1-2. I yini leswi lweyi a djulaka ku babatisiwa a fanelaka ku swi yentxa?

 KA NTLHANU wa malembe lama khalutiki, ku tlula 1.000.000 wa vhanu va babatisiwile swanga Timboni ta Yehovha. Ntalu wavu va dondzrisiwe ku sukela a “wutsrongwanini” ku fana na Timotewu mudondzrisiwa wa lembe xidzana dzra ku sungula. (2 Tim. 3:14, 15) Van’wana va dondzre hi Yehovha na va li vakulu, kasi van’wani na kutani va duhalile. Wansati wa kukazri a dondzre Bibele ni Timboni ta Yehovha a va a babatisiwa na a ni 97 wa malembe!

² Loko a li leswaku u dondzra Bibele kumbe u kulisiwe hi vapswali lava nga Timboni ta Yehovha, xana u yanakanya hi ku babatisiwa? Kungu ledzro i dzrinene ngopfu! Kambe na u nga si na babatisiwa, swi djula u tinyiketela ka Yehovha. Xidondzro lexi xi ta tlhamuxela leswi hlayaka swone ku tinyiketela. Nakone hi ta tlhela hi vona leswaku ha yini u nga fanelanga u txhava ku tinyiketela ka Yehovha ni ku babatisiwa, loko kutani u tiyimiselile.

I YINI KU TINYIKETELA?

3. Nyikela swikombiso swa le Bibeleni swa vhanu lava tinyiketeliki.

³ A Bibeleni mhunu lweyi a tinyiketeliki i mhunu lweyi a hlawuliki ku tizrela Yehovha hi ndlela leyi hlawulekiki. Vaisrayele a ku li tiko ledzri a dzri tinyiketelile ka Yehovha. Kambe a ku ni vhanu van’wana lava a va tinyiketele ka Yehovha hi ndlela ya ku hlawuleka. Hi xikombiso, Aroni a a yambala ‘ngiyana leya ku xwenga’ ya ku tinyiketela, ku nga xipepezretana xa gole a xilembeni xake. Xipepezretana lexiyani xa gole a xi kombisa leswaku a hlawuliwe akuva a tizrela Yehovha hi ndlela ya ku hlawuleka swanga muprista lwenkulu wa Israyele. (Lev. 8:9) Vanaziri na vone va tinyiketelile hi ndlela ya ku hlawuleka ka Yehovha. A zritu “Munaziri” ledzri susiwiki ka zritu dzra  Xiheberu ledzri liki nazir’, dzri tlhamuxela “lweyi a titsravuxiki” kumbe “lweyi a tinyiketeliki”. Vanaziri a va fanela ku hanya hi ku landzra nkongomiso lowu va nyikiwiki wone swanga Vanaziri ka Nawu wa Moxe.—Atinhl. 6:2-8.

4. a) Swi patsra yini ku tinyiketela ka Yehovha? b) Xana swi tlhamuxela yini ku “tiyala”? (Tlhela u vona mufoto.)

⁴ Loko mhunu a tinyiketela ka Yehovha, a hlawula ku va mudondzrisiwa wa Yesu Kriste nakone a zrangisa ku zrandzra ka Xikwembu Nkulukumba a wuton’wini byake. Xana swi patsra yini ku tinyiketela ka wukriste? Yesu a te: “Loko mhunu a djula ku ni landzrela, a a tiyale.” (Mat. 16:24) Swanga nandzra lweyi a tinyiketeliki ka Yehovha, u fanela ku yala ntxhumu wun’wana ni wun’wana lowu nga ha honaka wuxaka byaku na yene. (2 Kor. 5:14, 15) Leswo swi patsra ku yala ku yentxa “mintizro ya nyama” ya ku fana ni ku tikhoma hi ndlela ya ku biha hi tlhelo dzra tinkuku. (Gal. 5:19-21; 1 Kor. 6:18) Xana ku yingiseta Yehovha swi bindzrisa wutomi byaku? Loko u mu zrandzra Yehovha nakone u tiyiseka leswaku milawu yake ya ku pfuna a swi nge ti ku kazratela. (Amaps. 119:97; Eza. 48:17, 18) Makwezru lweyi a vitaniwaka Nicholas a li: “U nga ha vona minsinya ya milawu ya Yehovha ku fana ni djele ledzri ku sivelaka ku yentxa leswi u swi djulaka, kumbe ku fana ni mbangu lowu va pfalelaka ka wone tinghonyama akuva u sizreleleka ka khombo.”

