1. Xana vhanu vanyingi namunhla va dzri vonisa ku yini wutlhazri bya Bibele? (Amaproverbia 1:20, 21)

 A MATIKWENI manyingi swi tolovelekile ku vona vazrezri vanyingi lava nyonxiki na va nyikela marevhixta a tindleleni leti taliki hi vhanu. U sama u zrezra hi ndlela leyo? Loko swi li hi ndlela leyo, swi nga yentxeka u dzrimuke leswi tsraliwiki ka buku dzra Amaproverbia, ku nga leswaku a wutlhazri byi huwelela tindleleni akuva vhanu va byi twa. (Dondzra Amaproverbia 1:20, 21.) A Bibeleni ni ka mabuku yezru hi kuma ‘vutlhazri’ bya ntiyiso, ku nga wutlhazri bya Yehovha. Nakone hi leswi vhanu va swi vileleka akuva va kuma wutomi lebyi nga helikiki. Ha nyonxa loko mhunu wa kukazri a yamukela dzrin’we dzra mabuku yezru. Kambe van’wana a va na mhaka ni leswi Bibele dzri swi hlayaka. Va yanakanya leswaku Bibele dzri khaluteliwi hi nkama. Van’wana va hi hleka. Nakone van’wana va vulavula ku biha hi tidondzro ta Bibele ta mahanyela, va hlaya leswaku lava hanyaka hi tidondzro leto va tiyeli tinhloko nakone va tivona na va yampswa ku tlula van’wana. A matsrhan’wini ya leswo, Yehovha a nyika vhanu hinkwavu wutlhazri byake nakone a yentxa leswo hi lizrandzru.

2. Hi nga byi kuma kwini wutlhazri bya ntiyiso namunhla, kambe i yini leswi vhanu va ku tala va hlawulaka ku swi yentxa?

² Yin’we ya tindlela leti Yehovha a hi nyikaka a wutlhazri bya ntiyiso ha tone namunhla, i ku tizrisa Zritu dzrake ku nga Bibele. Hi nga hlaya leswaku vhanu hinkwavu a misaveni vana dzrone Bibele. Hi li yini hi mabuku yezru lawa ma seketeliwiki a Bibeleni? Hi ku pfuniwa hi Yehovha, mabuku lawa ma kumeka hi tindzrimi leti tlulaka 1.000. Hinkwavu lava ma dondzraka ni ku tizrisa leswi va swi dondzraka ka wone va buyeliwa. Kambe vhanu vanyingi va hlawula kuva va nga dzri yingiseti a zritu dzra wutlhazri bya ntiyiso. Loko va teka swiboho va vona swi yampswa  kuva va tidumba kumbe va dumba vhanu van’wana. Vanyingi va hi tekela hansi hi leswi hi landzraka leswi Bibele dzri swi hlayaka. Ka xidondzro lexi, hi ta vona leswaku ha yini vhanu va yangula hi ndlela leyo. Ku sungula, a hi voneni leswaku hi nga byi kumisa kuyini wutlhazri lebyi pfaka ka Yehovha.

3. Xana hi nga byi kombisa hi ndlela yini wutlhazri bya ntiyiso?

³ A Bibele dzri li: ‘A masungulo ya vutlhazri hi ku txhava Yehovha. Ni ku tiva Lwe wa ku xwengisisa hi kone ku yingelisisa.’ (Pr 9:10) A wutlhazri byi patsra ku tizrisa leswi hi swi tivaka akuva hi teka swiboho leswinene. Kambe hi kombisa leswaku hi ni wutlhazri bya ntiyiso loko hi ‘tiva Lwe wa ku xwengisisa’, kumbe loko hi djula ku tiva leswaku he dzrini vonela dzra Yehovha a mhakeni ya kukazri, loko hi djula ku teka a xiboho xa lisima. Hi nga yentxa leswo hi ku kambisisa leswi Bibele ni mabuku yezru ma swi hlayaka. Loko hi yentxa leswo, hi kombisa leswaku hi ni wutlhazri bya ntiyiso.—Pr 2:5-7.

4. Ha yini kuli Yehovha ntsena lweyi a nga hi nyikaka wutlhazri bya ntiyiso?

⁴ I Yehovha ntsena lweyi a nga hi nyikaka a wutlhazri bya ntiyiso. (Ro 16:27) Ha yini? Xa ku sungula, hikusa Yehovha i muvumbi nakone a tiva hinkwaswu mayelanu ni leswi a swi vumbiki. (Ps 104:24) Xa wubidzri, hinkwaswu leswi Yehovha a swi yentxaka swi kombisa leswaku a tlhazrihile. (Ro 11:33) Xa wuzrazru, lweyi a tizrisaka swilayu swa wutlhazri leswi pfaka ka Yehovha, minkama hinkwayu a wa buyeliwa. (Pr 2:10-12) Loko hi djula ku va ni wutlhazri bya ntiyiso hi fanela ku pfumelela mintiyiso ya masungulu yi kongomisa swiboho ni swiyentxo swezru.

