1. I yini leswi mhunu a fanelaka ku swi yentxa na a nga si na sungula ku yaka?

A HI NGE mhunu wa kukazri a yanakanya ku yaka yindlu. Nakone awa swi tiva ha hombe leswi yi fanelaka ku tsrhamisisa xiswone. Xana leswo swi djula ku hlaya leswaku a nga tekela ku sungula ku xavetela materiyali a va a sungula ku yaka ke? Im-him. Na a nga si sungula ku yaka, a fanela ku yentxa ntxhumu wa kukazri wa lisima: ku nkonta leswi fanelaka ku humexiwa. Ha yini? Hikusa a fanela ku swi tiva leswaku a ta va na yone mali ya ku yaka a za a ya heta. Loko a zranga a tiva mali leyi taka djuleka, swi ta mu nabyalela ku yaka a za a ya heta.

2. Hi ku ya hi Luka 14:28-30, i yini leswi u fanelaka ku swi pimisa ha hombe na u nga si na babatisiwa?

² Xana lizrandzru ni ku tlangela loku u nga na kone ha Yehovha swi ku yentxa u yanakanya ku babatisiwa? Loko swi li tanu, u langusana ni xiboho xa ku fana ni xa mhunu lweyi a djulaka ku yaka yindlu. Hi ndlela yini? Pimisa hi leswi Yesu a swi hlayiki ka Luka 14:28-30. (Dondzra.) Yesu a a khanela hi leswi swi tlhamuxelaka swone ku va mudondzrisiwa wakwe. Loko hi djula ku mu landzrela, hi fanela ku tiyimisela ku hakela “mali” ya kone​—ku nga ku lwisana ni swihinga u tlhela u titsrona swa kukazri. (Lk 9:23-26; 12:51-53) Xileswo, na u nga si na babatisiwa, u fanela ku pimisa ha hombe hi hinkwaswu leswi patsrekaka ka kuva mudondzrisiwa wa Kriste. Leswo swi ta ku pfuna ku lungekela ku tama u tizrela Xikwembu Nkulukumba swanga mukriste lwa babatisiwiki.

3. Hi ta bula hi yini ka nhloko-mhaka leyi?

³ Xana swi ni mabindzru ku tikazratela ku hlula swihinga akuva u kota ku va mudondzrisiwa wa Kriste lwa babatisiwiki? Nakunene ma kone! Ku babatisiwa swi ku pfulela mikhandlu ya ku yamukela matovoko ya ku tala​—swoswi ni le nkameni lowu taka. Ka nhloko-mhaka leyi, hi ta bula hi swivutiso swa kukazri swa lisima mayelanu ni babatiso. Ku yentxa leswo swi ta ku pfuna ku kuma nhlamulo ya xivutiso lexi liki: “Xana ni lungile akuva ni babatisiwa?”

4. a) I yini ku tinyiketela? b) Xana swi tlhamuxela yini ku “tiyala”, hi laha swi kombisiwiki ha kone ka Mattheo 16:24?

⁴ I yini ku tinyiketela? Na u nga si na babatisiwa, ku djuleka u tinyiketela ka Xikwembu Nkulukumba. I yini ku tinyiketela? I xikhongoto lexi humaka mbilwini lexi u xi hambaka u byela Yehovha leswaku u djula ku tizrisa wutomi byaku akuva u mu tizrela hi la ku nga helikiki. Loko u tinyiketela ka Xikwembu Nkulukumba, u va na u “tiyala”. (Dondzra Mattheo 16:24.) Swoswi u lumba Yehovha, nakone leyo i ndjombo leyikulu. (Ro 14:8) Ka xikhongoto lexo, u byela Xikwembu Nkulukumba leswaku ku sukela ka nkama lowo, ntxhumu wa lisima swinene a wuton’wini byaku ku ta va ku mu tizrela, ku nga li ku tinyoxisa. Ku tinyiketela kwaku i xihlambanyo—xidumbiso xa lisima lexi u xi yentxelaka Xikwembu Nkulukumba. Yehovha a nga hi sindzrisi ku hamba xihlambanyo lexo. Kambe loko hi xi hamba, Yehovha a yimela leswaku hi xi hetisisa.​—Ps 116:12, 14.

