1-2. Xana ntsrumi yi byele yini vavasati lava yiki sizreni dzra Yesu, nakone xana Yesu ha byakwe a va lelete yini?

VAVASATI va nge vangani lava txhavaka Xikwembu Nkulukumba va be mpundzru hi 16 ka Nisani wa 33 N.Y. na va tamele timbilu hi voko, va kongoma a sizreni lomu a ku khalute 36 wa mawora na ntsrumbu wa Hosi Yesu Kriste wu bekiwile. Loko va tlhasa a xilahlwini, na va djula ku tota ntsrumbu hi mizri ni mafuzra ya ku nun’hwela, va tale hi ku hlamala loko va kuma leswaku sizra a dzri li phanga! Ntsrumi yi byele vadondzrisiwa leswaku Yesu a a pfuxiwile ku feni, yi tlhela yi ku: ‘A n’wi zrangela Galileya, n’wi ta mu vona kone.’​—Mt 28:1-7; Lk 23:56; 24:10.

² Loko vavasati lava va sukile a sizreni, Yesu ha byakwe a va tsrhindzrekelile a va leleta leswi: ‘Fambani, n’wi bikela vamakwezru leswaku va ya Galileya; hi lomu va taka ndzri vona kone.’ (Mt 28:10) Swi komba leswaku Yesu a a ni swileleto swa lisima ngopfu ku swi nyika vadondzrisiwa vakwe, hikusa a ntsrhaku ka ku pfuxiwa kwakwe ku feni, ntxhumu wa ku sungula a nga wu lulamisela wu ve ntlhanganu wolowo!

3-4. I yini xi hi yentxaka hi hlaya leswaku ntizro lowu tsraliwiki ka Mattheo 28:19, 20 a wu nyikiwanga ntsena vapostola? (Vona xifaniso xa kapa.)

³ Dondzra Mattheo 28:16-20, NM. Ka ntlhanganu lowu Yesu a nga wu lulamisela, a tlhamuxele ntizro wa lisima lowu vadondzrisiwa vakwe a va ta wu yentxa a dzaneni dzra ku sungula​—ku nga ntizro wolowu hi wu yentxaka ni namunhla. Yesu a te: “Hi leswo ke, fambani mi ya yentxa vadondzrisiwa . . . , mi va dondzrisa ku bekisa hinkwaswu leswi ndzri mi leletiki swone.”

⁴ Yesu a djula leswaku valandzreli vakwe va zrezra. A nga zrumanga ntsena vapostola vakwe va 11 va ku dumbeka. Hi swi tivisa kuyini leswo? Kasi, xana a ko va ni vapostola ntsena a nhaveni ya Galileya loko Yesu a lelete leswaku ku yentxiwa vadondzrisiwa? Dzrimuka leswaku  ntsrumi ya hlaye leswi ka vavasati lavaya: ‘N’wi  ta mu vona [a Galileya].’ Xileswo, swi komba leswaku na vone vavasati lava va ku dumbeka va ve kone hi nkama lowo. Kambe a hi leswo ntsena. Mupostola Pawulo a paluxa leswaku Yesu ‘a voniwi kan’we hi vamakwezru lava tlulaka ntlhanu wa madzana’. (1Ko 15:6) Kwini?

5. Xana hi dondzra yini ka 1 Ba-le-Korinte 15:6?

⁵ Hi ni swivangelo leswi twalaka leswi hi yentxaka hi twisisa leswaku Pawulo a a khanela hi ntlhanganu luwa wa le Galileya lowu tlhamuxeliwaka ka ndzrima 28 ya Mattheo. Hi swini swivangelo swa kone? Xa ku sungula, ku tala ka vadondzrisiwa va Yesu a va huma Galileya. Xileswo, mbangu wa ku tsrhamiseka wa ku tlhanganela ka wone ni vhanu vanyingi a wu li a nhaveni ya Galileya​—ku nga li a kaya ka mhunu le Yerusalema. Xa wubidzri, Yesu lwa pfuxiwiki ku feni a a hambile ntlhanganu ni 11 wa vapostola a kaya ka mhunu le Yerusalema. Loko Yesu a o djula ku zruma ntsena vapostola ku zrezra ni ku yentxa vadondzrisiwa, inha a swi yentxile leswo le Yerusalema a matsrhan’wini ya ku leleta vapostola ni vavasati lavaya kun’we ni vambeni leswaku va ya tlhangana naye a Galileya.​—Lk 24:33, 36.

