1. Hi swi tivisa kuyini leswaku Yehovha a djula hi tsrhindzrekela kwake?

 YEHOVHA a hi zramba ku tsrhindzrekela kwake. (Yk 4:8) A djula ku va Xikwembu Nkulukumba wezru, Papayi wezru ni Munghanu wezru. Hi swi tivisa kuyini leswo? Yehovha a hlamula swikhongoto swezru nakone a wa hi pfuna hi minkama ya ku kazrata. A tlhela a tizrisa nhlengeletanu yake akuva a hi dondzrisa ni ku hi sizrelela. Kambe hine ke hi nga yentxa yini akuva hi tsrhindzrekela ka Yehovha?

2. Hi nga tsrhindzrekelisa kuyini ka Yehovha?

² Hi nga tsrhindzrekela ka Yehovha hi ku khongota kwake ni ku dondzra Bibele hi tlhela hi yanakanyisisa ha dzrone. Loko hi yentxa leswo, lizrandzru dzrezru ni ndlela leyi hi mu tlangelaka ha yone Yehovha swi ta ya swi yengeteleka nakone hi ta susumeteleka ku yentxa leswi mu fanelaka ku nga ku mu yingiseta ni ku mu gandzrela. (Mpf 4:11) Loko hi ya hi mu tiva ku yampswa Yehovha, hi ta ya hi mu dumba ni ku dumba nhlengeletanu leyi a yi tizrisaka akuva a hi pfuna.

3. I yini leswi Sathana a dzringisaka ku swi yentxa akuva a hi tsravukanisa na Yehovha, kambe i yini lexi taka hi pfuna kuva hi nga tsrhiki Yehovha ni nhlengeletanu yake? (Amapsalma 31:13, 14)

³ Kambe Sathana a djuletela tindlela ta ku hi tsravukanisa na Yehovha, ngopfungopfu loko hi langusana ni swikazratu. A swi yentxisa kuyini leswo? Ha kutsrongokutsrongo a dzringisa ku tsranisa ndlela leyi hi mu dumbaka ha yone Yehovha ni nhlengeletanu yake. Kambe a hi fanelanga hi wela ka mintlhamu ya Sathana. A ku na ntxhumu lowu taka hi tsravukanisa na Yehovha kun’we ni nhlengeletanu yake loko lipfumelo dzrezru ni ndlela leyi hi mu dumbaka ha yone swi tiyile.—Dondzra Amapsalma 31:13, 14.

4. I yini leswi hi taka swi vona ka xidondzro lexi?

 ⁴ Ka xidondzro lexi hi ta vona swikazratu swizrazru leswi buyaka hi handle ka bandla leswi nga ha tsranisaka ndlela leyi hi mu dumbaka ha yone Yehovha ni nhlengeletanu yake. Xana swikazratu leswo swi nga hi tsravukanisa hi ndlela yini na Yehovha? Nakone hi nga yentxa yini akuva hi tisizrelela?

5. Xana swikazratu swi nga yi tsranisisa kuyini ndlela leyi hi dumbaka Yehovha ni nhlengeletanu yake ha yone?

⁵ Minkama yin’wana hi kumana ni swikazratu swa ku fana ni ku kanetiwa hi maxaka kumbe ku heleliwa hi ntizro. Swikazratu swoleswo swi nga ha tsranisa ndlela leyi hi yi dumbaka ha yone nhlengeletanu ya Yehovha swi va swi hi tsravukanisa na yone. Hi ndlela yini? Loko xikazratu xi teka nkama wa ku leha hi nga ha sungula ku titwa wuswezru hi va hi hela ntamu. Sathana a londzrovota mukhandlu lowo akuva a byala ku ganaganeka miyanakanywini yezru kutani hi nga ha sungula ku tivutisa leswi: Xana Yehovha awa ni zrandzra hakunene. Xana yene kumbe nhlengeletanu yake a va na nadzru ka swikazratu leswi ni kumanaka na swone? Xiyimu xa ku fana ni lexo xi same xi humelela va-Israyele va kukazri a Egipta. A ku sunguleni, a va pfumela leswaku Yehovha a a hlawule Moxe na Aroni akuva va va huluxa. (Eks 4:29-31) Kambe loko Faro a sungule ku va bindzrisela wutomi va-Israyele lavayani va zrwexe nandzru Moxe na Aroni. Va te: ‘Leswi n’wi hambiki ntxhumu lowa ku nun’hwa a mahlweni ka Faro, ni le mahlweni ka malandzra yakwe, n’wi beke lipanga a vokweni dzravu kuva va hi dlaya.’ (Eks 5:19-21) Va zrwexe nandzru malandzra ya Xikwembu Nkulukumba ya ku dumbeka. Vavisani ka swone! Loko u lwisana ni swikazratu swa kukazri ku dzringana nkama wa ku leha, u nga yentxa yini akuva u tama u dumba Yehovha ni nhlengeletanu yake?