5. Ku yentxeka yini loko vhanu va nga djuleteli wutlhazri bya Yehovha?

⁵ Vanyingi lava hi va kumaka a nsin’wini va pfumela leswaku a wuyaku bya hlamalisa, kambe a va pfumeli leswaku ku ni muvumbi. Va pimisa leswaku mintxhumu hinkwayu ye titumbulukela. Van’wana va hlaya leswaku va pfumela ka leswaku Xikwembu Nkulukumba a kone, kambe va pimisa leswaku a milawu ya Bibele yi khaluteliwi hi nkama nakone va hanya hi ndlela leyi vone va vonaka na yi yampswa. Kambe he wani mabindzru lama vaka kone? Leswi vhanu va dumbaka mavonela yavu ku nga li ya Xikwembu Nkulukumba, xana mintxhumu yi famba ha hombe lani misaveni? Xana vhanu va ku kumile ku nyonxa ka ntiyiso kumbe ku lavisela loku tiyiki ka wumundzruku? Loko hi vona leswi humelelaka namunhla, hi nga tiyiseka hi ntiyiso lowu: ‘A ku na vutlhazri, a ku na ku yingelisisa, a ku na ku tlhavukanya loku lwaka na Yehovha.’ (Pr 21:30) Leswi swi hi susumetela ku tama hi djula wutlhazri bya Yehovha! Lexi vavisaka, vhanu vanyingi a va pimisi hi ndlela leyo. Ha yini?

6. Hi ku ya hi Amaproverbia 1:22-25, i vamani lava kalaka va nga yingiseti wutlhazri bya ntiyiso?

⁶ Vanyingi a va yingiseti loko wutlhazri bya ntiyiso ‘byi bandlukana a zruweni’. Hi ku ya hi Bibele, ku ni mintlawa yibidzri ya vhanu lava yalaka wutlhazri: a “masinge”, kumbe lava pfumalaka wutlhazri, ‘a vatsandzri’, ‘ni lava lihuwhe’ kumbe a swihunguki. (Dondzra Amaproverbia 1:22-25.) A hi voneni leswi yentxaka vhanu lavo va yala wutlhazri bya Xikwembu Nkulukumba. Hi ta tlhela hi vona leswi hi nga swi yentxaka akuva hi nga fani na vone.

7. Ha yini vambeni va hlawula ku tama vava “masinge”?

⁷ Ntlawa wa ku sungula i wa “masinge”, ku  nga lava va pfumelaka xin’wana ni xin’wana, kumbe lava va kanganyisiwaka hi ku nabyala. (Pr 14:15) Minkama yinyingi hi kuma vhanu va ku tanu a nsin’wini. Hi xikombiso, yanakanya hi vhanu va ku tala lava va kanganyisiwaka hi vazrangeli va wukhongoti ni va politika. Van’wana va hlamala ngopfu loko va tsrumbula leswaku va kanganyisiwile hi vazrangeli volavo. Kambe vhanu lava ku vulavuliwaka ha vone ka Amaproverbia 1:22, va hlawula ku tama vava masinge kumbe va nga wu landzri ntiyiso. (Yr 5:31) Va zrandzra ku tiyentxela leswi va swi djulaka nakone a va swi djuli ku dondzra Bibele kumbe ku landzra leswi dzri swi hlayaka. Vhanu vanyingi va yanakanya ku fana ni wansati wa kukazri lweyi a zrandzraka wukhongoti wa le Quebec, a Canadá, lwa samiki a byela mun’we wa Timboni ta Yehovha a ku: “Loko mufundhisi wezru a hi kanganyisile, a nandzru i wake, a hi wezru!” Nakunene a hi swi djuli ku fana ni lava va hlawulaka ku tama va kanganyisiwa!—Pr 1:32; 27:12.