6. Xana Mattheo 28:20 yi kombisa hi ndlela yini leswaku xileleto xa ku yentxa vadondzrisiwa xa tizra namunhla, nakone xana xileleto xoxo xi yingisetiwa hi mpimu muni?

⁶ Xiya xivangelo xa wuzrazru xa lisima. Xileleto xa Yesu xa ku yentxa vadondzrisiwa a xi gamelanga ntsena ka vakriste lava a va hanya ka dzana dzra ku sungula. Hi swi tivisa kuyini leswo? Yesu a hetise swileleto swakwe ka valandzreli vakwe hi mazritu lawa: ‘Ndzri na n’wine hi masiku hinkwawu, ku kondzra ku hela minkama.’ (Mt 28:20) Hi laha Yesu a hlayiki ha kone, namunhla ntizro wa ku yentxa vadondzrisiwa wu yentxiwa hi vhanu vanyingi. Pimisa ha swone! Lembe ni lembe ku babatisiwa kusuhi ni 300.000 wa vhanu swanga Timboni ta Yehovha, va ndzruluka vadondzrisiwa va Yesu Kriste!

7. Xana hi ta bula hi yini swoswi, nakone ha yini?

⁷ Vanyingi va lava dondzraka Bibele va hluvuka va va va babatisiwa. Nambitanu, van’wana va lava hi dondzraka navu Bibele va voneka ingiki va xandzra ku hamba vadondzrisiwa. Va swi zrandzra ku dondzra, kambe a va hluvuki va va va babatisiwa. Loko u fambisa xidondzro xa Bibele, ha dumba leswaku u djula ku pfuna lweyi u dondzraka naye ku tizrisa leswi a swi dondzraka ni kuva a ndzruluka mudondzrisiwa wa Kriste. Nhloko-mhaka leyi yi ta kombisa leswaku hi nga khumbisa kuyini mbilu ya lweyi hi dondzraka naye ni leswaku hi nga mu pfunisa kuyini ku kula hi le moyeni. Ha yini swi djuleka kuva hi bula hi mhaka leyi? Hikusa hi wun’wana nkama swi ta djula hi tsrema leswaku hi nga ya mahlweni hi dondzra ni mhunu wa kone kumbe im-him.

8. I yini swi nga yentxaka swi kazrata ku khumba timbilu ta van’wana?

⁸ Yehovha a djula leswaku vhanu va mu tizrela hi leswi va mu zrandzraka. Xileswo, nkongometo wezru i ku pfuna lava hi dondzraka navu Bibele ku twisisa leswaku Yehovha a zron’weka ngopfu ha vone ha mun’we-mun’we ni leswaku a va zrandzra ngopfu swinene. Hi djula ku va pfuna ku vona leswaku Yehovha i ‘tatana wa swizrombe, ni mumpfenkeli wa tinhlolokati’. (Ps 68:5) Loko lava u dondzraka navu Bibele va ya va twisisa leswaku Xikwembu Nkulukumba awa va zrandzra, mbilu yi ta khumbiwa nakone lizrandzru dzravu ka Yehovha dzri ta kula. Van’we va lava hi dondzraka navu swi nga ha va bindzrela ku vona Yehovha swanga Tatana hi leswi vapapayi vavu va hlulekiki ku va komba lizrandzru. (2Tm 3:1, 3) Kutani-ke, loko u fambisa xidondzro, tlakuxa ngopfu wumhunu bya ku xonga bya Yehovha. Pfuna lava u dondzraka navu Bibele ku twisisa leswaku Xikwembu Nkulukumba wezru wa lizrandzru a djula leswaku va kuma wutomi lebyi nga helikiki, nakone a tsrhama na a tibekisele ku va pfuna ku hetisisa nkongometo lowo. Hi swini swin’wana hi nga swi yentxaka?

