Xana A Wu Swi Tiva?
Ha yini ka masotxha ya hosi Davhida a ku ni vhanu va matiko mambeni?
VAN’WE va lava a va li va matiko mambeni lava a va hamba xiyenge xa masotxha ya Davhida, a ku li Tseleki wa Muamoni, Uriya wa Muheti na Yitma wa Mumowabu. a (1 Makr. 11:39, 41, 46) Ka masotxha ya Davhida a ku ni ‘Vakereti, Vapeleti ni Vagiti’. (2 Sam. 15:18) Swi tikomba na Vakereti ni Vapeleti a va lumba lixaka dzra Vafilista. (Ezek. 25:16) Kasi a Vageti a va huma ka doropa dzra Vafilista dzra Gati.—Yehoš. 13:2, 3; 1 Sam. 6:17, 18.
Kutani, ha yini Davhida a pfumelele kuva vavanuna lava va hamba xiyenge xa masotxha yake? Hi leswaku a a tiyiseka leswaku vavanuna lava a va dumbeka kwake, nakone a xa lisima ku tlula leswo hi leswaku a va dumbeka ka Yehovha. Hi xikombiso, a dicionário dzra kukazri dzra Bibele loko dzri vulavula hi Vakereti ni Vapeleti dzri li: “Vone va tame va dumbeka ka Davhida nambiloko va kumana ni swiyimu swa ku kazrata a ku fumeni kwake.” Va swi kombise hi ndlela yini leswaku a va dumbeka? Loko ‘vhanu va ka Israyele hinkwavu’ va tsrike ku landzrela Davhida, kambe va landzrela ‘mhunu lwe wa ku biha, a vito dzrake afaka e Xeba’, a Vakereti ni Vapeleti va tame va yima na Davhida nakone va mu pfune ku helisa wupfukeli lebyo bya Xeba. (2 Sam. 20:1, 2, 7) Ka khambi dzrin’wana, mun’we ka vana va Davhida, Aduniya, a zame ku tihamba hosi a mbangwini wa Solomoni. Kambe Vakereti ni Vapeleti va tame va dumbeka ka Davhida nakone va pfune Solomoni akuva a va hosi, hikusa hi yene lweyi nakunene Yehovha a a mu hlawulile.—1 Tih. 1:24-27, 38, 39.
Wanuna mun’wana lweyi a a nga li Muisrayele kambe a a dumbeka ka Davhida i Itayi, wa Mugiti. Itayi ni 600 wa vavanuna lava a va na yene, va seketele hosi Davhida nkama lowu n’wanake Absolomu a mu pfukeliki nakone a hlohloteliki tiko hinkwadzru dzra Israyele akuva dzri yentxa leswi fanaka. A ku sunguleni Davhida a byele Itayi leswaku leswi a a nga li Muisrayele a swi nga vileli leswaku a tipatsra ku lweni. Kambe Itayi a te: ‘Yehovha awa hanya, ni hosi, n’winyi wanga, awa hanya, hakunene lomu a hosi, n’winyi wanga a taka va kone, nambi ku li a ku feni, nambi ku li a ku hanyeni, a nandzra waku a tava kone na yene.’—2 Sam. 15:6, 18-21.
Itayi a a dumbekile ka Davhida, hosi leyi hlawuliwiki ha Yehovha
Nambileswi a Vakereti, Vapeleti ni Vageti a va li va matiko mambeni, a va swi tiva leswaku Yehovha i Xikwembu Nkulukumba wa ntiyiso ni leswaku Davhida a hlawuliwe hi Yehovha. Nakunene Davhida a a tlangela hi leswi a a ni vavanuna va ku dumbeka va ku fana ni lava kusuhi na yene.
a Hi ku ya hi nawu lowu Yehovha a wu nyikiki Vaisrayele, lowu nga ka Deuteronoma 23:3-6, Vaamoni ni Vamowabu a va nga pfumeleliwi ku nghena a nhlengeletanwini ya Israyele. Kambe, swi tikomba na nawu lowo a wu tsimbisa ntsena ku va tinxaka leti ti kuma mfanelo ya ku lumba a tiko dzra Israyele, kambe a wu nga tsimbisi leswaku vhanu va matiko mambeni va tipatsra ni vhanu va Xikwembu Nkulukumba va hanya na vone. Vona “Amonitas” ka Estudo Perspicaz Das Escrituras vol-1, tluka 111.
