1. Ha yini hi fanela ku landzra nkongomiso wa Yehovha? Nyikela xikombiso.

 TIYANAKANYE na wu lahlekile nhoveni lani khombo dzri nga kone, hikusa ku ni swihazri swa nhova, swidodwana leswi nga ni mavabyi, minsinya leyi nga ni vhenenu nambi mimbangu ya ku u nga bohlovela u nghena xikheleni. A wu ta nyonxa ngopfu swinene hi ku va ni mukongomisi lweyi a nga ni mfambu, lweyi a tivaka lomu ku nga ni khombo ni ndlela ya ku dzri gega! Phela misava leyi hi hanyaka ka yone namunhla, ya fana ni nhova leyo hikusa yi tale hi makhombo lawa ngopfungopfu ma khumbaka wumoya byezru. Kambe hi ni mukongomisi lweyi a hetisekiki ku nga Yehovha. Yene a hi pfuna ku fambela kule ni makhombo, a hi kongomisa ka wutomi lebyi nga helikiki a misaveni leyimpshwa.

2. Xana Yehovha a hi kongomisa hi ndlela yini?

² Xana Yehovha a hi kongomisa hi ndlela yini? Xa ku sungula, a hi kongomisa hi ku tizrisa Zritu dzrake ku nga Bibele nakone a tlhela a tizrisa vhanu akuva va hi kongomisa. Hi xikombiso, a tizrisa a “nandzra wa ku dumbeka ni ku tlhazriha” akuva a hi nyika swakuda swa moya akuva hi kota ku teka swiboho swa wutlhazri. (Mat. 24:45) Yehovha a tlhela a tizrisa vavanuna lava nga ni wuswikoti akuva va hi kongomisa. Hi xikombiso, valaviseli va miganga ni vakulu va hi tiyisa va tlhela va hi nyika tidondzro leti hi pfunaka ku lwisana ni swikazratu. Hi wu tlangela ngopfu swinene nkongomiso lowu wa ku dumbeka ka masiku lawa ya wugamu! Leswo swi hi pfuna ku tama hi va vaghanu va Yehovha leswi taka yentxa hi tikholisa hi wutomi swoswi ni nkameni lowu taka.

3. Hi ta kambisisa yini ka xidondzro lexi?

³ Nambitasu, minkama yin’wana swi nga hi kazratela ku landzra minkongomiso ya Yehovha ngopfungopfu loko yi nyikeliwa hi vavanuna lava kalaka va nga hetisekanga. Ha yini? Hikusa va nga hi nyika nkongomiso lowu lwisanaka ni leswi hi swi zrandzraka, minkama yin’wana hi nga ha titwa ingiki a minkongomiso leyi va hi nyikaka yone a yi twisiseki nakone a yi buyi hi ka  Yehovha. Ka swiyimu leswo, hi fanela ku dumba ka leswaku Yehovha hi yene a kongomisaka vhanu vake ni leswaku ku yingiseta minkongomiso yake swi ni matovoko. Kuva hi tiyisa ndlela leyi hi mu dumbaka ha yone Yehovha, ka xidondzro lexi hi ta kambisisa 1) ndlela leyi Yehovha a va kongomisiki ha yone vhanu vake a nkameni wa Bibele, 2) ndlela leyi a hi kongomisaka ha yone swoswi ni 3) ndlela leyi hi buyeliwaka ha yone hi ku tama hi yingiseta minkongomiso yake.

NDLELA LEYI YEHOVHA A KONGOMISIKI VAISRAYELE HA YONE

4-5. Xana Yehovha a swi kombise hi ndlela yini leswaku a a tizrisa Moxe akuva a kongomisa Vaisrayele? (Vona Mufoto ka kapa.)

⁴ Yehovha a hlawule Moxe akuva a kongomisa Vaisrayele leswaku va huma a Egipta, nakone hi makhambi ya ku phindhaphindha a kombise Vaisrayele leswaku hi yene lweyi a a va kongomisa hi ku tizrisa Moxe. Hi xikombiso, Yehovha a a va zrangela hi ku tizrisa tlavi a nhlikanini, ni wusiku a a va zrangela hi ku tizrisa ndzrilo. (Eks. 13:21) Moxe kun’we ni Vaisrayele va landzrelele tlavi ni ndzrilo ku ya tlhasa a lwandle dzra ku pshwuka. Kambe Vaegipta va hlongolise Vaisrayele. Vone va txhave swinene lakakuva va yanakanya leswaku Vaegipta a va ta va dlaya. A va yanakanya leswaku Moxe a nga tekanga xiboho lexinene xa ku va yisa a lwandle dzra ku pshwuka. Kambe a swi nga li hi ndlela leyo hikusa Yehovha a a kongomisa vhanu vake hi ku tizrisa Moxe. (Eks. 14:2) Kutani Yehovha a va huluxe hi ndlela ya ku hlamalisa swinene.—Eks. 14:26-28.