9-10. Hi wani mabuku lawa hi fanelaka ku ma tizrisa loko hi fambisa swidondzro swa Bibele, nakone ha yini ku langiwe mabuku lawo?

⁹ Tizrisa mabuku lama liki “I Yini Leswi Hi  Nga Swi Dondzraka A Bibeleni?” na “Tihlayiseni eRirhandzwini Ra Xikwembu”. Mabuku lawo ngopfu-ngopfu ma hambeliwe ku hi pfuna ku khumba timbilu ta lava hi dondzraka navu Bibele. Hi xikombiso, ndzrima 1 ya buku ledzri liki Leswi Hi Nga Swi Dondzraka yi hlamula swivutiso leswi: Xana Xikwembu Nkulukumba a ni mhaka na hine kumbe a ni tihanyi?, Xana Xikwembu Nkulukumba a titwisa kuyini loko hi xaniseka?, na Swa koteka ku va munghanu wa Yehovha ke? Ku hlayiwa yini hi buku ledzri liki Tihlayiseni eRirhandzwini Ra Xikwembu? Buku ledzro dzri ta pfuna lweyi hi dondzraka naye ku twisisa ndlela leyi ha yone ku tizrisa minsinya ya milawu ya Bibele swi nga yampswisaka wutomi byakwe ni kuva swi mu tsrhindzretela kusuhi na Yehovha. Nambi loko kutani u hetile ku dondzra mabuku lawa ni vambeni, lulamisela ha hombe xidondzro xin’wana ni xin’wana, nakone tsrhama na u dzrimuka swivileleko swa ku kongoma swa xidondzro xin’wana ni xin’wana.

¹⁰ Nambitanu, a hi nge lweyi u dondzraka naye a djula ku dondzra hi mhaka ya kukazri leyi ngeke kone ka dzrin’we dzra mabuku ya lama nga ka Switizro Swa Ku Dondzrisa Ha Swone. Kumbexana u nga mu kutxa ku dondzra buku dzra kone wuswakwe leswaku wene u kota ku ya mahlweni hi ku dondzra  naye hi dzrin’we dzra switizro leswi ha ha ka ku swi hlaya leswi hi leletiwaka ku dondzra Bibele ha swone ni vhanu.

11. Hi wini nkama lowu hi fanelaka ku sungula ku hamba xikhongoto xa ku pfula ni xa ku pfala, nakone u nga yi nhingenisisa kuyini mhaka leyi?

¹¹ Sungula xidondzro hi xikhongoto. Hi ntolovelo, swa yampswa kuva hi nga hlweli ku sungula hi tlhela hi pfala xidondzro hi xikhongoto, leswi swi nga vaka ndzreni ka mavhiki ya ku sungula loko kutani xidondzro xi sungule kuva xa nkama ni nkama. Hi fanela ku pfuna lweyi hi dondzraka naye Bibele ku vona leswaku hi ngo kota ku twisisa Zritu dzra Xikwembu Nkulukumba ntsena hi ku pfuniwa hi moya Wakwe. Vamakwezru van’wana va bula ni lava dondzraka navu Bibele hi lisima dzra xikhongoto hi ku dondzra Yakob 1:5, leyi liki: ‘Loko a mun’we ku n’wine a pfumala vutlhazri, a a kombele ku Xikwembu Nkulukumba.’ Mufambisi wa xidondzro a gama a vutisa lweyi a dondzraka naye Bibele, a ku: “Xana hi nga kombelisa kuyini wutlhazri ka Xikwembu Nkulukumba?” Lweyi a fambiseliwaka xidondzro xa Bibele a talisa ku pfumela leswaku hi nga byi kombela hi ku hamba xikhongoto ka Xikwembu Nkulukumba.

12. Xana Amapsalma 139:2-4 u nga ma tizrisisa kuyini ku pfuna lweyi u mu fambiselaka xidondzro ku khongota ka Yehovha na a nga txhavi ntxhumu?

