1. Xana vazrezri van’wana va titwisa kuyini hi ku zrezrela vhanu? (Tlhela u vona mufoto.)

 SWANGA vhanu va Yehovha, hi zrezrela van’wana hikusa ha mu zrandzra Papayi wezru wa le matilweni nakone hi djula ku pfuna vhanu leswaku va mu tiva. Vazrezri vanyingi va wu zrandzra ngopfu ntizro wa ku zrezra, kambe vazrezri van’wana swa va kazratela ku kuma ku nyonxa a ntizrweni wa ku zrezra. Ha yini? Swi nga yentxeka van’wana va li vhanu va tingana kumbe va titwa va nga na wuswikoti bya ku dondzrisa. Van’wana a va titwi ha hombe ku famba kaya ka vambeni na va nga zrambiwanga, van’wana va txhava kuva va nga yamukeliwi. Van’wana va dondzrisiwe kuva va fambela kule ni mabulu lawa ma nga va yentxaka va holovisaka ni van’wana. Nambileswi va mu zrandzraka ngopfu Yehovha, vamakwezru lava swa va kazratela kuva va zrezrela lava buyaka hi ka mimbangu yin’wana, nambitanu va dzri tiva lisima dzra ntizro wa ku zrezra nakone va patsreka hi xitalu. Handle ka ku ganaganeka va nyonxisa mbilu ya Yehovha!

2. Ha yini u nga fanelanga u hela ntamu loko swi ku kazratela ku kuma ku nyonxa a ntizrweni wa ku zrezra?

² Xana minkama yin’wana swa ku kazratela ku kuma ku nyonxa a ntizrweni wa ku zrezra? Loko leswo swi same swi ku humelela u nga heli ntamu, swi nga yentxeka leswo swi kombisa leswaku wa titsrongahata nakone a wu djuli ku kokela yingiso kwaku. Nakone swi kombisa leswaku a wu djuli ku holova ni mhunu. Handle ka leswo, a nga kone lweyi a djulaka ku yamukeliwa hi ndlela leyi nga liki yinene ngopfungopfu loko a zama ku yentxela ntxhumu lowunene mhunu. U nga tiyiseka leswaku Papayi waku wa le matilweni a swi tiva ha hombe leswaku swa ku kazratela nakone a djula ku ku pfuna ka leswi u swi vilelaka. (Eza. 41:13) Ka xidondzro lexi, hi ta vona ntlhanu wa swidzringanyeto  leswi nga hi pfunaka ku lwa ni matitwela lawo ni ku kuma ku nyonxa loku yengetelekiki a ntizrweni wa ku zrezra.

PFUMELELA ZRITU DZRA XIKWEMBU NKULUKUMBA DZRI KU TIYISA

3. I yini lexi pfuniki Yeremiya ku zrezrela van’wana?

³ Nambi minkameni ya khale, a madzrungula ya Xikwembu Nkulukumba a ma tiyisa malandzra yake loko ma yamukela swiyavelo swa ku kazrata. Vona xikombiso xa muprofeta Yeremiya. Loko Yehovha a mu nyike xiyavelo xa ku zrezra, Yeremiya a sungule ku vilela. Yene a te: ‘A ndzri tivi ku vulavula hikuva ndzri ntsrongwana.’ (Yer. 1:6) I yini lexi pfuniki Yeremiya akuva a va ni xixixi xa ku zrezra? Leswi Yehovha a mu byeliki swone swi mu tiyisile. Yene a te: ‘Ku ni mbilwini yanga leswi fanaka ni ndzrilo lowu hisaka lowu pfaleliwiki a mazrambyini yanga, ndzri kazrale hi ku tikhoma.’ (Yer. 20:8, 9) Nambileswi Yeremiya a a fanela ku zrezrela vhanu lava kalaka va nga yamukeli, a dzrungula ledzri a dzri yamukeliki akuva a dzri zrezra dzri mu nyike xixixi lexi a a xi vilela akuva a hetisisa ntizro lowo.

