1-2. a) I yini leswi Yehovha a swi vonaka loko vhanu va ntsrandzra-vahlayi va hlengeletana ka Xilalelo xa Hosi? (Vona xifaniso xa ku sungula.) b) Hi ta bula hi yini ka nhloko-mhaka leyi?

YANAKANYA hi leswi Yehovha a swi vonaka loko vhanu va ntsrandzra-vahlayi a misaveni hinkwayu va hlengeletana ka Xilalelo xa Hosi. A nga voni ntsena vhanu va vanyingi; yene a xiya mun’wana ni mun’wana lwa nga kone. Hi xikombiso, a vona vhanu lava hi ku dumbeka va kumekaka lembe ni lembe. A makazri kwavu ku nga ha va ni lava taka nambi loko va xanisiwa swinene. Vambeni a va kumeki ka mintlhanganu hinkwayu, kambe va vona Xidzrimuxo swanga ntlhanganu lowu swo ko boha ku va ka wone. Nakone Yehovha a xiya lava ku nga ha vaka khambi dzra ku sungula na va ya Xidzrimuxweni, nambi ku nga ha va hi ku navela ku swi vona.

² Nakunene, Yehovha a nyonxisiwa hi ku vona leswaku vanyingi va kumeka ka Xidzrimuxo. (Lk 22:19) Nambitanu, xa ku sungula lexi nga ni lisima ngopfu ka Yehovha a hi nhlayu ya vhanu lava taka ka xidzrimuxo, kambe i xivangelo xa ku ta kwavu. Ha yini? Hikusa ka Yehovha nsusumeto wa mhunu hi wone wu djulekaka ngopfu. Ka nhloko-mhaka leyi, hi ta bula hi xivutiso xa lisima swinene lexi liki: Ha yini hi nga kumeki ntsena ka Xidzrimuxo kambe ni le ka mintlhanganu ya vhiki ni vhiki leyi Yehovha a yi lulamiselaka lava mu zrandzraka?

3-4. a) Ha yini hi ya a mintlhanganwini? b) Ku va kone kwezru a mintlhanganwini ku komba yini ha hine? c) Hi ku ya hi 1 Ba-le-Korinte 11:23-26, ha yini hi nga fanelanga ku lovha Xidzrimuxweni?

³ Xa ku sungula lexi hi yentxaka hi kumeka ka mintlhanganu hi leswaku yone i xiyenge xa wugandzreli byezru. Nakambe hi kumeka ka yone hi leswi hi dondzrisiwaka ha Yehovha. Vhanu lava tibyelaka va yala leswaku va ni xivileleko xa ku dondzrisiwa. (3Yh 9) Ku  hambana na vone, hine hi swi navela ngopfu ku dondzrisiwa hi Yehovha ni hi nhlengeletanu leyi a yi tizrisaka.​—Eza 48:17, 18; Yh 6:45.

⁴ Ku va kone kwezru a mintlhanganwini ku komba leswaku hi vhanu lava titsrongahataka, lava navelaka ni lava swi zrandzraka ku dondzrisiwa. Ka wusiku bya Xidzrimuxo xa lifu dzra Yesu, hi kumeka ka xiyentxakalu lexi xa lisima ku nga li ntsena hi leswi swi sindzrisaka kambe ni hi leswi hi yingisetaka hi ku titsrongahata xileleto xa Yesu lexi liki: ‘Yentxani leswo n’wi ta ndzri dzrimuka ha swone.’ (Dondzra 1 Ba-le-Korinte 11:23-26.) Ntlhanganu lowo wu tiyisa dumbo dzrezru hi wumundzruku wu tlhela wu hi dzrimuxa leswi Yehovha a hi zrandzrisaka xiswone. Nambitanu, Yehovha awa swi tiva leswaku hi djula ku kutxiwa ni ku tiyisiwa ku tlula kan’we hi lembe. Xileswo a hi lulamisela mintlhanganu vhiki ni vhiki ni ku hi kutxa ku ya ka yone. Ku titsrongahata ku hi susumetela ku yingiseta. Hi heta nkama wunyingi vhiki ni vhiki na hi lulamisela ni ku ya a mintlhanganwini yoleyo.

