NHLOKOMHAKA YA XIDONDZRO 40
Vanyingi Va Ta Yentxiwa Lava Lulamiki!
‘Lava ku tlhazriha va ta phatima ku fana ni ku phatima ka mpfhuka, ni lava dondzrisiki lavanyingi a ku lulama va ta fana ni tinyeleti hi minkama ni minkama.’—DN 12:3.
LISIMU 151 Yehovha A Ta Va Vitana
NKATSRAKANYU WA LESWI TAKA DONDZRIW *
1. He yini mintxhumu leyi nyonxisaka leyi taka yentxeka hi nkama wa Mfumu wa 1.000 wa malembe?
WA YI yanakanya ndlela leyi swi taka va ha yone loko vhanu va sungula ku pfuxiwa lani misaveni ka Mfumu wa Kriste wa 1.000 wa malembe? Nakunene lowo wu ta va nkama wa ku nyonxisa swinene. Hinkwavu lava feliwiki hi vazrandzriwa vavu, va va xuva nakone va navela ku tlhela va va vona. Na ye Yehovha a titwisa xiswoswo. (Yb 14:15) Yanakanya ku nyonxa loku hinkwavu va taka va na kone loko va yamukela maxaka ni vanghanu vavu lava fiki. Hi lani hi swi voniki ha kone ka nhlokomhaka leyi khalutiki, a ‘valulami’, ku nga lava a mavito yavu ma tsraliwiki a bukwini dzra wutomi, va ta ‘pfukela a vuton’wini’. (Min 24:15; Yh 5:29) Swi nga yentxeka vazrandzriwa vezru lava fiki va ta pfuxiwa ntsrhakunyana ka loko Armagedoni dzri khalutile. * Handle ka leswo, ku ni ntlawa wun’wana, wa lava taka pfuxiwa. Ntlawa lowo i wa ‘lavamfani’, ku nga hinkwavu lava pfumaliki mukhandlu wa ku dondzra ha Yehovha va tlhela va mu tizrela hi mbilu hinkwayu na va nga si fa. Vhanu lavo va ta pfuxeliwa ‘ku yavanyisiwa’.
2-3. a) Hi ku ya hi Ezaya 11:9, 10, xana ntizro lowukulu wa ku dondzrisa wu ta yentxeka hi ndlela yini? b) Hi ta vona yini ka xidondzro lexi?
2 Hinkwavu lava taka pfuxiwa swi ta djula va dondzrisiwa. (Eza 26:9; 61:11) Kutani ku ta yentxiwa ntizro lowukulu swinene wa ku dondzrisa. (Dondzra Ezaya 11:9, 10.) Ha yini va fanela ku dondzrisiwa? Lavamfani lava taka pfuxiwa va fanela ku dondzra mayelana Yesu, Mfumu wa Xikwembu Nkulukumba, xitizrulo, vito dzra Yehovha ni mfanelo ya Xikwembu Nkulukumba ya ku fuma. Nambi valulami swi ta djula va dondzrisiwa mayelanu ni leswi Yehovha a swi paluxiki ha kutsrongokutsrongo hi nkongometo wake hi misava. Vhanu va ku tala lava tizreliki Yehovha hi ku dumbeka va fe na Bibele dzra ha tsraliwa, xileswo lava ku lulama ni lavamfani va ta va ni swinyingi swa ku swi dondzra.
3 Ka xidondzro lexi hi ta vona tinhlamulo ta swivutiso leswi: Xana ntizro lowu wa ku dondzrisa wu ta va hi ndlela yini? He kwini ku yelana loku nga kone a xikazri ka ntizro lowu ni kuva vhanu va tsraliwa bukwini dzra wutomi? Tinhlamulo ta swivutiso leswi i ta lisima swinene kwezru. Hi lani hi taka swi vona ha kone, wuprofeta byin’wana bya Daniel ni bya Apfuletelo, byi ta hi pfuna ku swi twisisa ha hombe leswaku ku ta yentxeka yini ntsrhaku ka loko vafi va pfuxiwile. Kambe ku sungula, hi ta vona mintxhumu ya ku nyonxisa leyi taka yentxeka, leyi profetiwiki ka buku dzra Daniel 12:1, 2.