⁵ Ka 40 wa malembe lama landzreliki, Moxe a tame a dumba leswaku Yehovha a a tizrisa tlavi akuva a kongomisa vhanu va Xikwembu Nkulukumba a mananga. a Ku dzringana nkama wa kukazri, Yehovha a yimise tlavi a tendeni dzra Moxe, lani Vaisrayele hinkwavu a va ta kota ku dzri vona. (Eks. 33:7, 9, 10) Yehovha a vulavule na Moxe na a li tlavini, kutani Moxe a byela tiko dzra Israyele leswi Yehovha a mu leletiki swone. (Amaps. 99:7) Vaisrayele a va swi xiya leswaku i Yehovha lweyi a a va kongomisa hi ku tizrisa Moxe.

6. Xana Vaisrayele va yangulise kuyini ka ndlela leyi Yehovha a a va kongomisa ha yone? (Atinhlayo 14:2, 10, 11)

⁶ Lexi vavisaka hi leswaku, ntalu wa Vaisrayele a va nga kholwi leswaku Yehovha a a tizrisa Moxe swanga muyimeli wake. (Dondzra Atinhlayo 14:2, 10, 11.) Hi makhambi ya ku phindaphinda, va yale leswaku i Yehovha lweyi a a tizrisa Moxe leswaku a va kongomisa. Hi kola ka leswo, Yehovha a nga va pfumelelanga kuva va nghena a tikweni dzra xidumbiso.—Atinhl. 14:30.

7. Nyikela swikombiso swa lava yingisetiki nkongomiso wa Yehovha. (Atinhlayo 14:24) (Tlhela u vona ni mufoto.)

⁷ Kambe, van’we ka Vaisrayele va yingisete nkongomiso wa Yehovha. Hi xikombiso, Yehovha a hlaye leswi: ‘Kalebe . . . a ndzri [landzre] hi mbilu yakwe hinkwayu’. (Dondzra Atinhlayo 14:24.) Xikwembu Nkulukumba a hakele Kalebe, hi ku mu pfumelela ku tsrhama ka mbangu lowu a a navela ku tsrhama ka wone, a Kanana. (Yehoš. 14:12-14) A Vaisrayele lava pfumeleliwiki ku nghena a tikweni dzra xidumbiso va hi siyele xikombiso lexinene xa ku yingiseta minkongomiso ya Yehovha. Loko Yoxuwa a ve muzrangeli wa Vaisrayele ntsrhaku ka Moxe, vone a “va mu txhava . . . masiku hinkwawu ya ku hanya kwakwe.” (Yehoš. 4:14) Yehovha a va tovokisile a tlhela a va nyika tiko dzra xidumbiso.—Yehoš. 21:43, 44.

8. Tlhamuxela ndlela leyi Yehovha a kongomisiki ha yone vhanu vake a nkameni wa tihosi. (Tlhela u vona ni mufoto.)

⁸ Ka malembe lama landzreliki, Yehovha a hlawule vatsremi akuva va kongomisa vhanu vake. Ntsrhakunyana ka leswo, hi nkama wa ku fuma  ka tihosi a tlhele a hlawula vaprofeta akuva va kongomisa vhanu vake. A Tihosi ta ku dumbeka ti swi yingisetile swilayo swa vaprofeta. Hi xikombiso, Hosi Davhida hi ku titsrongahata a yingisete xilayo xa muprofeta Natani. (2 Sam. 12:7, 13; 1 Makr. 17:3, 4) Hosi Yehoxafati a yingisete nkongomiso lowu a nyikiwiki wone hi muprofeta Yahaziyele nakone a pfune Vayuda a ku: ‘Dumbani vaprofeta [va Xikwembu Nkulukumba]’. (2 Makr. 20:14, 15, 20) Loko Hosi Ezekiya a kazratekile a kombele mpfunu ka muprofeta Ezaya. (Eza. 37:1-6) Minkama hinkwayu loko tihosi ti landzra nkongomiso wa Yehovha, a a ti tovokisa nakone tiko a dzri sizreleleka. (2 Makr. 20:29, 30; 32:22) Swi nga yentxeka vhanu hinkwavu va swi xiyile leswaku Yehovha a tizrisa vaprofeta leswaku a kongomisa vhanu vake. Nambitasu, ntalu wa Tihosi ni Vaisrayele va tsrhike ku yingiseta Yehovha.—Yer. 35:12-15.

