1-2. I yini lexi hi pfunaka ku twisisa ndlela leyi Yehovha a titwiki ha yone ntsrhaku ka loko ku hangalasiwe madzrimi mayelanu na yene?

 YANAKANYA hi xiyimo lexi: Mhunu lweyi u mu zrandzraka a khanela ku biha ha wene. Wene wa swi tiva leswaku i madzrimi; kambe vhanu van’wana va kholwile leswi a swi hlayiki. A xa ku biha hi leswaku vhanu volavo va ma hangalasile madzrimi wolawo nakone lava va ma twiki va ma kholwili. A wu ta titwisa kuyini hi mhaka leyi? Loko u kazrateka hi ndlela leyi vhanu lava va taka ku vona ha yone ni ku txhimisiwa ka vito dzraku, a swi ta ku vavisa ngopfu a hi swone xana?—Amapr. 22:1.

² Xiyimo lexi xi hi pfuna ku twisa ha hombe ndlela leyi Yehovha a titwiki ha yone loko vito dzrake dzri ntxhimisiwa. Mun’we ka vanake va moya, a hlaye madzrimi mayelanu na yene ka wansati wa ku sungula, Evha. Nakone, Evha a ma kholwile madzrimi lawo. Hi kola ka madzrimi wolawo, vapswele vezru va ku sungula va pfukele Yehovha. Xileswo, xidoho ni lifu swi hangalake ka vhanu hinkwavu. (Gen. 3:1-6; Rom. 5:12) Swikazratu hinkwaswu leswi hi swi vonaka namunhla a misaveni swa ku fana ni lifu, tiyimpi ni ku xaniseka, swi ve kone hi kola ka madzrimi lawa Sathana a ma hlayiki a xizrambeni xa Edeni. Xana Yehovha a titwisa kuyini loko a vona swikazratu hinkwaswu leswi vangiwaka hi madzrimi lawa? Handle ka ku ganaganeka, leswo swi mu vavise ngopfu Yehovha, kambe leswo a swi mu yentxanga a va Xikwembu Nkulukumba wa mona kumbe lwa beketelaka xiviti. Nakunene, Yehovha a ha tama a va “Xikwembu Nkulukumba lweyi a nyonxiki”.—1 Tim. 1:11.

3. He yini ndjombo leyi hi nga na yone?

³ Hi ni ndjombo ya ku pfunisa ka ku basisa vito dzra Yehovha hi ku va hi yingiseta xileleto xa ku nabyala lexi liki: ‘Dzrumisani vito dzra Yehovha.’ (Amaps. 113:1) Hi dzrumisa vito dzra Yehovha loko hi byela van’wana hi mintxhumu leyinene leyi a yi yentxhiki. Kutani ke, xana u tiyimiselile ku yentxa leswo? A hi voneni swivangelo swizrazru  leswi taka hi pfuna ku dzrumisa vito dzra Yehovha hi mbilu hinkwayu.

YEHOVHA AWA NYONXA LOKO HI DZRUMISA VITO DZRAKE

4. Ha yini Yehovha a nyonxa loko hi mu dzrumisa? Nyikela xikombiso. (Tlhela u vona mufoto.)

⁴ Papayi wezru wa le matilweni awa nyonxa loko hi ndzrumisa vito dzrake. (Amaps. 119:108) Vhanu van’wana va titwa na va nga pfuni ntxhumu nakone va djula leswaku vanhu van’wana va tsrhamela ku va kulungela kumbe ku khanela leswinene ha vone. Xana Yehovha a tsrhame hi ndlela leyo? Nikutsrongo. Yanakanya hi xikombiso lexi: Xin’hwanyatana xa kukazri xi xingazra papayi wa xone hi lizrandzru xi va xi mu byela leswi: “Papayi u wa lisima swinene kwanga!” Papayi lweyi a tala hi ku nyonxa hi leswi n’wanake a swi yentxiki. Ha yini? Xana hi nga hlaya leswaku a a titwa na a nga li wa ntxhumu lakakuva a djula ku kulungeliwa hi n’wanake akuva a tivona na a li wa lisima? Im-him. Ku hambana ni leswo, awa swi tiva leswaku i papayi lwenene, kambe awa nyonxa loko a vona n’wanake na a mu komba lizrandzru ni ku mu tlangela. Awa swi tiva leswaku matsrhamela lawa ma ta pfuna n’wanake ku va mhunu lwa nyonxiki loko a kula. Hi xivangelo lexi fanaka, Yehovha Papayi wezru a nyonxa ngopfu loko hi mu dzrumisa.

