Hine swanga Timboni ta Yehovha, hi tikazratela ku hanya hi ku fambisana ni leswi Yesu a swi dondzrisiki nakone swi yentxiwiki hi vapostola. Nhlokomhaka leyi yi katsrakanya leswi hi swi kholwaka.

1.   Xikwembu Nkulukumba. Hi gandzrela Xikwembu Nkulukumba mun’we wa Ntamu Hinkwawu, lweyi nga Muvumbi nakone vito dzrake i Yehovha. (Amapsalma 83:18; Apfuletelo 4:11) Yene i Xikwembu Nkulukumba wa Abrahamu, Moxe na Yesu.—Eksoda 3:6; 32:11; Yohan 20:17.

2.   Bibele. Hi kholwa leswaku Bibele i dzrungula ledzri pfaka ka Xikwembu Nkulukumba. (Yohan 17:17; 2 Timoteo 3:16) Leswi hi swi kholwaka swi tiseketele ka 66 wa mabuku hinkwawu ya Bibele, lama patsraka “Testamente dzra Khale” and ni “Testamente Ledzrimpswha.” Prisori Jason D. BeDuhn, a hlaye leswaku hi ku khanya leswaku Timboni ta Yehovha ti seketele leswi ti kholwaka ka swone ni leswi ti swi yentxaka a Bibeleni na ti nga dzringisi ku tsrimba leswi a dzri fanela ku swi hlaya.” *

    Leswi hi kholwaka ka Bibele hinkwadzru, a swi hlayi swone leswaku hi va-fundamentalista. Ha swi twisisa leswaku swiyenge swin’wana swa Bibele swi tizrisa mavulavulela ya ku fanekisela nakone a swi fanelanga swi twisisiwa hi ku kongoma.—Apfuletelo 1:1.

3.   Yesu. Hi landzra leswi Yesu a swi dondzrisiki hi tlhela hi yetisela xikombiso xake. Nakone hi mu teka swanga Muhuluxi wezru ni N’wana wa Xikwembu Nkulukumba. (Matewu 20:28; Amintiṛo 5:31) Xileswo, hi vakriste. (Amintiṛo 11:26) Kambe hi dondzra a Bibeleni leswaku Yesu a hi Xikwembu Nkulukumba wa Ntamu Hinkwawu, hi mahlayela man’wana, Bibele a dzri seketeli dondzro ya Trindadi.—Yohan 14:28.

4.   Mfumu wa Xikwembu Nkulukumba. A hi ntxhumu lowu nga timbilwini ta vakriste, kambe i mfumu lowu nga matilweni. Mfumu lowu wu ta helisa mimfumu hinkwayu ya vhanu nakone wu ta hetisisa leswi Xikwembu Nkulukumba a a swi djula hi misava. (Daniel 2:44; Matewu 6:9, 10) Leswo swi ta yentxeka ku nga li khale, hikusa Bibele dzri li hi hanya “a masikwini ya vugamu.’—2 Timoteo 3:1-5; Matewu 24:3-14.

    Yesu i Hosi ya Mfumu wa Xikwembu Nkulukumba. Yene a sungule ku fuma 1914.—Apfuletelo 11:15.

5.   Ku huluxiwa. Gandzrelo dzra xitizrulo xa Yesu dzri hi pfumelela kuva hi ntsrhunxiwa ka xidoho no lifu. (Matewu 20:28; Amintiṛo 4:12) Akuva a kuma leswo, mhunu a fanela ku pfumela ka Yesu Kriste, a txintxa wutomi byake a tlhela a babatisiwa. (Matewu 28:19, 20; Yohan 3:16; Amintiṛo 3:19, 20) Leswi mhunu lweyo a swi yentxaka swi kombisa leswaku a ni lipfumelo. (Yakob 2:24, 26) Kambi a ku huluxiwa a ku nge xaviwi, mhunu a ku kuma ntsena hi kola ka ‘timpswalu ta Xikwembu Nkulukumba’.—Ba-le-Galatia 2:16, 21.