¹² Dondzrisa lweyi u mu fambiselaka xidondzro ku khongota. Mu tiyise leswaku Yehovha awa swi djula ku yingiseta swikhongoto swakwe leswi humaka a mbilwini. Tlhamuxela leswaku loko hi khongota na hi li wuswezru, hi nga swi kota ku pfulela Yehovha mbilu hakunene​—hi hlaya leswi hi titwisaka xiswone leswi n’waninkama a hi ta txhava ku bulela mhunu mun’wana. Phela, Yehovha awa yi tiva mimpimiso yezru ya le ndzreni-ndzreni. (Dondzra Amapsalma 139:2-4.) Hi nga tlhela hi kutxa lweyi hi dondzraka naye Bibele leswaku a kombela Xikwembu Nkulukumba a mu pfuna ku tsrhika mapimisela lama hoxekiki ni ku hlula mikhuva ya ku biha. Hi xikombiso, a hi nge lweyi kutani u nga ni nkamanyana na u dondzra naye a zrandzra nkhuvo wa kukazri lowu sunguleliki a wuhedenini. Awa swi tiva leswaku swi bihile, kambe mhaka hi leswaku a zrandzra mintxhumu ya kukazri ka nkhuvo lowu. Mu kutxe ku byela Yehovha hi ku kongoma leswi a titwisaka xiswone ni ku mu kombela a mu pfuna ku zrandzra ntsena leswi Xikwembu Nkulukumba a swi zrandzraka.​—Ps 97:10.

13. a) Ha yini hi fanela ku tekela ku zramba lava hi dondzraka navu Bibele kuva va famba na hine mintlhanganwini? b) Hi nga yentxa yini akuva lweyi hi dondzraka naye Bibele a titwa na a nga lahlekanga loko a li Ndlwini ya Mfumu?

¹³ Tekela ku zramba lweyi u dondzraka naye Bibele a mintlhanganwini. Leswi lweyi u mu fambiselaka xidondzro a swi twaka ni ku swi vona a mintlhanganwini ya wukriste swi nga mu khumba mbilu swi va swi mu pfuna ku yentxa nhluvuku. Mu kombe vídeo ledzri liki Ku Yentxeka Yini A Ndlwini Ya Mfumu? u va u mu zramba hi xinghanu leswaku a famba na wene a mintlhanganwini. Mu nyike boleya kumbe u mu hakelela xapa loko swi koteka. I miyanakanyu ya hombe ku zramba vazrezri va ku siyana-siyana loko u ya fambisa xidondzro. Hi ndlela leyo, lweyi u dondzraka naye a ta tolovelana ni van’wana a bandleni, nakone swi ta mu nabyalela ku titwa na a nga lahlekanga loko a li mintlhanganwini yezru.

14. I yini swi nga kutxaka lweyi hi dondzraka naye Bibele ku kula hi le moyeni?

¹⁴ Nkongometo wezru i ku pfuna lweyi hi dondzraka naye Bibele ku kula hi le moyeni. (Ef 4:13) Loko mhunu a pfumela ku dondzra Bibele, swi nga yentxeka ngopfu-ngopfu a navela ku tiva leswaku xidondzro xi ta mu pfunisa kuyini hi ku kongoma. Kambe, loko lizrandzru ledzri a nga nadzru hi Yehovha dzri ya dzri kula, leswi taka yentxeka hi leswaku a ta sungula ku pimisa hi ndlela leyi a nga pfunaka van’wana ha yone, ku patsra ni lava kutani va nga swizro swa bandla. (Mt 22:37-39) Loko ku tlhasa nkama wa kone, u nga ganagane ku mu  komba ndjombo ya ku seketela ntizro wa Mfumu hi mali.

