NHLOKOMHAKA YA XIDONDZRO 43
LISIMU 90 Tiyisanani
U Nga Ku Hlulisa Kuyini Ku Ganaganeka
“Kambelani mintxhumu hinkwayu.”—1 TES. 5:21.
NKONGOMETO
Leswi u nga swi yentxeka loko u nga tiyiseki leswaku Yehovha awa zron’weka ha wene, loko u tisola hi xiboho lexi u xi tekiki xa ku tizrela Yehovha kumbe loko u nga ha swi koti ku yentxa leswi a u navela ku mu yentxela swone.
1-2. a) He kwini ku ganaganeka loku malandzra ya Yehovha ma nga ha vaka na kone? b) Hi ta vona yini ka xidondzro lexi?
HINKWEZRU, lavakulu kumbe lavatsrongo, hi ni ku ganaganeka a ka kukazri minkama yimbeni. Hi xikombiso, yanakanya hi mumpshwa wa kukazri lwa tivutisaka leswaku xana hakunene Yehovha awa zron’weka ha yene. Kutani leswo, swi nga mu yentxa a ganaganeka nambi ku va a babatiswa. Xikombiso xin’wana, i xa makwezru wa kukazri, lweyi nkama lowu na a ha li mumpshwa, a hlawuliki ku zrangisa ntizro wa Yehovha matsrhan’wini ya ku hlawula ku tizra ngopfu akuva a va ni mali yinyingi ka misava leyi. Swoswi makwezru lweyi, a kulile hi ntanga nakone o va ni mali leyi a kotaka ku tihanyisa ntsena, kutani a nga ha tivutisa leswaku xana a teke xiboho lexinene na a ha li mumpshwa. Swoswi, yanakanya hi makwezru wa xisati lwa kuliki hi ntanga lweyi a kalaka a nga ha koti ku yentxa swinyingi hi kola ka ntanga. A nga ha titwa na a hele ntamu hi kola ka leswi a kalaka a nga ha swi koti ku yentxa leswi a a swi yentxa. Xana u sama u ti hamba swivutiso swa ku fana ni leswi: ‘Xana Yehovha awa zron’weka ha mine hakunene? Xana ku tikazrata loku ni ku yentxeliki Yehovha ku ve ka mahala? Xana ni nga ha tama ni mu yentxela xa kukazri Yehovha?’
2 Loko hi nga tikazrateli ku kuma tinhlamulo ya swivutiso leswi, swi nga ha hi yentxa hi heleliwa hi lipfumelo ledzri hi nga na dzrone ka Yehovha nambi ku yima ku mu tizrela. Ka xidondzro lexi, hi ta vona ndlela leyi Bibele dzri nga hi pfunaka ha yone loko hi yanakanya leswaku 1) Yehovha a nga zron’weki ha hine, 2) swiboho leswi hi swi tekiki nkameni lowu khalutiki a swi vanga swinene kumbe 3) a ha ha li va lisima ka Yehovha.
I YINI LEXI NGA HI PFUNAKA LOKO HI LI NI KU GANAGANEKA?
3. I yini leswi hi nga swi yentxaka loko hi li ni ku ganaganeka?
3 Loko hi li ni ku ganaganeka, i swa lisima ku hamba wusetxhi akuva hi kuma tinhlamulo a Bibeleni. Loko hi yentxa leswo, lipfumelo dzrezru ka Yehovha ni wunghanu byezru na yene swi ta tiya nakone hi ta va hi ‘tiyile a lipfumelweni’.—1 Kor. 16:13.
4. Hi nga ‘kambela mintxhumu hinkwayu’ hi ndlela yini? (1 Vatesalonika 5:21)
4 Dondzra 1 Vatesalonika 5:21. Xiya leswaku a Bibele dzri hi kutxa kuva hi ‘kambela mintxhumu hinkwayu’. Hi nga swi yentxisa kuyini leswo? Loko hi nga tiyiseki mayelanu ni mhaka ya kukazri, hi nga ha kambisisa leswi Bibele dzri swi hlayaka mayelanu ni mhaka leyo. Hi xikombiso, yanakanya hi mumpshwa lweyi a kalaka a nga tiyiseki leswaku Yehovha awa zron’weka ha yene. Xana swoleswo i ntiyiso? Im-him, a fanela ku ‘kambela mintxhumu hinkwayu’ hi ku dondzra Bibele akuva a vona leswi Yehovha a swi yanakanyaka ha yene.
