Loko hi dondzra Bibele, hi nga djuletela tindzralama ta moya hi ku hamba wusetxhi. Hi nga susa londzrovoto hi ndlela yini ka wusetxhi lebyo?

Handzrisisa hi wuyenti wutsrhokotsrhoko bya wundzrunguli bya Bibele. Hi xikombiso, tivutise leswi: ‘I mani mutsrali wa kone? A a tsralela mani? Xana wudzrunguli lebyi byi tsraliwe dzrini nakone ka swiyimu swini? I yini leswi yentxekiki na dzri nga si tsraliwa? I yini leswi yentxekiki ntsrhaku ka loko dzri tsraliwile?

Yanakanyisisa hi tidondzro leti u taka ti kuma hikuva u hlamula swivutiso swa ku fana ni leswi: ‘Xana vhanu lava ni dondzraka ha vone ka wundzrunguli lebyi a va titwisa kuyini? He wani matsrhamela lawa a va li na wone? Ha yini ni fanela ku yetisela matsrhamela yavu kumbe ni nga ma yetiseli?’

Tizrisa leswi u swi dondzriki, ku nga ha va nsin’wini kumbe ka wutomi byaku bya siku ni siku ni vhanu vambeni. Loko u yentxa leswo, u ta va na u kombisa wutlhazri hi lani Bibele dzri hlayaka ha kone: ‘Lwe wa vutlhazri a a languse timhaka leti.’—Amaps. 107:43

• Ndlela ya kone: Vona ndlela leyi wundzrunguli lebyi nga ka xiyenge lexi liki Wukosi Byi Nga Bibeleni ka ntlhanganu wa makazri ka vhiki, byi hi pfunaka ha yone ku tizrisa leswi hi swi dondzriki. Xiyenge lexi, xi talisa ku va ni swivutiso leswi hi nga tihambaka swone, tinhla leti hi nga yanakanyisisaka ha tone ni mifoto leyi hi nga dondzraka swa kukazri ka yone.