5. Ha yini vhanu lava titsrongahataka va yamukela xizrambu xa Yehovha?

⁵ Lembe dzrin’wana ni dzrin’wana, vhanu vanyingi lava titsrongahataka va yamukela xizrambu xa Yehovha xa kuva va dondzrisiwa ha yene. (Eza 50:4) Vone va nyonxisiwa hi ku kumeka ka Xidzrimuxo va gama va sungula ku kumeka ni le ka mintlhanganu yin’wana. (Zk 8:20-23) Hinkwezru hi nyonxa xikan’we hi ku dondzrisiwa ni ku kongomisiwa hi Yehovha, ‘mupfuni [wezru] ni mutizruli [wezru].’ (Ps 40:17) Hakunene, a ku na ntxhumu wa ku nyonxisa kumbe wa lisima swinene ku tlula ku yamukela xizrambu xa ku dondzrisiwa hi Yehovha na Yesu, N’wanakwe lweyi a mu zrandzraka swinene!​—Mt 17:5; 18:20; 28:20

6. Xana ku titsrongahata ku mu pfunise kuyini wanuna mun’we kuva a ya Xidzrimuxweni?

⁶ Lembe ni lembe, hi tikazratela ku zramba vhanu vanyingi hi la swi kotekaka ha kone leswaku va va kone ka Xidzrimuxo xa lifu dzra Yesu. Vanyingi lava titsrongahataka va pfuneka hi ku yamukela xizrambu xezru. Vona xikombiso xin’we. Ka malembe ya ku tala lama khalutiki, wanuna wa kukazri a yamukele xipapelana xa xizrambu xa Xidzrimuxo, kambe a byele makwezru lwa mu nyikiki xone leswaku a nge ti swi kotisa. Nambitanu, ka wusiku bya Xidzrimuxo, makwezru waxinuna a hlamalisiwe hi ku vona wanuna lwiya a nghena a Ndlwini ya Mfumu. Wanuna lwiya a nyonxisiwe swinene hi ndlela leyi a hoyozeliwiki ha yone lakakuva a sungule ku ya a mintlhangawini vhiki ni vhiki. Nakunene, e luza ntsena mintlhanganu yizrazru ndzreni ka lembe ledzri landzreliki hinkwadzru. I yini leswi mu pfuniki ku kumeka ka mintlhanganu hinkwayu? Yene a a titsrongahatile lakakuva a txintxa mapimisela yakwe. Makwezru lwa mu zrambiki a game a ku: “Wanuna lwe i mhunu wa ku titsrongahata swinene.” Handle ka ku ganaganeka Yehovha a koke wanuna lweyi akuva a mu tizrela, nakone swoswi i makwezru lwa babatisiwiki.​—2Sa 22:28; Yh 6:44.

7. Leswi hi swi dondzraka a mintlhanganwini ni le Bibeleni swi nga hi pfuna hi ndlela yini ku va lava titsrongahataka?

⁷ Leswi hi swi dondzraka a mintlhaganwini ni leswi hi swi dondzraka a Bibeleni swi nga hi pfuna ku va vhanu lava titsrongahataka. Ka mavhiki lama zrangelaka Xidzrimuxo, mintlhanganu yezru yi vulavula ngopfu hi xikombiso xa Yesu ni hi ku titsrongahata loku a ku kombisiki hi ku nyikela wutomi byakwe swanga xitizrulo. Nakambe ka masiku lama zrangelaka Xidzrimuxo, hi kutxiwa ku dondzra dzrungula dzra Bibele mayelanu ni swiyentxakalu swa le mahlweni ka ku fa ka Yesu ni ku pfuxiwa kwakwe. Leswi hi swi dondzraka ka mintlhanganu leyo ni leswi hi swi dondzraka ka wudzrunguli lebyo bya Bibele swi kulisa ku tlangela kwezru hi xitlhavelo lexi Yesu a hi yentxeliki xone. Hi susumeteleka ku yetisela ku titsrongahata kwakwe ni ku yentxa ku zrandzra ka Yehovha, nambiloko swi hi bidzrela.​—Lk 22:41, 42.

8. Xana Yesu a kombise xixixi hi ndlela yini?

⁸ Hi tlhela hi dzringisa ku tekekela Yesu hi ku kombisa xixixi. Yanakanya hi xixixi lexi a xi kombisiki ka masiku lama zrangeliki lifu dzrakwe. Yesu a a swi tivisisa leswaku ku nga li khale valala vakwe a va ta mu tsrongahata, va mu ba va tlhela va mu dlaya. (Mt 20:17-19) Nambitanu, hi ku swi zrandzra a langutane ni lifu. Loko nkama wu tlhasile, a byele vapostola vakwe lava dumbekaka lava a va li naye a Getsemani a ku: ‘Pfukani, hambani hi famba! Vonani, lwa ndzri wongaka a kusuhi.’ (Mt 26:36, 46) Kutani loko xitsrhungu lexi a xi tamele matlhazri xi tlhasile ku ta mu khoma, Yesu a zrangele mahlweni, a tikombekisa, a byela masotxha kuva ma tsrhika vapostola vakwe va famba. (Yh 18:3-8) Hi nga vona xixixi xa ku nhati lexi a xi kombisiki! Namunhla wa siku, vakriste lava totiwiki ni lava va tihamba tin’wanyana va tikazratela ku tekekela Yesu hi ku va ni xixixi. Hi ndlela yini?