5. Hi mu “yingelisa” kuyini Yehovha loko a hlamula swivutiso swezru?
5 Nkama lowu hi dondzraka Bibele, swi fana ni loko hi “yingela” Yehovha na a vulavula na hine. Kambe hi fanela ku yentxa leswi yengetelekiki ku tlula ku dondzra Bibele loko hi djula ku kuma tinhlamulo ta Yehovha mayelanu ni swivutiso swezru. Hi fanela ku kuma ni ku dondzra tindzrimana leti taka hi pfuna ku hlamula swivutiso leswi kongomiki. Hi nga ha hamba wusetxhi ka mhaka yoleyo hi ku tizrisa switizro leswi nhlengeletanu ya Yehovha yi hi nyikaka swone. (Amapr. 2:3-6) Hi fanela ku khongota ka Yehovha, hi mu kombela kuva a hi pfuna ku kuma tinhlamulo ta swivutiso swezru. Hi gama hi kambisisa minsinya ya milawu ya Bibele ni ku kambisisa dzrungula ledzri nga hi pfunaka ka mhaka yezru. Nakone, i swinene ku kambisisa wudzrunguli bya Bibele bya malandzra ya ku dumbeka ya Yehovha lawa na wone ma viki ka xiyimu xa ku fana ni xezru.
6. Xana mintlhanganu yi hi pfunisa kuyini ku kuma tinhlamulo ta swivutiso swezru?
6 Hi tlhela hi “yingela” Yehovha na a vulavula na hine loko hi li mintlhanganwini. Loko hi kumeka mintlhanganwini nkama ni nkama, hi nga ha yingela wukaneli kumbe nhlamulo ya makwezru leyi yi nga ha vaka nhlamulo ya swivutiso swezru. (Amapr. 27:17) A hi kambisiseni leswi nga hi pfunaka ku kuma tinlamulo ta swivutiso swezru.
U NGA YENTXA YINI LOKO U NGA TIYISEKI LESWAKU YEHOVHA AWA ZRON’WEKA HA WENE?
7. He xini xivutiso lexi vhanu vanyingi va ti hambaka xone?
7 Xana u sama u tivutisa leswaku, ‘Hakunene Yehovha awa zron’weka ha mine?’ Loko u titwa na u nga li wa lisima, u nga ha swi vona swi nga koteki kuva munghanu wa mutumbuluxi wa wuyaku hinkwabyu. Swi nga yentxeka ku humelele leswi fanaka hi hosi Davhida. A hlamalisiwe hi ku tiva leswaku Yehovha a zron’weka ngopfu hi vhanu. A te: ‘Yehovha, a mhunu i ntxini akuva u mu tiva wene xana? Ni n’wana wa mhunu akuva u mu dzrimuka xana?’ (Amaps. 144:3) U nga yi kuma kwini nhlamulo ya xivutiso lexi?
8. Hi ku ya hi 1 Samuel 16:6, 7, 10-12, i yini leswi Yehovha a swi xiyaka ka vhanu?
8 A Bibele dzri dondzrisa leswaku Yehovha a vona hinkwavu lava tivonaka na va nga li va lisima ka van’wana. Hi xikombiso, Yehovha a zrume Samuwele kuva a ya kaya ya Yese akuva a ya tota mun’we wa vana vake akuva a va hosi ya Israyele. Yese a vitane 7 wa vanake akuva va ya ka Samuwele kambe a dzrivale Davhida, ku nga lwetsrongo wa kone. b Kambe, lweyi a hlawuliwiki hi Davhida. (Dondzra 1 Samuel 16:6, 7, 10-12.) Yehovha a xiyisise leswi Davhida a nga xi swone hi le ndzreni. A a swi tiva leswaku mumpshwa lweyi a a mu zrandzra ngopfu Yehovha.
