1-2. A ku li mani Tsadok? (1 Makronika 12:22, 26-28)

 YANAKANYA hi leswi, vhanu va ku tlula 340.000 wa vavanuna va tlhanganile loko Davhida a ve hosi ya tiko hinkwadzru dzra Israyele. A xitsrhungu xi tsrhame tinhaveni kusuhi na Hebroni ku dzringana masiku mazrazru. A va nyonxe ngopfu swinene, va bula, va hlekelela ni ku yimbelela tinsimu ta ku dzrumisa Yehovha. (1 Makr. 12:39) Ka xitsrhungu lexo a ku ni mumpshwa lweyi a vitaniwaka Tsadok, Yehovha a yentxe leswaku hi swi tiva leswaku Tsadok a a li makazri ka xitsrhungu lexiyani. (Dondzra 1 Makronika 12:22, 26-28.) Kambe a ku li mani ­Tsadok?

² Tsadok kuve muprista lweyi a tizriki kun’we na muprista Abiatar. Yehovha a nyike Tsadok wutlhazri lebyikulu ni wuswikoti bya ku twisisa ku zrandzra kwake. (2 Sam. 15:27) Loko vhanu va vilela switsratsriyo leswinene a va ya ka Tsadok. Kambe a tlhele a va wanuna wa xixixi. Ka xidondzro lexi, hi ta kambisisa tsrhamela ledzri dzra xixixi, ledzri Tsadok a a li na dzrone.

3. (a) Ha yini hi fanela ku va ni xixixi? (b) Hi ta vona yini ka xidondzro lexi?

³ A masikwini lawa ya wugamu, Sathana a yentxa hinkwaswu leswi a nga swi kotaka akuva a hlasela vhanu va Yehovha. (1 Pet. 5:8) Nkama lowu hi yimelaka leswaku Yehovha a helisa Sathana kun’we ni misava leyi ya ku biha, hi fanela ku va ni xixixi. (Amaps. 31:24) Swoswi a hi voneni swivangelo swizrazru leswi hi nga yetiselaka xixixi xa Tsadok ha swone.

SEKETELA MFUMU WA XIKWEMBU NKULUKUMBA

4. Ha yini swi djula kuva vhanu va Yehovha va va ni xixixi loko va djula ku seketela Mfumu wa Xikwembu Nkulukumba? (Tlhela u vona ni mufoto.)

⁴ Swanga vhanu va Yehovha, hi seketela Mfumu wa Xikwembu Nkulukumba hi mbilu hinkwayu. Hakanyingi, akuva hi kota ku yentxa leswo swi djula xixixi. (Mat. 6:33) Hi xikombiso, ka misava leyi ya ku biha, swi djula hi va ni xixixi akuva hi yingiseta Yehovha ni ku zrezra madzrungula lamanene ya Mfumu. (1 Tes. 2:2) Nakone swi djula xixixi akuva hi tama hi va ni wukalatlhelo nkama lowu misava leyi yi yaka yi yavana hi kola ka politika. (Yoh. 18:36) Malandzra manyingi ya Yehovha ma luzekeliwe hi mintxhumu ya wone, ma xanisiwa ni ku petiwa madjele hi ku yala ku patsreka ka politika ni ku ya wusotxhweni.

5. Ha yini swi djule kuva Tsadok a va ni xixixi akuva a seketela Davhida?

⁵ Tsadok a nga yanga a Hebroni ntsena akuva a ya patsreka ka nkhuvu lowu hambiwiki loko Davhida a va hosi. Kambe a ye Hebroni na a hlomile nakone a a tibekisele ku ya lwa yimpi. (1 Makr. 12:38) Yene a a tiyimisele ku seketela Davhida ni ku lwa ni valala va Israyele. Swi nga yentxeka Tsadok a a li sotxha ledzri a dzri nge na mfambu ku tlula masotxha lamambeni, kambe yene a a ni xixixi.

6. Xana Davhida a ve xikombiso lexinene xa xixixi ka Tsadok hi ndlela yini? (Amapsalma 138:3)

⁶ Xana Tsadok a dondzre hi ndlela yini ku va ni xixixi? Yene a a heta nkama ni vavanuna va ntamu ni lava nga ni xixixi, xileswo a dondzre ka xikombiso xavu. Hi xikombiso, Davhida a a li muzrangeli ni sotxha ledzri nga ni xixixi, xileswo Vaisrayele hinkwavu va mu seketelile kuva a va hosi. (1 Makr. 11:1, 2) Minkama hinkwayu Davhida a a dumba Yehovha akuva a lwa ni valala vake. (Amaps. 28:7; dondzra Amapsalma 138:3.) Kambe a ku ni swikombiso swin’wana leswi Tsadok a a ta swi yetisela. Vavanuna va ku fana na Yehoyada kun’we ni n’wanake Benaya lweyi na yene a a li musotxha, ku patsra ni 22 wa vazrangeli lava na vone a va seketela Davhida. (1 Makr. 11:22-25; 12:26-28) Davhida a ve hosi hi kola ka nseketelo wa vavanuna lava va ku dumbeka nakone va yentxe hinkwaswu akuva va mu sizrelela.