5. Loko hi dzrumisa Yehovha, he wani madzrimi lawa hi pfunisaka ku ma paluxa mayelanu na Sathana?

⁵ Loko hi dzrumisa Yehovha, Papayi wezru wa le matilweni, hi pfunisa ka ku paluxa leswaku leswi Sathana a swi hlayaka mayelanu ni mun’wana ni mun’wana wezru i madzrimi. Hi ndlela yini? Sathana a hlaye leswaku a nga kone lweyi a a ta yimelela vito dzra Yehovha hi ku dumbeka. A tlhele a hlaya leswaku a nga kone lweyi a a ta tama a dumbeka loko a dzringiwa. Nakone a tlhele a hlaya leswaku hinkwezru a hi ta tsrhika ku tizrela Yehovha loko hi dumbisiwa mintxhumu ya ku xonga. (Yb. 1:9-11; 2:4) Kambe Yobe a tame a dumbeka ka Xikwembu Nkulukumba ni ku kombisa leswaku Sathana i muhembi. Xana na wene, u ta tama u dumbeka ka Xikwembu Nkulukumba? Mun’wana ni mun’wana wezru a ni ndjombo ya ku yimelela vito dzra Papayi wezru, Yehovha, ni ku mu nyonxisa hi ku mu tizrela hi ku dumbeka. (Amapr. 27:11) Nakunene, ku yentxa leswo i tovoko.

6. Hi nga mu yetisela hi ndlela yini hosi Davhida ni Valevhi? (Nehemiya 9:5)

⁶ Lizrandzru ledzri vhanu va ku dumbeka va nga na dzrone hi Xikwembu Nkulukumba, dzri va susumetela ku dzrumisa vito dzrake hi mbilu hinkwayu. Hosi Davhida a tsrale leswi: ‘Khensa Yehovha, hika dzranga, ni hinkwaswu leswi nga ndzreni kwanga a swi khense vito dzra ku xwenga kwakwe.’ (Amaps. 103:1) Davhida a a swi tiva leswaku ku twalisa vito dzra Yehovha swi fana ni ku twalisa Yehovha hi ntshima. Vito dzra Yehovha dzri patsra ndhuma yake, leswo swi hi dzrimuxa matsrhamela yake hinkwawu ya ku xonga ni mintxhumu hinkwayu ya ku xonga leyi a yi yentxiki.  Davhida a a djula ku dzrumisa vito dzra Papayi wake hikusa dzri xwengile. A a djula ku yentxa leswo hi ‘hinkwaswu leswi nga ndzreni kwake’ leswi liki hi mbilu yake hinkwayu. Hi lani ku fanaka, Valevhi a va zrangela ka ku dzrumisa Yehovha. Nakone hi ku titsrongahata, a va vona na mazritu yavu ma nga yaneli ku kombisa leswaku va gandzrela vito dzra Yehovha hi ndlela leyi swi mu fanelaka ha yone. (Dondzra Nehemiya 9:5.) Handle ka ku ganaganeka, ku titsrongohata loko ku yentxe Yehovha a nyonxa swinene.