‘LAVA KHUTSRIYELAKA NTSRHUZRINI . . . VA TA PFUKA’
4-5. Ku ta humelela yini a masikwini ya wugamu? (Daniel 12:1)
4 Dondzra Daniel 12:1. A buku dzra Daniel dzri vulavula hi ku landzrelelana ka mintxhumu leyi taka yentxeka a masikwini ya wugamu. Hi xikombiso, Daniel 12:1 yi hlaya leswaku Mikayele, ku nga Yesu Kriste, hi yene a ‘yimelaka vana va tiko dzra [Xikwembu Nkulukumba]’. Mazritu lawa ma sungule ku hetiseka hi 1914 loko Yesu a ve Hosi ya Mfumu wa Xikwembu Nkulukumba.
5 Kambe Daniel a tlhele a hlaya leswaku Yesu “a ta yima” hi ‘nkama wa nhlomulo lowukulu lowa kuva ke he ke loko matiko ma tumbuluka ku tlhasa swoswi lo wa nga hi lowo wu nga siki na va kone’. Nhlomulo lowu lowukulu i wun’we ni lowu ku vulavuliwaka ha wone ka Matewu 24:21. Yesu awa yima, leswi liki, a yentxa xa kukazri akuva a kota ku huluxa vhanu dzra Xikwembu Nkulukumba. Nakone leswo a swi yentxa a wugan’wini bya nhlomulo lowukulu, kumbe hi Armagedoni. Loko dzri vulavula hi vhanu dzra Xikwembu Nkulukumba, a buku dzra Apfuletelo dzri li i ‘xitsrhungu lexikulu xi humaka nhlomulweni lowukulu’.—Mpf 7:9, 14.
6. Hi swi tivisa ku yini leswaku ku pfuka ka vafi loku ku vulavuliwaka ha kone ka Daniel 12:2 ku ta va ka hakakunene? Tlhamuxela. (Akuva u kuma leswi yengetelekiki mayelana ni ku pfuxiwa ka vafi lani misaveni, vona “Swivutiso Swa Vadondzri” ka xihondzro lexi.)
6 Dondzra Daniel 12:2. Ku ta yentxeka yini ntsrhaku ka loko xitsrhungu lexikulu xi khalutile ka nhlomulo lowukulu? A wuprofeta lebyi a byi vulavuli hi ku pfuxiwa ka vafi ka ku fanekisela ka moya, ka malandzra ya Xikwembu Nkulukumba loku ku yentxekaka a masikwini lawa ya wugamu hi lani a hi swi twisisa ha kone khale. * Amatsrhan’wini ya leswo, a wuprofeta lebyi byi khanela hi ku pfuxiwa ka vafi loku taka yentxeka a misaveni leyimpswha. Kambe ha yini hi hlaya leswo? A zritu ledzri liki “ntsrhuzri” dzri tizrisiwile ni le ka Yob 17:16, na dzri tlhamuxela ‘Sizra’. Leswi liki a buku dzra Daniel 12:2 dzri vulavula hi ku pfuxiwa ka vafi loku taka yentxeka ntsrhakunyana ka Armagedoni.
7. a) Van’wana va ta pfukela a ‘vutomini lebyi nga gamikiki’ hi ndlela yini? b) Ha yini loku ku li ku pfuxiwa ka vafi ‘lokunene’?
7 Xana a buku dzra Daniel 12:2, dzri djula ku hlaya yini loko dzri ku van’wana va ta pfukela a ‘vutomini lebyi nga gamikiki’? Leswo swi tlhamuxela leswaku hi nkama wa Mfumu wa 1.000 wa malembe, lava taka pfuxiwa, va dondzra, ni ku tama va yengesela wutivi va tlhela va yingiseta Yehovha na Yesu, va ta nyikiwa wutomi lebyi nga helikiki. (Yh 17:3) Loku ku tava ku pfuxiwa ka vafi ‘lokunene’ ku tlula loku yentxekiki a minkameni ya khale. (Hb 11:35, BX) Ha yini? Hikusa vhanu va ku kala ku hetiseka lava pfuxiwiki a minkameni ya khale va tlhele va fa.