5. a) Xana mhunu a tinyiketela ka Yehovha hi ndlela yini? b) He kwini ku hambana ka ku tinyiketela ka Yehovha ni babatiso? (Tlhela u vona mufoto.)

⁵ Xana u tinyiketela ka Yehovha hi ndlela yini? U hamba xikhongoto, ka xikhongoto lexo u dumbisa Yehovha leswaku u ta mu hanyela wutomi byaku hinkwabyu ni ku mu dumbisa leswaku u ta zrangisa ku zrandzra kwake a wuton’wini byaku. Ku hlaya ntiyiso, u dumbisa Yehovha leswaku u ta tama u mu zrandzra “hi mbilu yaku hinkwayu, hi wutomi byaku hinkwabyu, hi miyanakanyu  yaku hinkwayu ni hi ntamu waku hinkwawu”. (Mar. 12:30) Ku tinyiketela loko ku yentxiwa a xihundleni, wene na Yehovha. Hi tlhelo dzrin’wana a babatiso dzri yentxiwa mahlweni ka vhanu vanyingi; dzri komba van’wana leswaku u tinyiketelile ka Yehovha. Ku tinyiketela kwaku i xidumbiso xa lisima swinene, xileswo u ta yentxa hinkwaswu leswi u nga swi kotaka akuva u xi hetisisa xidumbiso lexi, nakunene hi leswi Yehovha a swi yimeliki kwaku.—Ekles. 5:4, 5.

HA YINI HI TINYIKETELA KA YEHOVHA?

6. Ha yini mhunu a tinyiketela ka Yehovha?

⁶ Xivangelo lexikulu lexi hi yentxaka hi tinyiketela ka Yehovha hi leswaku ha mu zrandzra. A lizrandzru ledzro a hi matitwela ya nkamanyana. Kambe dzri tiseketele ka “wutivi bya ntiyiso” ni “wutlhazri hinkwabyu kun’we ni ku twisisa ka moya”, kumbexana mintxhumu leyi u yi dondzriki ha Yehovha ni ku zrandzra kwake leswi yentxiki leswaku lizrandzru dzraku ha yene dzri kula. (Kol. 1:9) Xidondzro xaku xa Bibele xi ku yentxe u tiyiseka leswaku 1) Yehovha i mhunu wa hakakunene, 2) Bibele i Zritu dzra Yehovha ledzri huhuteliwiki, ni 3) leswaku a tizrisa nhlengeletanu yake akuva a hetisisa ku zrandzra kwake.

7. I yini leswi hi fanelaka ku swi yentxa na hi nga si na tinyiketela?

⁷ Lava tinyiketelaka ka Yehovha va ni wutivi bya Xikwembu Nkulukumba nakone va hanya hi ku pfumelelana ni milawu ya Yehovha. Va tikazratela ku byela van’wana leswi va swi dondzraka a Bibeleni. (Mat. 28:19, 20) Lizrandzru dzravu ha Yehovha dzri ye dzri kula, nakone va djula ku gandzrela Yehovha hi mbilu yavu hinkwayu. Xana u titwa hi ndlela leyo? A wu nge ti djula ku tinyiketela ka Yehovha ni ku babatisiwa ntsena akuva u nyonxisa lweyi  u dondzraka na yene Bibele kumbe vapswali vaku; kumbe ku swi yentxa hi leswi vanghanu vaku hinkwavu va swi yentxiki.