8. I yini leswi taka hi pfuna kuva lava wupfiki hi tlhelo dzra moya?

⁸ Hi xivangelo lexi twalaka, Bibele a dzri hi kutxi ku tama hi va masinge kambe dzri hi kutxa ku tama hi kula a wutlhazrini byezru. (1Ko 14:20) Hi va lava kuliki hi tlhelo dzra moya loko hi tizrisa minsinya ya milawu ya Bibele a wuton’wini byezru. Ha katsrongokatsrongo hi ya hi swi vona ha wuswezru leswaku ku landzra minsinya leyo ya milawu, swi hi pfuna ku teka swiboho swa wutlhazri ni ku tingawula swikazratu. I swinene kuva hi yanakanyisisa hi swiboho leswi hi swi tekaka. Loko kutani hi ni nkama wa kukazri na hi dondzra Bibele ni ku hlalela mintlhanganu, hi nga ha tivutisa leswaku ha yini hi nga si teka xiboho xa ku tinyiketela ka Yehovha ni ku babatisiwa. Loko kutani hi babatisiwile, xana hi yentxa nhluvuku swanga vazrezri ni vadondzrisi va madzrungula lamanene? Xana swiboho leswi hi swi tekaka swi kombisa leswaku hi kongomisiwa hi minsinya ya milawu ya Bibele? Xana hi kombisa matsrhamela ya Wukriste loko hi tizrisana ni vambeni? Loko hi xiya lomu hi fanelaka ku yampswisa kone, hi fanela ku beka miyanakanyu ka tidondzro ta Yehovha, hikusa ti ‘tlhazrihisa lwe wa ku dzrivala’.—Ps 19:7.

9. Xana ‘vatsandzri’ va swi kombisisa ku yini leswaku va dzri yala wutlhazri?

⁹ A ntlawa wa wubidzri wa lava yalaka wutlhazri bya Xikwembu Nkulukumba i wa ‘vatsadzri’. Hi txhuka hi kuma vhanu va ku fana ni lava a nsin’wini. Va zrandzra ku hleka van’wana. (Ps 123:4) Bibele dzri hlaye leswaku a masikwini ya wugamu, a ku tava ni ‘vahleki’ vanyingi. (2Pe 3:3, 4) Ku fana ni vakon’wana va wanuna wa ku lulama Lota, vhanu van’wana namunhla a va na mhaka ni swidzrimuxo swa Xikwembu Nkulukumba. (Gn 19:14) Vanyingi va hleka lava hanyaka hi minsinya ya milawu ya Bibele. Va susumeteliwa ‘hi ku navela kwavu’ ka mintxhumu leyi bihiki, kumbe leyi nga fambisaniki ni ku zrandzra ka Xikwembu Nkulukumba. (Yd 7, 17, 18) Leswi Bibele dzri swi hlayaka hi vatsandzri swi yelana ha hombe ni madukwa kun’we ni lava va yalaka Yehovha!

10. Hi ku ya hi Amapsalma 1:1, hi nga swi kotisa kuyini ku va hi nga fani ni vatsandzri?

¹⁰ Loko hi nga tivoneli, hi ku nabyala hi nga sungula ku ngheniwa hi moya wa vahleki. Xana hi nga yentxa yini akuva leswo swi nga hi humeleli? Ndlela yin’wana i kuva hi nga titlhanganisi ni lava nga ni moya wa ku solasola. (Dondzra Amapsalma 1:1.) Leswo swi hlaya leswaku a hi yingiseti kumbe ku dondzra mintxhumu leyi humaka ka madukwa. Xana wa swi yanakanya leswaku a ku ta humelela yini loko a ho sungula kuva hi nga yi dumbi minkongomiso leyi pfaka ka Yehovha ni ka nhlengeletanu yake? Akuva leswo swi nga humeleli,  hi nga ha tivutisa leswi: ‘Xana ni tolovela ku solasola loko hi nyikiwa minkongomiso leyimpswha? Xana ni tolovela ku djuletela swihoxo ka lava va zrangelaka?’ Loko hi ku kahlula hi lulamisa mapimisela wolawo, swi ta mu nyonxisa ngopfu Yehovha.—Pr 3:34, 35.

11. Xana ‘lava lihuwhe’ kumbe swihunguki, va yi vonisa ku yini milawu ya Yehovha ya mahanyela?

¹¹ A ntlawa wa wuzrazru wa vhanu lava yalaka wutlhazri bya ntiyiso i wa ‘lava lihuwhe’, kumbe swihunguki. Vone i swihunguki hikusa a va swi djuli ku hanya hi milawu ya mahanyela ya Xikwembu Nkulukumba. Va djula ku tiyentxela leswi va swi vonaka na swi lulamile. (Pr 12:15) Hi ndlela leyo va yala Yehovha hi ku kongoma, ku nga yene nhlovo ya wutlhazri. (Ps 53:1) Loko hi li ku zrezreni, hakanyingi va vulavula ku biha ha hine hi leswi hi hanyaka hi milawu ya Bibele. Kambe vone a ve nge swi koti ku hi nyika wutomi bya ku yampswa. Bibele dzri li: ‘A vutlhazri byi tlakukile, byi tlula xihunguki; xi nga pfuli nomu wa xone a mhazraneni.’ (Pr 24:7) Ndzrimana leyi yi kombisa leswaku a swihunguki a swi nge swi koti ku nyikela swilayu leswinene. A swi hlamalisi leswi Yehovha a hi byelaka kuva hi ‘hambana ni xihunguki’!—Pr 14:7.

