NHLOKOMHAKA YA XIDONDZRO 28
LISIMU 123 Titsrongahate Ka Nawu Wa Yehovha
Xana Wa Swi Kota Ku Hambanisa Ntiyiso Ka Madzrimi?
“Yimani mi tiya, na mi tikhame masenge hi bandhi dzra ntiyiso.”—EFE. 6:14.
NKONGOMETO
Ku kota ku vona ku hambana ka ntiyiso lowu hi wu dondzraka ka Yehovha ni madzrimi ya Sathana kun’we ni vakaneti vezru.
1. U titwisa kuyini hi kola ka ntiyiso?
SWANGA vhanu va Yehovha, ha yi zrandzra mintiyiso leyi nga Bibeleni. Nakone hi seketela lipfumelo dzrezru ka mintiyiso yoleyo. (Rom. 10:17) Ha tiyiseka leswaku Yehovha a simeke bandla dzra wukriste swanga “nsika tlhelo xiseketelo xa ntiyiso”. (1 Tim. 3:15) Nakone hi nyonxa ngopfu hi ku seketela “lava va [hi] zrangelaka”, phela vavanuna lava hi vone va hi tlhamuxelaka mintiyiso ya le Bibeleni ni ku hi pfuna ku yentxa ku zrandzra ka Xikwembu Nkulukumba.—Heb. 13:17.
2. Hi ku ya hi Yakobe 5:19, i yini leswi nga ha hi humelelaka ntsrhaku ka ku dondzra ntiyiso?
2 Kambe, ntsrhaku ka ku dondzra Bibele ni ku pfumela leswaku hi fanela ku kongomisiwa hi nhlengeletanu ya Yehovha, loko hi nga tivoneli hi nga ha hambuka. (Dondzra Yakobe 5:19.) Sathana a nga nyonxa ngopfu swinene loko hi tsrhika nhlengeletanu ya Yehovha kun’we ni ku dondzra Bibele.—Efe. 4:14.
3. Ha yini hi fanela ku tama hi yingiseta ntiyiso? (Vaefesa 6:13, 14)
3 Dondzra Vaefesa 6:13, 14. Ku nga li khale Sathana a ta hangalasa madzrimi a va a yentxa leswaku matiko ma lwisana ni vhanu va Yehovha. (Mpful. 16:13, 14) Nakone ha swi tiva leswaku Sathana a ta yentxa hinkwaswu akuva a zama ku kanganyisa vhanu va Xikwembu Nkulukumba. (Mpful. 12:9) Xileswo, i swa lisima kuva ku sukela swoswi hi tiva ku hambanisa ntiyiso ka madzrimi ni ku tiyimisela ku tama hi yingiseta ntiyiso. (Rom. 6:17; 1 Pet. 1:22) Leswo, hi leswi hi swi vilelaka akuva hi kota ku huluka ka nhlomulo lowukulu!
4. Hi ta vona yini ka xidondzro lexi?
4 Ka xidondzro lexi hi ta vona matsrhamela mabidzri lawa hi fanelaka ku va na wone loko hi djula ku tiva ntiyiso lowu nga Bibeleni ni ku yamukela nkongomiso wa nhlengeletanu ya Xikwembu Nkulukumba. Ntsrhaku ka leswo, hi ta vona mintxhumu yizrazru leyi hi fanelaka ku yi yentxa loko hi djula ku tama hi khomelela a ntiyisweni.
MATSRHAMELA LAWA HI FANELAKA KU VA NA WONE AKUVA HI TIVA NTIYISO
5. Xana ku txhava Yehovha swi hi pfunisa kuyini ku tiva ntiyiso?
5 Ku txhava Yehovha. Ku txhava Yehovha swi tlhamuxela ku mu zrandzra ngopfu lakakuva hi nga yentxi ntxhumu lowu nga ha mu khunguvanyisaka. Xileswo, hi djula ku swi tiva ha hombe leswi nga swinene ni leswi bihiki, leswi nga ntiyiso ni leswi nga madzrimi, akuva hi kota ku yamukeliwa ha Yehovha. (Amapr. 2:3-6; Heb. 5:14) Hakayinyingi, leswi vhanu va swi zrandzraka a swi mu nyonxisi Yehovha, xileswo a hi fanelanga hi pfumelela ku txhava vhanu swi hi yentxa hi khunguvanyisa Yehovha.
