Wumboni byi kombisa leswaku Yesu a ve Muprista Lwenkulu loko a babatisiwile hi 29 a Nguveni Yezru (N.Y.). Hi swi tivisa kuyini? Ka babatiso dzrakwe, Yesu a nyikeli mizri wakwe swanga xitlhavelo ka altari dzra ku fanekisela ledzri yimelaka ku zrandzra ka Xikwembu Nkulukumba. Leswi tlhamuxelaka leswaku loko a babatisiwile, Yesu a kombise leswaku a djula ku yentxa ku zrandzra ka Tatana wakwe, leswi liki, a nyikela wutomi byakwe swanga xitizrulo. (Ga 1:4; Hb 10:5-10) Altari dzra ku fanekisela dzri sungule ku va kone ntsrhaku ka loko Yesu a babatisiwile. A minkameni ya Bibele, a altari a dzri li xiyenge xa lisima xa tempele. Xileswo, hi nga hlaya leswaku a tempele ledzrikulu dzra moya dzri sungule ku va kone ntsrhaku ka loko Yesu a babatisiwile. A tempele ledzro dzra moya dzri yimela malulamiselo hinkwawu lawa Yehovha a ma yentxaka na a tiseketela ka xitizrulo xa Yesu akuva vhanu va mu gandzrela hi ndlela leyi basiki.​—Mt 3:16, 17; Hb 5:4-6.

Ku fana ni leswi khale a ku vileleka muprista lwenkulu a tempeleni, a tempele ledzrikulu dzra moya na dzrone a dzri mu vilela. Akuva ku yanelisiwa xivileleko lexo, Yehovha a tote Yesu ‘hi moya wa ku xwenga ni ntamu’. (Min 10:37, 38; Mr 1:9-11) Kambe, hi nga tiyisekisa kuyini leswaku Yesu a totiwile swanga Muprista Lwenkulu na a nga si fa a tlhela a pfuxiwa? Xikombiso xa Aroni ni xa van’wana lava tizriki swanga vaprista lavakulu xi ta hi pfuna ku kuma nhlamulo ya xivutiso lexo.

Hi ku ya hi Nawu wa Moxe, a ko va ntsena muprista lwenkulu a a fanela ku nhingena a Mbangwini wa ku Xwengisisa a tabernakeleni, ntsrhaku, a Mbangwini wa ku Xwengisisa a tempeleni. A Mbangu wa ku Xwengisisa a wu tsravukanisiwa ni Mbangu wa Xwenga hi kapulana. A muprista lwenkulu a a nhingena a Mbangwini wa ku Xwengisisa ntsena hi Siku dzra Dzrivaleliwo. (Hb 9:1-3, 6, 7) Aroni ni vapfaleti vakwe va totiwe swanga vaprista lavakulu na va nga si ‘hundzra mahlweni ka xisizrelo kumbe kapulana [dzra ntshima]’ va nhingena a Mbangwini wa ku Xwengisisa. Hi la ku fanaka, na a nga si fa, Yesu a a fanela ku totiwa swanga Muprista Lwenkulu akuva a ‘hundzrela mahlweni ka xisizrelo, hi leswaku, . . . nyama yakwe’ a va a nhingena a matilweni. Mizri wa nyama wa Yesu a wu fana ni xisizrelo, kumbe kapulana. Akuva a ya hanya matilweni, ku sungula Yesu a a fanela a totiwa swanga muprista lwenkulu. (Hb 10:20) Hi kola ka leswo, mupostola Pawulo a hlaye leswaku Yesu swanga ‘muprista lwenkulu’ a ‘tsremakanyi tende ledzri tlulaka hi vukulu ni ku hetiseka ka dzrone, ledzra ku ka dzri nga yentxiwanga ha mavoko’, ‘a nhingena tilweni’.​—Hb 9:11, 24.

Xana ku ni ku hambana a xikazri ka nkama lowu a xipfumelelanu leximpswha xi tiyiki ha wone ni nkama lowu xi khanguliwiki ha wone?

A ku na ku hambana a xikazri ka nkama lowu a xipfumelelanu leximpswha xi tiyiki ha wone ni nkama lowu xi khanguliwiki ha wone. Ha yini? Nkama lowu Yesu a tlheleliki a tilweni ha wone a va a kombisa leswi a hi yentxeliki swone a wuton’wini byakwe bya ku hetiseka, a teke gwasu dzra ku sungula ka lawa a ma ta tiyisa xipfumelelanu leximpswha. Magwasu wolawo ma tlhele ma khangula xipfumelelanu kumbe ma xi yentxa xi tizra. Hi wani magwasu ya kone?

Dzra ku sungula, Yesu a tikombekise a mahlweni ka Yehovha. Dzra wubidzri, a nyikele lisima dzra xitlhavelo xakwe ka Yehovha. Dzra wuzrazru, Yehovha a yamukele lisima dzra ngati ya Yesu leyi halatiwiki. Na magwasu lawo ma nga si tekiwa, xipfumelelanu leximpswha a xi nga tizri.

Bibele a dzri hi byeli hi ku kongoma leswaku he dzrini lani Yehovha a yamukeliki lisima dzra xitlhavelo xa Yesu. Xileswo, a hi nge hlayi hi ku kongoma leswaku he dzrini lani a xipfumelelanu leximpshwa xi tiyisiwiki ni ku khanguliwa. Nambitanu, ha swi tiva leswaku Yesu a tlhantukele tilweni khume dzra masiku na Pentekosta dzri nga si tlhasa. (Min 1:3) Ndzreni ka nkamanyana wolowo, Yesu a nyikele lisima dzra xitlhavelo xakwe ka Yehovha, nakone Yehovha a xi yamukelile. (Hb 9:12) Wumboni bya leswaku xipfumelelanu leximpshwa a xi tizra byi tikombe hi Pentekosta dzra 33 N.Y. (Min 2:1-4, 32, 33) Kutani a swi tikomba leswaku a xipfumelelanu leximpswha a xi sungulile ku tizra.