12. I yini lexi nga hi pfunaka kuva hi nga fani ni swihunguki?

¹² Ku hambana ni lava va nyenyaka milawu ya Xikwembu Nkulukumba, hine ha yi zrandzra ndlela leyi Yehovha a pimisaka ha yone, ku patsra ni milawu yake ya mahanyela. Lizrandzru ledzro dzri tiya ngopfu loko hi xiya ku hambana loku nga kone ka lava yingisetaka Yehovha ni lava kalaka va nga mu yingiseti. Vona swikazratu leswi vhanu va kumanaka na swone hi ku yala wutlhazri bya Xikwembu Nkulukumba. Nakone vona ndlela leyi wutomi byaku byi nyonxisaka ha yone hi leswi u yingisetaka Yehovha.—Ps 32:8, 10.

13. Xana Yehovha awa hi sindzrisa kuva hi yamukela wutlhazri byake?

¹³ Hinkwavu va nga ha va na byone wutlhazri bya Yehovha, kambe yene a nga sindzrisi mhunu kuva na byone. Yehovha a hlaya leswaku he wani mabindzru ya kuva mhunu a nga byi yamukeli wutlhazri byake. (Pr 1:29-32) Lava hlawulaka ku kala va nga mu yingiseti Yehovha ‘va ta da mihandzru ya mikhuva yavu’. Ndlela, leyi va hanyaka ha yone yi ta va twisa ku vavisa, yi va vangela swikazratu hi wugamu yi va yisa ku suvisiweni. Nakone leswo swi ta yentxeka ku nga li khale. Hi tlhelo dzrin’wana, ka hinkwavu lava yingisetaka wutlhazri bya Yehovha ni ku tlhela va byi tizrisa, Amaproverbia 1:33 yi nyikela xitiyisekiso lexi: ‘Kambe lwa ndzri yingelaka a ta tsrhama ha hombe, a ta zrula, a nga txhavi leswimfani.’—Pr 1:33.

14-15. Xana hi dondzra yini ka Amaproverbia 4:23?

¹⁴ Ku tizrisa wutlhazri bya Xikwembu Nkulukumba, minkama hinkwayu swi ni mabindzru lamanene. Hi lani hi swi voniki ha kone, hinkwavu va nga va na byone wutlhazri bya Yehovha. Hi xikombiso, ka buku dzra  Amaproverbia, Yehovha a hi nyika swilayu leswi minkama hinkwayu swi pfunaka. Swoswi a hi voneni mune wa swikombiso.

¹⁵ Bekisa mbilu. A Bibele dzri li: ‘Bekisa mbilu yaku ku tlula hinkwaswu leswi u swi bekisaka. Hikuva i nhlovo ya vutomi.’ (Pr 4:23) Yanakanya hi leswi djulekaka akuva hi sizrelela mbilu yezru ya hakakunene. Swi djula hi da swakuda leswi nyikaka lihanyu, hi hamba wutiwololi, ni kuva hi tingawula mikhuva leyi nga bekaka lihanyu dzrezru a khombyeni. Swi djula hi yentxa leswi fanaka akuva hi sizrelela a mbilu yezru ya ku fanekisela. Siku ni siku hi tiwundla hi Zritu dzra Xikwembu Nkulukumba. Ha tilulamisela akuva hi hlalela mintlhanganu ni ku tlhela hi patsreka ka yone. Minkama hinkwayu hi khinyela ka ntizro wa ku zrezra nakone hi tingawula mikhuva leyi nga honaka wumoya byezru, hi ku fambela kule ni mintxhumu leyi nga ha khumbaka mayanakanyela yezru ya ku fana ni swihungatiso leswi nga liki swinene ni vanghanu va ku biha.