7. (a) He swini swikombiso swa le masikwini yezru, leswi nga hi pfunaka ku va ni xixixi? (b) Hi ku ya hi vhidiyu, u dondzre yini ka xikombiso xa makwezru Nsilu?

⁷ Na hine hi nga va ni xixixi, loko hi dondzra hi swikombiso swa malandzra ya Yehovha lawa ma kombisiki xixixi nakone ma seketeliki Mfumu wa Xikwembu Nkulukumba. Hosi yezru Yesu Kriste, a yale ku seketela politika dzra misava leyi ya Sathana. (Mat. 4:8-11;Yoh. 6:14, 15) Yesu minkama hinkwayu a dumbe Yehovha akuva a va ni xixixi ni ntamu lowu vilelekaka akuva a yentxa leswi nga swinene. Ni namunhla, hi ni swikombiso swa vamakwezru vanyingi lava nga vampshwa, lava yaliki ku ya a wusotxhweni ni ku tipatsra ka politika. Swi ngo yini loko wo dondzra mimfambu ya vampshwa lava ka pajina dzrezru dzra jw.org? a

PFUNA VAMAKWENU

8. I ka swiyimu swini lani swi djulaka kuva vakulu va va ni xixixi?

⁸ Hine vhanu va Yehovha ha swi zrandzra ku pfunana. (2 Kor. 8:4) Kambe minkama yin’wana akuva hi kota ku yentxa leswo swi djula hi va ni xixixi. Hi xikombiso, hi nkama wa yimpi vakulu va bandla va pfuna vamakwezru hi ku va nyika mpfunu hi tlhelo dzra moya ni ku va nyika mpfunu lowu va wu vilelaka loko swi koteka. A vakulu va va zrandzra vamakwezru, xileswo va tiyimisele ku va pfuna nambiloko ku yentxa leswo swi va beka nghozini. (Yoh. 15:12, 13) Loko vakulu va yentxa leswo, hi nga hlaya leswaku va yetisela xikombiso xa xixixi xa Tsadok.

9. Hi ku ya hi 2 Samuel 15:27-29, Davhida a kombele Tsadok kuva a yentxa yini? (Tlhela u vona ni mufoto.)

⁹ Wutomi bya Davhida a byi li khombyeni, n’wanake Absalomu a a djula ku mu dlaya ni ku va hosi a mbangwini wake. (2 Sam. 15:12, 13) Swi djule ku va Davhida hi ku kahlula a huma a Yerusalema. Yene a byele malandzra yake a ku: ‘Pfukani hi tsrutsruma, hi ku va hi nga ka hi nga swi koti ku huluka mahlweni ka Absalomu!’ (2 Sam. 15:14) Na malandzra yake ma ha tsrutsruma, Davhida a xiye leswaku a ku fanela ku sala mhunu a Yerusalema akuva a ta tiva makungu ya Absalomu a va a mu tivisa wone. Xileswo, a zrumele Tsadok kun’we ni vaprista van’wana akuva va yentxa ntizro lowo. (Dondzra 2 Samuel 15:27-29.) Kambe vone a va fanela ku tivonela ngopfu hikusa leswi Davhida a va kombeliki swone a swi ta va beka khombyeni. Leswi Absalomu a a li wanuna wa ku tibyela, wa wukanganyisi nakone a a zrandzra ku tidzrihisela, yanakanya leswi a a ta swi yentxa hi Tsadok kun’we ni vaprista van’wana loko a e gungula leswaku va yima na Davhida!

10. Xana Tsadok ni van’wana va sizrelele Davhida hi ndlela yini?

¹⁰ Davhida a a ni kungu, kambe akuva kungu ledzro dzri humelela a a vilela mpfunu wa Tsadok ni munghanu mun’wana wa ku dumbeka, Huxayi. (2 Sam. 15:32-⁠37) Huxayi a yentxe ingiki a yima na Absalomu, a tlhela a mu nyika tindlela ta leswi a a ta mu hlaselisa xiswone Davhida. Kambe ku hlaya ntiyiso, leswo a swi ta nyika nkama Davhida wa kuva a tilulamisela. Loko Absalomu a pfumele makungu ya Huxayi, Huxayi a ye byela Tsadok na Abiyatari hi kungu ledzri Absalomu a a li na dzrone. (2 Sam. 17:8-16) Kolanu va kote ku zrumela zritu ka Davhida, va mu byela leswi Absalomu a kunguhatiki ku swi yentxa. (2 Sam. 17:17) Hi ku pfuniwa hi Yehovha, Tsadok ni vaprista van’wana va swi kotile ku sizrelela wutomi bya Davhida.—2 Sam. 17:21, 22.

