BIBELE dzri tamele mazritu manyingi lama sukaka mbilwini ya vhanu lava ‘faka va tiyingela swanga ha hine’. (Yk 5:17) Hi xikombiso, hi nga hantla hi pfumelelana ni mazritu ya ntiyiso ya Pawulo lama kumekaka ka Ba-le-Roma 7:21-24 lani a liki: ‘Ndzra ku ndzri zrandzra ku yentxa leswinene, na leswimfani swa ku ndzri namazrela. . . . Hla mine! Ndzri mhunu wa khombo!’ Matitwela lawa ya ntiyiso ma hi tlema timbilu loko hi lwa ni ku kala ku hetiseka kwezru.

Pawulo a tlhele a hlaya swin’wana swa le mbilwini. Ka Ba-le-Galatia 2:20, a khanele hi ku tiyiseka loku a a li na kone ka leswaku Yesu a a ‘[mu] zrandzra a va a tinyiketa ha [yene]’, habyakwe! Xana leswo a swi fani ni leswi hi tiyingelisaka xiswone? Kumbexana a hi minkama hinkwayu.

Loko hi lwisana ni matitwela ya ku tivona na hi nga pfuni ntxhumu hi mhaka ya swihono swa khale, swi nga ha hi kazratela ku pfumela leswaku Yehovha awa hi zrandzra ni leswaku a hi dzrivalelile, nakone swi nga ha hi bindzrela ku vona xitlhavelo xa xitizrulo swanga nyiko leyi a yi nyikiki mun’wana ni mun’wana wezru. Xana Yesu hakunene a djula hi vona xitizrulo swanga nyiko yezru? Loko swi li tanu, i yini lexi nga hi pfunaka ku yi vona hi ndlela yoleyo? A hi kambisiseni tinhlamulo ta swivutiso leswo.

Ina, Yesu a djula hi vona xitlhavelo xakwe swanga nyiko leyi a nyikiki mun’wana ni mun’wana wezru. I yini leswi nga hi pfunaka ku kholwiseka hi leswo? Yanakanya hi xiyentxakalo lexi tsraliwiki ka Luka 23:39-43. Wanuna wa kukazri a hayekiwi mhandzrini ya nxaniso tlhelweni ka Yesu. Yene awa pfumela leswaku a ni nandzru wa xihono lexi a xi yentxiki. Ndlela ya tihanyi leyi a khatisiwiki ha yone yi komba leswaku xihono xakwe a xi li xikulu ngopfu hikusa makhatela lawa a ma yentxiwa ka swigevengu leswi a swi tekeliwa hansi. Na a vaviseke swinene hi xiyimu xakwe, wanuna lweyo a kombela Yesu a ku: ‘Ndzri dzrimuki loko u ta ta ku fumeni kwaku.’

Xana Yesu a yentxe yini? Dzringisa ku mu vona a xiyin’weni xakwe xa ku vavisa na a ndzruluta nhloko yakwe akuva a lavisa wanuna lweyo. Nambi leswi a twaka ku vavisa swinene, a hlekela wanuna lweyo hi lizrandzru a va a mu tiyisekisa leswi: “Kunene dzri li ku wene namunhla, u tava va mine a Paradeyisini, Tradução do Novo Mundo.” Yesu a a tava a mu byele ntsena leswaku ‘N’wana wa mhunu a tele . . . ku nyiketa vutomi byakwe, xi va xitizrulo ku lava ku tala’. (Mt 20:28) Kambe a matsrhan’wini ya leswo, Yesu hi wumbilu a kombise leswi wanuna lwiya a a ta pfunekisa xiswone hi xitlhavelo xakwe? Yene a a khanela hi ndlela ya xinghanu loko a tizrisa mavitanela ya ku “wene” ni ya ku “mine”. Nakambe a mu byele hi ku lavisela loku wanuna lweyo a a ta va na kone, ka ku hanya a paradeyisi la misaveni.

Handle ka ku ganaganeka, Yesu a a djula leswaku wanuna lweyi a vona xitlhavelo xakwe swanga nyiko leyi a yi ta pfuna yene hi ntshima. Loko Yesu a titwe hi ndlela leyo hi xigevengu lexi pfumaliki ni nkama wa ku tizrela Yehovha, handle ka ku ganaganeka a titwa hi ndlela leyi fanaka ka mukriste lwa babatisiwiki lweyi a tizrelaka Yehovha. Kutani, i yini leswi nga hi pfunaka ku tiyiseka leswaku xitlhavelo xa Yesu xa tizra ku hine nambi loko khale hi yentxe swihono?

