Vona ndlela leyi Bibele dzri xi hlamulaka ha yone xivutiso lexi.

A buku dzra Amintiṛo 24:15 dzri hlaya leswaku ‘ku ta va ni ku pfuka ka lava ku fa, ni le ku valulami ni le ku lavamfani’. A valulami hi lava va fiki na va yingiseta Xikwembu Nkulukumba, xileswo mavito yavu ma tsraliwile a bukwini dzra wutomi. (Mlk 3:16) Lavamfani hi lava va pfumaliki mukhandlu lowu dzringaniki wa ku dondzra hi Yehovha na va ha hanya, xileswo a mavito yavu a ma tsraliwanga a bukwini dzra wutomi.

A buku dzra Yohan 5:28, 29 na dzrone dzri vulavula hi mintlawa yibidzri yoleyi ku vulavuliwaka ha yone ka Amintiṛo 24:15. Yesu a te ‘lava yentxiki leswinene va ta pfuka va ya vutomini,’ kasi ‘lava yentxiki swa ku biha va ta pfuka va ya ku yavanyisiweni’. Lava ku lulama va yentxe leswinene na va nga si fa kutani va ta pfukela wuton’wini hikusa mavito yavu ma ta va ma tsraliwe a bukwini dzra wutomi. Swi li yini hi lava kalaka va nga lulamanga? Vone va yentxe swa ku biha na va nga si fa, xileswo va ta pfukela ku ya ku yavanyisiweni. Mavito yavu a ma si tsraliwa a bukwini dzra wutomi. Va ta nyikiwa nkama akuva va yavanyisiwa, kumbe ku kambeliwa. Lowo a ta va mukhandlu wa kuva va dondzrisiwa ha Yehovha ni ku va mavito yavu ma tsraliwa a bukwini dzra wutomi.

A buku dzra Apfuletelo 20:12, 13 dzri hlaya leswaku hinkwavu lava taka pfuxiwa va ta fanela ku yingiseta milawu leyi tsraliwiki ka mabuku lamampswha. Mabuku lawo ma ta va ni milawu leyi Yehovha a taka hi nyika yone a misaveni leyimpswha. Yehovha a ta helisa hinkwavu lava nga djulikiki ku yingiseta.—Eza 65:20.

A buku dzra Daniel 12:2 dzri hlaya leswaku van’wana va ta pfukela ‘vutomini lebyi nga gamikiki, van’wana va ta pfukela tinganeni ni le ku nyenyiweni loku nga gamikiki’. A ndzrimana leyi yi hi byela leswi taka yentxeka ntsrhaku ka 1.000 wa malembe. Van’wana va ta nyikiwa wutomi lebyi nga gamikiki kasi van’wana va ta yavanyisiwa hi lani ku nga gamikiki. Leswi liki, van’wana va ta hanya hi lani ku nga helikiki kasi van’wana va ta heliseliwa magamu.—Mpf 20:15; 21:3, 4.

Yanakanya hi leswi. A xiyimu xa mintlawa leyibidzri ya lava taka pfuxiwa, xi nga fanisiwa ni xiyimu xa vhanu lava djulaka ku ya tsrhama a tikweni dzrin’wana. A valulami va fana ni lava va nyikiwiki mpfumelelo wa ku tizra kumbe ku ya tsrhama a tikweni ledzro nakone va ni ntsrhunxeko ni timfanelo ta kukazri. Lava kalaka va nga lulamanga va fana ni lava va nyikiwiki mpfumelelo wa ku yendzra kumbe ku ya tsrhama masikunyana matsrongo a tikweni ledzro. Vhanu lavo va fanela ku kombisa leswaku va dumbeka akuva va tama va tsrhama a tikweni ledzro. Hi ndlela leyi fanaka, lava kalaka va nga lulamanga va fanela ku yingiseta milawu ya Yehovha va tlhela va kombisa leswaku kutani va lulamile akuva va tama va hanya a paradeyisini. Ka lava va djulaka ku ya tsrhama a tikweni dzrin’wana, nambileswi van’wana va nyikiwiki mpfumelelo wa ku ya tsrhama nkama wunyingi nakasi van’wana ve nyikiwa mpfumelelo wa ku ya tsrhama nkama wutsrongo, hi wugamu van’wana va nga ha nyikiwa mfanelo ya kuva vatsrhamatiko kasi van’wana va nga ha tlheliseliwa a tikweni dzravu. Leswo swi ta ya hi leswi mun’wana ni mun’wana a taka hanyisa xiswone a tikweni ledzro. Hi ndlela leyi fanaka, akuva lava va taka pfuxiwa va kuma wutomi lebyi nga helikiki kumbe va helisiwa, swi ta ya hi ndlela leyi va taka hanya ha yone a misaveni leyimpswha.

Yehovha a ngo va Xikwembu Nkulukumba wa lizrandzru ntsena, a tlhela a va Xikwembu Nkulukumba lweyi a nga ni wululami. (Dt 32:4; Ps 33:5) Yehovha a ta kombisa lizrandzru dzrake ledzrikulu loko a pfuxa lava lulamiki ni lava kalaka va nga lulamanga. A yimela leswaku hinkwavu lava taka pfuxiwa, va hanya hi milawu yake leyi tlakukiki ya mahanyela. Ko va ntsena lava va mu zrandzraka ni ku yingiseta milawu yake va taka hanya hi lani ku nga helikiki a misaveni leyimpswha.