5. Hi kwini ku hambana loku nga kone a xikazri ka ku tinyiketela ni ku babatisiwa?

⁵ Hi kwini ku hambana loku nga kone ka ku tinyiketela ni ku babatisiwa? Ku tinyiketela i ntxhumu lowu u wu yentxaka a xihundleni; u wu yentxa na u li na Yehovha ntsena. Kambe ku babatisiwa i ntxhumu lowu u wu yentxaka a livaleni; wu yentxiwa a mahlweni ka vhanu vambeni, hakanyingi ka tinhlengeletanu ta miganga ni ta swifundzra. Loko u babatisiwa, u komba vhanu vambeni leswaku u tinyiketelile ka Yehovha. * Kutani, ku babatisiwa kwaku ku yentxa vambeni va swi tiva leswaku u zrandzra Yehovha, Xikwembu Nkulukumba waku, hi mbilu yaku hinkwayu, hi moya waku hinkwawu, hi ku yanakanya kwaku hinkwaku ni hi ntamu waku hinkwawu, ni leswaku u tiyimisele ku mu tizrela hi la ku nga helikiki.​—Mr 12:30.

6-7. Hi ku ya hi 1 Petros 3:18-22, hi swini swivangelo swibidzri leswi yentxaka babatiso dzri djuleka?

⁶ A babatiso dzra djuleka hakunene? Vona leswi Bibele dzri swi hlayaka ka 1 Petros 3:18-22. (Dondzra.) A ngalawa a yi kombisa ka vhanu hinkwavu leswaku Nowa a a ni lipfumelo. Hi lani ku fanaka, a babatiso dzraku dzri tiyisekisa vhanu hinkwavu leswaku u tinyiketele ka Yehovha. Kambe a babatiso dzra djuleka hakunene? Ina. Petro a tlhamuxele swivangelo swa kone. Xa ku sungula, a babatiso dzri ‘huluxa wene’. Kambe leswaku a babatiso dzri hi huluxa, hi fanela ku kombisa leswaku hi ni lipfumelo ka Yesu. Hi fanela ku kombisa ku kholwa ka leswaku a hi felile, a pfuxiwile leswaku a hanya tilweni ni leswaku swoswi a le ‘xineneni xa Xikwembu Nkulukumba’.

⁷ Xa wubidzri, a babatiso dzri hi nyika ‘lipfalu ledzrinene’. Loko hi tinyiketela hi va hi babatisiwa, hi sungula wuxaka lebyi hlawulekiki na Yehovha. Hi nkonta ya ku tisola kwezru loku sukelaka mbilwini ni ku va ni lipfumelo ka tizrulo, Xikwembu Nkulukumba a hi dzrivalela swidoho swezru. Leswo swi hi yentxa hi va ni lipfalu ledzrinene ka yene.

8. I yini lexi ngopfu-ngopfu xi fanelaka ku ku yentxa u djula ku babatisiwa?

⁸ I yini lexi ngopfu-ngopfu xi fanelaka ku ku yentxa u djula ku babatisiwa? Loko u li kazri u dondzra Bibele hi wuyenti, u dondzre mintxhumu yinyingi hi Yehovha, ku nga wumhunu byakwe ni ndlela yakwe ya ku yentxa mintxhumu. Leswo swi ku khumbe mbilu swi tlhela swi yentxa u va ni lizrandzru ledzrikulu hi Xikwembu Nkulukumba. Xileswo, lexi ngopfu-ngopfu xi fanelaka ku ku yentxa u djula ku babatisiwa i lizrandzru ledzri u nga nadzru ha Yehovha.

9. Loko Mattheo 28:19, 20 yi ku vadondzrisiwa va fanela ku babatisiwa ‘hi vito dzra Tatana ni dzra N’wana ni dzra moya wa ku xwenga’, yi djula ku tlhamuxela yini?

⁹ Ntxhumu wumbeni lowu ku susumetelaka leswaku u babatisiwa i mintiyiso leyi u yi pfumeliki leyi nga Bibeleni. Kambisisa leswi Yesu a swi hlayiki loko a nyikela xileleto xa ku yentxa vadondzrisiwa. (Dondzra Mattheo 28:19, 20.) Hi ku ya  hi leswi Yesu a swi hlayiki, a vadondzrisiwa va fanela ku babatisiwa ‘hi vito dzra Tatana ni dzra N’wana ni dzra moya wa ku xwenga’. Xana leswo swi tlhamuxela yini? Swi tlhamuxela leswaku u fanela ku kholwa hi mbilu hinkwayu ka mintiyiso ya Bibele mayelanu na Yehovha, N’wanakwe Yesu ni moya wa ku xwenga. Mintiyiso leyo yi ni ntamu swinene nakone yi nga ku khumba mbilu swinene. (Hb 4:12) A hi dzrimukeleni yin’wana ya yone.