9. I yini lexi ku tiyisekisaka leswaku Yehovha awa zron’weka ha wene? (Tlhela u vona ni mufoto.)
9 Yanakanya mayalenu ni ndlela leyi Yehovha a swi kombisiki ha yone leswaku awa zron’weka ha wene. A ku nyika swilayu leswinene leswi u swi vilelaka ka xiyimu xaku. (Amaps. 32:8) Lexi i xikombiso xa leswaku awa ku tiva ha hombe. (Amaps. 139:1) Loko u tizrisa swilayu swa Yehovha a wuton’wini byaku ni ku vona ndlela leyi swi ku pfunaka ha yone, u ta ya u tiyiseka ka leswaku Yehovha awa zron’weka ha wene. (1 Makr. 28:9; Mint. 17:26, 27) Yehovha awa ku vona ku tikazrata kwaku akuva u mu tizrela ni ku mu yingiseta. A tlhela a vona ni wumhunu byaku lebyinene lebyi u nga na byoneni leswaku a djula ku va munghanu waku. (Yer. 17:10) Nakone, na yene a ta nyonxa ngopfu loko u djula kuva Munghanu wake.—1 Yoh. 4:19.
‘Loko u djula [Yehovha], u ta mu kuma.’—1 Makr. 28:9 (Vona yava 9) c
U NGA YENTXA YINI LOKO SWIBOHO LESWI U SWI TEKIKI NKAMENI LOWU KHALUTIKI SWI NGA VANGA SWINENE?
10. Loko hi yanakanya hi swiboho leswi hi swi tekiki nkameni lowu khalutiki, he swini swivutiso leswi hi nga ha ti hambaka swone?
10 Loko nkama wu ya wu famba, van’we va nga ha lavisa ntsrhaku va va va tivutisa leswaku xana va teke swiboho leswinene kumbe im-him. Swi nga yentxeka va tsrhike mintizro leyi holelaka swi phela kumbe va tsrhike ku va ni bindzru ledzri fambaka ha hombe akuva va tizrela Yehovha hi lani ku yengetelekiki. Kambe ku khaluta nkama wunyingi kumbe malembe manyigi. Swi nga yentxeka va yanakanya hi vhanu va kukazri lava va va tivaka lava va tekiki xiboho lexi hambaniki ni xavu nakone swoswi vhanu lava va tikomba na va ni mali yinyingi nakone na va ni wutomi lebyi nyonxisaka. Kutani va nga ha tivutisa leswi: ‘Xana xiboho lexi ni xi tekiki xa ku tizrela Yehovha xi ve xinene? Kumbe inhaka ni tizre ngopfu akuva ni va ni mali yinyigi swoswi?’
11. I yini leswi nga ha kazrata mutsrali wa buku dzra Amapsalma 73?
11 Loko u same u ti hamba swivutiso swa ku fana ni leswi, vona leswi Bibele dzri swi hlayaka mayelanu ni ndlela leyi mutsrali wa Amapsalma 73 a titwiki ha yone. A vone vhanu lava a va nga mu tizreli Yehovha kambe va tikomba na a va ni lihanyu ledzrinene, va ganyile, nakone va nge na swikazratu. (Amaps. 73:3-5, 12) Loko a vone leswaku a wutomi ingiki a byi va fambela ha hombe, swi mu yentxe a yanakanya leswaku xiboho lexi a xi tekiki xa ku tizrela Yehovha a xi nga li xinene. Leswo a swi mu kazrata ‘siku hinkwadzru’. (Amaps. 73:13, 14) A lulamisise kuyini ndlela leyi a a titwa ha yone?
12. Hi ku ya hi Amapsalma 73:16-18, xana mutsrali wa buku dzra Amapsalma a yi lulamisise kuyini ndlela leyi a a titwa?
12 Dondzra Amapsalma 73:16-18. Mutsrali wa Amapsalma a ye nghena mbangwini wa ku xwenga wa Yehovha. Ka mbangu wolowo, a a kota ku yanakanyisisa ha hombe. A swi twisisile leswaku, nambileswi van’we ka vhanu lavo a va tikomba na va ni wutomi lebyi nyonxisaka a va nge na dumbu dzra wumundzruku. Leswo swi mu yentxe a va ni ku zrula ka miyanakanyu, a nga ha titwi na a heli ntamu nakone swi mu yentxe a tiyiseka ka leswaku xiboho lexi a xi tekiki xa ku zrangisa Yehovha a wuton’wini byake a xi li xinene. Nakone a a tiyimisele ku tama a tizrela Yehovha.—Amaps. 73:23-28.
