1. He wani matitwela lawa malandzra man’wana ya Yehovha minkama yin’wana ma nga ha vaka na wone?

 SWA txhavelela ku tiva leswi Amapsalma 149:4 [BX] yi hlayaka swone! Yone yi li: ‘A Hosi [Yehovha] yi titsrhavela hi vhanu va yone.’ Kambe minkama yin’wana vambeni va nga ha heleliwa hi ntamu va va va yanakanya leswi: ‘Xana mine hi tshima ni wa lisima ka Yehovha?’ Malandzra manyingi ya Yehovha nambi ya le minkameni ya khale, minkama yin’wana ma langutane ni matitwela ya ku fana ni lawo.—1 Sam. 1:6-10; Yb. 29:2, 4; Amaps. 51:11.

2. I mani lweyi a nga yamukeliwaka hi Yehovha?

² A Bibele dzri swi beka livaleni leswaku vhanu va ku kala ku hetiseka va nga swi kota ku nyonxisa Yehovha ni ku yamukeleka kwake. Hi ndlela yini? Hi fanela ku kombisa leswaku hi ni lipfumelo ka Yesu Kriste hi tlhela hi babatisiwa. (Yoh. 3:16) Hi ndlela leyo hi kombisa leswaku hi tisolile ka swidoho swezru ni leswaku hi dumbisa Yehovha ku yentxa ku zrandzra kwake. (Mint. 2:38; 3:19) Yehovha awa nyonxa loko hi tikazratela ku yentxa leswo akuva hi tsrhindzrekela kwake. Nakone loko hi yentxa hinkwaswu leswi hi nga swi kotaka akuva hi hetisisa xidumbiso lexi hi xi yentxiki, Yehovha a ta hi yamukela a tlhela a hi vona swanga vanghanu vake lavakulu.—Amaps. 25:14.

3. Hi ta vona yini ka xidondzro lexi?

³ Kutani ha yini van’wana va yanakanya leswaku Yehovha a nga nyonxi ha vone? I yini leswi Yehovha a swi yentxaka akuva a kombisa leswaku awa hi yamukela? Nakone i yini leswi hi nga swi yentxaka akuva hi tiyisa ku dumba kwezru ka leswaku Yehovha awa nyonxa ha hine?

 LESWI YENTXAKA VAN’WANA VA YANAKANYA LESWAKU A VA YAMUKELEKI KA YEHOVHA

4-5. I yini lexi hi nga tiyisekaka ha xone nambiloko hi tivona na hi nga pfuni ntxhumu?

⁴ Van’we vezru minkama yin’wana hi titwa hi nga pfuni ntxhumu ku sukela a wutsrongwanini. (Amaps. 88:15) Makwezru wa kukazri lweyi a vitaniwaka Adrián a li: “Minkama hinkwayu a ni tivona ni nga li wa lisima. Ni dzrimuka leswaku na na ha li ntsrongo a ni khongota leswaku ndangu wezru wu hanya paradeyisini, kambe mine a ni nga tivoni na ni faneleka akuva ni ya tsrhama kone.” Tony makwezru lweyi a kalaka a nga kulisiwanga ntiyisweni a li: “Vapswali vanga a va ngi ngi sama va ni byela leswaku va ni zrandzra ni leswaku va tikhuza ha mine. A swo fana ni loko leswi a ni swi yentxa a swi nga li swa ntxhumu kwavu.”

⁵ Loko minkama yin’wana u titwa u nga pfuni ntxhumu, dzrimuka leswaku i Yehovha ha wuswake a nga ku kokela ntiyisweni. (Yoh. 6:44) Yehovha a vona leswi nga swinene ka mun’wana ni mun’wana wezru. A tiva timbilu tezru nakone a ndlela leyi a hi vonaka ha yone yi hambanile ni ndlela leyi hine hi tivonaka ha yone. (1 Sam. 16:7; 2 Makr. 6:30) Xileswo tiyiseka loko Yehovha a ku byela leswaku u mhunu lwe a navelekaka kwake.—1 Yoh. 3:19, 20.