10-11. Hi yini mintiyiso mayelanu na Tatana leyi u yi dondzriki ni ku yi pfumela?

¹⁰ Xana wa ha dzrimuka loko u dondzre ntiyiso mayelanu na Tatana? Hi xikombiso, u dondzre leswaku hi yene ‘vito dzrakwe a nga Yehovha’, swaku a ‘tlakukile henhla ka misava hinkwayu’ ni leswaku hi yene ‘ntsena Xikwembu Nkulukumba’. (Ps 83:18; Eza 37:16) Yene i Muvumbi wezru, nakone ‘a ku huluka ku pfa ku Yehovha’. (Ps 3:8; 36:9) A kume ndlela ya ku hi huluxa ka xidoho ni lifu ni ku hi nyika dumbo dzra ku hanya hi la ku nga gamikiki. (Yh 17:3) Loko u tinyiketela ni ku babatisiwa, u ta tiviwa swanga Mboni ya Yehovha. (Eza 43:10-12) U ta hamba xiyenge xa ndangu wa misava hinkwayu wa vagandzreli va Xikwembu Nkulukumba. Ka ndangu lowu, xizro xin’wana ni xin’wana xa tibuma hi ku vitaniwa hi vito dzra Xikwembu Nkulukumba ni ku pfuna vambeni leswaku va tiva vito dzrakwe.​—Ps 86:12.

¹¹ Yanakanya hi ndjombo leyi u nga nayu: ya ku twisisa leswi Bibele dzri swi hlayaka hi Tatana! Loko u pfumela mintiyiso leyo ya lisima, mbilu yaku yi nga ku susumetela ku tinyiketela ni ku babatisiwa.

12-13. Hi yini mintiyiso mayelanu ni N’wana leyi u yi dondzriki ni ku yi pfumela?

¹² Xana u titwe hi ndlela yini loko u dondzre mintiyiso leyi landzrelaka mayelanu ni N’wana? Yesu i mhunu wa wubidzri wa lisima swinene a Wuyakwini hinkwabyu. Yene i Muhuluxi wezru. Hi ku swi zrandzra, a nyikele wutomi byakwe hi nkonta yezru. Loko hi kombisa hi mintizro leswaku hi ni lipfumelo ka tizrulo, hi nga dzrivaleliwa swidoho swezru, hi va ni wuxaka na Xikwembu Nkulukumba ni ku va ni wutomi lebyi nga gamikiki. (Yh 3:16) Yesu i Muprista wezru Lwenkulu. A djula ku hi pfuna leswaku hi kuma matovoko lama tisiwaka hi tizrulo ni ku va ni wuxaka lebyinene na Xikwembu Nkulukumba. (Hb 4:15; 7:24, 25) Hi yene Hosi ya Mfumu wa Xikwembu Nkulukumba ni lweyi a taka tizrisiwa leswaku a hlawulekisa vito dzra Yehovha, a helisa wubihi ni ku buyisa matovoko lama nga gamikiki a Paradeyisini. (Mt 6:9, 10; Mpf 11:15) Yesu a hi nyike xikombiso lexi hi fanelaka ku xi yetisela. (1Pe 2:21) A hi dondzrise hi ku va xikombiso lexinene, leswi liki, a tizrise wutomi byakwe leswaku a yentxa ku zrandzra ka Xikwembu Nkulukumba.​—Yh 4:34.

¹³ Loko u pfumela leswi Bibele dzri swi hlayaka mayelanu na Yesu, u ta dondzra ku zrandzra N’wana lweyi a zrandzriwaka hi Xikwembu Nkulukumba. Lizrandzru ledzro dzri ku susumetela ku tizrisa wutomi byaku leswaku u yentxa ku zrandzra ka Xikwembu Nkulukumba, hi lani Yesu a yentxiki ha kone. Leswo swi ta ku yentxa u xuva ku tinyiketela ka Yehovha ni ku babatisiwa.

14-15. Hi yini mintiyiso mayelanu ni moya wa ku xwenga leyi u yi dondzriki ni ku yi pfumela?