4. He wani mabindzru ya ku dondzra Bibele ni ku yanakanyisisa hi leswi hi swi dondzraka? (Vakolosa 1:9, 10)

⁴ Ni namunhla mazritu ya Yehovha lama kumekaka Bibeleni ma pfuna vakriste ku kuma ntamu lowu va wu vilelaka. Loko mupostola Pawulo a tsralele bandla dzra le Kolosa a byele vamakwavu leswaku loko va dondzra leswi yengetelekiki mayelanu ni ku zrandzra ka Yehovha, a swi ta va pfuna ku “hanya hi ndlela leyi fanelekaka ka Yehovha” ni ku ‘mu nyonxisa ka ntizro wun’wana ni wun’wana va wu yentxaka’. (Dondzra Vakolosa 1:9, 10.) Ntizro lowunene ku khaneliwaka ha wone, wu patsra ntizro wa ku zrezra. Xileswo, loko hi dondzra Bibele hi tlhela hi yanakanyisisa hi leswi hi swi dondzraka, a lipfumelo dzrezru ka Yehovha dzri ta ya dzri tiya nakone hi ta swi twisisa leswaku ha yini swi li swa lisima ku zrezra madzrungula ya Mfumu.

5. I yini lexi nga hi pfunaka ku susa londzrovoto a ku dondzreni kwezru ka Bibele?

⁵ Akuva u susa londzrovoto ka Zritu dzra Xikwembu Nkulukumba, u nga djahi loko u dondzra ni ku yanakanyisisa. U nga tsrutsrumi nkama lowu u dondzraka. Loko u dondzra dzrungula dzra kukazri ledzri swi ku kazratelaka ku dzri twisisa u nga dzri khaluti. A matsrhan’wini ya leswo, tizrisa Índice das Publicações da Torre de Vigia kumbe Nkongomiso Wa Ku Hamba Wusetxhi Wa Timboni Ta Yehovha akuva u kuma ntlhamuxelo wa dzrungula ledzro. Loko u tinyika nkama wa ku dondzra hi Yehovha u ta  tiyisa ku dumba kwaku ka leswaku leswi Bibele dzri swi hlayaka i ntiyiso. (1 Tes. 5:21) Loko u ya u tiyiseka, u ta ya u nyonxa hi ku yavelana ni van’wana leswi u swi dondzraka.

TILULAMISELI HA HOMBE

6. Ha yini hi fanela ku tilulamisela ha hombe na hi nga si ya ku zrezreni?

⁶ Loko u tilulamisela ha hombe na u nga si ya a ku zrezreni, swi ta ku nabyalela ku bulisana ni vhanu. Yesu a lulamisele vadondzrisiwa vake na va nga si ya ku zrezreni. (Luk. 10:1-11) Vone va yentxe hinkwaswu leswi Yesu a a va dondzrise swone. Xileswo, va nyonxe ngopfu hi hinkwaswu leswi va kotiki ku swi yentxa.—Luk. 10:17.

7. Hi nga tilulamisela hi ndlela yini akuva hi ya ku zrezreni? (Tlhela u vona mufoto.)

⁷ Hi nga tilulamisela hi ndlela yini akuva hi ya ku zrezreni? Hi fanela ku yanakanya hi leswi hi djulaka ku swi hlaya, kutani hi swi hlaya hi ndlela ya ntumbuluku hi ku tizrisa mazritu yezru. Nakone swi nga pfuna ku yanakanyisisa hi tindlela tibidzri kumbe tizrazru leti vhanu va toloveliki ku siva mabulu ha tone ni ndlela leyi hi nga hlamulaka ha yone. Kutani, loko hi bula ni mhunu hi nga zrula, hi b’onyozela ni ku kombisa xinghanu.

