A Bibele dzri swi beka livaleni leswaku Yehovha a nga hlaya leswi taka yentxeka a nkameni lowu taka. (Eza. 45:21) Kambe a dzri tlhamuxeli wutshokotsrhoko hinkwabyu mayelanu ni ndlela leyi Yehovha a swi yentxaka ha yone kumbe nkama lowu a swi yentxaka ha wone nambi makhambi lawa a hlawulaka ku swi tiva ha wone. Xileswo, a swi nge koteki kuva hi tiva hinkwaswu mayelanu ni wuswikoti bya Yehovha bya ku tiva leswi taka yentxeka a nkameni lowu taka, kambe ku ni mintxhumu ya kukazri leyi hi fanelaka ku yi tiva.

Yehovha a nga yentxa xin’wana ni xin’wana lexi a xi djulaka, kambe minkama yin’wana a hlawula kuva a nga yentxi mintxhumu ya kukazri. Leswi a nga ni wutlhazri lebyi nga helikiki, Yehovha a nga hlaya ntxhumu wun’wana ni wun’wana lowu a wu djulaka lowu taka yentxeka. (Rom. 11:33) Kambe leswi Yehovha a kotaka ku tilawula hi ku helela, a nga hlawula ku va a nga swi tivi leswi taka yentxeka.—Dzringanisa na Ezaya 42:14.

Yehovha a yentxa leswaku ku zrandzra kwake ku yentxeka. Xana leswo swi yelana kwini ni wuswikoti lebyi a nga na byone bya ku hlaya leswi taka yentxeka a nkameni lowu taka? Ezaya 46:10 yi tlhamuxela leswi: ‘Ndzri tivisa ke he ku sunguleni leswi taka humelela a wugan’wini, ndzri tivisa ni le ku zrangeni leswi nga siki yentxeka, ndzri ku: A makungu ya nga ma ta tiya kutani ndzri ta yentxa ku zrandzra kwanga hinkwaku.’

Xin’we xa swivangelo lexi yentxaka Yehovha a kota ku hlaya leswi taka yentxeka a nkameni lowu taka, hi leswaku yene a ni ntamu wa ku yentxa mintxhumu yi humelela. A swi sindzrisi kuva Yehovha a tiva leswi taka yentxeka a nkameni lowu taka, ku fana ni leswi yentxekaka kwezru loko hi hlalela filme dzra kukazri kumbe ku dondzra buku dzra kukazri lani hi ntlulaka hi ya wugan’wini akuva hi twisisa kumbe ku vona wugamu bya mhaka. Ku hambana ni leswo, Yehovha a nga hlawula kuva ntxhumu wa kukazri wu yentxeka hi nkama lowu a wu djulaka, nakone a nga yentxa leswaku leswo swi humelela hi nkama wa kone.—Eks. 9:5, 6; Mat. 24:36; Mint. 17:31.

Xileswo, Bibele dzri tizrisa swiga leswi liki ndzri ‘hambile’ ni ndzri ‘khanelile’ akuva dzri tlhamuxela leswi Yehovha a swi yentxaka loko swi ta mhakeni ya leswi taka yentxeka nkameni lowu taka. (2 Tih. 19:25; Eza. 46:11) Swiga leswo, swi ndzruluteliwe ka zritu dzra kukazri hi lidzrimi dzra ku sungula ledzri fambisanaka ni zritu ledzri tlhamuxelaka ‘muvumbi’. (Yer. 18:4) Swanga hi leswi muhambi wa timbita lweyi a nga ni wuswikoti bya ku ndzruluta vumba byi va hotsro ya ku xonga, hi lani ku fanaka, Yehovha a nga ntxintxa mintxhumu akuva swi yentxaka hi ku ya hi ku zrandzra kwake.—Efe. 1:11.

Yehovha awa yi hlonipha nyiko ya mun’wana ni mun’wana ya ku va ni ntsrhunxeko wa ku tihlawulela. Yehovha a nga bekeli mun’wana ni mun’wana wezru wugamu lebyi a taka va na byone, nakone a nga kunguhati ka ha li mahlweni leswi taka humelela wuton’wini bya mhunu mun’wana ni mun’wana kumbe ku kunguhata leswaku a helisiwa. Yehovha a pfumelela mun’wana ni mun’wana wezru kuva a hlawula ndlela leyi a djulaka ku famba ha yone, nakone a tlhela a hi tsratsriya kuva hi landzra ndlela leyinene.

Vona swikombiso swibidzri. Xa ku sungula xi vulavula hi vhanu va le Ninivha. Yehovha a hlaye leswaku doropa ledzriyani a dzri ta helisiwa hi kola ka wubihi lebyi vhanu va le ka doropa ledzro a va li na byone. Kambe, ntsrhaku ka loko vhanu lava va tisolile, Yehovha ‘a ndzruluke ku biheni loku faka a hlaye leswaku a ta va yentxa kone; a nga ku yentxanga’. (Yon. 3:1-10) Yehovha a ntxintxe nkungu ledzri a dzri hlayiki mayelanu ni vhanu va le Ninivha hikusa va wu tizrise ha hombe ntsrhunxeko wa ku tihlawulela, nakone va ntxintxe mahanyela yavu ntsrhaku ka loko va twe dzrungula dzra yavanyiso ledzri Yonasi a a zrumiwe ku dzri zrezra. Ku tisola kwavu ku yentxe leswaku va nga helisiwi.

Xikombiso xin’wana i xa wuprofeta mayelanu ni hosi leyi vitaniwaka Korexi, lweyi a a ta ntsrhunxa Vayuda a wukazraweni ni ku leleta leswaku ku pfuxetiwa tempele dzra Yehovha. (Eza. 44:26–45:4) Hosi Korexi wa le Persiya, a byi hetisisile wuprofeta lebyo. (Ezr. 1:1-4) Yehovha a tizrise Korexi akuva a hetisisa wuprofeta lebyo na a nga zanga a mu sindzrisa leswaku a mu gandzrela, leswi liki, Korexi a a ni ntsrhunxeko wa ku tihlawulela swiboho leswi a a djula ku swi teka ni ku hlawula lweyi a djulaka ku mu gandzrela.—Amapr. 21:1.

I ntiyiso leswaku ku patsreka swinyingi ka wuswikoti bya Yehovha bya ku tiva leswi taka yentxeka nkameni lowu taka. Ku hlaya ntiyiso, a ku na mhunu lweyi a nga twisisaka hi ku helela miyanakanyu ni swiyentxo swa Yehovha. (Eza. 55:8, 9) Kambe hinkwaswu leswi Yehovha a hi pfuleteliki swone, swi tiyisa lipfumelo dzrezru dzra leswaku minkama hinkwayu a ta yentxa leswi nga swinene loko a hlaya leswi taka yentxeka a nkameni lowu taka.