7. Xana hi nga mu dzrumisa hi ndlela yini Yehovha ka wutomi byezru bya siku ni siku?

⁷ Ni namunhla, na hine hi nga dzrumisa Yehovha hi ku khanela hi ndlela leyi kombisaka ku tlhangela ni lizrandzru. Loko hi ya nsin’wini hi nga dzrimuka leswaku nkongomento nkulu lowu hi nga na wone, i wa ku kokela vhanu ka Yehovha, ni ku va pfuna ku vona Yehovha swanga Papayi wezru lwa nga ni lizrandzru. (Yak. 4:8) I tovoko ku hine ku komba vhanu a Bibeleni ka leswaku Yehovha i Xikwembu Nkulukumba lwa nga ni lizrandzru, wululami, wutlhazri, ntamu ni matsrhamela man’wana ya ku xonga. Ndlela yin’wana ya ku dzrumisa Yehovha ni ku mu nyonxisa ha yone hi loko hi yentxa hinkwaswu leswi hi nga swi kotaka akuva hi mu yetisela. (Efe. 5:1) Loko hi yentxa leswo, vhanu vanyingi va nga swi xiya leswaku hi hambanile ni vhanu van’wana. (Mat. 5:14-16) Loko hi hanyisanaka na vone siku ni siku, swi nga yentxeka hi va ni mukhandlu wa ku va tlhamuxela leswaku ha yini hi hambanile ni vhanu van’wana. Nakone vhanu va timbilu letinene, va ta djula ku dondzra mayelanu na Xikwembu Nkulukumba wezru. Loko hi dzrumisa Yehovha hi tindlela leti, a nyonxa ngopfu swinene.—1 Tim. 2:3, 4.

HI NYONXISA YESU LOKO HI DZRUMISA VITO DZRA YEHOVHA

8. Xana Yesu, a ve wa ku sungula ku dzrumisa Yehovha hi ndlela yini?

⁸ Ka swivumbiwa hinkwaswu swa ku tlhazriha swa lani misaveni ni le matilweni, a nga kone lwa tivaka Papayi ku yampswa ku tlula N’wana. (Mat. 11:27) Yesu awa mu zrandzra Papayi wake nakone hi yene wa ku sungula ku dzrumisa vito dzrake. (Yoh. 14:31) Ka xikhongoto lexi a xi hambiki ka Papayi wake hi wusiku bya wugamu na a nge si fa, a katsrakanye ntizro lowu a wu yentxiki lani misaveni hi ndlela leyi: “Ni va tivise vito dzraku.” (Yoh. 17:26) A a djula ku hlaya yini?

9. He xini xikombiso lexi Yesu a xi nyikeliki, akuva a hi pfuna ku twisisa ha hombe leswi Yehovha a tsrhamisiki xiswone?

⁹ Yesu a nge byela vhanu leswaku vito dzra Xikwembu Nkulukumba i Yehovha ntsena. A Vayuda lava Yesu a va dondzrisiki a va dzri tiva vito dzra Xikwembu Nkulukumba, kambe Yesu a ve wa ku sungula “lweyi a mu tlhamuxelaka”. (Yoh. 1:17, 18) Hi xikombiso, matsralwa ya Xiheberu a ma hlaya leswaku Yehovha a ni timpswalu ni ntwelawusiwana. (Eks. 34:5-7) Yesu a swi beke livaleni leswo ka xikombiso xa n’wana lweyi a sukiki kaya. Loko hi dondzra hi kuma leswaku papayi muni a vone n’wanake “na a ha li kule” kutani a tsrutsruma a ya tlhangana na yene a mu xingazra, nakone a mu dzrivalela hi ku ntsrhunxeka. Kutani leswi swi swi beka livaleni leswaku Yehovha a ni ntwelawusiwana nakone awa dzrivalela. (Luk. 15:11-32) Yesu a hi kombe ndlela leyi Papayi wake a tsrhamisiki xiswone.

