1. He kwini ku lavisela loku Yehovha a hi nyikiki kone?

 YEHOVHA a hi nyiki ku lavisela loku nyonxisaka ka wutomi lebyi nga helikiki. Van’wana va ta hanya swanga swivumbiwa swa moya hi lani ku nga helikiki a matilweni. (1Ko 15:50, 53) Kambe vanyingi va ni ku lavisela ka ku hanya hi lani ku nga helikiki lani misaveni na va ni lihanyu ledzrinene va tlhela va nyonxa. (Mpf 21:3, 4) Ku lavisela loko i ka lisima nambiloko hi lavisele ku ya hanya matilweni kumbe lani misaveni.

2. I yini ku lavisela?

² A Bibeleni a zritu “ku lavisela” dzri nga ha tlhamuxela ku yimela leswaku mintxhumu leyinene yi yentxeka. Nakone hi nga tiyiseka leswaku leswi hi swi laviselaka hi wumundzruku swi ta yentxeka hikusa hi dumbisiwe ha Yehovha. (Ro 15:13) Ha swi tiva leswi a hi dumbisiki swone nakone ha swi tiva leswaku minkama hinkwayu a hetisisa leswi a swi dumbisiki. (Tin 23:19) Ha tiyiseka leswaku Yehovha a ni ku navela ni ntamu wa ku hetisisa leswi a swi dumbisiki. A ku lavisela kwezru a hi lozro kambe i ka ntiyiso.

3. Hi ta vona yini ka xidondzro lexi? (Amapsalma 27:14)

³ Papayi wezru wa le matilweni a wa hi zrandzra nakone a djula leswaku hi mu dumba. (Dondzra Amapsalma 27:14.) Loko hi dumba Yehovha hi tlhela hi va ni ku lavisela loku tiyiki, hi ta swi kota ku lavisana ni swikazratu na hi nyonxile nakone na hi nga byi txhavi wumundzruku. A hi voneni ndlela leyi ku lavisela ku hi sizrelelaka ha yone. Kambe, a hi zrange hi vona ndlela leyi ku lavisela kwezru ku fanaka ha yone ni hangi ni xilembe xa masotxha. Hi ku landzrela hi ta vona ndlela leyi hi nga ku tiyisaka ha yone ku lavisela kwezru.

4. Xana a ku lavisela ku fana ni hangi hi ndlela yini? (Ba-Heberu 6:18, 19)

⁴ Ka papela ledzri a dzri tsraleliki Vaheberu, mupostola Pawulo a fananise ku lavisela ni hangi. (Dondzra Ba-Heberu 6:18, 19.) Leswi a a toloveli ku yendzra hi boti, a a swi tiva leswaku  hangi dzri sizrelela boti akuva dzri nga yingayingi. Khambi dzrimbeni na a li botini, ku ve ni xidzedze lexikulu. Kutani a va vonile vafambisi va boti loko va txukumetela tihangi akuva boti dzri nga bi mazribye. (Min 27:29, 39-41) Ku fana ni hangi, ku lavisela kwezru ku hi sizrelela ku va hi nga hambani na Yehovha ni ku va hi nga yingayingi kumbe ku vindlavindleka loko hi kumana ni swikazratu. Ku lavisela kwezru loku tiyiki, ku hi pfuna ku lwisana ni swidzedze leswi tisiwaka hi swikazratu swa wutomi hikusa ha tiyiseka leswaku ku nga li khale swi ta khaluta. Hi fanela ku dzrimuka leswaku Yesu a hi tivisile leswaku hi ta xanisiwa. (Yh 15:20) Ku yanakanyisisa hi hakelo ledzri hi dzri yimelaka swi hi pfuna ku tama hi tizrela Yehovha hi ku dumbeka.

5. Xana ku lavisela ku mu pfunise kuyini Yesu ku va a tiyiselela lifu?

⁵ Vona ndlela leyi ku lavisela ku pfuniki Yesu ha yone ku tama a dumbeka nambileswi a a swi tiva leswaku a a ta fa hi ndlela ya ku vavisa. Hi siku dzra Pentekoxta 33 N.Y., mupostola Petro a tsrhahe wuprofeta bya Mupsalma lebyi a byi tlhamuxela ndlela leyi Yesu a a tava a zrule ha yone: ‘[Ndzri] ta tsrhama hi ku dumba, hikuva u nga ka u nga tsrhiki hika dzranga Hades, naswone u nga ka u nga nyiketi Muxwengi waku a vona ku bola. . . . U ta dzri xuzrisa hi ku tsrhava a vusweni byaku.’ (Min 2:25-28; Ps 16:8-11) Nambileswi a a swi tiva leswaku a ta fa, Yesu a a ni dumbo ledzri tiyiki dzra leswaku Yehovha a a ta mu pfuxa ni leswaku a a ta va ni ku nyonxa lokukulu hi ku tlhela a va ni papayi wake a matilweni.—Hb 12:2, 3.