8. Swi tlhamuxela yini ku pfuxeliwa ‘tinganeni ni le ku yavanyisiweni loku nga gamikiki’?
8 Kambe a hi hinkwavu lava taka pfuxiwa va taka pfumela ku dondzra ha Yehovha. A wuprofeta bya Daniyele byi hlaya leswaku van’wana va ta pfukela a ‘tinganeni ni le ku yavanyisiweni loku nga gamikiki’. Hi mhaka swiyentxo swavu swa wuxandzruki, mavito yavu ma nge te tsraliwa a bukwini dzra wutomi nakone va nge te byi kuma wutomi lebyi nga helikiki. Kambe va ta ‘yavanyisiwa hi lani ku nga gamikiki’ kumbe ku heliseliwa magamu. Kutani Daniel 12:2 yi vulavula hi hi ku yavanyisiwa ka lava taka pfuxiwa hi ku ya hi leswi va taka swi yentxa ntsrhaku ka loko va pfuxiwile. * (Mpf 20:12) Van’wana va ta kuma wutomi leyi nga helikiki kasi van’wana va nge te byi kuma.
VANYINGI VATA YENTXIWA LAVA LULAMIKI
9-10. I vamani lava taka ‘phatima ku fana ni mpfhuka’ nakone leswo swi ta yentxeka siku muni?
9 Dondzra Daniel 12:3. I yini swin’wana swi taka yentxeka ntsrhaku ka “nhlomulo lowukulu”? Handle ka leswi kutani hi swi voniki ka Daniel 12:2, a ndzrimana 3 yi hlaya swin’wana leswi taka yentxeka ntsrhaku ka nhlomulo lowukulu.
10 I vamani lava taka ‘phatima ku fana ni ku phatima ka mpfhuka’? Matewu 13:43 yi hi pfuna ku vona nhlamulo, yi li: “Hi nkama wolowo lava ku lulama va ta vaninga ku fana ni dambu a Mfun’wini wa Papayi wavu.” A mongo ka ndzrimana leyi wu komba leswaku Yesu Kriste a a vulavula hi “vana va Mfumu”, ku nga Vakriste lava totiwiki lava taka fuma na yene a Mfun’wini wake. (Mt 13:38) Kutani swi tikomba na Daniel 12:3 yi vulavula hi vatotiwa ni ntizro lowu va taka wu yentxa hi nkama wa Mfumu wa 1.000 wa malembe.
A vatotiwa va ta tizrisana na Yesu Kriste akuva va kongomisa ntizro lowukulu wa ku dondzrisa lowu taka yentxiwa hi nkama wa Mfumu wa 1.000 wa malembe (Vona yava 11)
11-12. Xana vatotiwa va ta yentxa yini hi nkama wa Mfumu wa 1.000 wa malembe?
11 Xana vatotiwa va ta yentxa vanyingi va va ‘valulami’ hi ndlela yini? A vatotiwa va ta tizrisana na Yesu akuva va kongomisa ntizro lowukulu wa ku dondzrisa lowu taka yentxiwa a misaveni. Lava 144.000 va ta tizra swanga tihosi va tlhela va tizra swanga vaprista. (Mpf 1:6; 5:10; 20:6) Swanga vaprista, va ta pfuna a ku ‘holiseni ka matiko’, hi mahlayela mambeni, va ta pfuna vhanu a misaveni hinkwayu leswaku va va lava hetisekiki hakutsrongokutsrongo. (Mpf 22:1, 2; Ezk 47:12) Handle ka ku ganaganeka a vatotiwa va ta nyonxa ngopfu swinene!
12 Kambe i vamani “lavanyingi” lava taka yentxiwa lava lulamiki? Hi lava taka pfuxiwa, lava taka huluka ka Armagedoni ni vana lava nga ha pswaliwaka a misaveni leyimpswha. Loko ku hela 1.000 wa malembe, hinkwavu lava taka va na va hanya lani misaveni va tava na va hetisekile. Kutani, xana mavito yavu ma ta tsraliwa siku muni hi ndlela ya kuva ma nga ha timeki a bukwini dzra wutomi?
XIKAMBELO XA WUGAMU
13-14. Xana vhanu hinkwavu lava hetisekiki lani misaveni va ta fanela ku kombisa yini akuva va kuma wutomi lebyi nga helikiki?
13 Hi fanela ku dzrimuka leswaku mhunu a nga ti kuma wutomi lebyi nga helikiki ntsena hikuva a hetisekile. Yanakanya hi Adamu na Evha. A va hetisekile, kambe akuva va kuma wutomi lebyi nga helikiki a va fanele ku kombisa leswaku va mu yingiseta Yehovha. Kambe lexi vavisaka, a va swi kombisanga leswo.—Ro 5:12.