11. Hi nga xi yetisela hi ndlela yini xikombiso xa xixixi xa Tsadok nkama lowu hi pfunaka vamakwezru?

¹¹ Xana hi nga xi yetisela hi ndlela yini xikombiso xa Tsadok ni ku va ni xixixi loko vamakwezru bandleni va va khombyeni nakone va vilela mpfunu wezru? (1) Landzra minkongomiso. Nkama lowu hi nga khombyeni i swa lisima swinene ku bekisa wumun’we. Nakone swi djula hi yingiseta minkongomiso leyi pfaka hi ka zrwavi dzra lomu hi tsrhamaka kone. (Heb. 13:17) Nkama wun’wana ni wun’wana vakulu va fanela ku hi dzrimuxa minkongomiso ya nhlengeletanu mayelanu ni ku tilulamisela timhangu ta ntumbuluku. (1 Kor. 14:33, 40) (2) Vana ni xixixi kambe vana ni wuxiyaxiya. (Amapr. 22:3) Yanakanya na u nga si teka xiboho. U nga kumeki khombyeni na swi nga vileleki. (3) Dumba Yehovha. Dzrimuka leswaku a zron’weka swinene hi wuhlayiseki byaku ni bya vamakwezru. Yehovha a nga ku pfuna kuva u nyikela nseketelo ni nsizrelelo lowu vamakwezru va wu vilelaka.

12-13. U dondzre yini ka mfambu wa Viktor na Vitalii? (Tlhela u vona ni mufoto.)

¹² Vona xikombiso xa Viktor na Vitalii, ku nga vamakwezru lava pfunisiki ka ku yavela vamakwezru swakuda ni mati a Ucrânia. Viktor a li: “Hi djuleteli swakuda a mimbangwini hinkwayu. Minkama yinyingi a hi twa swibalesa kusuhi na hine. Makwezru lweyi a a ni xitolo a hi hanane swakuda. Swakuda leswo swi pfune vamakwezru vanyingi ku dzringana nkama wa kukazri. Nkama lowu hi pakelaka swakuda ka kamiyawu ku we bomba kolomu ka 20 wa mametru kusuhi na hine. Siku ledzriyani ni kombele Yehovha kuva a ni nyika xixixi xa ku tama ni pfuna vamakwezru.”

¹³ Vitalii a li: “Swi djule kuva hi va ni xixixi lexikulu. Liyendzro dzranga dzra ku sungula dzri teke 12 wa mawora. A ni khongota ka Yehovha nkama hinkwawu.” Vitalii a kombise xixixi, kambe a tlhele a va ni wuxiyaxiya. Yene a li: “Ni kombele Yehovha kuva a ni nyika wutlhazri ni ku dzringanisela. A ni fambisa ntsena ka switaratu leswi a wuhosi a byi swi pfumelela kuva hi swi tizrisa. Ku vona ndlela leyi vamakwezru a va tizrisana ha yone, swi tiyise lipfumelo dzranga. Va hi pfune ku susa swihinga leswi a swi pfale switaratu, a va hlengeleta mpahla va tlhela va hi buyisela yone ku patsra ni swakuda, nakone a va hi pfuna ku swi pakela ka kamiyawu, va hi nyika swakuda ni ku hi zruzrela ka liyendzro dzrezru.”

TAMA U DUMBEKA KA YEHOVHA

14. Hi titwisa kuyini loko mhunu lweyi hi mu zrandzraka a tsrhika ku tizrela Yehovha?

¹⁴ Swin’we swa swiyimu swa ku kazrata ku swi tiyiselela hi loko xaka dzra kukazri kumbe munghanu wa le kusuhi a tsrhika ku tizrela Yehovha. (Amaps. 78:40; Amapr. 24:10) Loko lizrandzru dzrezru hi mhunu lweyo dzri li dzrikulu hi kone swi yaka swi kazrata ku swi tiyiselela. Loko a li leswaku u same u va ka xiyimu lexo, xikombiso xa Tsadok xa ku dumbeka xi nga ku tiyisa.