10. a) Hi swi tivisa kuyini leswaku Yesu a a tizrisa vito dzra Papayi wake nakone a a djula leswaku van’wana va yentxa leswi fanaka? (Marka 5:19) (Tlhela u vona mufoto.) b) Xana Yesu a djula leswaku hi yentxa yini namunhla?

¹⁰ Xana Yesu a a tlhela a djula leswaku van’wana va tizrisa vito dzra Papayi wake? Ina. Van’we ka vazrangeli va wukhongoti a va kholwa leswaku vito dzra Xikwembu Nkulukumba dzri xwenge ngopfu kuva mhunu a dzri tizrisa, kambe Yesu a nga pfumelelanga leswaku a swihena leswi kalaka swi nga seketeliwanga a matsralweni swi mu sivela ku dzrumisa vito dzra Papayi wake. Khambi dzrin’wana Yesu a dahe wanuna lweyi a a ni mademona lweyi a a tsrhama a mugangeni wa Vagerasi.  Vhanu va txhave ngopfu swinene lakakuva va kombela leswaku Yesu a suka a mugangeni luwani. (Mar. 5:16, 17) Nambitasu,Yesu a a djula leswaku vhanu va muganga luwani va tiva vito dzra Xikwembu Nkulukumba. Kutani, Yesu a byele wanuna lweyi a mu dahiki leswaku a nga byeleteli vhanu leswi a swi yentxiki kambe a va byela leswi Yehovha a mu yentxeliki swone. (Dondzra Marka 5:19.) a Yesu a ha djula leswi fanaka ni namunhla, hi tivisa vito dzra Papayi wake a misaveni hinkwayu! (Mat. 24:14; 28:19, 20) Loko hi hamba xiyenge xezru a mhakeni leyi, hi ta yentxa leswaku hosi yezru Yesu Kriste yi nyonxa ngopfu swinene.

11. Xana Yesu a dondzrise valandzreli vake ku khongota mayelanu na yini, nakone ha yini leswo swi li swa lisima? (Ezekiel 36:23)

¹¹ Yesu a a swi tiva leswaku nkongometo wa Yehovha a ku li ku xwengisa vito dzrake, ni ku kombisa leswaku leswi hlayiwiki mayelanu na Yene a ku li madzrimi. Hi leswi mu yentxiki a dondzrisa valandzreli vake ku khongota hi ndlela leyi: “Papayi wezru lweyi a nga matilweni, a vito dzraku a dzri xwengisiwe.” (Mat. 6:9) Yesu a a swi twisisa leswaku mhaka leyi yi khumba swivumbiwa hinkwaswu. (Dondzra Ezekiel 36:23.) A ku na xivumbiwa xin’wana lexi tlhazrihiki a wuyakwini hinkwabyu, lexi yentxiki swa ku tlula leswi Yesu a swi yentxiki akuva a xwengisa vito dzra Yehovha. Kambe, loko Yesu a khomiwile, valala vake a va mu lumbete leswaku a yeyise vito dzra Yehovha. Handle ka ku ganaganeka, Yesu a a swi tiva leswaku ku tizrisa hi ndlela ya ku biha kumbe ku zruka vito dzra ku xwenga dzra Papayi wake, a ku li xidoho lexikulu lexi mhunu a nga xi yentxaka. Ku yavanyisiwa ni ku lumbetiwa hi xidoho lexi, swi mu vavise ngopfu swinene. Swi nga yentxeka na lexo xi ve xivangelo lexi mu yentxiki a titwa na a “kazratekile ngopfu swinene” loko a li kusuhi ni ku khomiwa.—Luk. 22:41-44.

