Swanga Timboni ta Yehovha, hi tikazratela ku pfuna mindangu yezru ni ya vambeni akuva yi va ni wumun’we. Hine hi hlonipha Xikwembu Nkulukumba swanga muvumbi wa mindangu. (Genesis 2:21-24; Ba-le-Efesa 3:14, 15) A Bibeleni, Yehovha a dondzrisa minsinya ya milawu leyi pfuniki vhanu va misava hinkwayu akuva va va ni wukati lebyi humelelaka ni lebyi nyonxisaka.

 Hi tikazratela ku landzra a swilayu leswi nga Bibeleni hikusa swi hi pfuna ku va vanuna, vasati ni vapswele lavanene (Amaproverbia 31:10-31; Ba-le-Efesa 5:22–6:4; 1 Timoteo 5:8) A wutlhazri lebyi nga Bibeleni byi nga pfuna nambi swizro swa mindangu leswi nga ni wukhongoti lebyi hambaniki. (1 Petros 3:1, 2) Twana leswi vambeni va swi hlayiki loko vakatavu va ve Timboni ta Yehovha:

•   “Ka 6 wa malembe ya ku sungula ka mutxhatu wezru, a hi tsrhamela ku holova ni ku danisana. Ntsrhaku ka ku va Ivete a ve Mboni ya Yehovha, ni kokiwe hi ku lehisa mbilu ni ku titsrongahata kwake ka lizrandzru. A ku txintxa loko a ku yentxiki ku huluxe wukati byezru.”—Clauir, wa Brazil

•   “Ni lwisane ni nkatanga Chansa loko a sungula a ku dondzra Bibele ni Timboni ta Yehovha hikusa a ni pimisa leswaku ti hohlota mindangu, kambe hi ntiyiso wa kone na swi vona leswaku Bibele dzri pfune a wukati byezru.”—Agness, wa le Zâmbia.

 A ntizrweni wezru wa ku zrezra hi komba hinkwavu leswaku a ku tizrisa leswi Bibele dzri swi hlayaka swa hi pfuna

•   Ku hlawula lweyi hi fanelaka ku txhata na yene

•   Ku hlula swihinga swa lembe dzra ku sungula dzra mutxhatu

•   Ku hanyisana ni vingi

•   Ku tizrisa mali hi ndlela leyinene

•   Ku lulamisa timholova a wukatini

•   Ku dondzra ku dzrivalela

•   Ku dondzrisa vana

 Ina, swi nga ti vanga hi minkama yimbeni. Hi xikombiso, hi 1998 a instituto de pesquisas Sofres xi kambisisi wukati lebyi mun’we ntsena ka vatekani a viki Mboni ya Yehovha. A wukambisisi byi paluxe leswaku ka 20 wa mitxhatu, wun’we wu ve ni swikazratu leswikulu.

 Yesu a profete leswaku lava landzraka tidondzro take minkama yimbeni a va ta tlhangavetana ni swikazratu a ndangwini. (Matewu 10:32-36) N’wamatimu lweyi va liki i Will Durant, a xiye leswaku hi nkama wa mfumu lowukulu wa Roma, “wukhongoti bya wukriste a byi lumbetiwa leswaku byi hahlula mindangu.” * Namunhla Timboni ta Yehovha timbeni ti lumbetiwa hi ndlela leyi fanaka. Xana ha kunene hi lweyi wa Mboni ya Yehovha a byalaka a ku yavana?

 Loko Tribunal Europeu dos Direitos do Homem dzri yiseliwa mhaka ya ku lumbetiwa ka Timboni ta Yehovha ka leswaku ti hohlota mindangu, dzri hlaye leswaku swizro swa ndangu leswi nga liki Timboni ta Yehovha hakanyingi hi swone swi byalaka dzolonga hi ku yala “ku pfumela ni ku hlonipha a ntsrhunxeko lowu xizro xa ndangu xi nga na wone wa ku tihlawulela wukhongoti bya xone”. A tribunali dzri tlhele dzri ku: “A mhaka leyi yi tolovelekile ka mitxhatu hinkwayu leyi vatekani va kone va ngeke ka wukhongoti bya byin’we, na tone a Timboni ta Yehovha ta khumbeka a mhakeni leyi.” * Nambi loko va xanisiwa hi mhaka ya wukhongoti byavu va khomelela ka milawu ya Bibele: ‘N’wi nga tlheliseleni a mhunu a wubihi hi wubihi. . . .Loko fanga na swi nga koteka, ni laha n’wi nga pfaka ku n’wine, vanani ni ku zrula ni vhanu hinkwavu.’—Ba-le Roma 12:17, 18

 Timboni ta Yehovha ti landzra a xilayu lexi nga Bibeleni xa ku tekana ka tone ku va ‘ntsena Hosini’ kumbe ku txhata ni mhunu leyi a nga wa wukhongoti bya tone. (1 Ba-le Korinte 7:39) Ni namunhla nawu lowu wa ha tizra. Hi xikombiso, nhlokomhaka ya Journal of Marriage and Family hi 2010 yi te” vatekani lava nga ka wukhongoti bya byin’we, lava yentxaka mintxhumu xikan’we va tlhela va kholwa ka swo swa swin’we’’, minkama yinyingi wukati byavu byi va lebyi nyonxisaka. *

 Hi tlhelo dzrimbeni, a Timboni a ti kutxi mhunu ku ntsrikana kumbe ku hambana ni nkatake lwa nga liki Mboni ya Yehovha. A Bibele dzri li: ‘Kambe loko ve van’wana, ndzra va byela, mine, yi nge Hosi, dzri li: Loko mun’we makwezru e ni nsati lweyi a nga pfumelangakiki, loko nsati lweyo a swi zrandzra ku tsrhama naye, a nga mu tsrhiki. Ni wansati lwa nga ni nuna lwa nga pfumelangakiki, loko nuna a swi zrandzra ku ntsrhama na ye, a nga mu ntsriki.’ (1  Ba-le Korinte 7:12, 13) Timboni ta Yehovha ta wu hlonipha nawu lowu.