6. Xana mupostola Pawulo a titwise kuyini loko a pimisa hi swihoxo swake swa khale?

⁶ Na hi nga si dondzra ntiyiso swi nga yentxeka van’we kwezru hi yentxe mintxhumu leyi nga hi yentxaka hi titwa nandzru. (1 Pet. 4:3) Malandzra man’wana ya Yehovha lawa kutani ma mu tizrelaka ku dzringana nkama wa ku leha swi nga yentxeka na wone ma lwisana ni ku tsrana ka kukazri. Wene ke? Xana minkama yin’wana u titwa na Yehovha a nga ku dzrivalelanga? Ka xiyimu lexi i swinene ku dzrimuka leswaku man’we ka malandzra ya Yehovha ya le nkameni wa khale na wone ma lwisane ni matitwela lawo. Hi xikombiso, mupostola Pawulo loko a yanakanyisisa hi ku kala ku hetiseka kwake a a titwa na a nga pfuni ntxhumu. (Rom. 7:24) I ntiyiso leswaku Pawulo a tisolile ka swidoho swake a va a babatisiwa. Nambitanu a a tivona swanga “lwentsrongo ka vapostola” ni “mudohi lwenkulu”.—1 Kor. 15:9; 1 Tim. 1:15.

7. I yini leswi hi faneliki ku swi dzrimuka?

⁷ Yehovha a dumbisa leswaku loko hi tisola a ta hi dzrivalela. (Amaps. 86:5) Xileswo loko kutani hi tisolile ka swidoho leswi hi swi yentxiki, hi nga tiyiseka leswaku Yehovha a hlaya ntiyiso nakone a hi dzrivalelile.—Kol. 2:13.

8-9. Hi nga swi kotisa kuyini ku lwisana ni miyanakanyu ya leswaku a hi mu yentxeli leswi yaneliki Yehovha?

⁸ Hinkwezru hi djula ku tizrela Yehovha hi lani hi nga kotaka ha kone. Xileswo, van’wana va nga ha titwa na leswi va swi yentxelaka Yehovha swi nga nyawuli akuva va yamukeleka kwake. Makwezru lweyi a vitaniwaka Amanda a li: “A ni pimisa leswaku ku yentxela Yehovha hinkwaswu leswi ni nga swi kotaka i kuva minkama hinkwayu ni yentxa leswi yengetelekiki. Leswo swi ni yentxa ni zama ku yentxa mintxhumu leyi yi kalaka yi nga li ka ntamu wanga. Loko ni nga swi koti, swi ni yentxa ni khunguvanyeka, ni yanakanya leswaku na yene Yehovha a titwisa xiswoswo.”

⁹ Hi nga yi hlulisa kuyini miyanakanyu ya leswaku a hi mu yentxeli leswi yaneliki Yehovha? Dzrimuka leswaku Yehovha a nga hi bindzriseli nakone awa yanakanyelana. A nga hi sindzrisi ku yentxa swa ku tlula leswi hi nga swi kotaka, a nyika lisima ntizro wun’wana ni wun’wana lowu hi wu yentxaka ntsena loko hi tikazrata. Nakone u nga yanakanyisisa hi swikombiso swa le Bibeleni swa vhanu lava tizreliki Yehovha hi timbilu tavu hinkwatu. Hi xikombiso, yanakanya hi Pawulo. A tizre yi nga txhayi ku dzringana malembe manyingi, a yendzre mpfhuka wa ku leha swinene nakone a pfunisile a ku simekiweni ka mabandla. Kambe loko xiyimu xake xi txintxile a nga ha swikoti ku zrezra ku fana ni khale, a nga va leswaku Yehovha a a nga ha swi nyiki lisima leswi a nga  swi yentxa? Im-him. Pawulo a tame a yentxa leswi a nga swi kotaka nakone Yehovha a mu tovokisile. (Mint. 28:30, 31) Hi ndlela leyi fanaka, leswi hi mu yentxelaka swone Yehovha swi nga ha txintxa hi ku famba ka nkama. Kambe lexi xi nga xa lisima i nsusumeto lowu hi yentxaka hi mu tizrela. Swoswi a hi voneni tindlela leti Yehovha a kombisaka ha tone leswaku awa hi yamukela.

YEHOVHA A SWI KOMBISA HI NDLELA YINI LESWAKU AWA HI YAMUKELA?