NDLELA LEYI YEHOVHA A KONGOMISIKI HA YONE VAKRISTE VA KU SUNGULA

9. I vamani lava Yehovha a nga va tizrisa akuva va kongomisa vhanu vake a dzaneni dzra ku sungula? (Tlhela u vona ni mufoto.)

⁹ A dzaneni dzra ku sungula N.Y., Yehovha a simeke bandla dzra wukriste. Xana Yehovha a va kongomise hi ndlela yini vakriste va ku sungula? A beke Yesu swanga nhloko ya Bandla. (Efe. 5:23) Kambe Yesu a nga khanelanga ni mudondzrisiwa ha mun’we mun’we a va byela leswi a va fanela ku swi yentxa, kambe a tizrise vapostola kun’we ni vakulu a Yerusalema akuva va zrangela bandla. (Mint. 15:1, 2) Handle ka leswo, ku hlawuliwe vakulu akuva va kongomisa mabandla.—1 Tes. 5:12; Tit. 1:5.

10. a) Xana ntalu wa vakriste va le dzaneni dzra ku sungula va yangulise kuyini ka nkongomiso lowu va wu yamuliki? (Mintizro 15:30, 31) b) Ha yini van’we a nkameni wa Bibele va nga pfumelanga ku kongomisiwa hi vhanu lava Yehovha a va hlawuliki? (Vona bokisi ledzri liki “ Ha Yini Vhanu Van’wana Va Nga Pfumeli Leswaku Yehovha A Tizrisa Vhanu Leswaku A Kongomisa A Vhanu Vake?”)

¹⁰ Xana vakriste va le dzaneni dzra ku sungula va yangulise kuyini? Ntalu wavu va nyonxile hi ku landzra minkongomiso leyi va yi yamukeliki. Nakunene, ‘va nyonxe hi ndlela leyi dzri va tiyisiki ha yone’. (Dondzra Mintizro 15:30, 31.) Kutani ke, Yehovha a va kongomisa hi ndlela yini vhanu vake a masikwini yezru?

NDLELA LEYI YEHOVHA A HI KONGOMISAKA HA YONE NAMUNHLA

11. Nyikela xikombiso xa ndlela leyi Yehovha a va kongomisaka ha yone lava zrangelaka a masikwini yezru.

¹¹ Yehovha a ha tama a kongomisa vhanu vake namunhla. A yentxa leswo hi ku tizrisa Bibele  ni n’wanake lweyi a nga nhloko ya bandla. Xana Xikwembu Nkulukumba a ha tama a tizrisa vhanu akuva va zrangela vhanu vake? Ina. Hi xikombiso, vona leswi yentxekiki ntsrhaku ka 1870. Charles Taze Russell kun’we ni vanghanu vake va twisise leswaku lembe dzra 1914 a ku ta va lembe dzra lisima ka Mfumu wa Xikwembu Nkulukumba. (Dan. 4:25, 26) Va tiseketele ka wuprofeta bya Bibele akuva va tlhasela wugamu lebyo. Xana Yehovha a a seketela wusentxhi lebyi va byi hambiki a Bibeleni? Nakunene a a va kongomisa. Leswi swi yentxekiki hi 1914 swi kombise leswaku a Mfumu wa Xikwembu Nkulukumba wu sungule ku fuma. Ku sungule hi yimpi ya ku sungula ya misava, ku landzrela mavabyi, ku tsrekatsreka ka misava ni ku pfumaleka ka swakuda. (Luk. 21:10, 11) Nakunene, Yehovha a a tizrisa vavanuna lavayani va ku dumbeka akuva va pfuna vhanu vake.