9. a) Ha yini hi nga ha djulaka xixixi akuva hi va kone nkama ni nkama a mintlhanganwini? b) Xikombiso xezru xi nga va khumbisa kuyini vamakwezru lava nga madjele hi kola ka lipfumelo dzravu?

⁹ Akuva hi kumeka a mintlhanganwini nkama ni nkama, swi nga ha djula hi kombisa xixixi loko hi langutana ni swiyimu swa ku bindzra. Van’we ka vamakwezru vaxinuna ni vaxisati va ta a mintlhanganwini nambi loko va ha li ku dzrileni ka vazrandzriwa lava fiki, va hetiwa ntamu kumbe va lwa ni mavabyi ya kukazri. Van’wana nangweso, hi xixixi va ta a mintlhanganwini nambiloko va tlhangavetana ni nkaneto wa maxaka kumbe wa wuhosi. Yehleketisisa kutsrongo hi leswi xikombiso xezru xi va khumbisaka xiswone lava nga madjele hi kola ka lipfumelo dzravu. (Hb 13:3) Loko va twa leswaku ha ha tama hi tizrela Yehovha nambi hi langusana ni mindzringo, swa va tiyisa ku tama va va ni lipfumelo, xixixi ni ku dumbeka. Mupostola Pawulo a ve ka xiyimu xa ku fana ni lexo. Loko a li djele a Roma, a tsrhavile loko a twa leswaku vamakwavu a va tizrela Xikwembu Nkulukumba hi ku dumbeka. (Flp 1:3-5, 12-14) Mahlweninyana kumbe ntsrhakunyana ka loko a humexiwe djele, mupostola Pawulo a tsrale papela dzrakwe ka va-Heberu. Ka papela ledzro, a kutxe vakriste lavo va ku dumbeka leswaku va tama va ‘susumetana a lizrandzrwini’ ni kuva va nga txhuki va tsrhika ku hlengeletana.​—Hb 10:24, 25; 13:1.

10-11. a) Hi vamani lava hi fanelaka ku va zrambela Xidzrimuxweni? b) Hi ku ya hi Ba-le-Efesa 1:7, ha yini hi yentxa leswo?

¹⁰ Hi kombisa xixixi loko hi zrambela maxaka, vatizri-kulozri ni vayakelani vezru ka Xidzrimuxo. Ha yini hi va zramba? Hikusa hi tlangela ngopfu leswi Yehovha na Yesu va hi yentxeliki swone lakakuva a xi kone lexi nga hi sivelaka ku zramba van’wana akuva va va kone ka Xidzrimuxo. Hi djula leswaku va dondzra ndlela leyi na vone va nga pfunekaka ha yone ka ‘timpswalu’ ta Yehovha hi kola ka xitizrulo.​—Dondzra Ba-le-Efesa 1:7; Mpf. 22:17.

¹¹ Loko hi kombisa xixixi hi ku hlengeletana xikan’we, hi va na hi kombisa matsrhamela man’wana ya lisima lawa Xikwembu Nkulukumba na Yesu va ma kombisaka hi tindlela leti xiyekaka.

12. a) Xana mintlhanganu yezru yi dzri kulisa hi ndlela yini lizrandzru dzrezru ha Yehovha na Yesu? b) Buku dzra 2 Ba-le-Korinte 5:14, 15 dzri hi kutxa ku yentxa yini akuva hi tekelela Yesu?

¹² Ndlela leyi hi zrandzraka ha yone Yehovha na Yesu yi hi susumetela ku kumeka a mintlhanganwini. Kutani, leswi hi swi dondzraka a mintlhanganwini swi kulisa lizrandzru dzrezru ha Yehovha ni N’wanakwe. Minkama hinkwayu a mintlhanganwini ha dzrimuxiwa leswi vone va hi yentxeliki swone. (Ro 5:8) Xidzrimuxo xi tisa miyanakanywini yezru leswi lizrandzru dzra Yehovha na Yesu dzri nga kulisa xiswone nambi ka lava va nga siki na twisisa lisima dzra xitizrulo. Hi ku tala hi ku khensa, hi dzringisa ku tekelela Yesu hi ndlela leyi hi hanyaka ha yone siku ni siku. (Dondzra 2 Ba-le-Korinte 5:14, 15.) Ku yengetela ka leswo, timbilu tezru ti hi susumetela ku dzrumisa Yehovha hi leswi a hi nyikiki xitizrulo. Ndlela yin’wana leyi hi nga mu dzrumisaka ha yone i ku nyikela tinhlamulo leti humaka mbilwini loko hi li mintlhanganwini.

