1. Ha yini hi fanela ku yingiseta leswi Yesu a hi basopisiki swone?

KA WUPROFETA byakwe mayelanu ni masiku ya wugamu, Yesu a te: ‘Kambe tivonelani, suka a timbilu tenu ti bindzriwa hi . . . minhlatiyelo ya vutomi’, kumbe hi swikazratu swa siku ni siku. (Lk 21:34) Ku djuleka hi yingiseta leswi a hi basopisiki swone. Ha yini? Namunhla hi lwisana ni swikazratu swa ku fana ni leswi vhanu hinkwavu va lwisanaka na swone.

2. Hi swini swikazratu leswi hlatiyelisanaka leswi vamakwezru va kumanaka na swone?

² Minkama yin’wana, hi sindzriseka ku lwisana ni swikazratu swa ku hlawa hi nkama wun’we. Vona swikombiso swa kukazri. Makwezru mun’we waxinuna va liki hi John, * lweyi a xanisiwaka hi mavabyi lama khwanyalisaka mavoko ni milenge, a tsrhoveke mbilu loko nkatakwe a mu tsrhikile ntsrhaku ka 19 wa malembe na va tekanile. Hi ku famba ka nkama vanakwe vabidzri va vanh’wanyana va tsrhike ku tizrela Yehovha. Vatekani va kukazri va liki hi Bob na Linda va kumane ni mindzringo leyi hambaniki. Va heleliwe hi ntizro, va gama va tekeliwa yindlu. Ku yengetela ka leswo, Linda a byeliwe leswaku a ni mavabyi ya mbilu lama nga mu dlayaka ni man’wana lama suselaka mizri ntamu wa ku sivela mavabyi.

3. Hi ku ya hi Ba-le-Filipi 4:6, 7, hi nga tiyiseka hi yini?

³ Hi nga tiyiseka leswaku Muvumbi wezru ni Tatana wezru wa lizrandzru, Yehovha, awa swi twisisa leswi hi titwisaka xiswone loko hi li ku hlatiyeleni. Nakone a djula ku hi pfuna ku lwisana ni swikazratu swezru. (Dondzra Ba-le-Filipi 4:6, 7.) A Zritu dzrakwe dzri ni wudzrunguli byinyingi lebyi khanelaka hi swikazratu leswi malandzra yakwe ma lwisaniki na swone. Handle ka leswo, dzri hi byela hi leswi Yehovha a ma pfunisiki xiswone loko ma li ku hlatiyeleni. A hi voneni swikombiso swi nge swingani.

4. Hi yini mindzringo leyi Eliya a kumaniki na yone, nakone a titwise kuyini hi leswi Yehovha a mu pfunisiki xiswone?

⁴ Eliya a tizrele Yehovha hi minkama ya ku bindzra nakone a kumane ni mindzringo leyikulu. Hosi Akabe, ku nga yin’we ya tihosi ta ku kala ku dumbeka ta Israyele, a tekane na Jezabele, mugandzreli wa ku biha swinene wa Baal. Ha wubidzri byavu va tate tiko hi wugandzreli bya Baal nakone va dlaye vaprofeta vanyingi va Yehovha. Eliya a kote ku huluka. Nakone a huluke ndlala leyikulu hi ku dumba Yehovha. (1Th 17:2-4, 14-16) Handle ka leswo, Eliya a dumbele ka Yehovha loko a kanetana ni vaprofeta xikan’we ni vagandzreli va Baal. A kutxe va-Israyele leswaku va tizrela Yehovha. (1Th 18:21-24, 36-38) Eliya a vone wumboni byinyingi bya leswaku Yehovha a a mu pfuna a minkameni leyo ya ku bindzra.

5-6. Hi ku ya hi 1 Tihosi 19:1-4, xana Eliya a titwise kuyini, nakone Yehovha a mu kombise kuyini leswaku a a mu zrandzra?