15. Xana hi nga mu pfunisa kuyini lweyi hi dondzraka naye Bibele ku tlhantlha swizralanganya loko swi humelela?

¹⁵ Dondzrisa lweyi u dondzraka naye Bibele leswi a fanelaka ku swi yentxa loko ku pfuka swizralanganya. Hi xikombiso, a hi nge lweyi u dondzraka naye i muzrezri lwa nga siki babatisiwa, kutani a ku byela leswaku a khunguvanyisiwe hi mhunu a bandleni. A matsrhan’wini ya ku yima ni lweyi kumbe lwiya, ha yini u nga mu kombisi leswi Matsralwa ma hlayaka swone? Hi ku ya hi Matsralwa, a nga dzrivalela makwezru yelweyo kumbe, loko swi mu hlula ku swi tsrhikisa xiswoswo, a nga ya khanela na yene hi ndlela leyinene ni ya lizrandzru hi nkongometo wa ku ‘kuma makwavu’. (Dzringanisa Mattheo 18:15.) Pfuna lweyi u dondzraka naye ku lulamisela leswi a taka swi hlaya. Mu kombe ndlela ya ku tizrisa JW Library^®, Nkongomiso Wo Endla Ndzavisiso Wa Timbhoni Ta Yehovha, na jw.org^® akuva a dondzra tindlela leti pfunaka ta ku tlhantlha xiyimu xa kone. Loko a wupfisiwa ha hombe na a nga si na babatisiwa, swi ta mu nabyalela ku hanyisana ha hombe ni vambeni a ndzreni ka bandla a ntsrhaku ka ku babatisiwa.

16. Hi wani mabindzru ya ku zramba vazrezri vambeni ku ya fambisa xidondzro xikan’we?

¹⁶ Zramba van’wana a bandleni leswaku mi ya fambisa xidondzro xikan’we​—ku patsra ni mulanguseli wa muganga loko a pfuxela bandla dzrenu. Ha yini? Handle ka swivangelo leswi boxiwiki ku sunguleni, vazrezri van’wana va nga ha kota ku pfuna lweyi u mu fambiselaka xidondzro hi tindlela leti n’waninkama wene u ngeke na tone. Hi xikombiso, a hi nge lweyi u dondzraka naye Bibele a dzringise ku tsrhika ku dzraha kambe a tsrandzrekile hakanyingi. Zramba Mboni leyi hluliki mukhuva lowo, kumbexana leyi yentxiki tanu a ntsrhaku ka nkamanyana na yi wa yi pfuka. Kumbexana Mboni leyo yi nga kota ku pfuna lweyi u dondzraka naye Bibele hi swilayu leswi tizraka leswi a vilelaka ku swi twa. Loko u nga titwi na u ntsrhunxekile ku fambisa xidondzro a mahlweni ka makwezru lwa nga ni wuswikoti, mu kombele a fambisa xidondzro. Hi yentxela dzrini na dzrini, londzrovota wuswikoti bya van’wana akuva ku pfuneka lweyi u dondzraka naye Bibele. Dzrimuka, nkongometo wezru i ku pfuna lweyi hi dondzraka naye Bibele ku kula hi le moyeni.

17-18. I yini leswi u fanelaka ku swi yanakanyela loko u vona ku tsremelisa xidondzro?

¹⁷ Loko lweyi u dondzraka naye Bibele a nga yentxi nhluvuku lowu yaka wu voneka, swi ta djula leswaku u yima u tivutisa leswi: ‘Xana swa yampswa ni tsremelisa xidondzro ke?’ Loko u kambisisa xiyimu xa kone, u fanela ku lavisa wuswikoti bya mhunu wa kone. Van’we swi va tekela nkama wa ku leha ku tlula van’wana akuva va yentxa nhluvuku. Tivutise: ‘Xana lweyi ni dondzraka naye Bibele awa hluvuka hi mpimu lowu fambelanaka ni xiyimu xakwe?’ ‘Xana a sungulile ku ‘bekisa’, kumbe ku tizrisa, leswi a swi dondzraka?’ (Mt 28:20) Swi nga yentxeka lweyi hi mu fambiselaka xidondzro a hluvuka ha hombe-hombe, kambe nhluvuku wa kone wu fanela ku ya wu tikomba.