10. Xana hi nga dzri yingelisa kuyini zritu dzra Yehovha loko a hi byela leswaku awa hi yamukela? (Yoh. 16:27)

¹⁰ Hi ku tizrisa Bibele. Yehovha minkama hinkwayu a djuletela tindlela ta ku kombisa malandzra yake leswaku awa ma zrandzra nakone awa nyonxa hi leswi ma swi yentxaka. A Bibele dzri khanela hi swiyentxakalu swibidzri lani Yehovha a byeliki Yesu leswaku i n’wanake lweyi a zrandzrekaka nakone a mu yamukelaka. (Mat. 3:17; 17:5) Xana a wu swi nyonxeli ku twa Yehovha na a hlaya ntxhumu lowu fanaka ha wene? Namunhla Yehovha a nga khaneli na hine hi ku kongoma, kambe a khanela na hine hi ku tizrisa Bibele. Hi nga yingela zritu dzra Yehovha loko a hi byela leswaku awa hi yamukela nkama lowu hi dondzraka mazritu ya Yesu ka Tievhangeli. (Dondzra Yohane 16:27.) Yesu a yetisele Papayi wake hi ku helela, xileswo loko hi twa mazritu ya lizrandzru lawa Yesu a ma byeliki vhanu va ku kala ku hetiseka, hi nga kota ku yanakanya hi ku kongoma na Yehovha a hi byela mazritu lawo.—Yoh. 15:9, 15.

11. Ha yini ku lavisana ni mindzringo swi nga hlayi swone leswaku Yehovha a nga hi yamukeli? (Yakobe 1:12)

¹¹ Leswi a hi yentxelaka swone. Yehovha minkama hinkwayu a lulamele ku hi pfuna. Hi xikombiso, a hi nyika hinkwaswu leswi hi swi vilelaka hi tlhelo dzra nyama. Minkama yin’wana Yehovha a nga pfumelela leswaku hi khaluta hi ka mindzringo ya kukazri, hi lani swi viki ha kone ka Yobe. (Yb. 1:8-11) Loko hi khaluta hi ka mindzringo a swi hlayi swone leswaku Yehovha a nga ha hi yamukeli. Ku hambana ni leswo, lowo i mukhandlu wa ku kombisa lizrandzru ledzri hi nga na dzrone ha Yehovha ni ndlela leyi hi mu dumbaka ha yone. (Dondzra Yakobe 1:12.) Nakone hi ta kota ku vona leswaku Yehovha awa hi zrandzra nakone awa hi seketela nkama lowu a hi pfunaka kuva hi tiyisela.

12. Hi nga dondzra yini ka xikombiso xa Dmitrii?

¹² Vona leswi yentxekeliki makwezru Dmitrii wa le Ásia, A heleliwe hi ntizro nakone a tsrhame tihweti tinyingi na a nga tizri. A hambe xiboho xa ku yengetela ntizro wake wa ku zrezra, hi ndlela leyo a kombise ku dumba Yehovha. A ku khaluta tihweti tinyingi kambe a a nga wu kumi  ntizro. Kolanu a sungule ku vabya lakakuva a nga swi koti ku huma kaya. A titwe na a nga ha pfuni ntxhumu hikusa a a nga swi koti ku hetisisa wutiyanguleli byake swanga nuna tlhelo papayi, nakone a a tsrhamela ku tivutisa loko Yehovha a a ha mu yamukela. Ka wusiku bya kukazri, n’wanake wa n’hwanyana a mu tsrhindzrekelile a mubedweni na a ni papela ledzri a a tsrale buku dzra Ezaya 30:15 ledzri liki: ‘A ku zruleni, ni le ku dumbeni ku ta va ntamu wenu.’ Kutani a mu byela leswi: “Papayi loko u nga titwi ha hombe dzrimuka ndzrimana leyi.” Dimitrii a xiye leswaku hi ku pfuniwa hi Yehovha, ndangu wake a wu ni swakuda ni ka ku tsrhama kone. Yene a li: “Ni vone leswaku leswi a swi djula kuva ni swi yentxa i ku zrula ni va ni dumba Yehovha.” Loko u lavisana ni ndzringo wa ku fana ni lowu, dumba leswaku Yehovha a ta ku hlayisa ni ku ku pfuna akuva u tiyisela.