6. Ku txhava loku vavanuna lavayani va 10 va Israyele a va li na kone, ku va yentxe va soholota ntiyiso hi ndlela yini?
6 Loko hi txhava ngopfu vhanu ku tlula ndlela leyi hi mu txhavaka ha yone Xikwembu Nkulukumba, hi nga ha tsrhika ntiyiso. Vona xikombiso xa 12 wa Vaisrayele lava zrumiwiki ku ya kambela tiko ledzri Yehovha a dumbisiki ku va nyika dzrone. 10 wa vone, a va va txhava ngopfu Vakanana ku tlula ku zrandzra ngopfu Yehovha. Va hlaye leswi ka Vaisrayele van’wana: ‘A hi swi koti ku ya lwa ni tiko, hikuva dzra hi tlula hi ntamu.’ (Atinhl. 13:27-31) Hi ku ya hi vonela dzra ximhunu, a Vakanana a va ni ntamu ngopfu ku tlula Vaisrayele, nakunene leswo a a li ntiyiso. Muisrayele mun’wana ni mun’wana lweyi a a yanakanya leswaku a a nge ti swi kota ku hlula valala vavu, mhunu yelweyo a a beka Yehovha hi tlhelo. Vavanuna lava 10 a va fanela ku yanakanyisisa ngopfu hi leswi Yehovha a a djula leswaku va swi yentxa. Nakone a va fanela ku tlhela va yanakanyisisa hi leswi Yehovha kutani a va yentxeliki swone. Kutani a va ta swi xiya leswaku ntamu lowu Vakanana a va li na wone a wu nga li wa ntxhumu loko wu pimanisiwa ni ntamu lowukulu lowu Yehovha a nga na wone. Ku hambana ni vavanuna lavayani lava a va nge na lipfumelo, Yoxuwa na Kalebe a va djula ku yamukeleka ka Yehovha. Vone va hlaye leswi ka tiko dzra Israyele: ‘Loko Hosi [Yehovha] yi hi tsrhavela yi ta hi beka ku tiko ledzro, yi hi nyika tiko ledzri.’—Atinhl. 14:6-9, Bibele Dzra Ku Xwenga, BX.
7. Xana hi nga yi tiyisisa kuyini ndlela leyi hi mu hloniphaka ha yone Yehovha? (Tlhela u vona ni mufoto.)
7 Akuva hi tiyisa ndlela leyi hi mu hloniphaka ha yone Yehovha, hi fanela ku yanakanyisisa ngopfu hi tindlela ta ku mu nyonxisa ka xiboho xin’wana ni xin’wana lexi hi xi tekaka. (Amaps. 16:8) Loko u dondzra wudzrunguli bya Bibele tivutise leswi: ‘Loko a ni li ka xiyimu lexi, he xini xiboho lexi a ni ta xi teka?’ Hi xikombiso, tiyanakanyi na u yingela vavanuna lavayani va 10 na va nyikela wudzrunguli bya ku biha mayelanu ni tiko ledzri va dzri kambeliki. Xana a u ta pfumelela ku txhava vhanu ku ku yentxa u kholwa leswi vavanuna lavayani va 10 va swi hlayiki, kumbe a u ta pfumelela kuva lizrandzru ledzri u nga na dzrone ha Yehovha ni ku tiyimisela ku yentxa ku zrandzra kwake ku ku yentxa u tiya ku tlula ku txhava loko? A Vaisrayele hinkwavu a va nga kholwi ka leswaku leswi Kalebe na Yoxuwa a va swi hlaya a ku li ntiyiso. Hi kola ka leswo, va luzekeliwe hi ndjombo ya ku nghena a tikweni dzra xidumbiso.—Atinhl. 14:10, 22, 23.