14 Ntsrhaku ka 1.000 wa malembe, vhanu hinkwavu a misaveni va tava va hetisekile. Xana vhanu hinkwavu lava hetisekiki va ta mu yingiseta Yehovha hi lani ku nga helikiki, kumbe van’wana va ta fana na Adamu na Evha va va va nga dumbeki? Swivutiso leswi swi ta hlamuliwa. Hi ndlela yini?
15-16. a) I nkama muni lani vhanu hinkwavu va taka va ni mukhandlu wa ku kombisa leswaku va dumbeka ka Yehovha? b) Ma ta va wani mabindzru ya xikambelo xa wugamu?
15 Sathana a ta pfaleliwa ku dzringana 1.000 wa malembe, xileswo a nga ti swi kota ku hambukisa vhanu. Ntsrhaku ka 1.000 wa malembe, Sathana a ta ntsrhunxiwa swa nkamanyana nakone a ta dzringisa ku hambukisa vhanu lava hi nkama wolowo va taka va na va hetisekile. Hi nkama lowo wa xikambelo xa wugamu, vhanu hinkwavu lava hetisekiki lani misaveni va ta va ni mukhandlu wa ku kombisa leswaku va mu hlonipha Yehovha nakone va byi seketela wuhosi byake kumbe im-him. (Mpf 20:7-10) Ndlela leyi mun’wana ni mun’wana a taka yangula ha yone hi nkama lowo wa xikambelo xa wugamu, yi ta kombisa leswaku vito dzrake dzri nga tsraliwa a bukwini dzra wutomi hi ndlela ya kuva dzri nga ha timeki kumbe im-him.
16 Bibele dzri hlaya leswaku vhanu van’wana lava swi nga tivekiki leswaku i vangani, va ta fana na Adamu na Evha. Va nga ti dumbeka nakone va nga ti byi yamukela wuhosi bya Yehovha. Xana ku ta yentxeka yini ha vone? Apfuletelo 20:15 yi li: ‘Ni loko mhunu a nga kumiwanga a tsraliwile bukwini dzra vutomi, a ku txukumeteliwa tiveni dzra ndzrilo.’ A vaxandzruki hinkwavu va ta heliseliwa wugamu. Kambe vhanu vanyingi va ta khaluta ka xikambelo xa wugamu nakone mavito yavu ma ta tsraliwa hi ndlela ya kuva ma nga ha timeki a bukwini dzra wutomi.
‘NKAMA WA VUGAMU’
17. I yini leswi ntsrumi yi byeliki Daniyele leswaku a swi ta yentxeka a masikwini yezru? (Daniel 12:4, 8-10)
17 Swi nyonxisa swinene ku yanakanya hi leswi taka yentxeka ‘a nkameni wa wugamu’. Kambe nambi nkameni wa swoswi hi nga nyonxa swinene. Ntsrumi ya kukazri yi nyike Daniyele dzrungula dzra lisima swinene mayelanu ni leswi a swi ta yentxeka a masikwini yezru kumbe ‘a nkameni wa wugamu’. (Dondzra Daniel 12:4, 8-10; 2Tm 3:1-5) A ntsrumi yi byele Daniyele yi ku: ‘A ku tiva ku ta yengeteleka.’ Leswi liki, a vhanu va Xikwembu Nkulukumba a va ta byi twisisa hahombe wuprofeta bya buku dzra Daniel. Ntsrumi yi tlhele yi byela Daniyele yi ku a masikwini lawa ya wugamu, ‘lavamfani va ta yentxa leswimfani; ku nga ha vi na lwemfani lwe a taka yingelisisa’.
18. Ku ta yentxeka yini hi lava yentxaka swa ku biha ku nga li khale?
18 Namunhla swi nga ha tikomba ingi lava yentxaka swa ku biha a va khatisiwi. (Mlk 3:14, 15) Ku nga li khale, Yesu a ta yavanyisa lava hanyaka swanga timbuti, a va hambanisa ni lava va fanaka ni tihamba. (Mt 25:31-33) Lava yentxaka leswa ku biha va nga ti huluka a nhlomulweni lowukulu nakone va nga ti pfuxiwa a misaveni leyimpswha. Mavito yavu ma nga ti tsraliwa ka ‘buku dzra xidzrimuxo’ ledzri ku vulavuliwaka ha dzrone ka Malaki 3:16.