6.   Matilo. Yehovha Xikwembu Nkulukumba. Yesu Kriste ni tintsrumi leti dumbekaka va tsrama a matilweni. * (Amapsalma 103:19-21; Amintiṛo 7:55) Vhanu lava tlhasaka 144.000 va ta pfuxiwa akuva va ya matilweni va ya fuma na Yesu Kriste a Mfun’wini wake.—Daniel 7:27; 2 Timoteo 2:12; Apfuletelo 5:9, 10; 14:1, 3.

7.   Misava. Xikwembu Nkulukumba a vumbe misava akuva vhanu va tsrhama ka yone hi lani ku nga helikiki. (Amapsalma 104:5; 115:16; Eklesiasta 1:4) Xikwembu Nkulukumba a ta tovokisa vhanu lava yingisetaka hi ku va nyika lihanyu lebyi hetisekiki ni wutomi bya hi lani ku nga helikiki a paradeyisini kola misaveni.—Amapsalma 37:11, 34.

8.   Wubihi ni ku xaniseka. Loko yin’we ya tintsrumi ta Xikwembu Nkulukuba yi xandzrukile, ku sungule wubihi ni ku xaniseka a misaveni. (Yohan 8: 44) Ntsrhaku ka ku xandzruka, ntsrumi leyo yi yamukele vito dzra Sathana Diyavulosi. Yi kutxe vatekani va ku sungula leswaku va tipatsra na yene a ku xandzrukeni kwake. Mabindzru a ma vanga manene ka vatukulu vavu. (Genesis 3: 1-6; Ba-le-Roma 5:12) Akuva a hlamula swivutiso leswi sekelekisiwiki hi Sathana, Xikwembu Nkulukumba a pfumelela ku xaniseka ni wubihi swi va kone. Kambe a nge swi pfumeleli ku dzringana nkama wunyingi.

9.   Lifu. Lava fiki a va ha li kone. (Amapsalma 146:4; Eklesiasta 9:5, 10) A va li tiheleni kumbe a infernu.

    Xikwembu Nkulukumba a ta pfuxa vhanu vanyingi. (Amintiṛo 24:15) Ntsrhaku ka ku pfuxiwa vhanu, hinkwavu lava yalaka ku yentxa ku zrandzra ka Xikwembu Nkulukumba va ta helisiwa hi lani ku nga helikiki nakone ve nge he ve ni dumbo dzra ku tlhela va hanya.—Apfuletelo 20:14, 15.

10.   Ndangu. Hi landzra leswi Xikwembu Nkulukumba a swi hlayaka mayelanu ni mutxhatu, leswaku wanuna ni wansati va fanela ku txhata xikwa’we. Vhanu vo ngo divorsiyara ntsena loko mun’we wavu a yentxe swa tingana hi tlhelo dzra tinkuku.—Ba-le-Efesa 5:22–6:1.

11.   Wugandzrei byezru. A hi gandzreli xihambanu kumbe xithombe xin’wana ni xin’wana. (Deuteronoma 4:15-19; 1 Yohan 5:21) Xiya leswi wugandzreli byezru byi patsraka swone:

    •   Ku khongota ka Xikwembu Nkulukumba.—Ba-le-Filipi 4:6.

    •   Ku dondzra ni ku kambisisa Bibele.—Amapsalma 1:1-3.

    •   Ku yanakanyisisa hi leswi hi swi dondzraka a Bibeleni.—Amapsalma 77:12.

    •   Ku tlhangana akuva hi khongota, hi dondzra Bibele, hi yimbelela, hi khanela hi leswi hi swi kholwaka ni ku tiyisa vamakwezru.—Ba-le-Kolosa 3:16; Ba-Heberu 10:23-25.

    •   Ku zrezra “madzrungula lamanene ya Mfumu”.—Matewu 24:14.

    •   Ku pfuna lava kumanaka ni swikazratu.—Yakob 2:14-17.