16. Ha yini Amaproverbia 23:4, 5 yi pfuna ngopfu namunhla?

¹⁶ Yaneliseka hi leswi u nga na swone. Bibele dzri hi laya dzri ku: ‘U nga tikazrate ku hlengeleta vukosi. . . . Xana u ta byi langusa? Byi hundzrile. A vukosi byi timilisa timpapa, swanga hi gama ledzri hahaka henhla tilwini.’ (Pr 23:4, 5) A xi kone lexi tiyisekisaka leswaku mali leyi mhunu a nga na yone yi ta tama yi va kone hi masiku. Namunhla hi vona vhanu lava ganyiki ni swisiwana na va tikazrata ngopfu swinene akuva va kuma mali. Minkama yinyingi va nga ha yentxa mintxhumu leyi nga ha va honaka vito, va honetela wuxaka lebyi va nga na byone ni vhanu van’wana, nambi hi ku beka lihanyu byavu a khombyeni. (Pr 28:20; 1Tm 6:9, 10) Kutani a wutlhazri byi hi pfuna ku va hi dzringanisela a mhakeni ya mali. Leswo swi hi pfuna kuva hi nga kokeli kwezru, hi nyonxa ni ku tlhela hi yaneliseka hi leswi hi nga na swone.—Ekl 7:12.

17. Hi nga swi kotisa kuyini ku va ni ‘lidzrimi la lwe wa ku tlhazriha’ hi lani swi kombisiwaka ha kone ka Amaproverbia 12:18?

¹⁷ Yanakanya na u nga si vulavula. Loko hi nga tivoneli, mazritu yezru ma nga ha vanga swikazratu leswikulu. A Bibele dzri li: ‘Va kone lava tlhavaka hi mazritu yavu swanga hi timpanga; kambe lidzrimi la lwe wa ku tlhazriha i vutomi.’  (Pr 12:18) Hi hlayisa ku zrula loko hi tingawula ku hleva hi swihoxo swa van’wana. (Pr 20:19) Akuva mazritu yezru ma holisa a matsrhan’wini ya ku tlhava, timbilu tezru ti fanela ku tala hi wutivi bya Zritu dzra Xikwembu Nkulukumba. (Lk 6:45) Loko hi yanakanyisisa hi leswi Bibele dzri swi hlayaka, a mazritu yezru ma ta fana ni ‘nhlovo ya vutlhazri’, ma nyonxisa van’wana.—Pr 18:4.

18. Xana Amaproverbia 24:6 yi hi pfunisa kuyini akuva hi humelela a ntizrweni wezru wa ku zrezra?

¹⁸ Landzrelisisa minkongomiso. Akuva hi kota ku humelela a wuton’wini, a Bibele dzri hi nyika xilayu lexi: ‘Hikuva u ta huma yimpi hi ku tlhavukanya lo ka ku tlhazriha: A ku bekiseka ku kone loko vatlhavukanyisi va tele.’ (Pr 24:6) A hi voneni ndlela leyi ku tizrisa nsinya lowu wa nawu swi nga hi pfunaka ha yone akuva hi humelela loko hi zrezra ni loko hi dondzrisa. A matsrhan’wini ya kuva hi zrezra hi ku landzra mavonela yezru, hi fanela ku tikazratele ku landzra minkongomiso leyi hi yi kumaka mintlhanganwini. A mintlhanganwini hi yamukela minkongomiso ya wutlhazri ka wukaneli lebyi nyikeliwaka hi vamakwezru lava nga ni wuswikoti hi tlhela hi dondzra kuva vadondzrisi lavanene ka minkombiso leyi hambiwaka. Handle ka leswo, a nhlengeletanu ya Yehovha yi hi nyika switizro leswinene swa ku fana ni mabuku ni mavhidiyu, leswi nga pfunaka vhanu ku twisisa Bibele. Xana wa dondzra ku tizrisa switizro leswi?

19. Xana u titwisa kuyini hi wutlhazri lebyi Yehovha a hi nyikaka byone? (Amaproverbia 3:13-18)

¹⁹ Dondzra Amaproverbia 3:13-18. Hi swi tlangela ngopfu swilayu swa wutlhazri leswi kumekaka Zritwini dzra Xikwembu Nkulukumba! Xana a byi ta va hi ndlela yini wutomi byezru loko a hi nga li naswu swilayu leswo? Ka xidondzro lexi, hi kambisise swikombiso leswi pfunaka swa wutlhazri, leswi kumekaka ka buku dzra Amaproverbia. I ntiyiso leswaku Yehovha a nyikele swilayu swa wutlhazri ka Bibele hinkwadzru. Hi djula ku tizrisa swilayu leswo ka swiyimu hinkwaswu swa wutomi byezru. Vanyingi a va byi nyiki lisima wutlhazri bya Xikwembu Nkulukumba, kambe hine ha tiyiseka leswaku ‘lava byi bekisaka va katekile’.