8. I yini lexi nga ha ku pfunaka ku teka xiboho xa ku tinyiketela ka Yehovha? (Amaps. 116:12-14)

⁸ Loko u yanakanyisisa hi hinkwaswu leswi Yehovha a ku yentxeliki swone u ta susumeteleka ku mu tlangela ni ku nyikela wutomi byaku kwake. (Dondzra Amapsalma 116:12-14.) A Bibele dzri swi beka livaleni leswaku Yehovha i munyiki wa “nyiko yin’wana ni yin’wana leyinene kun’we ni xihiwa xin’wana ni xin’wana lexi hetisekiki”. (Yak. 1:17) Nyiko ya yikulu ka hinkwatu i xitlhavelo xa N’wanake, Yesu. Yanakanya hi leswi, xitizrulo xi yentxe leswaku swi koteka akuva hi va ni wuxaka bya le kusuhi na Yehovha. Handle ka leswo, Yehovha a hi nyika mukhandlu wa ku hanya hi lani ku nga helikiki. (1 Yoh. 4:9, 10, 19) Ku tinyiketela i yin’we ya tindlela ta ku kombisa ku tlangela ku nga li ntsena xitizrulu kambe matovoko hinkwawu a hi nyikaka wone. (Deut. 16:17; 2 Kor. 5:15) Hi leswi hi swi dondzraka ka xidondzro 46 yinhla 4 ka buku ledzri liki Hanya Hi Ku Nyonxa Hi La Ku Nga Helikiki! lani ku nga ni vhidiyu dzra maminutu mazrazru ledzri liki Nyika Yehovha Swihananu Swaku.

XANA U LULAMELE KU TINYIKETELA NI KU BABATISIWA?

9. Ha yini vhanu va nga fanelanga va titwa na va sindzriseka ku tinyiketela ka Yehovha?

⁹ Swi nga yentxeka u titwa u nga lulamelanga ku tinyiketela ni ku babatisiwa. Swi nga yentxeka swi vilela kuva u yentxa ku txintxa ka kukazri a wuton’wini byaku akuva u fambisana ni minsinya ya milawu ya Yehovha, kumbe u vilela nkama lowu yengetelekiki akuva u tiyisa lipfumelo dzraku ka Yehovha. (Kol. 2:6, 7) Xidondzro xin’wana ni xin’wana xi hluvuka hi ndlela leyi hambaniki, nakone a hi vampshwa hinkwavu va babatisiwaka ka ntanga leyi fanaka. I swa lisima ku tiva lani u fanelaka ku txintxa kone, ntsrhaku ka leswo yentxa hinkwaswu leswi u nga swi kotaka na u nga tifananisi ni vambeni.—Gal. 6:4, 5.

10. Xana u nga yentxa yini loko u vona leswaku a wu si lulamela ku babatisiwa? (Tlhela u vona bokisi ledzri liki “ Xana U Kulisiwa A Ntiyisweni?”)

¹⁰ Nambiloko u nga si lulamela ku tinyiketela ka Yehovha, u nga dzri tsrhiki kungu ledzro. Kombela Yehovha leswaku a ku pfuna ku txintxa leswi vilelekaka a wuton’wini byaku. (Filp. 2:13; 3:16) U nga tiyiseka leswaku Yehovha a ta yingela xikhongoto xaku nakone a ta ku pfuna.—1 Yoh. 5:14.

HA YINI VAN’WANA VA TXHAVA KU TINYIKETELA?