⁵ Dondzra 1 Tihosi 19:1-4. Eliya a tale hi ku txhava loko Nkosikazi Jezabele a hlaye leswaku a djula ku mu dlaya, nakone a tsrutsrumele ka muganga lowu vitaniwaka Berxeba. Eliya a a hele ntamu lakakuva a ‘tikombeleli ku fa’. Ha yini a titwe hi ndlela leyo? Hikusa a a li mhunu wa ku kala ku hetiseka, lweyi a a ‘tiyingela swanga ha hine.’ (Yk 5:17) Kumbexana a hluliwe hi ku hlatiyela ni ku kazrala nyameni. Swi tikomba ingiki a a pimisa leswaku a minzamu leyi a yi yentxiki ya ku seketela wugandzreli bya ntiyiso a yi ndzruluke nyuku wa mbyana, mintxhumu a Israyele a yi nga  txintxanga ni leswaku ka vagandzeli va Yehovha a ke sala yene ntsena. (1Th 18:3, 4, 13; 19:10, 14) Hi nga ha hlamalisiwa hi leswi muprofeta lweyo wa ku dumbeka a titwisiki xiswone. Kambe Yehovha a a swi twisisa leswi Eliya a a titwisa xiswone.

⁶ Yehovha a nga mu kawukanga Eliya loko a mu pfulele xifuva. A matsrhan’wini ya leswo, a mu pfune ku tlhela a kuma ntamu. (1Th 19:5-7) Hi ndlela ya lizrandzru, Yehovha a game a lulamisa miyanakanyu ya Eliya hi ku mu komba ntamu wakwe lowukulu. Yehovha a yengetele leswaku a ka ha li ni 7.000 wa vhanu a Israyele lava a va yala ku gandzrela Baal. (1Th 19:11-18) Hi ku yentxa leswo, Yehovha a kombe Eliya leswaku a a mu zrandzra ngopfu.

7. Ha yini ndlela leyi Yehovha a khomiki Eliya ha yone yi hi nyika ntamu?

⁷ Xana u le xiyin’wini lexi hlatiyelisaka? Loko swi li tanu, ku dzrimuka leswaku Yehovha a a twisisa leswi Eliya a a titwisa xiswone swi nga ku txhavelela! Swi hi tiyisekisa leswaku awa hi twisisa loko hi kamekile a mbilwini. Yehovha a swi tiva ha hombe leswi hi nga swi kotaka ni leswi hi nga swi kotikiki, leswi hi swi pimisaka ni leswi hi swi twaka. (Ps 103:14; 139:3, 4) Loko hi yetisela Eliya hi ku dumba Yehovha, yene a ta hi pfuna ku lwisana ni swikazratu leswi hi hlatiyelisaka.​—Ps 55:22.

8. Xana Yehovha a ta ku pfuna ku lwisana ni ku hlatiyela hi ndlela yini?

⁸ Ku hlatiyela ku nga ku yentxa u va ni mimpimiso ya ku biha u tlhela u hela ntamu. Loko swi li tanu, dzrimuka leswaku Yehovha a ta ku pfuna ku lwisana ni ku hlatiyela koloko. Xana a ta swi yentxisa kuyini? A ku zramba leswaku u khongota ka yene u mu byela hinkwaswu leswi ku kazrataka. Nakone a ta hlamula ku dzrila kwaku. (Ps 5:3; 1Pe 5:7) Xileswo, nkama hinkwawu khongota ka Yehovha, u mu byela hi swikazratu leswi ku hlatiyelisaka. Yehovha a nga ti khanela na wene hi ku kongoma ku fana ni leswi a khanelisiki xiswone na Eliya, kambe a ta khanela na wene hi ku tizrisa Zritu dzrakwe, ku nga Bibele, ni nhlengeletanu yakwe. A Bibeleni u ta kuma wudzrunguli lebyi nga ku txhavelelaka ni ku ku nyika dumbo. Handle ka leswo, a bandleni vamakwezru vaxinuna ni vaxisati va nga ku nyika ntamu.​—Ro 15:4; Hb 10:24, 25.

9. Xana munghanu lweyi hi mu dumbaka a nga hi pfuna hi ndlela yini?

⁹ Loko Yehovha a byele Eliya leswaku a nyika Elixa ntizro wa kukazri, a ku li ndlela ya ku mu nyika munghanu lweyi a a mu vilela, lweyi a a ta mu pfuna loko a hela ntamu. Hi ku fanana, loko u pfulela xifuva munghanu lweyi u mu dumbaka, yene a nga ku pfuna ku lwisana ha hombe ni ku hlatiyela kwaku. (2Th 2:2; Pr 17:17) Kumbexana u nga ha pimisa leswaku a wu na munghanu lweyi u nga mu pfulelaka xifuva. Loko swi li tanu, khongota ka Yehovha u kombela leswaku a ku pfuna ku kuma makwezru lwa wupfiki lweyi a nga ku pfunaka a ku hlatiyeleni kwaku.