15. Ha yini swi djule xixixi kuva Tsadok a tama a dumbeka ka Yehovha? (1 Tihosi 1:5-8)

¹⁵ Tsadok a tame a dumbeka ka Yehovha, nambiloko munghanu wake Abiyatari a teke xiboho xa kuva a nga ha dumbeki. Leswo swi yentxeke na mfumu wa Davhida wu li kusuhi ni ku hela. Loko Davhida a li kusuhi ni ku fa, n’wanake Adoniya a zame ku mu wutlela wuhosi, nambileswi Yehovha a a byi dumbise Solomoni. (1 Makr. 22:9, 10) Abiyatari a lange ku seketela Adoniya. (Dondzra 1 Tihosi 1:5-8.) Hi ndlela leyo, Abiyatari a nga dumbekanga, ku nga li ntsena ka Davhida, kambe ni ka Yehovha. Wa yi yanakanya ndlela leyi Tsadok a vavisekiki ni ku khunguvanyeka ha yone? Va tizre xikan’we na Abiyatari swanga vaprista ku tlula 40 wa malembe. (2 Sam. 8:17) Va zrwale kun’we a “areka dzra Xikwembu Nkulukumba”. (2 Sam. 15:29) Ha wubidzri byavu va seketele Davhida swanga hosi yavu nakone va yentxe swinyingi swanga vhanu va Yehovha.—2 Sam. 19:11-14.

16. I yini lexi pfuniki Tsadok akuva a tama a dumbeka?

¹⁶ Tsadok, a teke xiboho xa ku tama a dumbeka ka Yehovha nambiloko Abiyatari a hlawule ku kala a nga ha dumbeki. Davhida a a swi tiva leswaku minkama hinkwayu a nga mu dumba Tsadok. Nkama lowu Davhida a gunguliki wukanganyisi bya Adoniya a hlawule Tsadok, Natani na Benaya akuva va tota Solomoni swanga hosi. (1 Tih. 1:32-34) Handle ka ku ganaganeka, Tsadok a tiyisiwe ngopfu hi xikombiso xa Natani ni xa malandzra man’wana ya Yehovha lama seketeliki hosi Davhida hi ku dumbeka. (1 Tih. 1:38, 39) Loko Solomoni a ve hosi, “a beke Tsadok swanga muprista a xikhundleni xa Abiyatari”.— 1 Tihosi 2:35.

17. U nga mu yetisela hi ndlela yini Tsadok loko mhunu lweyi u mu zrandzraka a tsrhika ku tizrela Yehovha?

¹⁷ Xana u nga mu yetisela hi ndlela yini Tsadok loko mhunu lweyi u mu zrandzraka a tsrhika ku tizrela Yehovha? Komba Yehovha leswaku u hlawule ku tama u dumbeka kwake. (Yehoš. 24:15) Yehovha a ta ku nyika xixixi lexi u xi vilelaka akuva u tama u yentxa leswi nga swinene. Khongota ka Yehovha nakone tama u va munghanu wa lava dumbekaka ka Xikwembu Nkulukumba wezru. Yehovha a ku nyika lisima ngopfu ku dumbeka kwaku nakone a ta ku hakela hi kola ka leswo.—2 Sam. 22:26.

18. U dondzre yini ka leswi humeleliki Marco na Sidse?

¹⁸ Vona leswi humeleliki Marco ni nkatake Sidse. Loko vanavu vabidzri vaxisati va kulile, va tsrhike ku tizrela Yehovha. Marco a li: “Loko u ni vana, u va zrandzra ngopfu swinene. Nakone u yentxa hinkwaswu leswi u nga swi kotaka akuva u va sizrelela. Xileswo, swi tlhava mbilu loko va tsrhika ku tizrela Yehovha. Kambe minkama hinkwayu Yehovha awa hi pfuna ku tiyisela, hikusa loko ni hela ntamu nkatanga a va na a tiyile nakone loko yene a hela ntamu mine ni tiyile.” Sidse a li: “A hi tava hi nga swi kotanga ku tiyiselela xiyimu lexiyani loko Yehovha a a nga hi nyikanga ntamu wa ku xi tiyiselela. Ni khunguvanyeki ngopfu swinene nakone a ni yanakanya leswaku vananga va tsrhike ntiyiso hi mhaka yanga, xileswo ni tiphofule ka Yehovha hi xikhongoto. Ntsrhaku ka nkamanyana makwezru mun’we wa xisati lweyi hi kalaniki malembe manyingi a te ta khanela na mine, a ni barasara a va a ni lavisa matihlweni a ku: ‘Dzrimuka leswi Sidse, leswi swi yentxekiki a hi nandzru waku.’ Hi mpfunu wa Yehovha na swi kota ku tama ni nyonxa a ntizrweni wake.”

19. Xana u tiyimiseli ku yentxa yini?

¹⁹ Yehovha a djula leswaku malandzra yake hinkwawu ma va ni xixixi ku fana na Tsadok. (2 Tim. 1:7) Kambe Yehovha a nga djuli leswaku hi dumba ntamu wezru. Yene a djula leswaku hi dumba ntamu lowu yene a hi nyikaka wone. Kutani loko u kumeka ka xiyimu lexi djulaka u va ni xixixi kombela mpfunu wa Yehovha. U nga tiyiseka leswaku yene a ta ku pfuna akuva u va ni xixixi, ku fana na Tsadok!—1 Pet. 5:10.