6. Hi dondzra yini ka muprofeta Habakuk? (Habakuk 3:17-19)

⁶ Khongota ka Yehovha hi mbilu yaku hinkwayu u kombela mpfunu wake. Muprofeta Habakuk a langusane ni swikazratu swinyingi. Phela ku tlhase lakakuva a tivutisa leswaku xana Yehovha a a zron’weka ha yene hakunene. Kutani a pfule mbilu yake ka Yehovha a mu byela ndlela leyi a a titwa ha yone. A te: ‘Yehovha ndzri ta huwelela ku ya gama kwini, na u nga ndzri yingeli?’ (Hab 1:2, 3) Yehovha a hlamule xikhongoto lexo lexi humaka mbilwini. (Hab 2:2, 3) Ntsrhaku ka leswo, Habakuk a sungule ku yanakanyisisa hi hinkwaswu leswi Yehovha kutani a swi yentxeliki vhanu vake. Leswo swi mu pfune kuva a tlhela a va ni ku nyonxa. Swi ve livaleni ka Habakuk leswaku Yehovha a a zron’weka ha yene ni leswaku a a ta mu pfuna ka xikazratu xin’wana ni xin’wana lexi a a ta kumana na xone. (Dondzra Habakuk 3:17-19.) Hi dondzra yini ka mhaka leyi? Loko u kumana ni swikazratu, khongota ka Yehovha u mu byela ndlela leyi u titwaka ha yone u tlhela u mu kombela kuva a ku pfuna. U nga tiyiseka leswaku Yehovha a ta ku nyika ntamu lowu u vilelaka akuva u tiyisela. Lipfumelo dzraku dzri ta ya dzri tiya loko u xiya leswaku Yehovha a kusuhi na wene.

7. I yini leswi xaka dzra ku kukazri dzra Shirley dzri dzringisiki ku swi yentxa? Kambe i yini leswi yene a swi yentxiki?

⁷ Tama u va ni xiyimiso lexinene xa moya. Shirley makwezru wa kukazri wa xisati wa le Papuwa Nova Guiné, b a kumane ni swikazratu swinyingi. A ndangu wake a wu li wusiwaneni nakone a swi va kazratela nambi ku kuma swa ku tihanyisa. Xaka dzra kukazri dzra Shirley dzri dzringise ku yentxa leswaku a ganaganeka ka ndlela leyi a a mu dumba ha yone Yehovha. Dzri hlayi leswi: “U li a moya wa ku xwenga wa  mi pfuna, wu kwini mpfunu wa kone? Phela a ndangu waku wa ha ta tama wu va wusiwaneni. Phela leswi swa ku zrezra swi ku hetela nkama.” Shirley a li: “Ku tlhasi lani ni tivutisiki leswi: ‘Xana Yehovha awa zron’weka ha mine ni ndangu wanga?’ Ni tekele ku khongota ka Yehovha ni mu byela leswi a ni swi yanakanya. Handle ka ku ya ku zrezreni ni ku ya mintlhanganwini ntsena, ni tame ni dondzra Bibele kun’we ni mabuku mambeni.” Shirley a sungule ku xiya leswaku Yehovha a a wu hlayisa ndangu wake. Phela, a va ngi ngi sama va yetlela na va nga danga nakone a va nyonxile. Shirley a li: “Ni xiye leswaku Yehovha a a swi hlamula swikhongoto swanga.”(1Tm 6:6-8) Loko u ya mahlweni ni xiyimiso xaku xa moya, a swikazratu ni ku ganaganeka kwaku a swi nge ti ku tsravukanisa na Yehovha.

