1-2. He wani matovoko lawa mhunu a nga ha vaka na wone ntsrhaku ka babatiso?

 SWI nyonxisa ngopfu akuva mhunu a babatisiwa ni kuva a hamba xiyenge xa ndangu wa Yehovha. Lava yentxiki leswo va nga pfumelelana ni mazritu ya mupsalma Davhida lama liki: ‘A ni djombo, lweyi wene [Yehovha] u mu hlawulaka, lweyi u mu tsrhindzretelaka ku wene, akuva a tiyakela a tinxoxeni taku.’—Amaps. 65:4.

² Yehovha a va hlawula hi wutlhazri lava taka hamba xiyenge xa ndangu wake. Hi lani hi swi voniki ha kone ka xidondzro lexi khalutiki, a kokela ntsena vhanu lava a va vonaka leswaku va djula ku va ni wuxaka lebyinene na yene. (Yak. 4:8) Loko u tinyiketela ka Yehovha u va u babatisiwa, u sungula ku va ni wuxaka bya ku hlawuleka na yene. U nga tiyiseka leswaku ntsrhaku ka babatiso, Yehovha a ta ku ‘txhululela nkateko hi mpimu lowu tlulisaka’.—Mal. 3:10; Yer. 17:7, 8.

3. He byini wutiyanguleli lebyi vakriste lava tinyiketeliki ni ku babatisiwa va nga na byone? (Ekleziasta 5:4, 5)

³ Nakunene babatiso o va masungulu ntsena. Ntsrhaku ka babatiso u ta djula ku yentxa hinkwaswu leswi u nga swi kotaka akuva u hanya hi ku fambisana ni xiboho lexi u xi tekiki, nambiloko ku yentxa leswo swi dzringa lipfumelo dzraku. (Dondzra Ekleziasta 5:4, 5.) Swanga mudondzrisiwa wa Yesu, u ta yentxa  hinkwaswu akuva u landzra xikombiso xake ni kuva u landzra swileleto leswi a swi nyikeliki. (Mat. 28:19, 20; 1 Pet. 2:21) Xidondzro lexi xi ta ku pfuna ku yentxa leswo.

‘TAMA U LANDZRELA’ YESU LOKO U KUMANA NI SWIKAZRARU NI MINDZRINGO

4. Xana valandzreli va Yesu va fanela va zrwala “mhandzri ya nxanisa” hi ndlela yini? (Luka 9:23)

⁴ U nga yanakanyi leswaku ntsrhaku ka babatiso u nga ti kumana ni swikazratu. Yesu a swi beke livaleni ka vadondzrisiwa vake leswaku a va ta zrwala ‘mhandzri ya nxanisa’. Nakone a va ta swi yentxa “siku ni siku”. (Dondzra Luka 9:23.) Xana Yesu a a djula ku hlaya leswaku a vadondzrisiwa vake va ta xaniseka minkama hinkwayu? Im-him. A a djula ku hlaya leswaku handle ka matovoko lawa a va ta ma kuma a va ta kumana ni swikazratu. Swin’we swa swikazratu leswo a swi ta vavisa ngopfu swinene.—2 Tim. 3:12.

5. He wani matovoko lawa Yesu a ma dumbisiki lava zrangisaka Mfumu?

⁵ Swi nga yentxeka u same u langusana ni nkaneto lowu pfaka hi ka maxaka yaku, kumbexana u titsrone swa kukazri hi ku djula ku zrangisa Mfumu wa Xikwembu Nkulukumba. (Mat. 6:33) Xileswo, u nga tiyiseka leswaku Yehovha awa swi vona leswi u swi yentxaka hi konta yake. (Heb. 6:10) Swi nga yentxeka u swi xiyile leswaku mazritu lawa Yesu a ma hlayiki i ntiyiso, lama liki: “A nga kone lweyi a siyiki yindlu kumbe vamakwavu va xinuna, kumbe vamakwavu va xisati, kumbe mamana, kumbe papayi, kumbe vana, kumbe masimu hi kola kwanga kumbe hi kola ka madzrungula lamanene lweyi a nkameni lowu a kalaka a nge ti kuma tiyindlu, vamakwavu va xinuna, vamakwavu va xisati, vamamana, vana, ni masimu hi lani ku phindiwiki ka 100, na a xanisiwa—kutani a nkameni lowu taka a kuma wutomi lebyi nga gamikiki.” (Mar. 10:29, 30) Nakunene, matovoko lawa u ma kumiki i manyingi ku tlula leswi u titsroniki swone.—Amaps. 37:4.