6. I yini leswi makwezru wa kukazri a swi hlayiki mayelanu ni ku lavisela?

⁶ Ku lavisela ka Wukriste, ku pfuna vamakwezru vanyingi ku tiyisela. Vona xikombiso xa makwezru Leonard Chinn, ku nga makwezru wa ku dumbeka lweyi a a tsrhama a Inglaterra. A pfaleliwe djele hi nkama wa Yimpi ya ku Sungula ya Misava hikuva a yale ku ya wusotxhweni. A pfaleliwe ku dzringana tiwheti tibidzri ka xidjelana lexi a o va wuswake. Ntsrhaku ka leswo, a sindzrisiwe ku hamba mintizro ya swib’otxhwa. A tsrale leswi: “Leswi swi ni humeleliki swi swi beki livaleni leswaku hi vilela ku lavisela akuva hi tiyisela. Hi ni swikombiso swinyingi Bibeleni, xa Yesu, xa vaprofeta, xa vapostola ni swidumbiso swa ku xonga. Hinkwaswu leswo swi hi nyika dumbo ledzri tiyiki hi wumundzruku swi tlhela swi hi nyika ku tiyisela.” A ku lavisela ku tizre swanga hangi ka makwezru Leonard nakone ku nga tizra hi ndlela leyi fanaka ni kwezru.

7. Xana swikazratu leswi hi lavisanaka na swone swi nga ku tiyisa hi ndlela yini ku lavisela loku hi nga na kone? (Ba-le-Roma 5:3-5; Yakob 1:12)

⁷ Loko hi hlula swikazratu hi tlhela hi vona ndlela leyi Yehovha a hi pfunaka ha yone, hi kota ku vona leswaku Yehovha a wa hi yamukela nakone leswo swi tiyisa ku lavisela kwezru. (Dondzra Ba-le-Roma 5:3-5; Yakob 1:12.) Xileswo, ku lavisela kwezru ku ya ku tiya ku tlula nkama lowu hi dondzriki ha wone ntiyiso. Sathana a djula leswaku hi hetiwa ntamu hi swikazratu leswi hi kumanaka na swone, kambe hi mpfunu wa Yehovha hi nga swi kota ku hlula xikazratu xin’wana ni xin’wana.

8. Xana a ku lavisela ku fana ni xilembe xa musotxha hi ndlela yini? (1 Ba-le-Thesalonika 5:8)

⁸ A Bibele dzri tlhela dzri fanisa ku lavisela kwezru ni xilembe xa masotxha. (Dondzra 1 Ba-le-Thesalonika 5:8.) A xilembe xi sizrelela nhloko ya musotxha ka minhlaselo ya nala wake. Hi tlhelo dzra moya hi fanela hi sizrelela miyanakanyu yezru ka minhlaselo ya Sathana. A tizrisa mintxhumu ya ku hambanahambana akuva a hi dzringa ni ku hona miyanakanyu  yezru. Ku fana ni leswi xilembe xi sizrelelaka nhloko ya musotxha, ku lavisela loku hi nga na kone ku sizrelela miyanakanyu yezru akuva hi tama hi tizrela Yehovha hi ku dumbeka.

9. He wani mahanyela ya vhanu lava kalaka va nga na dumbo?

⁹ A dumbo dzra ku va ni wutomi lebyi nga helikiki dzri hi pfuna ku teka swiboho swa wutlhazri. Loko hi pfumelela leswaku ku lavisela kwezru ku tsrana ni ku pfumelela mayanakanyela ya misava leyi ma khumba mimpimiso yezru hi nga ha lahlekeliwa hi dumbo dzra ku hanya hi lani ku nga helikiki. Vona leswi yentxekeliki vakriste lava hanyiki doropeni dzra Korinte wa khale. Va lahlekeliwe hi lipfumelo ka xidumbiso xa lisima swinene xa Xikwembu Nkulukumba, ku nga dumbo dzra ku pfuka ka lava fiki. (1Ko 15:12) Mupostola Pawulo a tsrale leswaku lava a va nga kholwi ka dumbo dzra ku pfuxiwa ka vafi a vo hanyela bya namunhla. (1Ko 15:32) Namunhla vanyingi lava kalaka va nga pfumeli ka swidumbiso swa Xikwembu Nkulukumba vo hanyela bya namunhla a va na mhaka ni wumundzruku, vo djula ku ti nyonxisa ntsem. Kambe hine hi hambanile na vone ha byi dumba wumundzruku lebyi Xikwembu Nkulukumba a hi dumbisaka. A ku lavisela kwezru ku fana ni xilembe xa musotxha, ku sizrelela miyanakanyu yezru ku tlhela ku hi pfuna kuva hi nga tiyanakanyeli hine ntsena kambe hi yanakanya hi leswi swi nga honaka wunghanu byezru na Yehovha.—1Ko 15:33, 34.