8. Ku nga ha humelela yini hi vamakwezru lava zrangelaka a nhlengeletanwini ya Yehovha?

⁸ Hi ku tizrisa madzrungula ni maredi sosiyali, a valala vezru va hangalasa madzrungula ya ku biha hi vamakwezru lava zrangelaka a nhlengeletanwini ya Yehovha. (Ps 31:13) Kambe leswo, a swi hi hlamalisi hikusa nambi vakriste a nkameni lowu khalutiki va langusane ni swiyimu leswi fanaka loko mupostola Pawulo a lumbetiwa a va a pfaleliwa. Xana va yangulise kuyini?

9. Xana vakriste va kukazri va yangulise kuyini loko Pawulo a pfaleliwa?

⁹ Loko mupostola Pawulo a pfaleliwe Roma, vakriste va kukazri va yime ku mu seketela. (2Tm 1:8, 15) Ha yini? Xana a va khomiseka tingana hi Pawulo hi leswi vhanu van’wana a va mu vona swanga xigevengu? (2Tm 2:8, 9) Kumbe va sungule ku txhava leswaku na vone a va ta kanetiwa. A hi xi tivi xivangelo, kambe yanakanya ndlela leyi Pawulo a nga ha vaka a titwe ha yone. Phela a a lavisane ni swikazratu swinyingi nakone a a beke wutomi byake khombyeni hi nkonta ya vamakwavu. (Min 20:18-21; 2Ko 1:8) Handle ka ku ganaganeka a hi swi djuli ku fana ni lava tsrutsrumiki Pawulo nkama lowu a a vilela mpfunu wavu. Kutani i yini leswi hi fanelaka ku swi dzrimuka loko vamakwezru lava zrangelaka va kanetiwa?

10. I yini leswi hi fanelaka ku swi dzrimuka loko vamakwezru lava zrangelaka va kanetiwa?

 ¹⁰ Dzrimuka leswaku ha yini hi kanetiwa ni leswaku i mani lweyi a vangaka leswo. A Bibele ka 2 Timoteo 3:12 dzri li: ‘Mfuzri hinkwavu lava zrandzraka ku hanya hi wukhongoti ku Kriste Yesu, va ta xanisiwa.’ Kutani a swi hlamalisi leswi Sathana a hlaselaka ngopfungopfu lava zrangelaka a nhlengeletanwini ya Yehovha. A nkongometo wake i ku yentxa leswaku vamakwezru lava va tsrhika ku dumbeka ka Yehovha. Handle ka leswo a djula ku hi heta ntamu ni ku hi yentxa hi txhava.—1Pe 5:8.

11. Xana hi dondzra yini ka xikombiso xa Oneziforo? (2 Timoteo 1:16-18)

¹¹ Tama u pfuna vamakwezru u tlhela u dumbeka kwavu. (Dondzra 2 Timoteo 1:16-18.) A nkameni lowu khalutiki, mukriste lweyi a vitaniwaka Oneziforo a nga fananga ni vakriste lava tsrhikiki ku pfuna Pawulo. A Bibele dzri hlaya leswaku ‘a nga vanga na tingana hi pentxana ya [Pawulo]’. Oneziforo a djuletele Pawulo, kutani loko a mu kumile a dzringise ku mu pfuna hi leswi a a swi vilela. Hi ku yentxa leswo, Oneziforo a beke wutomi byake khombyeni. A hi fanelanga hi pfumelela leswaku ku txhava ku hi tsrhikisa ku pfuna vamakwezru lava va kanetiwaka. A matsrhan’wini ya leswo, hi fanela ku va seketela ni ku va pfuna ka leswi va swi vileleka. (Pr 17:17) Va dzri vilela ngopfu lizrandzru ni mpfunu wezru.

12. Xana hi dondzra yini ka vamakwezru va le Rússia?

¹² Vona xikombiso xa vamakwezru va le Rússia. A va tsrhiki ku pfuna lava va pfaleliwiki. Loko vamakwezru vambeni va yisiwa tribunali akuva va ya thethisiwa, vamakwezru va yentxa hinkwaswu akuva va va kone tribunali va ta va seketela. Xana leswo swi hi dondzrisa yini? Loko lava zrangelaka va hehliwa, va pfaleliwa kumbe ku kanetiwa, u nga txhavi. Va patsre ka swikhongoto, u pfuna maxaka yavu ni ku pimisa hi tindlela timbeni leti u nga va pfunaka ha tone.—Min 12:5; 2Ko 1:10, 11.