¹⁴ Loko u dondzra mintiyiso leyi landzrelaka mayelanu ni moya wa ku xwenga, u titwise kuyini? Moya wa ku xwenga a hi mhunu, kambe i ntamu lowu tizraka wa Xikwembu Nkulukumba. Yehovha a tizrise moya wa ku xwenga leswaku a huhutela vatsrali va Bibele, nakone moya lowu wu hi pfuna ku twisisa ni ku tizrisa leswi hi swi dondzraka a Bibeleni. (Yh 14:26; 2Pe 1:21) Hi ku tizrisa moya wakwe, Yehovha a hi nyika ntamu lowu tlulaka lowu tolovelekiki. (2Ko 4:7) Moya wa ku xwenga wu hi nyika ntamu wa ku zrezra madzrungula lamanene, wa ku lwa ni mindzrigo, ni gome ni swihinga. Wone wu hi pfuna ku va ni swihlawulekiso swa ku xonga a wumhunwini byezru leswi hambaka xiyenge xa ‘mhandzru wa moya’. (Ga 5:22) Lava dumbaka Xikwembu Nkulukumba va tlhela va mu kombela moya wa ku xwenga va ta nyikiwa wone hi mpimu lowukulu.​—Lk 11:13.

 ¹⁵ Swa txhavelela ngopfu swinene ku tiva leswaku vagandzreli va Yehovha va nga dumba mpfunu wa moya wa ku xwenga leswaku va gandzrela Xikwembu Nkulukumba! Loko u pfumela leswi Bibele dzri swi dondzrisaka mayelanu ni moya wa ku xwenga, u titwa na u susumeteleka ku tinyiketela ka Xikwembu Nkulukumba ni ku babatisiwa.

16. I yini leswi hi swi dondzriki ku ta tlhasa swoswi ka nhloko-mhaka leyi?

¹⁶ Xiboho xa ku tinyiketela ka Xikwembu Nkulukumba ni ku babatisiwa i xa lisima ngopfu swinene. Hi lani hi swi voniki ha kone, loko u yentxa leswo, u fanela ku pfumela ku hakela “mali” ya kone—leswi liki, u fanela ku tiyimisela ku lwisana ni swihinga u tlhela u titsrona swa kukazri. Kambe a matovoko lawa u taka ma kuma ma tlula hinkwaswu leswi u taka titsrona swone. A babatiso dzri nga ku huluxa ni ku ku pfumelela ku va ni lipfalu ledzri basiki matihlweni ya Xikwembu Nkulukumba. Lexi ngopfu-ngopfu xi fanelaka ku ku yentxa u boha ku babatisiwa i lizrandzru ledzri u nga nadzru hi Yehovha Xikwembu Nkulukumba. U fanela ku tlhela u kholwa hi mbilu hinkwayu ka mintiyiso leyi u yi dondzriki hi Tatana, hi N’wana ni hi moya wa ku xwenga. Ntsrhaku ka leswi hi swi voniki ku ta tlhasa swoswi, a wu ta hlamula hi ndlela yini xivutiso lexi: “Xana ni lungile akuva ni babatisiwa?”

17. Tlhamuxela mintxhumu ya kukazri leyi mhunu a fanelaka ku yi yentxa na a nga si babatisiwa.

¹⁷ Loko u vona leswaku u lungile akuva u babatisiwa, swi djula ku hlaya leswaku kutani u yentxe swa kukazri leswaku u va ni wuxaka lebyinene na Yehovha. * Hi nkonta ya xidondzro xaku xa Bibele xa siku ni siku, u sungule ku tiva swinyingi hi Yehovha na Yesu. U hlakulele lipfumelo. (Hb 11:6) Wa swi dumba hi ku helela swidumbiso swa Yehovha leswi nga Bibeleni nakone wa dumba leswaku ku pfumela ka gandzrelo dzra Yesu swi nga ku huluxa ka xidoho ni lifu. U tisolile ka swidoho swaku, wa tilaya hi mbilu hinkwayu hi kuva u swi yentxile nakone u kombele Yehovha leswaku a ku dzrivalela. U ndzrulukile, leswi liki, u titsravukanise ni mahanyela lawo a wu li na wone nakone u sungule ku hanya hi ndlela leyi nyonxisaka Xikwembu Nkulukumba. (Min 3:19) U sungule ku hisekela ku byela vambeni mayelanu ni lipfumelo dzraku. Xileswo, u yentxe leswi a swi vileleka leswaku u va muzrezri lwa nga babatisiwangakiki u tlhela u zrezra ni bandla. (Mt 24:14) Yehovha awa nyonxa swinene ha wene hi leswi u yentxiki hinkwaswu leswo. U nyonxise swinene mbilu yakwe.​—Pr 27:11.

