MINKAMA yin’wana, vatsrali va Bibele va phindaphinde mazritu wolawa ya man’we zritu hi zritu. Vona swivangelo swizrazru swa leswaku ha yini vatsrali lava va yentxe leswo:

Nkama lowu dzri tsraliwiki ha wone. A Israyeleni wa khale, ntalu wa vhanu a va nge na kopiya dzra buku dzra Nawu akuva va tidondzrela ha wuswavu. Minkama yinyingi, a mukhandlu wa wun’we lowu a va li na wone wa ku twa ku dondzriwa ka nawu hi loko va tlhanganile a tebernakeleni. (Deut. 31:10-12) Ka swiyimo leswo, a swi ta nabyala kuva vhanu va hingaleteka nkama lowu va yimiki ku dzringana nkama wa ku leha na va yingiseta ku dondzriwa ka nawu makazri ka vhanu vanyingi. (Nehem. 8:2, 3, 7) Xileswo, akuva vhanu va dzrimuka leswi va swi dondzriki ni ku xiya ndlela leyi a va ta swi tizrisa ha yone a wuton’wini byavu, a ku fanela ku phindaphindiwa mazritu lama nga ya lisima swinene. Ku phindaphinda mazritu a swi li swa lisima swinene akuva va kota ku dzrimuka milawu ya kukazri mayelanu ni wutsrhokotsrhoko byinyingi lebyi yelanaka ni milawu kun’we ni swileleto leswi Yehovha a va nyikiki swone.—Lev. 18:4-22; Deut. 5:1.

Ndlela leyi dzri tsraliwiki ha yone. Swiyenge swa kukazri swa Bibele swi tsraliwe swanga tinsimu, ku fana ni buku dzra Amapsalma, Lisimu la Tinsimu ni Aŝiḍilo. Tinsimu tin’wana ti ni xiyenge lexi liki tekelela lani ku phindiwaka mazritu, leswi kandzrakanyaka nhlokomhaka ya lisimu, nakone swi pfuna lava yingisetaka lisimu leswaku va dzrimuka mazritu. Vona xikombiso lexi kumekaka ka Amapsalma 115:9-11: ‘Israyele, dumba Yehovha: Yene i xipfunu xavu ni xitlhangu xavu. N’wine, yindlu ya Aroni, dumbani Yehovha: Yene i xipfunu xavu ni xitlhangu xavu. N’wine lava txhavaka Yehovha, dumbani Yehovha: Yene i xipfunu xavu ni xitlhangu xavu.’ Xana wa yi vona ndlela leyi ku phindaphinda ka mazritu a ku ta pfuna vayimbeleli akuva va bekisa a miyanakanywini ni le mbilwini yavu mazritu ya lisima?

Leswi yentxiki kuva dzri tsraliwa. Vatsrali van’wana minkama yin’wana a va phinda mazritu ya lisima. Hi xikombiso, nkama lowu Yehovha a nga nyikela nkongomiso wa leswaku Vaisrayele a va fanelanga ku da ngati, Yehovha a zrume Moxe leswaku a phindaphinda swivangelo swa kone. Yehovha a a djula ku kandzrakanya leswaku a ngati yi yimela wutomi. (Lev. 17:11, 14) Ntsrhaku ka nkama wa kukazri, loko vapostola ni vakulu a Yerusalema va tsrale mayelanu ni leswi vakriste a va fanela ku swi yentxa kumbe ku nga swi yentxi akuva va nyonxisa Yehovha, va kandzrakanye xivileleko xa ku tsrhika ngati.—Mint. 15:20, 29.

I ntiyiso leswaku Bibele dzri phindaphinda mazritu manyingi, kambe a swi tlhamuxeli swone leswaku Yehovha a djula leswaku hi tsrhamela ku phindaphinda mazritu wolawa ya man’we. Hi xikombiso,Yesu a te: “Loko u khongota u nga phindheteli mazritu wolawa ya man’we.” (Mat. 6:7) A hi byele leswi hi nga swi patsraka a swikhongotweni swezru leswi yelanaka ni ku zrandzra ka Xikwembu Nkulukumba. (Mat. 6:9-13) Xileswo, nambiloko hi nga phindaphindi mazritu wolawa ya man’we a swikhongotweni swezru, kambe hi nga phinda timhaka toleti ta tin’we a swikhongotweni swezru.—Mat. 7:7-11.

Ku ni swivangelo leswi twalaka, leswi yentxaka Bibele dzri phindaphinda mazritu wolawa ya man’we. I yin’we ya tindlela ta ku yampswa leyi Mudondzrisi wezru Lwenkulu Yehovha a hi dondzrisaka leswi nga swinene kwezru.—Eza. 48:17, 18.