11. Xana Yehovha a hi pfunisa kuyini ku tama hi dumbeka kwake?

¹¹ Vhanu van’wana lava kutani va lulameliki ku tinyiketela ni ku babatisiwa, minkama yin’wana va ganaganeka leswaku va fanela ku swi yentxa kumbe im-him. Va nga ha tivutisa leswi: Loko ntsrhaku ka babatiso nho yentxa xidoho lexikulu ni va ni susiwa bandleni ke? Loko u txhava leswo, u nga tiyiseka leswaku Yehovha a ta ku nyika hinkwaswu leswi u swi vilelaka “ku yentxela leswaku [u] hanya hi ndlela leyi fanelekaka ka Yehovha akuva [u] mu nyonxisa”. (Kol. 1:10) Nakone a ta ku nyika ntamu lowu u wu vilelaka akuva u yentxa leswi nga swinene. Yehovha a pfune vhanu vanyingi akuva va yentxa leswi nga swinene. (1 Kor. 10:13) I hi mhaka leyo a nga vhanu vatsrongo lava susiwaka a mabandleni. Yehovha a hi pfuna kuva hi tama hi dumbeka kwake.

12. I yini lexi u nga xi yentxaka akuva u nga weli ka xidoho lexikulu?

¹² Hinkwezru hi dzringeka ku yentxa mintxhumu ya ku biha. (Yak. 1:14) Kambe u nga hlawula leswi u taka swi yentxa loko u dzringiwa. Ntiyiso wa mhaka hi leswaku hi wene  u taka tihlawulela leswi u taka swi yentxa a wuton’wini byaku. Vhanu van’wana va hlaya leswaku a swi koteki ku lawula matitwela yezru ni leswi hi nga swi yentxaka. Kambe leswo a hi ntiyiso, u nga swi kota ku lawula ku navela kwaku ka ku biha. Nkama lowu u dzringiwaka u nga swi kota ku yala ku yentxa swa ku biha. Akuva leswo swi koteka khongota siku ni siku, tibekele xiyimiso lexinene xa dondzro ya ximhunu, dondzro ya Zritu dzra Xikwembu Nkulukumba, patsreka a mintlhangan’wini ya wukriste nakone yavelana ni van’wana leswi u swi dondzraka. Loko u tama u yentxa leswo u ta va ni ntamu lowu vilelekaka akuva u tama u dumbeka ka Yehovha. U nga dzrivali leswaku minkama hinkwayu Yehovha a ta ku pfuna ku yentxa leswo.—Gal. 5:16.

13. He xini xikombiso lexinene lexi Yosefa a hi bekeliki xone?

¹³ Swi ta nabyala kuva u tama u dumbeka ka Yehovha loko u swi tiva leswi u taka swi yentxa na u nga si dzringiwa. Bibele dzri khanela hi vhanu vanyingi va ku kala ku hetiseka lava va swi kotiki ku yentxa leswo. Hi xikombiso, nkama lowu nsati wa Potifaro a nga zama ku yetlela na Yosefa, yene kutani a a swi tiva leswi a a ta swi yentxa. Bibele dzri hlaya leswaku ‘a yalile’, Yosefa hi wuswake a hlaye leswi: ‘Ndzri nga swi kotisa kuyini ku yentxa leswimfani leswikulu leswi, ndzri dohela Xikwembu Nkulukumba xana?’ (Gen. 39:8-10) Swi le livaleni leswaku Yosefa a a swi tiva leswi a a ta swi yentxa na a nga si dzringiwa hi nsati wa Potifaro, hi leswo swi mu pfuniki ku yentxa leswinene nkama a nga dzringiwa.

14. Xana hi nga hlula mindzringo hi ndlela yini?

¹⁴ Hi nga va ni ku tiyimisela ka ku fana ni ka Yosefa hi ndlela yini? U nga hlawula na ka ha li swoswi leswi u taka swi yentxa loko u lavisana ni ndzringo. U nga hlweli ku yala loko mintxhumu yi nga fambisani ni ku zrandzra ka Yehovha, nakone u nga tsrhameli ku pimisa ha yone. (Amaps. 97:10; 119:165) Loko u yentxa leswo u ta kota ku hlula ndzringo. U ta va na u swi tiva leswi u taka swi yentxa na ndzringo wu nga si tlhasa.

