leyi ya amapsalma yi nga hi yentxa hi yanakanya hi xin’wanana lexi txhavaka ku yetlela hi mhaka ya ku dzruma ka tilo ni ku hatima. Yanakanya na papayi wa xone a xi yela lomu xi yentleliki kone, a xi xingazra xi za xi yetlela. Nambileswi xa ha tamaka xi yingela ku dzruma ka tilo, papayi wa xone awa xi txhavelela ni ku xi zrulisa. Loko hi kumana ni swiyimu leswi txhavisaka, hi vilela mpfunu wa papayi wezru wa le matilweni, Yehovha, akuva a hi xingazra hi ndlela ya ku fanekisela ku ya tlhasela loko hi titwa na hi zrulile. Kambe hi nga wu kumisa kuyini ntxhavelelo wa Yehovha?

16. I yini leswi hi fanelaka ku swi yentxa akuva hi pfuneka hi ntxhavelelo wa Yehovha? (Tlhela u vona mufoto.)

¹⁶ Leswi hi fanelaka ku swi yentxa. Minkama hinkwayu bulisana na Yehovha hi xikhongoto ni hi ku dondzra Zritu dzrake. (Amaps. 77:1, 12-14) Loko u tolovela ku yentxa leswo, swi ta ku nabyalela ku tsrutsrumela papayi waku wa le tilweni loko u kumana ni xikazratu. Byela Yehovha mintxhavu yaku ni swikazratu swaku. Ntsrhaku ka leswo, yingiseta leswi Yehovha a taka ku byela swone hi ku dondzra Bibele. Hi ndlela leyo u ta vona ntxhavelelo wa Yehovha. (Amaps. 119:28) Ku dondzra mabuku ya kukazri ya Bibele swi nga ku pfuna hi ku kongoma loko u titwa na u txhava. Hi xikombiso, u nga kuma ntxhavelelo ka buku dzra Yobe, Amapsalma, Amaproverbia ni ka mazritu ya Yesu lama kumekaka ka buku dzra Matewu ndzima 6. Nakunene loko u khongota ka Yehovha u tlhela u dondzra Zritu dzrake swi nga ku yentxa u titwa na u txhavelelekile.

17. I yini leswi hi nga tiyisekaka ha swone?

¹⁷ Hi nga tiyiseka leswaku Yehovha a lulamele ku hi pfuna ka swiyimu swa ku kazrata leswi hi nga ha lavisaka na swone a wuton’wini byezru. A hi nge te txhuka hi va wuswezru. (Amaps. 23:4; 94:14) Yehovha a dumbisa ku hi bekisa, ku hi tiyisa, ku hi seketela ni ku hi txhavelela. Ezaya 26:3 yi hi tiyisekisa leswi mayelanu na Yehovha: ‘Ku lwe wa mbilu ya ku tiya, ku mu bekisa a ku zruleni, ni ku zruleni, hikuva a tidumbele wene.’ Xileswo, Dumba Yehovha nakone londzrovota hinkwaswu leswi a swi yentxaka akuva a ku pfuna, loko u yentxa leswo u ta swi kota ku tama u tiya nambiloko u kumana ni swiyimu swa ku kazrata.