13. Xana ku poyiliwa ku nga yi khumbisa kuyini ndlela leyi hi mu dumbaka ha yone Yehovha ni nhlengeletanu yake?

¹³ Van’we ka maxaka yezru, lava hi dondzraka na vone xikole kumbe lava hi tizraka na vone, va nga ha hi poyila hi leswi hi zrezraka hi tlhela hi hanya hi ku landzra milawu ya Yehovha. (1Pe 4:4) va nga ha ku: “Phela na ku zrandzra kambe xikazratu i wukhongoti lebyi u nga ka byone swi tikomba na byi ku hetela nkama, awa ha koti ku yentxa ntxhumu.” Van’wana va nga ha sola mhaka ya ku susiwa bandleni, va ku: “Wene u vulavula ngopfu hi lizrandzru, kambe ndlela leyi mi khomaka ha yone vhanu lava susiwiki a yi kombisi lizrandzru!” Mazritu ya ku fana ni lawo ma nga ha byala ku ganaganeka a miyanakanywini yezru. Hi nga ha sungula ku tivutisa leswi: ‘Xana Yehovha a ngo ni bindzrisela? Xana nhlengeletanu a yo kazratisa mintxhumu?’ Xana u nga swi kota ku tama u va kusuhi na Yehovha ni nhlengeletanu yake na u yanakanya hi ndlela leyo?

14. Xana hi fanela ku yangulisa kuyini loko va hi poyila hi leswi hanyaka hi milawu ya Yehovha? (Amapsalma 119:50-52)

¹⁴ Tiyimisele ku yentxa leswi Yehovha a liki i swinene. Minkama hinkwayu Yobe a landzre milawu ya Yehovha nambileswi a a poyiliwa hi mhaka ya leswo. Mun’we ka vanghanu lava nga liki va ntiyiso, a dzringise ku kholwisa Yobe ka leswaku Xikwembu Nkulukumba a a nge na mhaka ni leswaku Yobe a yentxa leswinene kumbe leswi bihiki. (Yb 4:17, 18; 22:3) Yobe a nga zanga a pfumela madzrimi wolawo. A a swi tiva leswaku milawu ya Yehovha minkama hinkwayu yi lulamile, nakone a a tiyimisele ku hanya hi ku landzra milawu yoleyo. (Yb 27:5, 6) Yobe a nga pfumelelanga ntxhumu kumbe mhunu a mu txintxisa vonela dzrake. Xana leswo swi hi  dondzrisa yini? Hi nga txhuki hi pfumelela leswaku ku poyiliwa ku hi yentxa hi ganaganeka hi milawu ya Yehovha. Yanakanya hi hinkwaswu leswi u kumaniki na swone a wuton’wini. Nakunene u swi xiyile leswaku milawu ya Yehovha yi ni lisima nakone yi pfuna hine. Kutani tiyimisele ku seketela nhlengeletanu ni ku landzrelelisisa he kusuhi milawu leyo. Kutani swi nge na mhaka leswaku va ku poyilisa kuyini, a ku na mhunu lwa taka kota ku ku tsravukanisa na Yehovha.—Dondzra Amapsalma 119:50-52.

15. Ha yini Brizit a kanetiwile?

¹⁵ Vona leswi yentxekeliki makwezru wa xisati lweyi a vitaniwaka Brizit, wa le Índia. Yene a kumane ni ku kanetiwa ni ku poyiliwa hi maxaka. Ntsrhakunyana ka loko a babatisiwile hi 1997, nuna wake lweyi a kalaka a nga li Mboni ya Yehovha a luzekeliwe hi ntizro. Hi mhaka ya leswo, va sindzriseki ku ya tsrhama ni vapswele va nuna, ka doropa dzrimbeni. Na va li kohala, a swikazratu swa Brizit swi ye swi yengeseleka. Leswi nuna wake a a nga tizri, Brizit a a fanela ku tizra siku hinkwadzru akuva a wundla ndangu. A Yindlu ya Wugandzreli leyi a yi li kusuhi, a yi kumeka ka mpfhuka wa kolomu ka 350 wa makilometru nakone maxaka ya nuna a ma nga pfumelelani ni wukhongoti byake. Xiyimu xi ye xi mu bindzrela ngopfu Brizit, lakakuva swi djule kuva va tlhela va zruzra. Na a nga swi yimelanga, nuna wake a file. Ntsrhaku ka leswo, mun’we ka vanake, wa 12 wa malembe a khomiwe hi mavabyi ya kankru, a va a fa. Lexi vavisaka, hi leswaku maxaka ya Brizit ma hlaye leswaku a a ni nandzru hi hinkwaswu leswi a swi humelela, ni leswaku loko a a nga ndzrulukanga Mboni ya Yehovha, hinkwaswu leswiyani inhaka swi nga yentxekanga. Nambitanu, a tame a dumba Yehovha nakone a nga yi tsrhikanga nhlengeletanu yake.