A u ta kholwa ka mani? (Vona yava 7)
8. He dzrini tsrhamela ledzri hi fanelaka ku tikazratela ku va na dzrone nakone ha yini?
8 Ku titsrongahata. Yehovha a tlhamuxela ntiyiso ka vhanu lava titsrongahataka. (Mat. 11:25) Hi ku titsrongahata ha wu yamukela mpfunu wa kuva hi dondzra ntiyiso. (Mint. 8:30, 31) Nambitasu, hi fanela ku tivonela akuva hi nga tikulisi. Loko hi tikulisa swi nga hi yentxa hi vona mavonela yezru ma li ya lisima ngopfu swinene ku tlula minsiya ya milawu ya Bibele ni minkongomiso leyi pfaka hi ka nhlengeletanu ya Yehovha.
9. Xana hi nga tama hi va lava titsrongahataka hi ndlela yini?
9 Akuva hi tama hi titsrongahata, hi fanela ku dzrimuka leswaku hi vatsrongo ngopfu loko hi tidzringanisa na Yehovha. (Amaps. 8:3,4) Hi fanela ku tlhela hi khongota ka Yehovha hi kombela kuva a hi pfuna ku va lava titsrongahataka ni ku tlhela hi pfumela ku dondzrisiwa. A ta hi pfuna ku zrangisa mimpimiso yake leyi nga Bibeleni ni leyi pfaka hi ka nhlengeletanu yake a matsrhan’wini ya mimpimiso yezru. Nkama lowu u dondzraka Bibele, xiyisisa ndlela leyi Yehovha a va zrandzraka ha yone vhanu lava titsrongahataka ni ndlela leyi a va nyenyaka ha yone lava tikulisaka ni lava tibyelaka. Tikazrateli kuva lwa titsrongahataka loko u yamukela xiyavelo lexi nga ha ku yentxaka u va ni wulawuli bya kukazri.
NDLELA LEYI HI NGA KHOMELELAKA HA YONE KA NTIYISO
10. I vamani lava Yehovha a va tizrisiki kuva va kongomisa vhanu vake?
10 Tama u dumba nkongomiso wa nhlengeletanu ya Yehovha. A Israyeleni wa khale, Yehovha a tizrise Moxe na Yoxuwa akuva va nyikela minkongomiso ka vhanu vake. (Yehoš. 1:16, 17) Vaisrayele a swi va fambela ha hombe nkama lowu na va ha vona vavanuna lavayani swanga vayimeli va Yehovha Xikwembu Nkulukumba. Ntsrhaku ka malembe manyingi, loko ku vumbiwe bandla dzra wukriste hi khambi dzra ku sungula, a vapostola va 12 hi vone a va nyikela minkongomiso. (Mint. 8:14, 15) Hi ku famba ka nkama, ka ntlawa wolowo ku patsreke vakulu van’wana va Yerusalema. Leswi a va landzra kongomiso wa vavanuna lavayani va ku dumbeka “a mabandla a ma ya mahlweni ma tiyisiwa a lipfumelweni ma tlhela ma yandzra siku ni siku”. (Mint. 16:4,5) Na hine namunhla ha tovokosiwa loko hi yamukela minkongomiso leyi pfaka ka nhlengeletanu ya Yehovha. Xana Yehovha a nga titwisa kuyini loko hi nga va yingiseti lava a va bekiki kuva va hi kongomisa? Akuva hi kuma nhlamulo ya xivutiso lexi, a hi voneni leswi yentxekiki loko Vaisrayele va ya tikweni dzra xidumbiso.
11. Ku humelele yini hi lava kalaka va nga mu hloniphanga Yehovha hi ku pfukela Moxe, ku nga lweyi a mu hlawuliki kuva a kongomisa vhanu vake? (Tlhela u vona ni mufoto.)