12. Xana Yesu a xwengise vito dzra Papayi wake hi lani a kotiki ha kone hi ndlela yini?

¹² Akuva Yesu a xwengisa vito dzra Papayi wake, swi djule kuva a tiyiselela ku biwa, ku zrukiwa ni ku lumbetiwa. A a swi tiva leswaku a mu yingisetile Papayi wake ka hinwaswu; a ku nge na lexi a xi ta mu khomisa tingana. (Heb. 12:2) Nakone a a swi tiva leswaku Sathana a o mu hlasela hi ku kongoma ka swiyimo leswiyani swa ku kazrata. (Luk. 22:2-4; 23:33, 34) Sathana a a djula ku yentxa hinkwaswo leswi a a ta swi kota akuva  Yesu a nga dumbeki, kambe a nga swi kotanga. Yesu a kombise leswaku Sathana i muhembi lweyi a nga ni tihanyi, ni leswaku Yehovha a ni malandzra ya ku dumbeka lama tamaka ma mu tizrela hi ku dumbeka nambiloko ma kumana ni swiyimo swa ku kazrata!

13. Xana u nga nyonxisa Hosi yaku Yesu hi ndlela yini?

¹³ Xana u djula ku nyonxisa hosi yaku Yesu? Kutani, yana mahlweni u dzrumisa vito dzra Yehovha hi ku pfuna van’wana kuva va dondzra hi matsrhamela ya ku xonga ya Xikwembu Nkulukumba wezru. Loko u yentxa leswo u va na u landzrelisisa ha hombe minkondzro ya Yesu. (1 Pet. 2:21) Ku fana na Yesu, u ta nyonxisa Yehovha ni ku kombisa leswaku nala wake, Sathana, i muhembi lwenkulu!

HI DZRUMISA VITO DZRA YEHOVHA LOKO HI PFUNISA KA KU HULUXA WUTOMI BYA VHANU

14-15. He yini mintxhumu ya ku xonga leyi nga yentxekaka loko hi dondzrisa vhanu mayelanu na Yehovha?

¹⁴ Loko hi dzrumisa vito dzra Yehovha, hi va na hi pfunisa ka ku huluxa wutomi bya vhanu. Hi swi yentxisa kuyini leswo? Sathana a dlaye “matihlo ya miyanakanyu” ya lava kalaka va nga li vapfumeli. (2 Kor. 4:4) Va kholwa ka madzrimi ya Sathana ya ku fana ni lawa: Xikwembu Nkulukumba a nga kone, Xikwembu Nkulukumba a kule na hine nakone a nga na mhaka na hine, Xikwembu Nkulukumba a ni tihanyi nakone a xanisa vhanu hi lani ku nga helikiki. Madzrimi lawa hinkwawu, mo ntxhimisa vito dzra Yehovha ku yentxela leswaku vhanu va nga tsrhindzrekeli kwake. Kambe loko hi zrezra, hi va na hi sivela Sathana ku tlhaselela kungu dzrake. Hi dondzrisa vhanu ntiyiso mayelanu ni Papayi wezru, hi dzrumisa vito dzra ku xwenga dzra Xikwembu Nkulukumba wezru. He wani mabindzru ya kone?

¹⁵ Mintiyiso ya Zritu dzra Xikwembu Nkulukumba yi ni ntamu swinene. Loko hi dondzrisa vhanu mayelanu ni ndlela leyi Yehovha a nga xiswone hakunene, hi ta vona ntxhumu wa ku hlamalisa. Ntuzru wa madzrimi lowu Sathana a wu tsrimbiki a matihlweni ya vhanu wa suka hi kutsrongokutsrongo, kutani va sungula ku vona matsrhamela ya ku xonga ya Papayi wezru, Yehovha. Va hlamalisiwa hi ku vona ntamu lowu nga helikiki wa Yehovha. (Eza. 40:26) Va dondzra ku mu dumba hi kola ka wululami byake lebyi hetisekiki. (Deut. 32:4) Va dondzra swinyingi ka wutlhazri byake lebyikulu. (Eza. 55:9; Rom. 11:33) Nakone  va txhaveleleka loko va dondzra leswaku Yehovha i lizrandzru. (1 Yoh. 4:8) Loko va ya va tsrhindzrekela ka Yehovha, a dumbu dzravu dzra ku hanya hi lani ku nga helikiki dzri ya dzri tiya. Hi ni tovoko dzrikulu dzra ku pfuna vhanu kuva va tsrhindzrekela ka Papayi wavu, Yehovha! Loko hi yentxa leswo Yehovha a hi vona swanga “vatizrikulobye”.—1 Kor. 3:5, 9.