13. U nga ku kumisa kuyini ku zrula ka miyanakanyu loko u nga tiyiseki mayelanu ni swiboho leswi u swi tekiki ntsrhaku? (Tlhela u vona ni mufoto.)
13 Ku fana ni mupsalma, na wene u nga va ni ku zrula ka miyanakanyu hi ku pfuniwa hi Zritu dzra Xikwembu Nkulukumba. Hi ndlela yini? Dzrimuka mintxhumu hinkwayu leyinene leyi u nga na yone, ku patsra ni matovoko kumbe ku yamukeleka ka Yehovha ni ku dzrimuka leswaku Yehovha a nga va pfuni lava kalaka va nga mu tizreli. Vanyingi lava kalaka va nga mu tizreli Yehovha, ku va ni ntizro lowu holelaka mali yinyingi i swa lisima ka vone hikusa a va na dumbu dzra wumundzruku. Kambe, Yehovha a ku dumbisa ku ku tovokisa hi mintxhumu yinyingi ya ku xonga a nkameni lowu taka leyi u kalaka u ngi ngi sama u yi pimisa. (Amaps. 145:16) Kambe, tlhela u yanakanya hi leswi: Xana wutomi byaku a byi tava hi ndlela yini loko a u teke xiboho lexi hambaniki? Kambe tiyiseka hi leswi: Loko u teka swiboho hi ku ya hi lizrandzru ledzri u nga na dzrone na Yehovha kun’we ni vanhu van’wana u nga tiyiseka leswaku u ta va ni mintxhumu yinyingi leyi nga ku nyonxisaka.
Yanakanyisisa ngopfu hi matovoko manyingi lawa Yehovha a taka ku nyika wone nkameni lowu taka (Vona yava 13) d
U NGA YENTXA YINI LOKO U TIVONA U NGA HA LI WA LISIMA KA YEHOVHA
14. I yini lexi van’we ka malandzra ya Yehovha xi va ganaganekisaka nakone he xini xivutiso lexi va nga ha ti hambaka xone?
14 Man’we ya malandzra ya Yehovha a ma ha swi koti ku yentxa leswi a ma kota ku swi yentxa khale hi kola ka ntanga, xikazratu xa lihanyu kumbe a va he na ntamu ni wuswikoti leswi a va li na sowne khale. Leswo, swi nga ha va yentxa va ganaganeka leswaku xana va ha li va lisima ka Yehovha. Va nga ha tivutisa leswi: ‘Xana na ha li wa lisima ka Yehovha?’
15. I yini leswi mutsrali wa Amapsalma 71 a a tiyiseka ha swone?
15 Mutsrali wa Amapsalma 71 a a titwa hi ndlela leyi fanaka. A khongote a ku: ‘U nga ndzri tsrhike loko ntamu wanga wu helile.’ (Amaps. 71:9, 18) Nambileswi mupsalma lweyi a a pfa a hela ntamu, a a tiyiseka ka leswaku loko a tama a tizrela Xikwembu Nkulukumba hi ku dumbeka, Yehovha a a ta mu kongomisa ni ku mu seketela. Mupsalma a a swi tiva leswaku Yehovha awa nyonxa hi lava va yentxaka hinkwaswu akuva va mu tizrela nambiloko va kumana ni swikazratu.—Amaps. 37:23-25.
16. Xana vamakwezru lava kuliki hi ntanga i va lisima ka Yehovha hi ndlela yini? (Amapsalma 92:12-15)
16 Loko a li leswaku u mhunu lwa kuliki hi ntanga, yanakanya hi ndlela leyi Yehovha a ku vonaka ha yone. A nga ku pfuna ku tama u mu tizrela hi ku dumbeka nambiloko u kumana ni swikazratu kumbe ku hela ntamu. (Dondzra Amapsalma 92:12-15.) A matsrhan’wini ya ku yanakanya hi mintxhumu leyi u kalaka u nga ha swi koti ku yi yentxa, yanakanya hi leswi u swi kotaka ku swi yentxa. Hi xikombiso, u nga ha tiyisa van’wana hi kola ka xikombiso xaku lexinene xa lipfumelo ni ndlela leyi u zron’wekaka ha yone ha vone. U nga ha va byela ndlela leyi Yehovha a ku pfuniki ha yone hi malembe manyingi ni ku va byela swidumbiso swa Bibela leswi u yimelaka ku swi vona na swi hetiseka. Nakone, u nga dzrivali leswaku swikhongoto leswi u swi hambelaka van’wana swi va pfuna ngopfu swinene. (1 Pet. 3:12) Nambiloko hi kumana ni swikazratu, hinkwezru hi nga yentxa xa kukazri hi yentxela Yehovha kun’we ni van’wana.