10. Hi dzrini dumbo ledzri hi dzri kumaka ka leswi yentxekeliki Eliya, nakone xidumbiso lexi nga ka Ezaya 40:28, 29 xi nga hi pfuna hi ndlela yini?

¹⁰ Yehovha a pfune Eliya ku lwisana ni ku hlatiyela kwakwe ni ku tama a mu tizrela hi ku dumbeka hi malembe ya ku tala. Leswi yentxekeliki Eliya swi hi nyika dumbo. Minkama yin’wana hi nga ha khaluta hi ka swiyimu leswi hlatiyelisaka ngopfu lakakuva hi titwa na hi kazralile swinene a miyanakanywini ni le mizrini. Kambe loko hi dumba Yehovha, yene a ta hi nyika ntamu lowu hi wu vilelaka akuva hi tama hi mu tizrela.​—Dondzra Ezaya 40:28, 29.

11-13. Xana ku hlatiyela ku ma khumbise kuyini malandzra mazrazru ya Yehovha ya khale?

¹¹ Malandzra man’wana ya Yehovha lawa ku khaneliwaka ha wone a Bibeleni na wone ma ve ni ku hlatiyela lokukulu. Hi xikombiso, Ana a tiyiselele tingana ta ku kala a nga na n’wana. Xin’wana lexi vavisaka hi leswaku a a xanisiwa hi nsati-kulobye. (1Sa 1:2, 6) Ku hlatiyela lokukulu loku a a ku twa a ku mu vavisa ngopfu lakakuva a a tsrhamela ku dzrila, a nga djuli ni ku da.​—1Sa 1:7, 10.

¹² Minkama yin’wana, Hosi Davhida a hlatiyele swinene. Yanakanya hi swikazratu leswi a kumaniki naswu. A a kingidzriwa swinene hi lipfalu dzrakwe hi kola ka swihoxo swinyingi leswi a swi yentxiki. (Ps 40:12) A pfukeliwe hi n’wanakwe lweyi a a mu zrandzra, Absalomi. Leswi swi yentxe leswaku Absalomi a gama hi ku fa. (2Sa 15:13, 14; 18:33) Handle ka leswo, a wongiwe hi mun’we wa vanghanu vakwe lavakulu. (2Sa 16:23–17:2; Ps 55:12-14) Ka mapsalma manyingi lawa Davhida a ma tsraliki, hi kota ku vona leswaku nambi leswi a heliki ntamu, a nga tsrhikanga ku dumba Yehovha.​—Ps 38:5-10; 94:17-19.

¹³ A ntsrhaku, mupsalma wa kukazri a sungule ku kweleta mahanyela ya vhanu va ku biha. Swi nga yentxeka a a li mulevhi, wa vana va Asafi, nakone a tizre a ‘mbangwini wa ku xwenga wa Xikwembu Nkulukumba’. Mupsalma lweyi a hlatiyele ngopfu lakakuva a heleliwa hi ku nyonxa a tlhela a nga ha yaneliseki. A tlhasele ni ku pimisa leswaku ku tizrela Yehovha a swi nga sizi ngopfu.​—Ps 73:2-5, 7, 12-14, 16, 17, 21.

14-15. Xana swikombiso swizrazru leswi nga Bibeleni swi hi dondzrisa yini hi ku kombela mpfunu wa Yehovha?

¹⁴ Hinkwawu malandzra lawa ya mazrazru ya Yehovha a ma mu dumba ma tlhela ma kombela mpfunu wakwe. A ma hamba swikhongoto hi  ku hiseka ma mu byela minhlatiyelo ya wone. Nakone a ma bula naye hi ku ntsrhunxeka hi leswi a swi ma yentxa ma hlatiyela. A ma zanga ma tsrhika ku ya a mbangwini wa wugandzreli.​—1Sa 1:9, 10; Ps 55:22; 73:17; 122:1.

