Ha Yini Hi Nga Yi Yimpini Nakasi A Va-Israyele A Va Ya?
“LOKO mun’we kwenu o txhuka a yala ku lwa ni França kumbe ni Inglaterra hinkwenu mi ta dlayiwa!” Mazritu lawa ma hlayiwe hi muzrangeli wa masotxha wa Munazi na a bongela Timboni ta Yehovha ka Yimpi ya Wubidzri ya Misava. Nambileswi masotxha ya Manazi a ma li kusuhi na vone akuva ma va sindzrisa, a ku va nga ni Mboni ya Yehovha ni yin’we leyi pfumeliki ku landzrula lipfumelo dzra yone. Mawaku xixixi lexo! A xikombiso lexi xi dzri beka livaleni vonela dzrezru swanga Timboni ta Yehovha. A hi patsreki ka tiyimpi ta misava leyi nambi loko hi langusana ni lifu hi tama hi tiyimisela ku va hi nga ngheneleli ka mpfilumpfilu ya misava.
Kambe a hi hinkwavu lava tihlayaka Vakriste va pfumelelanaka ni vonela ledzro. Vanyingi va pfumela leswaku Mukriste a fanela a lwela tiko dzrake. Swi nga yentxeka va tibyela leswi: ‘Leswi va-Israyele a va li tiko dzra Xikwembu Nkulukumba a va ya yimpini, ha yini vakriste namunhla va nga fanelanga va lwa?’ A wu ta hlamulisa kuyini? U nga ha tlhamuxela leswaku a xiyimu xa va-Israyele a xi hambane kule ni xa vhanu va Xikwembu Nkulukumba namunhla. A hi voni ntlhanu wa mintxhumu leyi va hambanaka ha yone.
1. VHANU VA XIKWEMBU NKULUKUMBA A VO LUMBA TIKO DZRIN’WE NTSENA
A nkameni lowu khalutiki, Yehovha a hlengelete vhanu vake va va tiko dzrin’we, ku nga tiko dzra Israyele. A vitane Israyele a ku ‘i nhlengwe . . . ku tlula matiko hinkwawu’. (Eks 19:5) Yehovha a tlhele a va nyika tiko dzra kukazri. Kutani loko va-Israyele va ya lwa ni matiko man’wana a va nga lwi ni vamakwavu, kumbexana vhanu lava a va gandzrela Yehovha. *
A masikwini yezru, vhanu lava tizrelaka Yehovha i xitsrhungu lexikulu ‘xa matiko hinkwawu, ni xa tinxaka, ni xa tintsrhundzru ni xa tindzrimi’ hinkwatu. (Mpf 7:9) Xileswo, loko vhanu va Xikwembu Nkulukumba a vo ya yimpini a va ta lwa kumbe ku dlaya vamakwavu.
2. YEHOVHA HI YENE A LELETIKI VA-ISRAYELE KU YA YIMPINI
A nkameni lowu khalutiki, Yehovha hi yene a a byela va-Israyele akuva va ya lwa a tlhela a va byela ni xivangelo xa kone. Hi xikombiso Yehovha hi yene a byeliki va-Israyele akuva va lwa ni Vakanana. A tiko ledzro a dzri tiviwa ngopfu swinene hi ku gandzrela mademona, mahanyelo ya ku biha hi tlhelo dzra tinkuku ni ku nyikela magandzrelo hi vana. Nakone a Vakanana a va hanya mbangu lowu Yehovha a a dumbise ku wu nyika va-Israyele, xileswo Yehovha a lelete va-Israyele akuva va helisa tiko ledzro akuva dzri nga vi nhlonhlotelo wa ku biha kwavu. (Lv 18:24, 25) Nambi ntsrhaku ka kuva va-Israyele va nghenile tikweni dzra xidumbiso Yehovha a tame a va pfumelela ku lwa ni matiko lawa a ma li valala vavu. (2Sa 5:17-25) Kambe Yehovha a nga zanga a pfumelela va-Israyele kuva va ya yimpini hi ku navela kwavu. Loko va famba hi ku navela kwavu minkama hinkwayu a va hluliwa.—Tin 14:41-45; 2Mk 35:20-24.