17. Ha yini fi nga fanelanga ku fananisa leswi hi swi yentxaka ni leswi van’wana va swi yentelaka Yehovha?
17 Loko u kazrateka hi leswi u kalaka u ga ha koti ku mu yentxela swinyingi Yehovha, tiyiseka ka leswaku hinkwaswu leswi u swi yentxaka i swa lisima kwake. U nga ha zama ku ti fananisa ni leswi van’wana va swi kotaka ku swi yentxa. Kambe u nga swi yentxi leswo! Ha yini? Hikusa Yehovha a nga fananisi leswi u swi yentxa ni leswi van’wana va swi yentxaka. (Gal. 6:4) Hi xikombiso, Mariya a nyike Yesu mafuzra ya ku nun’hwela ya ku dula. (Yoh. 12:3-5) Hi hala tlhelo, wansati wa xisiwana lwa feliwiki hi nuna, a pete swimalana swibindzri swa lisima dzritrsongo ka makaxa ya le tempeleni. (Luk. 21:1-4) Kambe Yesu a nga zanga a fananisa swihanano swavu, matsrhan’wini ya leswo a xiye lipfumelo ledzri vavasati lavabidzri a va li na dzrone. Yesu a yetiseli Papayi wake hi ku helela. Xileswo, u nga tiyiseka leswaku Yehovha a vona hinkwaswu leswi u swi yentxaka hi kola ka lipfumelo ni lizrandzru ledzri u nga na dzrone ha yene ni leswaku hinkwaswu leswi u swi yentxaka i swa lisima kwake nambiloko wene u swi vona na swi nga li swa ntxhumu.
18. I yini lexi nga hi pfunaka ku hlula ku ganganeka? (Tlhela u vona Bokisi ledzri liki “ Zritu Dzra Yehovha Dzri Nga Ku Pfuna Ku Hlula Ku Ganaganeka.”)
18 Hinkwezru hi txhuka hi va ni ku ganaganeka minkama yin’wana. Kambe, hi lani hi swi voniki ha kone, a Bibele dzri nga hi pfuna ku hlula ku ganaganeka koloko. Kambe yentxa hinkwaswu akuva u hlula ku ganaganeka kumbe ku kuma nhlamulo ya swivutiso swaku, hi ku yentxa leswo u ta tiyiseka matsrhan’wini ya ku ganaganeka. Nakunene, Yehovha awa swi xiya leswi u swi yentxaka. A swi tlhangela ngopfu hinkwaswu leswi u swi yentxiki akuva u zrangisa ntizro wake mahlweni a wuton’wini byaku nakone a dumbisa ku ku hakela hi kola ka leswo. U nga tiyiseka leswaku Yehovha a zrandzra ni ku zron’weka hi mun’wana ni mun’wana wa malandzra yake ya ku dumbeka.
LISIMU 111 Leswi Swi Hi Yentxaka Hi Tsrhava
a NTLHAMUXELO WA MAZRITU: Ka nhlokomhaka leyi, hi vulavula hi ku ganaganeka loku ku nga ha hi yentxaka hi nga tiyiseki leswaku hi va lisima ka Yehovha kumbe mayelanu ni leswaku xana swiboho leswi hi swi tekiki i swa wutlhazri kumbe im-him. Lowu a hi muxaka wa ku ganaganeka lowu ku vulavuliwaka ha wone Bibeleni lowu nga ha kombisaka leswaku a hi na lipfumelo ka Yehovha ni ka swidumbiso swake.
b Nambileswi Bibele dzri kalaka dzri nga hi byeli hi ku kongoma leswaku Davhida a a ni malembe ma ngani nkama lowu Yehovha a mu hlawuliki, kambe a a ha li mupfana.—Vona Xihondzo Xo Rindzra xa 1 Ka Setembru Wa 2011, p. 29, § 2.