8. Ha yini vakriste va fana ni swibya swa vumba leswi Pawulo a khaneliki ha swone?

⁸ Mupostola Pawulo a byele vamakwavu a ku: “Hi ni wukosi lebyi a swibyeni swa vumba.” (2 Kor. 4:7) Kambe he byini wukosi lebyo? I ntizro wa ku zrezra lowu huluxaka wutomi bya vhanu ni ku khanela hi Mfumu wa Xikwembu Nkulukumba. (2 Kor. 4:1) Nakone i yini swibya swa vumba? I malandzra ya Xikwembu Nkulukumba lama zrezraka madzrungula lamanene. A minkameni ya Pawulo a vaxavisi a va tizrisa tihotsro ta vumba akuva va beka mintxhumu ya lisima ya ku fana ni swakuda, vhinyu ni mali. Hi ndlela leyi fanaka, hine hi swibya swa vumba leswi Yehovha a swi tizrisaka akuva hi teka madzrungula lamanene hi ma yisa ka vhanu vambeni. Hi mpfunu wa Yehovha, hi ni ntamu lowu hi wu vilelaka akuva hi zrezra hi ku dumbeka.

KHONGOTA U KOMBELA XIXIXI

9. I yini lexi nga hi pfunaka ku hlula ku txhava vhanu ni ku txhava kuva vhanu va nga yamukeli dzrungula dzrezru? (Tlhela u vona mufoto.)

⁹ Minkama yin’wana hi nga ha txhava vhanu kumbe hi txhava kuva hi nga yamukeliwi. Xana i yini lexi nga hi pfunaka ku lwisana ni xikazratu lexo? Vona xikhongoto lexi vapostola va xi hambiki loko va tsimbisiwa ku tama va zrezra,  a matsrhan’wini ya kuva va hela ntamu, vone va kombele Yehovha leswaku a va pfuna ‘akuva va ya mahlweni va zrezra zritu dzrake na va nga txhavi ntxhumu’. Nakone Yehovha hi ku kahlula a hlamule xikhongoto xavu. (Mint. 4:18, 29, 31) Loko ku txhava vhanu ku ku yentxa u hlatiyela nsin’wini, u fanela ku khongota u kombela mpfunu wa Yehovha. Kombela Yehovha a ku pfuna akuva lizrandzru ledzri u nga na dzrone hi vhanu dzri va dzrikulu ku tlula ku txhava loku u nga na kone.

10. Xana Yehovha a hi pfunisa kuyini akuva hi va Timboni take? (Ezaya 43:10-12)

¹⁰ Yehovha a hi hlawule kuva hi va Timboni take, nakone a dumbisa ku hi pfuna leswaku hi va ni xixixi. (Dondzra Ezaya 43:10-12.) A hi voneni mune wa tindlela leti a hi pfunaka ha tone. Ya ku sungula, Yesu minkama hinkwayu a na hine nkama hi zrezraka madzrungula lamanene. (Mat. 28:18-20) Ya wubidzri, Yehovha a beke tintsrumi akuva ti hi pfuna ka ntizro lowu. (Mpful. 14:6) Ya wuzrazru, Yehovha a hi nyika moya wa ku xwenga akuva wu hi pfuna ku dzrimuka mintxhumu leyi hi yi dondzriki. (Yoh. 14:25, 26) Ya wumune, hi ni mpfunu wa vamakwezru va xinuna ni va xisati a ntizrweni wa ku zrezra. Hi mpfunu wa Yehovha ni wa vamakwezru lava zrandzrekaka hi ni hinkwaswu leswi hi swi vilelaka akuva hi va ni xixixi ni ku tama hi zrezra.

