Wun’we wa mintizro yinyingi leyi a yi yentxiwa hi va-Levhi lava a va nga li vaprista wu nga ha fananisiwa ni ntizro lowu yentxiwaka hi mapholisa. A wu zrangeliwa hi ndzruna ya tempele. Filo, lweyi a nga mutsrali wa mu-Yuda, a tlhamuxele mintizro leyi a yi yentxiwa hi vatizri lavo. A te: “Van’we ka va-Levhi lava va yima tinyangweni hi ntshima va tizra swanga vavoneleli va tinyangwa, vambeni va yima a ndzreni [ka tempele] a mahlweni ka mbangu lowa ku xwenga akuva va yentxa leswaku ku nga vi na mhunu ni mun’we lwa kandzretelaka mbangu lowo hi vomu kumbe hi mphazamu na nge na mfanelo. Van’wana va zrendzrelekela tempele va yi lavelela, va yentxa hi ku txintxana hi minkama wusiku ni nhlikanhi.”

Valaveleli lava a va tizrela Sanedri. A ko va ntsena ntlawa lowu wa valaveleli va va-Yuda lowu mfumu wa Roma a wu wu pfumelela ku va ni matlhazri.

Hi ku ya hi xidondzri xin’wana Joachim Jeremias, “mazritu ya Yesu ya ku kawuka lava a va djula ku mu khoma, ya ku siku dzrin’wana ni dzrin’wana a a li tempeleni a dondzrisa kambe a va mu khomanga (Mt 26:55), ma nabyala ku ma twisisa. Yesu anha a nga zanga a ma hlayile mazritu lawo loko malandzra lawo a ma nga li van’we va valaveleli va va-Yuda”. Mutsrali lweyo a pfumela leswaku malandzra lawa ma nga sama ma djula ku khoma Yesu a mahlweninyana ka khambi ledzro na wone a ma li valaveleli va tempele. (Yh 7:32, 45, 46) Hi nkama wun’wana a ntsrhaku ka leswo, ka game ku zrumeliwa valaveleli ni ndzruna ya vone leswaku va ya khoma vadondzrisiwa va Kriste va va tisa ka Sanedri nakone swi tikomba na ku li vone va khomiki mupostola Pawulo va mu humexa handle ka tempele.​—Min 4:1-3; 5:17-27; 21:27-30.