18. Hi yini mintxhumu yimbeni leyi u fanelaka ku yi yentxa na u nga si na babatisiwa?

¹⁸ Na u nga si na babatisiwa, ku ni mintxhumu yimbeni leyi u fanelaka ku yi yentxa. Hi lani hi swi voniki ha kone, u fanela ku tinyiketela ka Xikwembu Nkulukumba. A xihundleni, khongota ka Yehovha hi mbilu hinkwayu u tlhela u mu dumbisa leswaku u ta tizrisa wutomi byaku leswaku u yentxa ku zrandzra kwakwe. (1Pe 4:2) Ntsrhaku ka leswo, byela mutlhanganisi wa huvo ya vakulu wa le bandleni dzraku leswaku u djula ku babatisiwa. Yene a ta kombela  leswaku vakulu va nga li vangani va tlhangana na wene. Kambe u nga khomiwe hi ntxhavu, vamakwezru lavo va ku zrandzreka va ku tiva va tlhela va ku zrandzra. Va ta kambisisa kun’we na wene tindondzro ta masungulu ta Bibele leti u ti dondzriki. Vakulu vo djula ntsena ku tiyiseka leswaku wa ti twisisa tindondzro ta masungulu neswaku wa dzri tiva lisima dzra ku tinyiketela ni ku babatisiwa. Loko va pfumelelana leswaku u lungile, va ta ku byela leswaku u nga babatisiwa ka nhlengeletanu ya muganga kumbe ka leyikulu ya xifundzra leyi landzrelaka.

19-20. U fanela ku yentxa yini ntsrhaku ka loko u babatisiwile, nakone u nga swi yentxisa kuyini leswo?

¹⁹ Ntsrhaku ka loko u babatisiwile, xana u fanela ku yentxa yini? * Dzrimuka leswaku ku tinyiketela i xihlambanyo, nakone Yehovha a yimela leswaku u xi hetisisa. Hi nkonta ya leswo, ntsrhaku ka babatiso, u fanela ku hanya hi ku yelana ni xidumbiso xaku. U nga swi yentxisa kuyini leswo?

²⁰ Xa ku sungula, tama u hlengeletana ni bandla. Loko u babatisiwa, u ta hamba xiyenge xa nhlengeletanu leyikulu ya vamakwezru. (1Pe 2:17) Vamakwezru a bandleni va ta va ndangu waku wa moya. Loko minkama hinkwayu u va kone a mintlhanganwini, u ta va ni wuxaka lebyi tiyiki swinene na vone. Xa wubidzri, dondzra Zritu dzra Xikwembu Nkulukumba u tlhela u yanakanyisisa ha dzrone siku ni siku. (Ps 1:1, 2) Ntsrhaku ka ku dondzra tindzrimana ta kukazri ta Bibele, yima u yanakanyisisa hi wuyenti hi leswi u swi dondzriki. Loko u yentxa leswo, mazritu ya Bibele ma ta nhingena a mbilwini yaku. Xa wuzrazru, tama u khongota. (Mt 26:41) Loko u khongota hi mbilu hinkwayu, u kota ku ya u tsrhindzrekela swinene ka Yehovha. Xa wumune, ‘zranga u djula Mfumu’. (Mt 6:33) U nga yentxa leswo hi ku zrangisa ntizro wa ku zrezra ni ku wu vona swanga wun’we wa mintxhumu leyi nga ya lisima a wuton’wini byaku. Loko u va kone ntizrweni wa ku zrezra minkama hinkwayu, lipfumelo dzraku dzri ta tiya swinene. Nakone u nga ha pfuna vambeni leswaku va kuma ndlela leyi yisaka a wuton’wini lebyi nga gamikiki.​—1Tm 4:16.

21. Hi wini mukhandlu lowu babatiso dzri taka ku pfulela wone?

²¹ Xiboho xa ku tinyiketela ka Yehovha ni ku babatisiwa hi xone xi nga xa lisima ku tlula hinkwaswu leswi u taka swi teka a wuton’wini byaku. I ntiyiso leswaku swi koxa “mali” ya kukazri. Kambe xana ku ni mabindzru? Handle ka ku ganaganeka ma kone! Xikazratu xin’wana ni xin’wana lexi u nga kumanaka na xone ka misava leyi ya ku bola xa ‘vevuka, i xa nkamanyana’. (2Ko 4:17) Hi tlhelo dzrin’wana, babatiso dzri ta ku pfulela mukhandlu wa ku va ni wutomi lebyi nyonxisaka namunhla ni ‘vutomi lebyi nga byone’ a nkameni lowu taka. (1Tm 6:19) Hi ndlela leyo, yanakanya ha hombe u tlhela u khongota hi nhlamulo leyi u taka yi nyikela ka xivutiso lexi liki: “Xana ni lungile akuva ni babatisiwa?”