13. Xana Yehovha a nga tizrisa vamani akuva a hi komba leswaku awa hi zrandzra?

¹³ A tizrisa vamakwezru. Yehovha a nga tizrisa vamakwezru akuva a hi tiyisekisa leswaku awa hi zrandzra. Hi xikombiso, a nga tizrisa vamakwezru akuva va hi byela mazritu lama kutxanaka hi nkama lowunene. Hi leswo swi yentxekeliki makwezru wa kukazri wa xisati wa le Ásia nkama lowu na a lavisana ni ku hlatiyela. A lahlekeliwe hi ntizro a tlhela a sungula ni ku vabya, nuna wake a yentxe xidoho lexikulu a va a yima ku tizra swanga nkulu wa bandla. Yene a li: “A ni nga swi tivi leswaku ha yini leswiyani swi ni yentxekela. Ni sungule ku yanakanya leswaku swi nga yentxeka ni yentxe txhumu wa kukazri wa ku biha ni leswaku Yehovha a a ni kwatelile.” Makwezru lweyi a khongotile a kombela leswaku Yehovha a mu komba leswaku a a mu zrandzra ni leswaku awa mu yamukela. Xana Yehovha a yentxe yini? Yene a li: “Vakulu a bandleni va khanele na mine nakone va ni tiyisekise leswaku Yehovha awa ni zrandzra swinene.” Ntsrhaku ka nkamanyana a tlhele a kombela mpfunu ka Yehovha. A tlhele a  ku: “Hi siku ledzri ni khongotiki ha dzrone ni yamukele papela dzra vamakwezru a bandleni, loko ni li kazri ni dondzra papela ledzro dzra ku txhavelelana ni gungule leswaku Yehovha a ni twile.” Nakunene minkama yin’wana Yehovha a kombisa leswaku awa hi zrandzra hi ku tizrisa mazrito lawa vamakwezru va hi byelaka wone.—Amaps. 10:17.

14. He yini ndlela yin’wana leyi Yehovha a kombisaka ha yone leswaku awa hi yamukela?

¹⁴ Yehovha a tlhela a kombisa ndlela leyi a hi zrandzraka ha yone loko a tizrisa vamakwezru leswaku va hi nyika swilayu leswi hi swi vilelaka. Hi xikombiso, Yehovha a tizrise mupostola Pawulo akuva a tsrala 14 wa mapapela a ma kongomisa a mabandleni. Ka mapapela lawa, Pawulo a nyikele swilayu leswi nga ni ntamu kambe swa lizrandzru. Kambe ha yini Yehovha a tizrise Pawulo akuva a nyikela swilayu leswo? Hikusa Yehovha i Papayi lweyi a nga ni wunene nakone a kawuka n’wanake ‘lwa mu tsrhavelaka’ (Amapr. 3:11, 12) Leswi swi tlhamuxela leswaku loko hi yamukela swilayu leswi seketeliwiki a Bibeleni a swi hlayi swone leswaku Yehovha a nga hi yamukeli, a matsrhan’wini ya leswo swi kombisa leswaku awa hi zrandzra. (Heb. 12:6) He tini tindlela tin’wana leti Yehovha a kombisaka ha tone leswaku awa hi yamukela?

WUMBONI BYIN’WANA LEBYI KOMBISAKA LESWAKU YEHOVHA AWA HI YAMUKELA

15. I vamani lava Yehovha a va nyikaka moya wa ku xwenga nakone leswo swi hi tiyisekisa yini?

¹⁵ Yehovha a nyika moya wake wa ku xwenga lava a va yamukelaka. (Mat. 12:18) Hi nga ha tivutisa: ‘Xana ku ni mhandzru wa moya lowu ni swi kotaka ku wu kombisa a wuton’wini byanga?’ Xana u swi xiyile leswaku swoswi wa swi kota ku lehisa mbilu ku tlula nkama lowu u nga dondzra ntiyiso ha wone? Nkama lowu u yaka mahlweni u kombisa matsrhamela ya moya wa Xikwembu Nkulukumba, u ta ya u tiyiseka leswaku Yehovha awa ku yamukela!—Vona bokisi ledzri liki: “ A Mhandzru Wa Moya I . . . ”