15. Xana mhunu a kombisa leswaku a ‘djuletela Yehovha hi mbilu hinkwayu’ hi ndlela yini? (Vaheberu 11:6)

¹⁵ Swi nga yentxeka kutani u tiyiseka leswaku u kume ntiyiso ni leswaku u djula ku tizrela Yehovha hi mbilu yaku hinkwayu. Kambe swi nga ha yentxeka u titwa u nga lulamelanga ku tinyiketela ka Yehovha ni ku babatisiwa. Ka xiyimu lexi, u nga yentxa swa ku fana ni leswi Davhida a swi yentxiki. Yene a kombele  Yehovha a ku: ‘Ndzri kambe, Xikwembu Nkulukumba, u tiva mbilu yanga. Ndzri dzringe, u tiva miyanakanyu yanga: u vona loko nha dzri famba hi ndlela ya ku somboloka. U ndzri fambisa hi ndlela leyi nge ke na ku hela.’ (Amaps. 139:23, 24) Yehovha a tovokisa “lava mu djuletelaka hi timbilu tavu hinkwatu”. Ku tikazrata loku u ku yentxaka akuva u babatisiwa ku kombisa leswaku na wene u djuletela Yehovha hi mbilu yaku hinkwayu.—Dondzra Vaheberu 11:6.

TAMA U TSRHINDZREKELA KA YEHOVHA

16-17. Xana lava kulisiwiki a ntiyisweni va nga tsrhindzrekela ka Yehovha hi ndlela yini? (Yohane 6:44)

¹⁶ Yesu a hlaye leswaku vadondzrisiwa vake va kokiwe ha Yehovha. (Dondzra Yohane 6:44.) Yanakanya ku nyonxisa ka swone ni ndlela leyi swi ku khumbaka ha yone. Yehovha a vona ntxhumu wa wunene ka mun’wana ni mun’wana lweyi a mu kokelaka a ntiyisweni. Yehovha a vona mun’wana ni mun’wana wezru swanga ‘tiko dzra ku xwenga’. (Deut. 7:6; vona nota ka Bíblia de estudo.) Yehovha a ku vona hi ndlela leyo.

¹⁷ Swi nga yentxeka u li mumpshwa lweyi a kulisiwaka hi vapswali lava nga Timboni ta Yehovha. Swi nga yentxeka u titwa u tizrela Yehovha hi leswi vapswali vaku va yentxaka leswo, ku nga li hi leswi a ku kokeliki kwake. Kambe Bibele dzri li: “Tsrhindzrekelani ka Xikwembu Nkulukumba, kutani na yene a ta mi tsrhindzrekelela.” (Yak. 4:8; 1 Makr. 28:9) Loko wene u yentxa xa kukazri akuva u tsrhindzrekela ka Yehovha, na yene a ta hamba xiyenge xake akuva a tsrhindzrekela kwaku. Yehovha a nga ku voni ntsena swanga mhunu lweyi a hambaka xiyenge xa ntlawa wa kukazri. Yehovha a tsrhindzrekela ka mhunu mun’wana ni mun’wana hi ku kongoma, nambi ka lava kulisiwaka a ntiyisweni. Loko mhunu a yentxa xa kukazri akuva a tsrhindzrekela ka Yehovha a va na a yentxa leswi nga ka buku dzra Yakobe 4:8.—Tlhela u vona 2 Vatesalonika 2:13.

18. Hi ta vona yini ka xidondzro lexi landzrelaka? (Amaps. 40:8)

¹⁸ Loko u tinyiketela ka Yehovha u tlhela u babatisiwa, u va na u yetisela Yesu. Yene a a tiyimisele ku yentxa xin’wana ni xin’wana lexi Papayi wake a a mu kombela xone. (Dondzra Amapsalma 40:8; Heb. 10:7) Ka xidondzro lexi landzrelaka hi ta vona leswi taka ku pfuna ku tama u dumbeka ntsrhaku ka loko u babatisiwile.