¹⁵ Yehovha a kombe lizrezre mun’wana ni mun’wana wa vone hi ku va hlamula. Ana a kume ku zrula ka miyanakanyu. (1Sa 1:18) Davhida a tsrale leswi: ‘A makhombo ya mululami i manyingi, kambe Yehovha a mu tizrula ku wone hinkwawu.’ (Ps 34:19) Asafi a vone leswaku Yehovha ‘a mu khomi hi voko [dzrakwe] ledzra xinene’, hi ku mu kongomisa hi swilayu swakwe swa lizrandzru. A yimbelele a ku: ‘Kambe mine, a ku va kusuhi ni Xikwembu Nkulukumba i ndjombo; ndzri beki vutxhavelo byanga ku Hosi Yehovha.’ (Ps 73:23, 24, 28) Hi dondzra yini ka swikombiso leswo? Hi minkama yimbeni, hi ta titwa na hi bindzreliwa hi swikazratu hi tlhela hi hlatiyela. Kambe hi nga swi kota ku lwisana naswu loko hi yanakanyisisa hi leswi Yehovha a va pfunisiki xiswone vambeni, hi tsrutsrumela ka yene hi xikhongoto, hi tlhela hi mu yingiseta hi ku yentxa hinkwaswu leswi a hi kombelaka swone.​—Ps 143:1, 4-8.

16-17. a) Ha yini hi nga fanelanga ku titsravuxa? b) Xana hi nga tlhela hi kuma ntamu hi ndlela yini?

¹⁶ Swikombiso swa malandzra lawa ya mazrazru swi tlhela swi hi dondzrisa ntxhumu wun’wana  wa lisima: A hi fanelanga ku tsravukana na Yehovha ni vhanu vakwe. (Pr 18:1) Nancy, lweyi a hlatiyeliki swinene loko a tsrhikiwe hi nuna, a li: “Ku ve ni masiku lawa a ni nga djuli ku vona mhunu kumbe ku khanela ni mhunu. Kambe loko ni ya ni tsravukana ni van’wana, gome a dzro yengeteleka.” Kutani Nancy a bohe ku tikazratela ku pfuna van’wana lava a va ni swikazratu. Leswo swi mu yentxe a titwa ha hombe. A li: “Ni xiye leswaku a nkama lowu a ni tikazratela ku yingela van’wana ni ku va pfuna ka swikazratu swavu, a ni nga kumi nkama wa ku pimisa hi swanga.”

¹⁷ Mintlhanganu ya bandla yi nga hi pfuna ku tlhela hi kuma ntamu. Yone i mikhandlu ya ku pfumelela Yehovha leswaku a hi pfuna ni ku hi miyeta. (Ps 86:17) Ka yone, a hi tiyisa hi ku tizrisa moya wakwe wa ku xwenga, Zritu dzrakwe ni vhanu vakwe. Mintlhanganu yi hi pfulela mikhandlu ya ku “tiyisiwa”. (Ro 1:11, 12) Makwezru waxisati va liki hi Sofia a li: “Yehovha ni vamakwezru hi vone va ni nyikaka ntamu wa ku ya a mahlweni. Mintlhanganu yezru ya bandla yi ve ntxhumu wa lisima swinene ka mine. Ni xiye leswaku loko ni ya ni hlengela a ku zrezreni xikan’we ni ku tipatsra ni bandla, ni ya ni kuma ntamu wa ku lwisana ni ku hlatiyela ni ku kazrateka.”

18. Loko hi hela ntamu, xana Yehovha a nga hi nyika yini?

¹⁸ Loko u hela ntamu, dzrimuka leswaku Yehovha a nga dumbisi ku hi phula ka swikazratu swezru a nkameni lowu taka ntsena. Kambe ni namunhla a tiyimisele ku hi pfuna ku lwisana ni minhlatiyelo yezru. Loko hi hela ntamu hi va hi vindlavindleka, Yene a hi nyika ku navela ni ntamu wa ku swi hlula.​—Flp 2:13.

19. Xana Ba-le-Roma 8:37-39 yi hi dumbisa yini?

¹⁹ Dondzra Ba-le-Roma 8:37-39. Mupostola Pawulo a hi tiyisa leswaku a ku na ntxhumu lowu taka hi tsravukanisa ni lizrandzru dzra Xikwembu Nkulukumba. Nambitanu, ntalu wa vamakwezru vaxinuna ni vaxisati va lwisana ni minhlatiyelo. Xana hi nga va pfunisa kuyini? Hi ku yetisela Yehovha hi ku va twela wusiwana ni ku va nyika mpfunu lowu va wu vilelaka. Kambe hi nga swi yentxisa kuyini? Ka nhloko-mhaka leyi landzrelaka hi ta bula hi swone.