10. Xana ku lavisela ku hi sizrelela hi ndlela yini ka madzrimi?

¹⁰ A dumbo dzrezru dzri nga tlhela dzri hi sizrelela ka miyanakanyu ya vhanu lava liki a swi koteki ku nyonxisa Yehovha. Hi xikombiso, van’wana va yanakanya leswi: “Mine a ni pfuni ntxhumu a ni nge txhuki ni va ni dumbo dzra ku hanya hi lani ku nga helikiki nakone a ni nge txhuki ni swi kotile ku hanya hi ku landzra milawu ya Xikwembu Nkulukumba.” Kambe wa mu dzrimuka lweyi a tizrisiki mayanakanyela ya ku fana ni lawa loko a bula na Yobe? Ku ve munghanu wa ku biha Elifaz. Yene a te: ‘A mhunu i ntxini, leswaku a basa xana?’ A game a hlaya leswi hi Xikwembu Nkulukumba: ‘Lavisa, a tinsasi takwe, a nga ti dumbi; a matilo a ma basanga mahlweni yakwe.’ (Yb 15:14, 15) Nakunene lawa i madzrimi! Mapimisela lawa i ya Sathana. A wa swi tiva leswaku loko hi pimisa hi ndlela leyo a ku lavisela kwezru ku ta tsrana. Kutani tingawula madzrimi lawo u va u yanakanyisisa hi swidumbiso swa Yehovha. U nga ganaganeki leswaku Yehovha a djula u hanya hi lani ku nga helikiki nakone a ta ku pfuna akuva u tlhasela kungu ledzro.—1Tm 2:3, 4.

11. Ha yini hi fanela ku lehisa mbilu hi yimela leswaku Yehovha a hetisisa swidumbiso swake?

¹¹ A hi minkama hinkwayu swi nabyalaka ku tama hi tiyisa ku lavisela kwezru. Swi djula hi lehisa mbilu nkama lowu hi yimela Xikwembu Nkulukumba leswaku a hetisisa swidumbiso swake. Kambe hi fanela ka dzrimuka leswaku Yehovha a nga na wugamu nakone nkama lowu ka hine wu lehiki ngopfu, ka Yehovha i wutsrongo. (2Pe 3:8, 9) A ta hetisisa nkongometo wake hi ndlela leyinene ngopfu ku tlula leyi hi yi yanakanyaka. I yini lexi nga hi pfunaka ku tiyisa ku lavisela kwezru loko hi ku lehisa mbilu hi yimela leswaku Yehovha a hetisisa swidumbiso swake?—Yk 5:7, 8.

12. Hi ku ya hi Ba-Heberu 11:1, 6, xana ku lavisela kwezru ku fana ni lipfumelo hi ndlela yini?

¹² A Bibele dzri fanisa ku lavisela kwezru ni ku pfumela leswaku Yehovha a kone, ‘nakone a hakela lava mu djulaka.’ (Dondzra Ba-Heberu 11:1, 6.) Loko Yehovha a ya a va wa xivizri kwezru hi ta ya hi tiyiseka leswaku a ta hetisisa hinkwaswu leswi a swi dumbisiki. Hi ndlela leyo hi ta tama hi tiyisa ku lavisela kwezru loko hi tama hi tsrhindzrekela ka Yehovha  lweyi a hi dumbisaka ku hetisisa ku lavisela kwezru. Kutani swoswi a hi voneni tindlela ta ku kongoma ta ku tiyisa wunghanu byezru na Yehovha ni ku tama hi tiyisa ku lavisela kwezru.

13. Hi nga tsrhindzrekelisa kuyini ka Xikwembu Nkulukumba?

¹³ Khongota ka Yehovha, u va u dondzra Bibele. I ntiyiso leswaku a hi nge mu voni Yehovha, kambe hi nga tsrhindzrekela kwake. Hi nga khanela na yene hi xikhongoto na hi tiyiseka leswaku a wa hi yingela. (Yr 29:11, 12) Nakone hine hi nga mu yingiseta Xikwembu Nkulukumba loko hi dondzra Bibele hi tlhela hi yanakanyisisa ha dzrone. Loko hi dondzra hi ndlela leyi Yehovha a pfuniki ha yone malandzra yake ya khale, a ku lavisela kwezru ku ya ku tiya. Hinkwawu mazritu lawa ma nga Bibeleni ma tsraleliwe ‘ku hi dondzrisa, akuva hi va ni ku lavisela hi ku tiyisela ni hi ku khongoteliwa loko nga matsralweni.’—Ro 15:4.