Wutizreli bya Pawulo byi kutxeteli ndlela leyi a a xi vona ha yone xitlhavelo xa Yesu. Hi ndlela yini? Yene a tlhamuxeli leswi: ‘Ndzri tlangela lwa dzri tiyisiki, a nga Kriste Yesu, Hosi yezru, leswi a liki ndzri lwe wa ku dumbeka a dzri beka ntizrweni, mine lwe faka khale ndzri mufingeti, ni mu xanisi, ni mulebyi.’ (1Tm 1:12-14) Xiyavelo xa Pawulo xi mu tiyisekise hi lizrezre, lizrandzru ni leswi Yesu a a mu dumbisa xiswone. Hi la ku fanaka Yesu a nyike mun’wana ni mun’wana wezru ntizro akuva a wu yentxa. (Mt 28:19, 20) Xana leswo a swi ku pfuni ku vona leswaku Yesu a fele wene?

Albert, Lweyi swoswi a tlheleliki ka Yehovha ntsrhaku ka 34 wa malembe na a susiwe bandleni, a li: “Swihono swanga swi le mahlweni kwanga nkama hinkwawu. Kambe loko ni li ku zrezreni, ni vona leswaku, ku fana na mupostola Pawulo, ni nyikiwe ntizro ha Yesu akuva ni wu hetisisa. Leswo swi ni yentxa ni nyonxa ni tlhela ni va ni vonela ledzrinene ha mine n’winyi, hi wutomi ni wumundzruku byanga.”​—Ps 51:3.

Allan, lweyi a yentxiki wubihi swinene a tlhela a va ni tihanyi na a nga si dondzra xihlayelamfuzri, a li: “Na ha kazratiwa hi wubihi hinkwabyu lebyi ni byi yentxeliki vhanu. Minkama yimbeni, leswo swi ni yentxa ni hlatiyela. Kambe ni khensa Yehovha hi leswi a pfumeleliki mudohi swanga hi mine ku tlhasisela madzrungula lamanene ka vhanu van’wana. Loko ni vona leswi vhanu va khumbisiwaka xiswone hi madzrungula lamanene, swi ni yentxa ni dzrimuka leswaku Yehovha i Xikwembu lexinene lexi nga ni lizrandzru. Ni vona leswaku awa ni tizrisa akuva a pfuna vhanu va ku fana na mine lava kazratiwaka hikola ka mintxhumu ya ku biha leyi va yi yentxiki.”

Ntizro wezru wu hi pfuna ku tizrisa nkama wezru ka mintxhumu leyinene ni ku tsrhama na hi pimisa hi leswi nga swinene. Wu hi tiyisekisa hi lizrezre, lizrandzru ni ku dumba loku Yesu a nga na kone ha hine.

Ku ya tlhasa loko xiyimu xa ku biha xa misava ya Sathana xi helisiwa, timbilu tezru ti nga ha tama ti hi yavukanyisa hikola ka swihono swa khale. I yini leswi taka hi pfuna ku lwa ni matitwela lawo?

Jean a li: “Na nyonxa hi leswi ‘Xikwembu Nkulukumba a nga nkulu ku timbilu tezru’”, Jean minkama yinyingi a lwisana ni ku titwa nandzru hi kola ka wutomi bya mintila yibidzri lebyi a byi hanyiki loko a ha li mumpshwa. (1Yh 3:19, 20) Na hine ha txhaveleleka hi ku tiva leswaku Yehovha na Yesu va xi twisisa xiyimu xezru ku hi tlula. Dzrimuka, hi lizrandzru va nyikele xitizrulo, ku nga li leswaku va ta pfuna vhanu lava hetisekiki, kambe leswaku va pfuna vadohi lava tisolaka.​—1Tm 1:15.

Hi tiyisa timbilu tezru hi ntiyiso lowu wa lisima loko hi khongota na hi yanakanyisisa hi ndlela leyi Yesu a hi khomaka ha yone hine vhanu va ku kala ku hetiseka ni loko hi yentxa leswi hi nga swi kotaka akuva hi hetisisa ntizro lowu a hi nyikiki wone. Hi ku yentxa leswo, ku fana na mupostola Pawulo, hi nga hlaya hi ku: Yesu wa ‘ndzri zrandzra a ve a tinyiketa ha mine.’