A masikwini yezru, Yehovha a nga va pfumeleli vhanu ku ya yimpini. Vhanu va lwa leswaku va buyeliwa vone ku nga li ku yentxa ku zrandzra ka Xikwembu Nkulukumba. Vone va lwa akuva va yengetela mabindzru yavu kumbe ku yimela mavonela yavu ya politika. Kambe swi li yini hi lava va liki va lwa akuva va sizrelela wukhongoti byavu kumbe ku helisa valala va Xikwembu Nkulukumba? Yehovha ha wuswake a ta sizrelela malandzra yake ni ku helisa valala vake a nkameni lowu taka a yimpini ya Armagedon. (Mpf 16:14, 16) Ka yimpi leyo a khandzra dzra Xikwembu Nkulukumba dzri ta vumbiwa hi swivumbiwa swa moya ku nga li vhanu va nyama lava tizrelaka Yehovha.—Mpf 19:11-15.
3. A VA-ISRAYELE A VA TSRETSRELELA LAVA NGA NI LIPFUMELO
Xana tiyimpi leti nga kone namunhla ta va tsretsrelela lava nga ni lipfumelo ku fana na Yehovha a tsretsreleliki Rahabi ni ndangu wake?
A nkameni lowu khalutiki, minkama yinyingi a khandzra dzra Israyele a dzri tsretsrelela vhanu hinkwavu lava nga ni lipfumelo, kambe a dzri helisa ntsena lava Xikwembu Nkulukumba a liki va fanela ku fa. Vona swikombiso swibidzri. Yehovha a lelete leswaku va-Israyele va helisa muti wa Yeriko, kambe va tsretsreleli Rahabi ni ndangu wake hi kola ka lipfumelo ledzri a dzri kombisiki. (Yš 2:9-16; 6:16, 17) Hi ku famba ka nkama, a tiko dzra Gibiyoni a dzri helisiwanga hikusa Vagibiyoni va kombise leswaku va mu txhava Xikwembu Nkulukumba.—Yš 9:3-9, 17-19.
A masikwini yezru, a matiko lawa ma lwaka yimpi a ma va tsretsreleli lava nga ni lipfumelo. Minkama yimbeni lava nge ke na nadzru va dlayiwa ka tiyimpi leto.
4. A VA-ISRAYELE A VA FANELA KU LANDZRA NKONGOMISO WA YEHOVHA LOKO VA YA YIMPINI
A nkameni lowu khalutiki, Yehovha a a djula leswaku masotxha ya va-Israyele ma yingiseta minkongomiso yake loko va le yimpini. Hi xikombiso, minkama yimbeni Yehovha a a djula leswaku va-Israyele va hlaya ‘timhaka ta ku zrula’ ka valala vavu. (Dt 20:10) Yehovha a a djula leswaku masotxha ya va-Israyele, minkama hinkwayu ma tsrhama na ma basile ni le minxaxeni ya wone. (Dt 23:9-14) Hi xikombiso, a matiko manyingi loko ma hlula yimpi a ma pfinya vavasati, kambe Yehovha a a nga va pfumeleli va-Israyele ku yentxa leswo. Ku hlaya ntiyiso, a vo pfumeleliwa ku txhata ni wansati wa tiko ledzri va dzri hluliki ntsrhaku ka loko ku khalute wheti na va hlule tiko ledzro.—Dt 21:10-13.
A masikwini yezru, matiko manyingi ma ni xipfumelelanu xa minkongomiso leyi ma fanelaka ku yi landzra loko ku lwiwa yimpi. A nkongometo wa minkongomiso leyo i ku sizrelela lava nge ke na nandzru. Kambe a hi minkama hinkwayu minkongomiso leyo yi landzriwaka.
5. XIKWEMBU NKULUKUMBA A LWELA TIKO DZRAKE
Xana Xikwembu Nkulukumba a lwela tiko dzra kukazri namunhla ku fana ni leswi a lweliki tiko dzra Israyele a Yeriko?