6. Ha yini swi djula kuva u tama u “lwisana ni ku navela ka nyama” ntsrhaku ka babatiso?

⁶ Ntsrhaku ka babatiso swa ha ta djula u lwa ni ku “navela ka nyama”. (1 Yoh. 2:16) Henhla ka hinkwaswu, wa ha tama u li mhunu wa ku kala ku hetiseka wa lixaka dzra Adamu. Minkana yin’wana, matitwela yaku ma nga ha fana ni ya mupostola Pawulo. Yene a tsrale leswi: “Nakunene hi le ndzrenindzreni na wu zrandzra Nawu wa Xikwembu Nkulukumba, kambe ka mizri wanga ni vona nawu wun’wana lowu lwaka ni Nawu lowu nga miyanakanywini yanga nakone wu ni yentxaka xib’otxhwa xa nawu wa xidoho lowu nga ka mizri wanga.” (Rom. 7:22, 23) Minkama yin’wana u nga ha hela ntamu hi kola ka ku kala ku hetiseka kwaku. Kambe ku yanakanyisisa hi xidumbiso lexi u xi yentxeliki Yehovha loko u tinyiketela kwake swi ta ku pfuna ku tama u tiyimisela ku lwisana ni mindzringo. Ku hlaya ntiyiso, loko u lavisana ni mindzringo, xidumbiso lexi u xi yentxeliki Yehovha xi ta ku pfuna kuva u nabyalisa wutomi byaku. Hi ndlela yini?

7. Xana ku tinyiketela kwaku ku ta ku pfuna hi ndlela yini ku tama u dumbeka ka Yehovha?

⁷ Loko u tinyiketela ka Yehovha, u va na u tiyala. Leswi hlayaka leswaku u nga ti pfumelela ntxhumu ni wun’we lowu nga ha khunguvanyisaka Yehovha. (Mat. 16:24) Xileswo, loko u lavisana ni ndzringo a swi nga ti djula u heta nkama wunyingi na u yanakanya hi leswi u taka swi yentxa. Hikusa u ta va u swi tiva leswaku u fanela ku yentxa yini, ku nga ku tama u dumbeka ka Yehovha. U ta tiyimisela ku tama u nyonxisa Yehovha. Hi ku yentxa leswo, u ta va na u fana na Yobe. Nambileswi a a lavisana ni swikazratu swinyingi, yene a te: ‘Ni nga ka ni nga suki ku lulameni kwanga!’—Yb. 27:5 BX.

8. Xana ku yanakanyisisa hi xikhongoto xa ku tinyiketela kwaku swi nga ku pfuna ku tiyisela mindzringo hi ndlela yini?

 ⁸ Loko u yanakanyisisa hi xikhongoto lexi u xi yentxiki loko u tinyiketela ka Yehovha swi ta ku pfuna kuva u tiyiselela mindzringo. Hi xikombiso, xana u ta navela ku gangisana ni mhunu lweyi a txhatiki? Im-him! U dumbise Yehovha leswaku u nge txhuki u swi yentxile leswo. Loko hi nga pfumeleli matitwela ya ku biha ma dzrima timitsru a timbilwini tezru, a swi nga ti vilela kuva hi lwisana ni matitwela lawo a nkameni lowu taka. A wu nge ti famba a ‘mintileni ya lava ku biha’.— Amapr. 4:14, 15.

