Timboni ta Yehovha ti tizrise wundzruluteli bya ku tala loko ti li kazri ti dondzra Bibele. Ka tindzrimi leti nga ni Tradução do Novo Mundo das Escrituras Sagradas, hi nyonxela ku tizrisa dzrone hikusa dzri tizrisa vito dzra Xikwembu Nkulukumba, dzri ba kone nakone dzra twisiseka.

•   Dzri ni vito dzra Xikwembu Nkulukumba. Vagandlisi vambeni va Bibele va hlulekile ku dzrumisa lweyi swi mu fanelaka. Hi xikombiso, ka Bibele dzrin’we ledzri ndzruluteliwiki hi nhlengeletanu ya kukazri ku longoloxiwe 70 wa mavito ya vhanu lava hlengeliki a ku dzri humexeni. Nambitasu, Bibele dzroledzro dzri suse hi ku helela a vito dzra mutsrali wa dzrone Yehovha Xikwembu Nkulukumba.

   Ku hambana ni leswo, Bibele dzra Tradução do Novo Mundo dzri tlhelisele vito dzra Xikwembu Nkulukumba a mimbangwini ya madzanadzana leyi a dzri kumeka ka yone a matsralweni ya ku sungula nakone a ku boxiwanga mavito ya lava kumekiki ka ntlawa lowu ndzruluteliki Bibele ledzro.

•   Dzri ba kone. A hi mabibele hinkwawu ma ndzruluteliki a dzrungula dzra Bibele hi lani a dzri tsraliwe ha kone a ku sunguleni. Hi xikombiso, Bibele dzrin’wana dzri ndzrulutele tsralwa dzra Matewu 27:40 hi ndlela leyi: ‘Loko u li N’wana wa Xikwembu Nkulukumba xika xihambanwini.’ Kambe, zritu ledzri tizrisiwiki ka matsralwa ya ku sungula hi ledzri liki “mhandzri”. Kumbexana vandzruluteli va tizrise zritu ledzri liki xihambano hi leswi a va pfumela leswaku Yesu a fele xihambanwini, kambe mhaka yoleyo a yi seketeliwanga Bibeleni. Xileswo, a Tradução do Novo Mundo dzri hlayekisa xileswi: “Loko u li n’wana wa Xikwembu Nkulukumba, xika a mhandzrini ya nxanisa.”

•   Ku twisiseka. A wundzruluteli lebyinene a byi fanelanga byi ba kone ntsena kambe byi fanela ku tlhela byi twisiseka hi ku nabyala. Vona xikombiso xa swone. Ka Ba-le-Roma 12:11, mupostola Pawulo a tizrise xiga lexi loko xi ndzruluteliwa zritu ni zritu xi hlayaka leswaku “ku bila ka moya”. Swanga hi leswi xiga lexi xi kazrataka ku xi twisisa, Tradução do Novo Mundo dzri ndzrulutela ndzrimana leyo hi ndlela ya ku nabyala ku yi twisisa. Dzri hlaya leswaku vakriste va fanela ‘ku pfuzra a moyeni’.

 Handle ka kuva Tradução do Novo Mundo dzri tizrisa vito dzra Xikwembu Nkulukumba, dzri ba kone dzri tlhela dzri twisiseka, ku ni ntxhumu wumbeni lowu dzri yentxaka dzri hambana ni mabibele laman’wana: Dzri nyikiwa vhanu mahala. Xileswo, vhanu va ntsrandzravahlayi va kota ku dzri dondzra hi lidzrimi dzravu, ku patsra ni swisiwana leswi a swi nge ti swi kota ku dzri xava.