12-13. He wani malulamiselo lama hambiwiki akuva ku yengeseliwa a ntizro wa ku zrezra ni ku dondzrisa vhanu hi nkama wa yimpi ya wubidzri ya misava?

¹² Tlhela u kambisisa leswi yentxekiki hi nkama wa Yimpi ya Wubidzri ya misava. Vamakwezru va ntsindzra wa misava hinkwayu va dondzre Mpfuletelo 17:8, ntsrhaku ka leswo va twisise leswaku a yimpi ya wubidzri ya misava a yi nga ti hi yisa ka Armagedoni, kambe a va swi tiva leswaku ku ta va ni nkama wa ku zrula lani Timboni ta Yehovha a ti ta kota ku zrezrela vhanu vanyingi. Nambileswi a swi tikomba na swi nga twisiseki, a nhlengeletanu ya Yehovha yi sungule xikole xa Giliyadi lexi a xi ta wupfisa vazrumiwa kuva vadondzrisa mimbangwini hinkwayu ya misava. Vazrumiwa lava, a va zrumeliwa matikweni man’wana nambi hi nkama wa yimpi. A nandzra wa ku dumbeka a sungule Xikole xa Wutizreli Bya Le Tilweni b akuva ku wupfisiwa vazrezri hinkwavu va le bandleni leswaku va va vazrezri lavanene. Hi ndlela leyi fanaka, vhanu va Xikwembu Nkulukumba a vo lulamiseliwa ku yentxa ntizro lowu awa ha vilela ku yentxiwa.

¹³ Loko hi xiya leswi yentxekiki, swo vhela swi tikomba leswaku Yehovha a a kongomisa vhanu vake ka nkama luwani wa ku kazrata. Ku sukela ka yimpi ya wubidzri ya misava, vhanu va Yehovha a matikweni manyingi va ti kholisa hi ku zrula ni ntsrhunxeko nkama lowu va zrezraka. Handle ka ku ganaganeka ntizro wu ya wu kula.

14. Ha yini hi fanela ku dumba nkongomiso lowu pfaka ka nhlengeletanu ya Yehovha ni le ka vakulu lava a va hlawuliki? (Mpfuletelo 2:1) (Tlhela u vona ni mufoto.)

 ¹⁴ Namunhla, Huvo Leyi Zrangelaka yi tama yi landzra nkongomiso wa Yehovha. Vone va djula leswaku minkongomiso leyi va yi nyikaka vamakwezru yi va pfuna ku vona mintxhumu hi ndlela ya Yehovha, va tlhela va tizrisa valanguseli va miganga ni vakulu akuva va kongomisa ni ku tiyisa a mabandla. c Vakulu lava vatotiwiki va le “vokweni dzra xinene dzra Kriste.” (Dondzra Mpfuletelo 2:1.) I ntiyiso leswaku vakulu hinkwavu a va hetisekanga nakone va yentxa swihoxo. Moxe na Yoxuwa a va pfa va phazama ku fana ni vapostola. (Atinhl. 20:12; Yehoš. 9:14, 15; Rom. 3:23) Kambe, swa tikomba leswaku Yesu a kongomisa nandzra wa ku dumbeka ni vakulu lava hlawuliwiki, nakone a ta tama a yentxa leswo “ku ya tlhasa ku heleni ka xiyimu lexi xa misava.” (Mat. 28:20) Kutani hi ni swivangelo swinyingi swa kuva hi dumba nkongomiso lowu hi wu kumaka ka vavanuna lava a va hlawuliki kuva va zrangela.

HA PFUNEKA LOKO HI TAMA HI LANDZRELELISISA MINKONGOMISO YA YEHOVHA

15-16. Xana u dondzra yini ka swikombiso swa lava landzriki nkongomiso wa Yehovha?