19. Swoswi i nkama wa ku yentxa yini nakone ha yini? (Malaki 3:16-18)
19 Swoswi i nkama wa ku kombisa hi mahanyela yezru leswaku a hi vhanu va ku biha. (Dondzra Malaki 3:16-18.) Namunhla, Yehovha a hlengeleta lava nga vake hi ntshima, kumbexana, lava nga va lisima swinene kwake. Handle ka ku ganaganeka hi djula ku lumba ntlawa lowo.
Swi ta nyonxisa ngopfu ku vona Daniyele, maxaka yezru, vanghanu vezru ni van’wana va ku tala loko va “pfuxiwa” akuva va nyikiwa hakelo dzravu! (Vona yava 20)
20. a) I yini leswi Yehovha a swi dumbisiki Daniyele? b) Ha yini u djula ku vona ku hetiseka ka xidumbiso lexi?
20 Nakunene hi hanya ka nkama wa ku nyonxisa, kambe swa ku nyonxisa ngopfu hi leswi taka yentxeka ku nga li khale. Ku nga li khale hi ta vona ku helisiwa ka wubihi hinkwabyu. Ntsrhaku ka leswo, hi ta vona ku hetiseka ka xidumbiso lexi Yehovha a xi yentxeliki Daniyele, ka Daniel 12:13. A te: ‘U ta yima, ku yamukela yavelo dzraku a ku heleni ka masiku’. Nakunene u wu lavisele ngopfu nkama lowu maxaka yaku, vanghanu vaku ku patsra na Daniyele, va taka pfuka ha wone! Kutani yentxa hinkwaswu leswi u nga swi kotaka akuva swoswi u va nandzra wa ku dumbeka wa Yehovha leswaku vito dzraku dzri tama dzri va kone a bukwini dzra wutomi.
LISIMU 80 “Dzringa U Vona Leswaku Yehovha I Munene”
^ Ka xidondzro lexi, hi ta vona matwisisela lama yampswisiwiki ya buku dzra Daniel 12:2, 3, ledzri khanelaka hi ntizro lowukulu wa ku dondzrisa lowu taka yentxiwa. Hi ta dondzra leswaku swi ta yentxeka siku muni leswo ni leswaku i mani lwa taka patsreka ka ntizro lowu wa ku dondzrisa. Hi ta tlhela hi vona leswaku ntizro lowo wu ta va pfunisa kuyini hinkwavu lava taka va na va hanya lani misaveni akuva va tilulamisela xikambelo xa wugamu ntsrhaku ka Mfumu wa Kriste wa 1.000 wa malembe.
^ Swi nga yentxeka ku ta zranga pfuxiwa lava viki va wugamu ku fa na va dumbekile ka Yehovha a masikwini ya wugamu, ntsrhaku ka leswo, ku landzrela lavan’wana, hi ku ya hi tinxaka tavu. Loko ku pfuxiwa ka vafi kuva hi ndlela leyi, lixaka dzrin’wana ni dzrin’wana dzri ta hoyozela lava dzri hanyiki na vone. Swi nge na mhaka leswaku swi ta yentxeka hi ndlela yini, Bibele dzri hlaya leswaku lava taka pfuxeliwa ku ya hanya matilweni va ta pfuka mun’wana ni mun’wana ‘hi nkama wakwe’, kumbe, hi ndlela leyi hlelekiki. Xileswo hi nga tlhaselela magamu ya leswaku lava taka pfuxeliwa ku hanya misaveni na vone va ta pfuxiwa hi ndlela leyi hlelekiki.—1Ko 14:33; 15:23.
^ Ntlhamuxelo lowu i matwisisela lama yampswisiwiki ya mhaka leyi, leyi kumekaka ka buku ledzri liki Nyikela Nyingiso Eka Vuprofeta Bya Daniyele! ndzrima 17, nile ka Xihondzo Xo Rindza xa 1 ka Julhu wa 1987, pp. 21-25.
^ Hi tlhelo dzrin’wana, a ‘valulami’ ni ‘lavamfani’ lava boxiwiki ka Amintiṛo 24:15 hi ‘lava yentxiki leswinene’ ni ‘lava yentxiki swa ku biha’ lava nga ka Yohan 5:29. Lawa i mazritu lama tlhamuxelaka leswi lava taka pfuxiwa va swi yentxiki na va nga si fa.