14. Ha yini swi li swinene ku yanakanyisisa hi swidumbiso leswi Yehovha kutani a swi hetisisiki?

¹⁴ Yanakanyisisa hi swidumbiso leswi kutani Yehovha a swi hetisisiki. Yanakanya hi leswi Yehovha a swi yentxeliki Abrahamu na Sara. A va duhwalile lakakuva a swi nga ha koteki kuva va va ni vana. Kambe vone va ve ni n’wana hi lani Yehovha a dumbisiki ha kone. (Gn 18:10) Kambe ku ni swimbeni leswi Yehovha a a va dumbise swone. A Bibele dzri hlaya leswaku Abrahamu a ‘a ta va tatana wa matiko lamanyingi’. (Ro 4:18) Nambileswi hi ku ya hi mavonela ya vhanu a swi voneka ingi a swi nge te koteka leswo, Abrahamu a a ni ku tiyiseka ka leswaku Yehovha a ta hetisisa xidumbiso xake. A ku dumbeka ka wanuna lwiyani wa lipfumelo a ku va nga ka mahala. (Ro 4:19-21) Madzrungula ya ku fana ni lawa, ma hi dondzrisa leswaku Yehovha minkama hinkwayu a hetisisa swidumbiso swake nambiloko swi voneka ingiki a swi nge koteki hi ku ya hi vonela dzra ximhunu.

15. Ha yini swi li swa lisima ku yanakanyisisa hi leswi Yehovha kutani a hi yentxeliki swone?

 ¹⁵ Yanakanyisisa hi leswi Yehovha kutani a ku yentxeliki swone. Yanakanyisisa hi swidumbiso swa Bibele leswi kutani swi hetisekiki kwaku. Hi xikombiso, Yesu a dumbise leswaku Yehovha a a ta ku nyika leswi u swi vilelaka akuva u hanya. (Mt 6:32, 33) Yesu a tlhele a tiyisekisa leswaku Yehovha a ta ku nyika moya lowa ku xwenga loko u wu kombela. (Lk 11:13) Nakone Yehovha a wa swi hetisisa swidumbiso leswo. Swi nga yentxeka u dzrimuka swidumbiso swin’wana leswi Yehovha a swi hetisisaka kwaku. A ku dumbisa ku ku dzrivalela, ku ku txhavelela ni ku ku disa hi tlhelo dzra moya. (Mt 6:14; 24:45; 2Ko 1:3) Ku yanakanyisisa hi leswi Yehovha kutani a ku yentxeliki swone, swi ta tiyisa ku lavisela kwaku ka leswi Yehovha a dumbisaka ku ku yentxela swone a nkameni lowu taka.

16. Ha yini ku lavisela kwezru ku li nyiko ya lisima?

¹⁶ A ku lavisela kwezru ka wutomi lebyi nga helikiki i nyiko ya lisima leyi pfaka ka Xikwembu Nkulukumba. Hi byi yimele hi manyawu wumundzruku bya ku hlamalisa lebyi hi tiyisekaka leswaku byi ta va kone. A ku lavisela kwezru ku tizra swanga hangi hi ku hi pfuna ku tiyisela swikazratu, ku kanetiwa ni ku lavisana ni lifu. Ku tizra swanga xilembe xa masotxha hi ku sizrelela miyanakanyu yezru akuva hi tingawula leswa ku biha hi va hi yentxa leswinene. Ku lavisela kwezru loko sekeliwiki Bibeleni ku hi tsrhindzretela kusuhi na Xikwembu Nkulukumba ku tlhela ku hi komba lizrandzru dzrikulu ledzri a nga na dzrone ha hine. Loko ku lavisela kwezru ku tiyile hi ta kuma matovoko manyingi a wuton’wini byezru.

17. Ha yini hi fanele hi nyonxa hi ku lavisela kwezru?

¹⁷ Ka papela dzrake ledzri a dzri tsraleliki Ba-le-Roma mupostola Pawulo a tsrale leswi: ‘Tsrhavani a ku languseleni.’ (Ro 12:12) Pawulo a a ni ku nyonxa lokukulu hikusa a a tiyiseka leswaku loko a tama a dumbeka a a ta va ni wutomi lebyi nga helikiki a matilweni. Na hine ha nyonxa hi ku lavisela loku hi nga na kone hikusa ha tiyiseka leswaku Yehovha a ta hetisisa swidumbiso swake. Hi lani mupsalma a tsraliki ha kone: ‘A ni ndjombo mhunu . . . lweyi ku dumba kwakwe ku nga ku Yehovha, Xikwembu Nkulukumba wakwe. . . . Lwa bekisaka swinene hi la ku nga helikikiki.’—Ps 146:5, 6.