¹⁵ Loko hi tama hi landzrelela nkongomiso wa Yehovha, ha tikholisa hi matovoko. Hi xikombiso, Andy na Robyn va xi twisise ha hombe xitsratsriyo xa kuva va tama va hanya hi mintxhumu yitsrongo. (Heb. 13:5) Bindzru dzra kone, va swi kotile ku tinyiketela akuva va pfunisa ka ntizro wa ku yaka Tiyindlu ta Wugandzreli. Robyn a li: “Minkama yin’wana a hi tsrhama ka mbangu wa wutsrongo, lani a hi nge na ka ku swekela kone. Ni sindzriseke ku xavisa muntxhini wa ku susa mafoto lowu a ni wu zrandzra ngopfu swinene. Ni dzrile ngopfu loko ni wu xavisa. A ni tiyimisele ku va ni nga kwati hi leswi ni swi tsrhikiki, ku fana Sara nsati wa Abrahamu, kambe ni nyonxa hi leswi ni kotaka ku swi yentxela Yehovha swoswi.” (Heb. 11:15) Xana Andy na Robyn va buyeliwe hi ndlela yini? Robyn a li: “Hi nyonxa ngopfu hi ku tiva leswaku hi nyika Yehovha hinkwaswu leswi hi nga na swone. Nkama lowu hi tizraka ka mintizro leyi Yehovha a hi nyikaka yone, hi kota ku vona ndlela leyi wutomi byi taka va ha yone a misaveni leyimpshwa.” Andy a pfumelelana na swone, a li: “Ha nyonxa leswi hi tizrisaka ntamu ni nkama wezru akuva hi seketela mintizro ya Mfumu.”

 ¹⁶ He yini ndlela yin’wana leyi hi buyeliwaka ha yone loko hi tama hi landzrelela nkongomiso wa Yehovha? Ntsrhaku ka loko a hete xikole, Marcia a a djula ku nghenela ntizro wa wuphayona hi lani a kutxiwiki ha kone. (Mat. 6:33; Rom. 12:11) Yene a li: “Ni zrambiwe ku ya dondzra a Univhersidade mune wa malembe hi mahala. Kambe a ni djula ku yentxela Yehovha leswi yengetelekiki. A matsrhan’weni ya ku va ni yamukela xizrambu lexo, ni hlawule ku yentxa ntizro lowu a wu ta ni pfuna ku kuma mali na ni phayona. Lexi ku ve xin’we xa swiboho leswinene lexi ni xi tekiki. Swoswi, ni tizra swanga phayona dzra nkama hinkwawu. Leswi ni hetaka nkama wutsrongo ka ntizro wa ku tihanyisa swi ni pfumelela ku pfunisa ka ntizro wa Betele ni ku yentxela Yehovha mintxhumu yin’wana ya lisima.”

17. Hi wani matovoko man’wana lawa hi ma kumaka hi ku landzra nkongomiso wa Yehovha? (Ezaya 48:17, 18)

¹⁷ Minkama yin’wana nhlengeletanu yi hi nyika switsratsriyo leswi hi sizrelelaka. Hi xikombiso, hi biwa ndleve ka ku zrandzra mali ni ku yentxa mintxhumu leyi nga hi sivelaka ku yingiseta milawu ya Yehovha. Ka swiyimu leswi, hi buyeliwa ntsena loko hi yingiseta milawu ya Yehovha nakone swi hi pfuna ku va ni lipfalu ledzri basiki ni ku fambela kule ni mintxhumu leyi nga hi petaka a nghozini. (1 Tim. 6:9, 10) Loko hi yentxa leswo, hi ta gandzrela Yehovha hi mbilu hinkwayu ku nga wugandzreli lebyi tisaka ku nyonxa, ku zrula ni ku yaneliseka.—Dondzra Ezaya 48:17, 18.

18. Ha yini u tiyimiseli ku tama u landzra nkongomiso wa Yehovha?

¹⁸ Handle ka ku ganaganeka Yehovha a ta tama a tizrisa vhanu va nyama akuva va nyikela minkongomiso ka nhlomulo lowukulu ni ka Mfumu wa 1000 wa malembe. (Amaps. 45:16) Xana hi ta tama hi landzra nkongomiso nambiloko swi sindzrisa ku va hi tsrhika mintxhumu leyi hi yi zrandzraka? Swi ta hi nabyalela loko ku sukela swoswi hi landzra nkongomiso wa Yehovha. Xileswo, a hi tameni hi landzra minkongomiso ya Yehovha, ku patsra ni leyi a hi nyikaka hi ku tizrisa vavanuna lava hi zrangelaka. (Eza. 32:1, 2; Heb. 13:17) Nkama lowu hi yentxaka leswo, hi ta va ni swivangelo leswi twalaka swa ku dumba Mukongomisi wezru Yehovha, yene a hi yentxa hi fambela kule ni mintxhumu leyi nga ha honaka wuxaka byezru na yene a tlhela a hi kongomisa ka wutomi lebyi nga helikiki.