TITWANANISI NI SWIYIMU NAKONE VANA NI LANGUTELO LEDZRINENE

11. Hi nga kuma vhanu lava yengetelekiki hi ndlela yini loko hi li ku zrezreni? (Tlhela u vona mufoto.)

¹¹ Xana wa kazrateka loko u nga kumi mhunu kumbe u kuma vhanu vatsrongo ka nsimu ya muti ni muti? Tivutisi leswi: ‘Xana ka nkama lowu ni tolovelaka ku zrezra ha wone, vhanu va le mugangeni wanga va kumeka kwini?’ (Mint. 16:13) ‘Xana va kumeka a ntizrweni kumbe a bazara?’ Loko swi li hi ndlela leyo, swa koteka ku kuma vhanu ka nsimu ya le switaratwini? Makwezru wa kukazri lweyi a vitaniwaka Joshua a te: “Ni gungule tindlela ta ku zrezra loko ni ya bazara ni loko ni le ka mimbangu leyi pfulekiki.” Yene ni nkatake Bridget va tolovela ku kuma vhanu vanyingi makaya loko va va yela madambyeni kumbe va va yela hi sonto nhlikanhini.—Efe. 5:15, 16.

12. I yini lexi nga hi pfunaka ku tiva leswi mhunu a swi kholwaka ni leswi mu zron’waka?

¹² Loko u vona leswaku mhunu a nga ti swi nyonxela leswi u taka swi hlaya, zama ku  gungula leswi a swi kholwaka ni leswi mu kazrataka. Joshua na Bridget va tizrisa xivutiso lexi kumekaka mahlweni ka xipapelana akuva va sungula mabulu. Hi xikombiso, va tizrisa xipapelana lexi liki: Xana U Dri Vonisa Ku Yini Bibele? Va li: “Vhanu van’wana va yanakanya leswaku Bibele i buku dzra Xikwembu Nkulukumba, kambe va ganaganeka ha swone. Xana he wani mavonela yaku?” Hakanyingi loko hi yentxa leswo hi ta swi kota ku va ni mabulu lamanene.

13. Nambiloko vhanu va nga hi yingiseti, ha yini hi nga hlayaka leswaku ha wu tlhasela nkongometo wezru a ntizrweni wa ku zrezra? (Amaproverbia 27:11)

¹³ Nambiloko vhanu va nga hi yingiseti loko hi va zrezrela, hine ha wu hetisisa nkongometo wezru. Ha yini? Hikusa hi yentxa leswi Yehovha ni n’wanake Yesu va djulaka leswaku hi swi yentxa nakone hi nyikela wumboni lebyi heleliki. (Mint. 10:42) Nambiloko hi nga va kumi vhanu va kuva hi bula na vone, kumbe va yala ku yamukela dzrungula dzrezru, ha nyonxa hikusa ha swi tiva leswaku hi nyonxisa Papayi wezru wa le matilweni.—Dondzra Amaproverbia 27:11.

14. Ha yini hi nyonxa loko makwezru a kuma mhunu lweyi a yamukelaka dzrungula dzrezru a ntizrweni wa ku zrezra?

¹⁴ Hi tlhela hi nyonxa ngopfu loko makwezru wa kukazri a kuma mhunu lweyi a nyonxelaka ntiyiso a ku zrezreni. Xihondzro Xa Ku Zrindzra xa fananise ntizro wa ku zrezra ni ntizro wa ku djuletela ntsrongwana lweyi a lahlekiki. Vhanu vanyingi va patsreka ka ntizro lowu wa ku djuletela nakone va djuletela ka mimbangu ya ku siyanasiyana. Kutani, loko ntsrongwana a kumekile—a ku nyonxi ntsena lweyi a nga mu kuma—kambe ku nyonxa hinkwavu lava patsrekiki. Hi ndlela leyi fanaka, a bandleni hinkwavu va pfunisa ka ku zrezrela hinkwavu ka muganga nakone hinkwavu va nyonxa loko mhunu a sungula ku hlalela mintlhanganu.

BEKA MIYANAKANYU KA LIZRANDZRU LEDZRI U NGA NA DZRONE HA YEHOVHA NI VHANU

15. Xana leswi nga ka nga Matewu 22:37-39 swi nga hi pfuna hi ndlela yini ku yengetela ku hiseka a ntizrweni wa ku zrezra? (Tlhela u vona mufoto wu nga ka .)