16. Xana Yehovha a tizrisa vamani akuva va zrezra madzrungula lamanene ka van’wana? (1 Vatesalonika 2:4)

¹⁶ Yehovha a nyike vhanu lava a va yamukelaka ntizro wa lisima, ntizro wa ku zrezra madzrungula lamanene. (Dondzra 1 Vatesalonika 2:4.) Vona ndlela leyi makwezru lweyi a zrandzrekaka lweyi a vitaniwaka Jocelyn a patsrekiki ha yone ka ntizro wa ku zrezra. Siku dzrin’wana Jocelyn a pfuke na a hlatiyela. Yene a li: “A ni titwa ni nge na ntamu nakone ni nga pfuni ntxhumu, a ni li phayona nakone ledzro a ku li siku dzranga dzra ku ya nsin’wini. Xileswo ni khongotile ni va ni ya nsin’wini.” Hi mixo wolowo Jocelyn a tivane na Mary ku nga wansati lweyi  a nga ni mbilu leyinene nakone a pfumeliki ntiyiso. Ntsrhaku ka tihweti ta kukazri Mary a hlaye leswaku a a li ku khongoteni a kombela mpfunu wa Yehovha nkama Jocelyn a nga gongondzra xipfalu. Xana Jocelyn a dondzre yini ka mfambu lowo? Yene a li: “Ni titwe ingiki hi loko Yehovha a a ni byela leswi, ‘na ku yamukela.’” I ntiyiso leswaku a hi vhanu hinkwavu lava taka hi yamukela loko hi zrezra kambe hi nga tiyiseka leswaku Yehovha awa nyonxa loko a hi vona hi tikazratela ku yavelana ni van’wana madzrungula lamanene.

17. Xana u dondzra yini ka leswi Vicky a swi hlayiki mayelanu ni xitizrulo? (Amaps. 5:12)

¹⁷ Yehovha a hambe lulamiselo dzra xitizrulo akuva a pfuna lava a va yamukelaka. (1 Tim. 2:5, 6) Kambe loko u nga tiyiseki ke, leswaku Yehovha awa ku yamukela nambiloko u ni lipfumelo ka xitizrulo nakone u babatisiwile? Dzrimuka leswaku a hi minkama hinkwayu hi fanelaka ku tiseketela ka matitwela yezru, kambe hi nga dumba Yehovha. Kwake, lweyi a nga ni lipfumelo ka xitizrulo a mu vona na a li lweyi a lulamiki nakone a dumbisa leswaku a ta mu tovokisa. (Dondzra Amapsalma 5:12; Rom. 3:26) Makwezru wa kukazri wa xisati lweyi a vitaniwaka Vick a vone ndlela leyi ku yanakanyisisa hi xitizrulo swi mu pfuniki ha yone. Yene a li: “Ni xiye leswaku Yehovha a ni lehisele mbilu ku dzringana nkama wa ku leha . . . Kambe, mine a ni mu byela leswi: ‘A lizrandzru dzraku i dzrikulu a dzri ni faneli, nakone a xitizrulo xa n’wanaku a xi dzringananga kuva xi hlampswa swidoho swanga.’” Loko Vick a yanakanyisise hi nyiko leyi ya yikulu ya xitizrulo a sungule ku titwa na a zrandzriwa hi Yehovha. Na hine hi nga tivona na hi zrandzriwa hi Yehovha nakone na hi yamukeliwa ha yene loko hi yanakanyisisa hi xitizrulo.

18. Loko hi tama hi zrandzra Papayi wezru wa le matilweni, i yini leswi hi nga tiyisekaka ha swone?

¹⁸ I ntiyiso leswaku nambiloko hi tikazrata akuva hi tizrisa hinkwaswu leswi hi swi dondzriki ka xidondzro lexi, u ta pfa u titwa na u hele ntamu kumbe u ganaganeka leswaku Yehovha awa ku zrandzra nakone awa ku yamukela. Loko leswo swi ku yentxekela, dzrimuka leswaku Yehovha awa va yamukela “lava va tamaka va mu zrandzra”. (Yak. 1:12) Kutani tama u tsrhindzrekela kusuhi na Yehovha nakone zama ku twisisa tindlela hinkwatu leti a ti tizrisaka akuva a kombisa leswaku awa ku zrandzra. Nakone u nga txhuke u dzrivala leswaku Yehovha “a nga le kule ngopfu ni mun’wana ni mun’wana wezru”.—Mint. 17:27.