 ¹⁸ Kambe, hi fanela ku yentxa yini loko lweyi hi nga ni nkama wa ku hlawa na hi mu fambisela xidondzro a nga yentxi mintxhumu yinyingi kumbe nambi wa wun’we ku komba leswaku awa tlangela leswi a dondzraka swone? Yanakanya hi xiyimu lexi: Lweyi u mu fambiselaka xidondzro a hete ku dondzra buku ledzri liki Leswi Hi Nga Swi Dondzraka, ku swi djula a va a sungula ni ledzri liki Tihlayiseni eRirhandzwini Ra Xikwembu, kambe a ngi ngi sama a ya ka ntlhanganu ni wa wun’we wa bandla​—nambi ka Xidzrimuxo! Nakone a tolovela ku djula swivangelo leswi ngeke swa lisima akuva a nga dondzri loko u mu yela. Lanu-ke, u ta va u yentxa swone loko u bula ni lweyi u dondzraka naye Bibele na u nga djikadjiki. *

19. U nga ku yini ka mhunu lweyi a nga vonekiki na a tlangela xidondzro xa Bibele, kambe i yini leswi u fanelaka ku swi kambisisa?

¹⁹ U nga ha sungula hi ku mu vutisa leswi: ‘Hi xini xizralanganya lexikulu lexi ku sivelaka ku va mun’we wa Timboni ta Yehovha?’ Lweyi u dondzraka naye Bibele a nga ha hlamula a ku: ‘Ku dondzra Bibele na swi zrandzra, kambe ni nge txhuki ni va Mboni ya Yehovha!’ Loko a pimisisa xileswi na kuve mi ni nkama wa ku hlawa na mi dondzra, xana ma ha ta yela yini mahlweni hi ku dondzra? Hi tlhelo dzrin’wana, lweyi u dondzraka naye Bibele a nga ha ku pfulela xifuva hi khambi dzra ku sungula, a ku byela leswi mu sivelaka. Hi xikombiso, a nga ku byela leswaku a yanakanya leswaku a nge swi koti ni siku ni dzrin’we ku zrezra hi yindlu ni yindlu. Kutani, leswi u tivaka matitwela yakwe, swi ta ku nabyalela ku mu pfuna.

20. Xana ku twisisa Amintiṛo 13:48 swi nga hi pfunisa kuyini ku vona leswaku swa yampswa hi ya mahlweni ni xidondzro kumbe im-him?

²⁰ Lexi vavisaka hi leswaku van’wana va lava hi va fambiselaka swidondzro va fana ni va-Israyele va le masikwini ya Ezekiyele. Yehovha a hlaye leswi ha vone ka Ezekiyele: ‘Lavisa, wene ku vone u fana ni lisimu la lizrandzru la lwe wa zritu dzra hombe, lwa kotaka ku yimba swinene. Va ma yingela mazritu yaku, kambe a va ma yentxi.’ (Ezk 33:32) Swi nga hi bindzrela ku byela mhunu leswaku hi ta tsrhika ku dondzra naye. Nambitanu, ‘a nkama [lowu saliki] wu gomile’. (1Ko 7:29) A matsrhan’wini ya ku heta nkama lowu yengetelekiki na hi fambisa xidondzro lexi nga bekikiki mihandzru, hi fanela ku kuma mhunu lweyi a kombisaka leswaku a tibekisele ‘vutomi lebyi nga helikiki’.​—Dondzra Amintiṛo 13:48.

21. Hi dzrini tsralwa dzrezru dzra lembe dzra 2020, nakone ha yini dzri tlhase hi nkama wa kone?

²¹ Hi 2020, tsralwa dzrezru dzra lembe dzri ta hi pfuna ku tizrela ngopfu ka ku yampswisa muxaka wa ntizro wezru wa ku yentxa vadondzrisiwa. Dzri tlakuxa man’we ya mazritu lawa Yesu a ma hlayiki ka ntlhanganu luwa lowu nga dzrivalekikiki a nhaveni ya le Galileya: “Hi leswo ke, fambani mi ya yentxa vadondzrisiwa . . . , mi va babatisa.”​—Mt 28:19, NM.