11 Na Vaisrayele va li ndleleni ya ku ya tikweni dzra xidumbiso, vavanuna lava a va tiviwa ngopfu swinene va sungule ku dzrela Moxe ni xiyavelo lexi Yehovha a a mu nyike xone. Vone va te: ‘Nhlengeletanu hinkwayu, a vhanu hinkwavu, [ku nga li Moxe ntsena] va xwengile, Yehovha a le makazri kwavu.’ (Atinhl. 16:1-3) Nambileswi a ku li ntiyiso leswaku ‘nhlengeletanu hinkwayu’ a yi xwengile mahlweni ka Xikwembu Nkulukumba, Yehovha a hlawule Moxe akuva a zrangela tiko dzrake. (Atinhl. 16:28) Loko va khanela ku biha hi Moxe, vaxandzruki lava a va va na va khanela ku biha hi Yehovha hi ku kongoma. Vone a va nga yanakanyi hi leswi Yehovha a a swi djula; a vo yanakanya ntsena hi leswi vone a va swi djula, ku nga ntamu ni ndhuma. Xikwembu Nkulukumba a helise vavanuna hinkwavu lava xandzrukiki, ku patsra ni vhanu hinkwavu lava va va seketeliki. (Atinhl. 16:30-35, 41, 49) Hi lani ku fanaka namunhla, ha swi tiva leswaku Yehovha a nga va yamukeli hinkwavu lava kalaka va nga yi landzri minkongomiso ya nhlengeletanu yake.
I mani lweyi a u ta mu seketela? (Vona yava 11)
12. Ha yini hi fanela ku dumba nhlengeletanu ya Yehovha minkama hinkwayu?
12 Minkama hinkwayu hi nga yi dumba nhlengeletanu ya Yehovha. Loko ku va ni xivileleko xa ku txintxa ndlela leyi hi yi twisisaka ha yone mintiyiso ya kukazri ya Bibele kumbe ndlela leyi hi tizrelaka Yehovha ha yone, lava zrangelaka ka nhlengeletanu yake a va pimisi kabidzri akuva va hamba ku txintxa koloko. (Amapr. 4:18) Va yentxa leswo hikusa leswi va swi djulaka ngopfu ku swi yentxa, i ku nyonxisa Yehovha. Va tlhela va yentxa hinkwaswu leswi va nga swi kotaka akuva va seketela swiboho leswo a Zritwini dzra Xikwembu Nkulukumba nakone leswo hi leswi malandzra hinkwawu ya Yehovha ma fanelaka ku swi yentxa.
13. I yini “xikombiso xa mazritu lama pfunaka” nakone hi fanela ku yentxa yini ha wone?
13 “Yana mahlweni u landzrela xikombiso xa mazritu lama pfunaka.” (2 Tim. 1:13) A “xikombiso xa mazritu lama pfunaka” ku hlayiwa tidondzro ta wukriste leti kumekaka a Bibeleni. (Yoh. 17:17) Tidondzro leto i xisekelo xa hinkwaswu leswi hi swi kholwaka. Nhlengeletanu ya Yehovha yi hi dondzrisa kuva hi khomelela ka tidondzro leto. Loko hi yentxa leswo hi ta tovokisiwa.
14. Xana van’we va vakriste a nkameni wa khale, va tsrhike ku landzra “xikombiso xa mazritu lama pfunaka” hi ndlela yini?
14 I yini leswi nga ha humelelaka loko ho titsravukanisa ni “xikombiso xa mazritu lama pfunaka”? Vona xikombiso. A dzaneni dzra ku sungula, van’we va vakriste a va hangalasa madzrimi ya leswaku a siku dzra Yehovha kutani a dzri tlhasile. Swi nga yentxeka va yamukele papela ledzri a va pimisa leswaku ku ve mupostola Pawulo lweyi a dzri tsraliki na dzri hlaya leswo. Kutani na va nga dzri kambelanga leswaku a ku li ntiyiso kumbe im-him, vakriste van’wana va le Tesalonika va kholwile ka mhaka leyo nakone va sungule ku hangalasa mhaka leyi ka van’wana. Loko a va dzrimukile leswi Pawulo a va dondzrisiki swone loko a ha li na vone, inhaka va nga kanganyisiwanga. (2 Tes. 2:1-5) Pawulo a a va byelile leswaku a va nga fanelanga ku kholwa hinkwaswu leswi va swi twaka, nakone akuva a va pfuna ka leswi a swi ta va humelela ka makhambi lama landzrelaka, Pawulo a gamise papela dzrake dzra wubidzri ledzri yaka ka Vatesalonika hi ku hlaya leswi: “Mine Pawulo ni mi tsralela madzrungula lawa hi voko dzranga, leyi hi yo ndlela leyi ni ma tiyisekisaka hi yone mapapela yanga hinkwawu.”—2 Tes. 3:17.