9. Xana ku yanakanyisisa hi xikhongoto xa ku tinyiketela kwaku swi nga ku pfuna ku zrangisa Mfumu wa Xikwembu Nkulukumba hi ndlela yini?

⁹ Swi nga kuyini loko ho kuma ntizro lowu wu nga ku sivelaka ku ya a mintlhanganwini nkama ni nkama? Handle ka ku ganaganeka wa swi tiva leswaku u ta yentxa yini. Hikusa na ntizro wa ku fana ni lowu wu nga si humelela, a wu titsrimbelile leswaku u nga ti pfumelela ntxhumu ni wun’we wu ku tsimbisa ku kumeka a mintlhanganwini. A wu nge ti dzringeka ku pfumela ntizro lowo, kutani ntsrhaku u pimisa leswaku u ta yi yentxisa kuyini mintlhanganu. Ku yanakanyisisa hi ku tiyimisela loku Yesu a a li na kone ka ku djula ku nyonxisa Papayi wake, swi ta hi pfuna akuva na hine hi nga pfumeleli ntxhumu wu hi sivela ku nyonxisa Xikwembu Nkulukumba lweyi hi tinyiketeliki kwake.—Mat. 4:10; Yoh. 8:29.

10. Xana Yehovha a ta ku pfuna hi ndlela yini akuva u ‘tama u landzrela’ Yesu?

¹⁰ Nakunene swikazratu ni mindzringo swi ku nyika mukhandlu wa ku kombisa leswaku u djula ku ‘tama u landzrela’ Yesu. Loko u yentxa leswo u nga tiyiseka leswaku Yehovha a ta ku pfuna. Bibele dzri li: “Xikwembu Nkulukumba awa dumbeka nakone a nge ti mi tsrhika mi dzringiwa hi ndzringo lowu mi taka hluleka ku wu tiyiselela, kambe loko mi dzringiwa a ta  mi pfulela ndlela akuva mi kota ku wu tiyiselela.”—1 Kor. 10:13.

HI NGA TAMA HI LANDZRELA YESU HI NDLELA YINI?

11. He yini yin’we ya tindlela letinene ta ku tama hi landzrela Yesu? (Tlhela u vona xifaniso.)

¹¹ Yesu a tizrele Yehovha hi mbilu yake hinkwayu, nakone a a khongota nkama hinkwawu. (Luk. 6:12) Yin’we ya tindlela ta ku tama hi landzrela Yesu ntsrhaku ka babatiso i kuva hi tibekela kungu dzra ku yentxa mintxhumu leyi taka hi tsrhindzretela kusuhi na Yehovha. Nambiloko hi yentxe nhluvuku ku ya tlhasa kwini, “a hi yeneni mahlweni hi famba ndleleni leyi”. (Filp. 3:16) Minkama yin’wana u ta twa mimfambu ya vamakwezru lava tikazrateliki ku yentxa leswi yengeletekiki a ntizrweni wa Yehovha. Swi nga yentxeka va ya ka Xikole xa Vazrezri va Mfumu kumbe va zruzrele lomu ku nga ni xivileleko lexikulu. Loko swiyimu swaku swi ku pfumelela, lawa i makungu manene ya ku u nga ma tlhasela. Minkama hinkwayu hi tikazratela ku yentxa leswi yengetelekiki a ntizrweni wa Yehovha. (Mint. 16:9) Loko u nga swi koti ku yentxa leswo hi kola ka xivangelo xa kukazri, u nga tivone u nge na lisima. Xa lisima ka mukriste i kuva a tama a tiyisela. (Mat. 10:22) U nga dzrivale leswaku Yehovha a swi teka swi li swa lisima hinkwaswu leswi u kotaka ku swi yentxa hi ku ya hi wuswikoti byaku ni swiyimu swaku. Hi leswo swi taka ku pfuna akuva u tama u landzrela Yesu ntsrhaku ka babatiso.—Amaps. 26:1.

12-13. U nga yentxa yini loko u vona leswaku awa ha hiseki ku fana ni khale? (1 Vakorinte 9:16, 17) (Tlhela u vona bokisi ledzri liki “ Tama U Tsrutsruma”.)