A nkameni lowu khalutiki, minkama minyingi Yehovha a pfune va-Israyele ku hlula hi ndlela ya hlolana. Hi xikombiso, Vona ndlela leyi Yehovha a pfuniki ha yone va-Israyele ku hlula muti wa Yeriko. A va-Israyele va landzre nawu wa Yehovha wa ku ‘huwelela ngopfu, a lihlampfu li mbundzrumuka’, kutani va hlula doropa hi ku nabyala. (Yš 6:20) Kutani Va yi hlulise ku yini yimpi ni va-Amori? ‘Yehovha a ku va txukumetela hi mabyana lamakulu . . . lava nga dlawa hi mabyana va va vanyingi va tlula lava va nga dlawa hi vana va Israyele hi matlhazri’.—Yš 10:6-11.
A masikwini yezru, Yehovha a nga seketeli tiko ni dzrin’we a yimpini. A Mfumu wa Xikwembu Nkulukumba lowu Yesu a nga Hosi ya wone ‘a hi wa misava leyi’. (Yh 18:36) Hi tlhelo dzrimbeni i Sathana lweyi a lawulaka mimfumu ya misava. A nsele lowu kombisiwaka a tiyimpini wu kombisa leswaku yene i mufumi wa ku biha.—Lk 4:5, 6; 1Yh 5:19.
A VAKRISTE VA NTIYISO VA BEKISA KU ZRULA
Hi lani hi swi voniki ha kone, a xiyimu xezru namunhla ni xa va-Israyele, a xi fani. Kambe ku hambana loko a hi xone ntsena xivangelo xa ku va hi nga yi yimpini. Xikwembu Nkulukumba a tivise leswaku a masikwini ya wugamu, vhanu lava dondzrisiwaka ha yene va nga ka va nga ha ‘dondzrisiwi ku lwa’, nambi ku patsreka yimpini. (Eza 2:2-4) Handle ka leswo, Kriste a hlaye leswaku valandzreli vake a va nga ti patsreka ka timpfilumpfilu ta misava leyi.—Yh 15:19.
Kriste a va kutxe ku yentxa leswi yengetelekiki. A va dondzrise leswaku va tingawula matsrhamela lawa ma nga va yentxaka va va ni xikhomela, mahlundzru ni ku pfuxa yimpi. (Mt 5:21, 22) A tlhele a dondzrisa valandzreli vake ku va lava “kondletelaka ku zrula”. Leswi swi patsra ku bekisa ku zrula ni vambeni ni ku zrandzra valala.—Mt 5:9, 44.
Hine ke, hi nga swi yentxisa kuyini leswo? Swi nga yentxeka hi nga swi naveli ku ya yimpini. Kambe xana a mbilwini yezru ku ni livengo ledzri nga byalaka ku yavana a bandleni? Hi djula ku yentxa hinkwaswu leswi hi nga swi kotaka akuva hi tsruvula livengo ledzro.—Yk 4:1, 11.
Hine a hi patsreki ka tiyimpi ta misava. A matsrhan’wini ya leswo, hi tikazratela ku kondletela ku zrula ni ku kombisa lizrandzru ka vamakwezru. (Yh 13:34, 35) Hi tiyimisele ku bekisa wukalatlhelo byezru ku ya tlhasela nkama lowu Yehovha a taka helisa tiyimpi hinkwatu hi lani ku nga helikiki.—Ps 46:9.
^ Ku ni minkama yin’wana a tinxaka tin’wana ta Israyele a ti lwisana, kambe leswo a swi nga mu nyonxisi Yehovha. (1Th 12:24) Minkama yimbeni Yehovha a a ku pfumelela ku lwa koloko. Kambe leswo a swi yentxaka ntsena loko tinxaka tin’wana ti nga dumbeki ka Yehovha kumbe loko ti yentxe xidoho lexikulu.— Abaṭ 20:3-35; 2Mk 13:3-18; 25:14-22; 28:1-8.