¹⁵ Hi nga yengetela ndlela leyi hi wu zrandzraka ha yone ntizro wa ku zrezra hi ku yanakanyisisa hi ndlela leyi hi mu zrandzraka ha yone Yehovha ni vhanu. (Dondzra Matewu 22:37-39.) Yanakanya ku nyonxa lokukulu loku Yehovha a vaka na kone loko a hi vona na hi zrezra ni loko vhanu va nyonxa loko va sungula xidondzro xa Bibele! Nakone dzrimuka leswaku lava yingisetaka dzrungula dzrezru va  hlawula ku tizrela Yehovha, va ta hanya hi la ku nga helikiki.—Yoh. 6:40; 1 Tim. 4:16.

16. Hi nga kuma ku nyonxa ka ntizro wezru wa ku zrezra nambi hi nga swi koti ku huma kaya hi ndlela yini? Nyikela xikombiso.

¹⁶ Loko hi xivangelo xa kukazri swi nga koteki kuva u huma kaya, i yini leswi u nga swi yentxaka? Loko swi tsrhame hi ndlela leyo, beka miyanakanyu yaku ka leswi u nga kotaka ku swi yentxa akuva u kombisa lizrandzru dzraku ha Yehovha ni vhanu. Hi nkama wa ntungu wa COVID-19, Samuel na Dania a va nga humi kaya. Hi nkama wolowo wa ku kazrata, a va nyikela wumboni hi ku tizrisa telefone, makarta, ni ku fambisa swidondzro swa Bibele hi ku tizrisa Zoom. Leswi Samuel a a fambela xipiritana hi leswi a a ni kankru a a londzrovota mikhandlu yoleyo akuva a nyikela wumboni. Yene a li: “A swikazratu swi nga ha hi heta ntamu hi tlhelo dzra miyanakanyu, dzra nyama ni hi tlhelo dzra moya. Xileswo, i swa lisima swinene ku kuma ku nyonxa a ntizrweni wa Yehovha.” Ka nkama wolowo wa ku kazrata, Dania a wile nakone swi kombele kuva a baxara ku dzringana tihweti tizrazru. Ntsrhaku ka leswo, swi djule kuva a famba hi xikarinyana ku dzringana 6 wa tihweti. Yene a li: “Ni zame ku yentxa hinkwaswu leswi ni swi kotiki ka swiyimu leswi a ni li ka swone. A ni nyikela wumboni ka dotori lweyi a a ni pfuxela ni ka lava a va ni buyisela mintxhumu. Nakone ni ve ni mabulu lamanene hi ku tizrisa telefone ni wansati lweyi a a tizra ka komponi leyi xavisaka switizro swa vadotori.” Hi kola ka swiyimu leswi, Samuel na Dania a va kotanga ku yentxa hinkwaswu leswi a va kota ku swi yentxa khale. Nambitasu, va yentxe leswi a va swi kota nakone va nyonxe ngopfu hi mabindzru lawa va viki na wone.

17. Xana u nga yentxa yini akuva u susa londzrovoto dzrikulu ka swidzringanyeto leswi hi swi voniki ka xidondzro lexi?

¹⁷ Zama ku tizrisa ntlhanu wa swidzringanyeto leswi hi swi kumiki ka xidondzro lexi. A swidzringanyeto hinkwaswu leswi, swi fana ni mintxhumu ya ku hambanahambana leyi txheliwaka ka swakuda. Loko swi patsriwa hinkwaswu swi yentxa swakuda swi nandzrika. Hi ndlela leyi fanaka, loko hi tizrisa swidzringanyeto leswi swa ntlhanu hi ta va na hi lulamele ku lwisana ni matitwela ya ku biha nakone hi ta kuma ku nyonxa a ntizrweni wa ku zrezra.