16. Xana vhanu va nga titwa hi ndlela yini loko va dondzra hi vito dzra Xikwembu Nkulukumba? Nyikela xikombiso.

¹⁶ Swi nga yentxeka na ntxhumu wa ku sungula lowu hi wu dondzrisaka vhanu ku li leswaku vito dzra Xikwembu Nkulukumbu i Yehovha. Leswo swi nga ha mu khumba ngopfu mhunu lweyi a nga ni mbilu leyinene. Hi xikombiso, mumpshwa wa kukazri lweyi a vitaniwaka Aaliyah b a kulisiwe ka wukhongoti lebyi nga liki bya wukriste. Kambe yene a a nga yaneliseki hi wukhongoti byake nakone a a nga titwi na a li kusuhi na Xikwembu Nkulukumba. Leswo swi txintxile loko a sungule ku dondzra ni Timboni ta Yehovha. A sungule ku vona Xikwembu Nkulukumba swanga mughanu wake, nakone a hlamalile loko a dondzre leswaku vito dzra Xikwembu Nkulukumba a dzri susiwile ka Mabibele manyingi dzri va dzri siviwa hi xithopo lexi liki Hosi. Ku dondzra vito dzra Yehovha swi txintxe wutomi byake. Yene a li: “Munghanu wanga lwenkulu a ni vito!” Ku ve dzrini bindzru dzra kone? Yene a tlhele a ku: “Swoswi ni ni ku zrula mbilwini. Ni titwa na ni tovokisiwile.” Wanuna wa kukazri lwa vitaniwaka Steve, a a li mutxhayi lweyi a kulisiwiki ka ndangu lowu a wu landzrelela ngopfu nawu wa wukhongoti bya Xiyuda. A a nga ha djuli ku va xizro xa wukhongoti ni byin’we hi leswi a voniki wukanganyisi byinyingi. Kambe, ntsrhaku ka loko mamana wake a file, a pfumele ku dondzra Bibele ni Timboni ta Yehovha. A khumbeke ngopfu swinene hi ku va a dondzre hi vito dzra Xikwembu Nkulukumba. Yene a li: “A ni ngi ngi dondzra hi vito dzra Xikwembu Nkulukumba. Ledzri ku ve khambi dzra ku sungula lani ni twisisiki leswaku Xikwembu Nkulukumba a kone! Swoswi na swi vona leswaku i mhunu wa hi kakunene. Kolanu ni tekele ku swi twisisa leswaku a ni kume munghanu wa ntiyiso.”

17. Ha yini u djula ku tama u dzrumisa vito dzra Yehovha? (Tlhela u vona mufoto.)

¹⁷ Ka ntizro waku wa nsimu, xana u dondzrisa vhanu mayelanu ni vito dzra Yehovha? Xana u va pfuna ku vona matsrhamela ya ku xonga ya Xikwembu Nkulukumba wezru? Hi ku yentxa leswo, u va na u dzrumisa vito dzra Xikwembu Nkulukumba. Tama u dzrumisa vito dzra Yehovha hi ku tama u pfuna vhanu ku tiva lweyi a faneliwaka hi vito ledzro. Loko u yentxa leswo, u ta huluxa vhanu vanyingi. Nakone u ta va na u landzrelisisa minkondzro ya Hosi yezru, Yesu Kriste. Henhla ka hinkwaswu, u ta nyonxisa Papayi wezru wa lizrandzru Yehovha. Yana mahlweni ‘u dzrumisa vito dzrakwe hi minkama ni hi la ku nga helikiki’.—Amaps. 145:2.