Ndlela ya yin’we ya kuva hi dzrivaleliwa swidoho swezru i ku tizrisa xitlhavelo xa xitizrulo lexi Yesu a xi hakeliki hi ngati yake. (Efe. 1:7) Nambitasu, a Bibele dzri li: “Xikwembu Nkulukumba . . . hi ku lehisa mbilu a o dzrivalela swidoho leswi yentxiwiki khale.” (Rom. 3:25) Xana Yehovha a a ta va a va dzrivalele swidoho na ku nga si humesiwa xitizrulo a tlhela a landzra nawu wake lowu hetisekiki wa wululami hi ndlela yini?

Yehovha a a dumbise leswaku a ku ta va ni ‘lixaka’ ledzri a dzri ta huluxa lava a va ta kombisa lipfumelo ka Xikwembu Nkulukumba ni ka swidumbiso swake. Ka Yehovha, loko a dumbise ku hakela xitizrulo a swo fana ni loko a xi hakelile. (Gen. 3:15; 22:18) Xikwembu Nkulukumba a a tiyiseka leswaku hi nkama lowu bekisiwiki, N’wanake a a ta tinyikela leswaku a buya misaveni akuva a hakela xitizrulo. (Gal. 4:4; Heb. 10:7-10) Nkama lowu Yesu a a li lani misaveni, Yehovha a mu nyike wulawuli akuva a dzrivalela swidoho nambileswi a xi nga si hakeliwa xitizrulo. Yesu a swi yentxile leswo hikusa a swi tiva leswaku xitlhavelo lexi a a ta xi nyikela a xi ta funeketa swidoho swa vhanu lava a va ta kombisa lipfumelo.—Mat. 9:2-6.