15. Hi nga tisizrelelisa kuyini ka madzrimi lama tikombaka ingiki i ntiyiso? Nyikela xikombiso. (Tlhela u vona ni mufoto.)
15 Hi nga dondzra yini ka leswi Pawulo a swi byeliki vakriste va le Tesalonika? Loko hi twa mintxhumu ya kukazri leyi kalaka yi nga fambisani ni leswi hi swi dondzraka a Bibeleni kumbe loko hi twa mavalivali ya kukazri, hi fanela ku va ni wuxiyaxiya. Khambi dzrin’wana, khale ka União Soviética, valala vezru va nyike vamakwezru papela ledzri a swi tikomba ingiki dzri pfa ntsindzra wa misava hinkwayu. Papela ledzro a dzri kutxa vamakwezru akuva va titsravuxa va tivumbela ntlawa wavu lowu zrangeliwaka hi vone ntsena. Nakone papela ledzro a dzri tikomba na dzri pfa kone mpela a ntsindzra hikusa a dzri ni sinatura dzra nhlengeletanu. Kambe vamakwezru lava na va dumbekile a va kanganyisiwanga. Va swi twisisile leswaku leswi papela a dzri swi hlaya a swi nga yelani ni leswi kutani a va swi dondzrile. Hi lani ku fana namunhla, lava nyenyaka ntiyiso makhambi manyingi va tizrisa internet kumbe maredi sosiyali akuva va hi pfilunganya kumbe ku hi hambanisa. Handle ka ku va hi “pfilunganyiwa miyanakanyu” hi fanela ku yanakanyisisa ha hombe ka leswaku leswi hi swi twaka kumbe ku swi dondzra swa yelana ni mintiyiso leyi kutani hi yi dondzriki kumbe im-him.—2 Tes. 2:2; 1 Yoh. 4:1.
U nga kanganyisiwe hi madzrimi lama tikombaka ingiki i ntiyiso (Vona yava 15) a
16. Hi ku ya hi Varoma 16:17, 18, hi fanela ku yentxa yini loko mun’we a titsravuxa ntiyisweni?
16 Tama u va ni wumun’we ni lava dumbekaka ka Yehovha. Yehovha a djula leswaku hi va ni wumun’we a wugandzrelini byezru, nakone leswo swi to koteka ntsena loko hi khomelela ntiyiso. Mun’wana ni mun’wana lweyi a hangalasaka dzrungula ledzri lwisanaka ni ntiyiso a byala ku yavana a bandleni, xileswo Yehovha a li hi fanela ku ‘fambela kule na vone’. Loko hi nga yentxi leswo, hi nga ha sungula ku kholwa mintxhumu leyi nga madzrimi ni ku hi yentxa hi nga ha dumbeki ka Yehovha.—Dondzra Varoma 16:17, 18.
17. He wani mabindzru lawa hi nga na wone loko hi tiva ntiyiso ni ku khomelela swi tiya ka wone?
17 Loko hi tiva ntiyiso ni ku khomelela ka wone, hi va kusuhi na Yehovha ni ku tiyisa lipfumelo dzrezru. (Efe. 4:15, 16) Handle ka leswo, a hi nge ti kanganyisiwa hi tidondzro ta madzrimi ta Sathana nakone hi ta tsrhama na hi sizrelelekile hi ku pfuniwa hi Yehovha ka nhlomulo lowukulu. Xileswo, khomelelani swi tiya a tiyisweni, “kutani Xikwembu Nkulukumba wa ku zrula a ta va na n’wine”.—Filp. 4:8, 9.
LISIMU 122 A Hi Tiyeni, Hi Nga Tsrekatsreki
a NTLHAMUXELO WA MUFOTO: Mufoto lowu kombisaka leswi swi yentxekiki ka malembe lama khalutiki, loko vamakwezru a khale ka União Soviética va yamukele papela ledzri a swi tikomba ingiki dzri pfa ka ntsindzra wa misava hinkwayu kambe ku hlaya ntiyiso a dzri pfa hi ka valala vezru. A masikwini yezru, valala vezru va nga ha tizrisa Internet akuva va hangalasa madzrimi mayelanu ni nhlengeletanu ya Yehovha.