¹² Swi nga kuyini loko swikhongoto swaku swi nga ha sukeli mbilwini nakone u ya sin’wini akuva u hetisisa nawu kumbe ku dondzra kwaku ka Bibele ku nga ha nyonxisi ku fana ni khale? Loko leswo swi humelela ntsrhaku ka  loko u babatisiwile u nga pimisi leswaku a wa ha na moya wa ku xwenga wa Yehovha. Wene u mhunu wa ku kala ku hetiseka, minkama yin’wana u nga ha titwa hi ndlela leyo. Loko u titwa u nge he na nkhinkhi ya ku fana ni leyi a wu li na yone a ku sunguleni, yimanyana u yanakanyisisa hi xikombiso xa mupostola Pawulo. Nambileswi a a tikazratela ku yetisela Yesu, minkama yin’wana matitwela yake a ma pfa ma txintxatxintxa. (Dondzra 1 Vakorinte 9:16, 17.) A hlaya leswi: “Nambiloko ni nga swi djuli ku swi yentxa na ha tama ni va ni wutiyanguleli lebyi.” Hi mazritu man’wana, Pawulo a a tiyimisele ku hetisisa ntizro wake swi nge na mhaka ni ndlela leyi a a titwa ha yone hi nkama wolowo.

¹³ Hi ndlela leyi fanaka, u nga teki swiboho hi ku ya hi ndlela leyi u titwaka ha yone. Tiyimisele ku tama u yentxa leswi nga swinene swi nge na mhaka ni ndlela leyi u titwaka ha yone. Loko u tama u yentxa leswi nga swinene, matitwela yaku na wone ma nga txintxa ma va lamanene. Loko u tama u va ni xiyimiso lexinene xa moya, swi ta ku pfuna ku tama u landzrela Yesu ntsrhaku ka babatiso. Handle ka leswo, vamakwezru va ta kutxeka loko va vona ku tiyimisela ni ku tiyisela kwaku.—1 Tes. 5:11.

“TAMANI MI TIKAMBELA . . . TAMANI MI KOMBISA LESWI NAKUNENE MI NGA SWONE”

14. Ha yini u fanela ku tsrhamela ku tikambela nkama ni nkama? (2 Vakorinte 13:5)

¹⁴ Ntxhumu wun’wana lowu nga ku pfunaka ntsrhaku ka babatiso i kuva u tikambela nkama ni nkama. (Dondzra 2 Vakorinte 13:5.) I swinene kuva minkama yin’wana u tsrhamela ku tikambela leswaku wa ha khomelela ka xiyimiso xaku xa ku khongota siku ni siku, ku dondzra Bibele, ku va kone mintlhanganwini ni kuva kone nsin’wini hi xitalo. Yentxa hinkwaswu leswi u nga swi kotaka akuva u susa londzrovoto dzrikulu ka mintxhumu leyi. Hi xikombiso tivutise leswi: ‘Xana na swi kota ku tlhamuxela tidondzro ta masungulo ta Bibele? Xana ni nga yentxa xa kukazri akuva ni yengesela ku nyonxa kwanga a ntizrweni wa nsimu? Xana ni hamba swikhongoto leswi kongomiki nakone ni kombisa leswaku na mu dumba Yehovha hi mbilu yanga hinkwayu? Xana ni hlalela mintlhanganu hinkwayu nkama ni nkama? Loko a li leswo, ni nga yentxa yini akuva ni nga luzi mintlhanganu ni ku tlhela ni patsreka ku yone hi ku nyikela tinhlamulo?’

15-16. U dondzre yini ka xikombiso xa Robert mayelanu ni ku lwisana ni mindzringo?