16. Xana Brizit a tovokisiwe hi ndlela yini hi ku tama a dumbeka ka Yehovha ni ka nhlengeletanu yake?

¹⁶ Leswi Brizit a a tsrhama kule ni bandla, mulaviseli wa muganga, a mu kutxe kuva a zrezrela vhanu lava a va tsrhama mugangeni wake ni ku khoma mintlhanganu a kaya kwake. A ku sunguleni a a vona ingiki leswo a swi ta kazrata.Kambe nambitasu, a xi yingelile xitsratsriyo  lexo. Brizit a a zrezra, a khoma mintlhanganu kaya kwake ni kuva a hamba wugandzreli bya ndangu ni swin’hwanyatana swake. A ve dzrini bindzru dzra kone? A kote ku fambisa swidondzro swinyingi swa Bibele, nakone swinyingi swa swidondzro swake swi babatisiwile. Hi 2005 a sungule ku tizra swanga phayona dzra nkama hinkwawu. Hi kuva a dumbe Yehovha ni ku tama a dumbeka ka nhlengeletanu yake, Brizit a tovokisiwile. Vanake va tizrela Yehovha hi ku dumbeka, nakone namunhla ku ni mabandla mabidzri ka muganga wavu! Brizit awa tiyiseka leswaku Yehovha a mu nyike ntamu lowu a a wu vilela akuva a langutana ni swikazratu ni ku tiyisela loko a xanisiwa ni ku poyiliwa hi maxaka.

17. I yini leswi hi fanelaka ku tiyimisela ku swi yentxa?

¹⁷ Leswi Sathana a swi djulaka i ku hi tsravukanisa na Yehovha. Hi lani hi swi voniki ha kone, a tizrisa swikazratu a wuton’wini akuva a hi yentxa hi pimisa leswaku Yehovha a hi tsrhikile. A nkongometo wake i ku hi yentxa hi pfumela leswaku loko hi ya mahlweni hi dumbeka ka nhlengeletanu ya Yehovha, hi taya hi bindzreliwa hi wutomi. A tlhela a dzringisa ku hi txhavisa loko vamakwezru lava zrangelaka va hehliwa, va kanetiwa kumbe ku pfaleliwa. Nakone hi ku tizrisa swipoyilo, a djula ku tsranisa ndlela leyi hi yi dumbaka ha yone milawu ya Yehovha ni nhlengeletanu yake. Kambe hine hi ma tiva ha hombe mazrengu ya Sathana nakone a hi kanganyisiwi ha yene. (2Ko 2:11) Tiyimisele ku tama u ya mahlweni u tingawula madzrimi ya Sathana ni ku tama u dumbeka ka Yehovha ni nhlengeletanu yake. Dzrimuka leswaku: Yehovha a nge ti txhuka a ku tsrukulile. (Ps 28:7) Kutani u nga pfumeleli ntxhumu kumbe mhunu a ku tsravukanisa na Yehovha!—Ro 8:35-39.

18. Hi ta vona yini xidondzro lexi landzrelaka?

¹⁸ Ka xidondzro lexi, hi vone swin’we swa swikazratu leswi taka he handle ka bandla. Kambe ndlela leyi hi mu dumbaka ha yone Yehovha ni hlengeletanu yake, yi nga ha dzringiwa hi swikazratu leswi taka he ndzreni ka bandla. Kambe hi nga swi kotisa kuyini ku lavisana ni swikazratu leswo? Hi ta bula ha swone ka xidondzro lexi landzrelaka.