    •   Ku yaka ni ku lunghisa Tiyindlu ta Wugandzreli ni mimbangu yimbeni leyi tizrisiwaka akuva ku dodzriwa Bibele.—Amapsalma 127:1.

    •   Ku pfuna lava weliwaka hi timhangu ta tumbuluku.—Amintiṛo 11:27-30.

12.   Nhlengeletanu yezru. Hi yaveliwe hi mabandla, nakone bandla dzrin’wana ni dzrin’wana dzri ni vakulu. A va holi nakone a va lumbi ntlawa wa ku hlawuleka. (Matewu 10:8; 23:8) A hi hakelisi swa wukhumi nakone a hi fambisi swiparatwana a mintlhanganwini yezru. (2 Ba-le-Korinte 9:7) Mintizro yezru yi seketeliwa hi minyikelo ya ku tizrandzrela leyi mhunu a yi yentxaka a xihundleni.

     Ntlawa wutsrongo wa vakriste lava wupfiki, ku nga Huvo leyi Zrangelaka, wu hi nyika minkongomiso ku sukela a ntsindzra wa misava hinkwayu akuva wu ya ka Timboni ta Yehovha a misaveni hinkwayu.—Matewu 24:45.

13.   Wumun’we byezru. Timboni ta Yehovha ta misava hinkwayu ti kholwa mintxhumu yoleyi ya yin’we. (1 Ba-le-Korinte 1:10) Nakone hi tikazratela ku va hi nga ve ni xihlawuhlawu hi leswi mhunu a nganyiki kumbe a nga xisiwana, a li wa mbangu wumbeni kumbe a li wa muhlovo wumbeni. (Amintiṛo 10:34, 35; Yakob 2:4) Hi ni ntsrhunxeko wa ku titekela swiboho hi ku ya hi lipfalu ledzri leteliwiki hi Bibele.—Ba-le-Roma 14:1-4; Ba-Heberu 5:14.

14.   Mahanyela yezru. Hi tikazratela kuva hi nga tipimiseli hini vinyi, kambe hi kombisa lizrandzru ka mintxhumu hinkwayu. (Yohan 13:34, 35) A hi yentxi mintxhumu leyi khunguvanyisaka Xikwembu Nkulukumba, ku patsra ni ku tizrisa ngati ka wudahu. (Amintiṛo 15:28, 29; Ba-le-Galatia 5:19-21) Hi zrandzra ku zrula nakone a hi tingheniseli ka tihimpi. (Matewu 5:9; Ezaya 2:4) Hi hlonipha milawu ya tiko loko yi nga lwisani ni milawu ya Xikwembu Nkulukumba.—Matewu 22:21; Amintiṛo 5:29.

15.   Ndlela leyi hi hanyisanaka ha yone ni van’wana. Yesu a hi zrume leswi: “U fanela ku zrandzra vhanu van’wana hi ndlela leyi u tizrandzraka ha yone”. A hlaye leswaku vakriste ‘a hi va misava’. (Matewu 22:39; Yohan 17:16) Nambileswi hi nga tekiki tlhelo ka timhaka ka politika, nakone hi nga timpatsriki ni mintlawa yin’wana ya wukhongoti, hi tikazratela ku ‘yentxela leswinene hinkwavu’. (Ba-le-Galatia 6:10; 2 Ba-le-Korinte 6:14) Kambe ha swi hlonipha swiboho leswi van’wana va swi tekaka a mhakeni leyi.—Ba-le-Roma 14:12.

 Loko u ni xivutiso mayelanu ni leswi Timboni ta Yehovha ti swi kholwaka u nga dondzra mayelanu na hine ka pajina dzrezru, u pfuxela dzrin’we dzra mazrwavi yezru, u hlalela yin’we ya mintlhanganu yezru kusuhi ni lomu u tsrhamaka kone kumbe u khanela ni Mboni ya Yehovha leyi tsrhamaka a mugangeni waku.