¹⁵ Ntxhumu wun’wana wa lisima i kuva u tiva ku tsrana kwaku. Makwezru Robert, a vulavule hi mfambu wa kukazri lowu khanyisaka mhaka leyi, a li: “Na ni ni 20 wa malembe, a ni  ni ntizro lowu a ni nga tizri siku hinkwadzru, siku dzrin’wana tsrhaku ka ntizro, mun’we wa vatizrikulobye wa xisati a ni zrambe kuva ni famba kaya kwake. Yene a hlaye leswaku a hi ta va wuswezru nakone a hi ta tikholisa ngopfu. A ku sunguleni ni zame maqhinga ya kuva ni nga pfumeli kambe hi wugamu ni yalile ni va ni mu byela xivangelo xa kone.” Robert a swi kotile ku hlula ndzringo luwani nakone swa khenseka. Hi ku famba ka nkama, loko Robert a yanakanyisise hi ndlela leyi a hlamuliki ha yone a vone leswaku nhaka a yangule hi ndlela ya ku yampswa ku tlula liyani a yanguliki ha yone. Yene a li: “Inhaka ni tekele ku yala hi ndlela leyi kombisaka leswaku a ni swi djuli hi lani Yosefa a yentxiki ha kone ka nsati wa Potifaro. (Gen. 39:7-9) Ku hlaya ntiyiso swi ni hlamalisile ku xiya leswaku swi ni kazratelile ku yala xizrambu lexo. Leswo swi ni pfune ku vona leswaku a ni fanela ni tama ni tiyisa wuxaka byanga na Yehovha.”

¹⁶ Ku fana na Robert i swinene ku pfana hi kambela matitwela yezru. Nambiloko u kote ku hlula ndzringo wa kukazri u nga ha tivutisa leswi: ‘Xana swi ni kazratelile ku hlaya swa ku im-him?’ Loko u xiya leswaku u fanela ku yampswisa swa kukazri u nga tinyiki nandzru. Handle ka leswo, nyonxa hi leswi u kahluliki u xiya ku tsrana kwaku. Khongota hi mhaka leyi ni kuva u tiyisa ku tiyimisela kwaku ka ku hanya hi minsinya ya milawu ya Yehovha.—Amaps. 139:23, 24.

17. Xana ku dumbeka ka Robert ku khumbe vito dzra Yehovha hi ndlela yini?

¹⁷ Hi nga dondzra swin’wana ka mfambu wa Robert. Yene a li: “Ntsrhaku ka loko ni yale xizrambu lexiyani, wansati lwiyani a ni byele leswi, ‘U pasile, a nho ku dzringa!’ Kutani ni game ni mu vutisa leswi, u djula ku hlaya yini hi leswo? A ni byele leswaku mun’we wa munghanu wake lweyi a a li Mboni ya Yehovha a mu byele leswaku vampshwa hinkwavu lava nga Timboni ta Yehovha va hanya wutomi byibidzri, ni leswaku loko va pfulekeliwa hi mukhandlu wa ku yentxa swa ku biha va nga tekela ku swi yentxa. Kutani a byele munghanu wake leswaku a a ta dzringisa ku yentxa leswo hi mine. Ni nyonxe ngopfu hi ku tiva leswaku ni dzrumise vito dzra Yehovha.”

18. I yini leswi u tiyimiseleke ku swi yentxa ntsrhaku ka babatiso? (Tlhela u vona bokisi ledzri liki “ Tinhlokomhaka Leti U Taka Ti Zrandzra”.)

¹⁸ Loko u tinyiketela ka Yehovha u va u babatisiwa, u kombisa leswaku u djula ku xwengisa vito dzrake nambi ko yentxeka yini nakone u nga tiyiseka leswaku Yehovha awa yi vona mindzringo ni tinxanisa leti u kumanaka na tone. A ta tovokisa minzamu hinkwayu leyi u yi yentxaka akuva u tama u dumbeka. U nga tiyiseka leswaku hi ku tizrisa moya wake wa ku xwenga a ta ku nyika mpfunu lowu u wu vilelaka. (Luk. 11:11-13) Hi ku pfuniwa hi Yehovha u ta swi kota ku tama u landzrela Yesu ntsrhaku ka babatiso.