13. Xana hi nga kombisa ku yenta ka lizrandzru dzrezru ha Yehovha ni N’wanakwe hi ndlela yini? Tlhamuxela

¹³ Hi nga kombisa ku yenta ka lizrandzru dzrezru ha Yehovha ni N’wanakwe hi kuva hi tiyimisela ku tsrhika hinkwaswu hi kola kwavu. Minkama yinyingi, hi fanela ku tikazrata kumbe ku tsrhika swin’wana akuva hi va kone a mintlhanganwini. Mabandla ya ku tala ma ni ntlhanganu wun’we a ku heleni ka siku dzra ntizro, lani ku tala ka hine kutani hi kazraliki. Ntlhanganu wun’wana wu hambiwa hi ku hela ka vhiki, lani vhanu van’wana va nga ku wiseni. Xana Yehovha awa swi xiya leswaku hi kone ka mintlhanganu yezru nambi loko hi kazralile? Nakunene awa swi xiya! Hi ntiyiso wa kone, loko hi yentxa hi ku lwa akuva hi kumeka a mintlhanganwini, Yehovha a nyonxa swinene hi lizrandzru ledzri hi dzri kombisaka ka yene.​—Mr 12:41-44.

14. Xana Yesu a hi siyelise kuyini ntila hi ku kombisa lizrandzru dzra ku tinyiketela?

¹⁴ Yesu a hi siyele ntila hi kuva a kombisa lizrandzru dzra ku tinyiketela. A a nga tibekiselanga ntsena ku fela vapostola vakwe kambe a tlhele a hanya hi ndlela leyi kombisaka leswaku a zrangisa swivileleko swavu. Hi xikombiso, a hambe ntlhanganu ni valandzreli vakwe nambi loko a kazralile nyameni kumbe a kazratekile miyanakanywini. (Lk 22:39-46) Nakone a a zron’weka swinene hi leswi a nga swi nyikaka van’wana ku nga li leswi a nga swi kumaka ka vone. (Mt 20:28) Loko lizrandzru dzrezru ha Yehovha ni vamakwezru dzri kulise xileswo, hi ta yentxa hinkwaswu hi nga  swi kotaka akuva hi hlalela Xilalelo xa Hosi ku patsra ni hinkwayu mintlhanganu leyin’wana ya bandla.

15. Xana hi vamani lava hi zron’wekaka swinene ku va pfuna?

¹⁵ Hi hamba xiyenge xa wumakwezru byin’we bya xihlayelamfuzri bya wukriste, nakone ha nyonxa hi ku heta nkama hi lani hi kotaka ha kone hi ku zramba van’wana leswaku va va na hine. Nambitanu, hi zron’weka swinene hi ku pfuna ‘a va yindlu ya vupfumeli’ byezru kambe lava holiki he moyeni. (Ga 6:10) Hi kombisa leswaku ha va zrandzra hi ku va kutxa ku kumeka a mintlhanganwini yezru, ngopfu-ngopfu ka Xidzrimuxo. Hi ku fana na Yehovha na Yesu, ha tsrhava swinene loko makwezru lwa holiki a tlhelela ka Yehovha, Tatana wezru wa lizrandzru ni Mubyisi wezru.​—Mt 18:14.

16. a) Xana hi nga kutxana hi ndlela yini, nakone mintlhanganu yi ta hi pfuna ku yentxa yini? b) Ha yini lowu wu li nkama lowunene wa leswaku hi dzrimuka mazritu ya Yesu lama nga ka Yohan 3:16?

¹⁶ Ka mavhiki lama landzrelaka, zramba vhanu vanyingi akuva va va kone ka Xidzrimuxo hi lani u nga kotaka ha kone, ka madambu ya Wawuntlhanu, 19 ka Abrili wa 2019. (Vona bokisi ledzri liki: “ Xana U Ta Va Zramba?”) A ndzreni ka lembe ledzri taka, hi djula ku yentxa leswi hi nga swi kotaka akuva hi kutxana leswaku hi kumeka a mintlhanganwini hinkwayu leyi Yehovha a hi lulamiselaka yone. Nkameni lowu wugamu bya xiyimu lexi byi yaka byi tsrhindzrekela, hi yi djula swinene mintlhanganu yezru akuva yi hi pfuna ku titsrongahata, ku va ni xixixi ni ku va ni lizrandzru. (1Te 5:8-11) Hi mbilu hinkwayu, a hi kombiseni ndlela leyi hi titwaka ha yone hi Yehovha ni N’wanakwe hi kola ka lizrandzru ledzri va hi kombaka dzrone!​—Dondzra Yohan 3:16.