HI WAWUZRAZRU, 18 ka Janeiru wa 2023 hi yamukele xitiviso xa ku hlawuleka ka jw.org, lexi a xi hlaya swaku Gage Fleegle na Jeffrey Winder va yaveliwe ku tizra swanga swizro swa Huvo Leyi Zrangelaka ya Timboni ta Yehovha. Vamakwezru lava, va tizrele Yehovha hi ku dumbeka ku dzringana nkama wunyingi.

Makwezru Fleegle a kulisiwe a mpeladambu wa Pennsylvania, a Estados Unidos, hi vapswele lava nga Timboni ta Yehovha. Na a ha li mumpshwa, yene kun’we ni vapswele vake va zruzrele ka xidoropana xitsrongo lani a ku ni xivileleko lexikulu. Ntsrhaku ka nkamanyana, a babatisiwile hi 20 ka Novhembru wa 1988.

Vapswele vake minkama hinkwayu a va mu kutxa ku nghenela ntizro wa nkama hinkwawu. Minkama hinkwayu a va yamukela valaviseli va miganga ni vatizri va Betele. Makwezru Fleegle a kote ku vona ndlela leyi vamakwezru lava a va nyonxe ha yone. Ntsrhakunyana ka loko a babatisiwile, a sungule ku tizra swanga phayona dzra nkama hinkwawu hi 1 ka Setembru wa 1989. Ntsrhaku ka malembe mabidzri, a tlhasele kungu ledzri a a li na dzrone ku sukela loko a ha ni 12 wa malembe, ku nga kungu dzra ku ya tizra a Betele. A sungule ku tizra a Betele dzra Brooklyn hi Otubru wa 1991.

A Betele, makwezru Fleegle a tizre ka ku gandlisa mabuku ku dzringana 8 wa malembe, ntsrhaku ka leswo, a yaveliwe ku ya tizra ka Ndzrawulu ya Ntizro. Hi nkama lowo, a ve ka bandla dzra Xirusu malembe ma nge mangani. Hi 2006 a txhate na Nadia, lweyi na yene a pfumeleliwiki ku tizra a Betele. Vone va tizre ka nsimu ya Xiputukezi nakone va tlhele va tizra ka nsimu ya Xipanyoli ku tlula 10 wa malembe. Ntsrhaku ka malembe manyingi na makwezru Fleegle a tizra ka Ndzrawulu ya Ntizro, a yaveliwe ku tizra ka xikritori xa Xihubyana xa ku Dondzrisa, nakone hi ku famba ka nkama a tizre ka xikritori  xa Xihubyana xa Ntizro. Hi Marsu wa 2022, a yaveliwe ku tizra swanga mupfunisi wa Xihubyana xa Ntizro xa Huvo Leyi Zrangelaka.

Makwezru Winder a kulisiwe Murrieta, a California a Estados Unidos. a dondzre ntiyiso ka vapswele vake nakone a babatisiwe hi 29 ka Marsu wa 1986. Ka hweti leyi landzreliki, a sungule ku tizra swanga phayona dzra ku pfunisa. A swi zrandzrile nakone a a djula ku tama a va phayona. Loko a heti tihweti tinyingi na a tizra swanga phayona dzra ku pfunisa, a sungule ku tizra swanga phayona dzra nkama hinkwawu hi 1 ka Otubru wa 1986.

Na a ha li mumpshwa, makwezru Winder a pfuxele vamakwavu vake vabidzri lavakulu, lava a va tizra a Betele. Leswo swi yentxe leswaku a navela ku ya tizra a Betele. Kutani, hi Mayu wa 1990 a zrambiwe ku ya tizra a Betele dzra Wallkill.

A Betele, makwezru Winder a tizre ka tindzrawulu ta ku siyanasiyana ku patsra ni ka Ndzrawulu ya ku Basisa, Ndzrawulu leyi vonelelaka Masimu ni Swihazri ni ka Xikritori xa Zrwavi. Hi 1997, a txhate na Angela nakone va tizra Betele ku sukela loko va txhatile. Hi 2014, va zruzrele a Warwick, lani makwezru Winder a wupfisiwiki ka ntizro wa ku yaka a tsindzra wa misava hinkwayu. Hi 2016 va zruzrele Patterson lani ku hambeliwaka kone Swikole swa Nhlengeletanu lani makwezru Winder a tizriki ka Ndzrawulu ya Áudio/Vídeo. Ntsrhaku ka mune wa malembe, va tlhelele a Warwick. Makwezru Winder a yaveliwe ku tizra ka Xikritori xa Xihubyana xa Vatizri. Hi Marsu wa 2022, a yaveliwe ku tizra swanga mupfunisi wa Xihubyana xa Vatizri xa Huvo Leyi Zrangelaka.

Hi Khongota leswaku Yehovha a tama a tovokisa “vavanuna [lava] swanga tinyiko” ni kuva va tama va tizra hi nkhinkhi akuva va seketela Mfumo.—Efe. 4:8.