‘E VẠHIAG ne pel mamạrut ne sok é hanuet ne noh hạipeluga, äf his ‘e iris hạian ma lä’riri‘ ne kat hạipeluạg ra, ka al‘ȧk vạhia, ma iris ‘i fạm tạunȧ‘ ‘e ta teluạ ti‘ut ne kạl se ma ‘e faki‘oag ma‘oi. ‘E ta faki‘oag het ma ka fȧ‘ sio: “ Hün se teset?” ‘E av ‘e ‘on rerege iạ sạio‘ a‘rū huạg pạu hete‘. Famori sạio‘ te‘i ‘e reko rū ne ‘oris huga ‘e av ne pelu, pefä‘e, ‘af‘afa, ne kaofoho, al‘ȧk ‘oris kạinag ne kạumane‘ag ne iris hanis sin ka iris kat re ra ta te sarat, mane‘ȧk ‘oris ri nohoga, ma hö‘ kokon ma noanoa titi‘ se ‘oris mạuri. Iris pa ‘inea‘ia ne hün se teset tä pefä‘ tape‘ ta sok se irisa.

² Hün se teset tä ‘Ạitu va‘ön‘ȧk te a‘rū la soko e? Ma kepoi ka Jihova ‘Ạitu iạ ne ‘atakoa sema ‘on ne‘ne‘i, ka mäeav hanis, ka pot, ma puer nonoj, ma po ‘e tes tä hạifiriga ma puer se nonojo fuạmamạu ‘e rȧnte‘? Ka tei ka ‘äe tape‘ma a‘mou a‘a‘häe‘ȧk kạinag te ‘i?

³ Ka tei ka iạ te se nonojot la ‘is la sạio‘kia ‘on hün ne ‘Ạitu fue‘ la te a‘rū ‘i la soko e? Lelea‘ ‘e ‘on rerege a‘häe ne ‘e av ne iris na sạio‘ tape‘ ta ma ‘on fuạga, ‘oris pilifi mea‘mea‘ia ne iris kat ‘e‘ȧk ra ‘Ạitu. ‘E avat ne ‘is hat se Puk Ha‘a, ‘is la pola räe ne famör ne huạg aire ka fea se ‘Ạitu, iris tape‘ma na kạinag sạio‘ tape‘ ta. La fakse, parofiạt ta Hapakuki ne sạio‘ se Jihova: “Ka tei ‘on fuạg ne ‘äe rē e la gou la räe se tē tape‘ te‘is? Ka ‘äe vahia tapen la röt‘ạkia ‘ou kelkel se ag sirsir ‘i? Ko a‘raksa‘ạkiga ma ag rạhrạhi noh kạlua gou, ka tape‘ma hạipeluga ma uake täe ‘e te‘ ne utu?”—Hapakuki 1:3.

⁴ Tei ka Jihova fạria parofiạt huạg aier te‘ Hapakuki ‘e reko ‘on sạio‘ te? ‘Igke‘. Te‘is te ne soko, ‘Ạitu a‘hele‘ua fäeag ‘on Hapakuki la fȧ‘ se Puk Ha‘a. ‘Ạitu hạiasoagan iạ la pola taf‘ia se te ne soksoko. Jihova pa ‘es la ‘äe la re la fakma sin. A‘häe‘ȧk, Puk Ha‘a rak‘ȧk ne “ia noh a‘häe se ‘ausag.” (1 Pita 5:7) Ti‘ se‘ fesia‘ ‘on ‘Ạitu se te mam‘asa ma tē ne hö‘ rū, ‘e ta famorit. (Aisea 55:8, 9) Ka hün se teset tä te a‘rū fuạmamạu ‘e rȧnte‘?

HÜN NE TE A‘RŪ FUẠMAMẠU?

⁵ Famör ne rot tūtū la‘ se ‘oris lelea‘ muạ‘ȧk rotu ma famör rak‘ȧk te la sại‘oa ne hün se teset tä te a‘rū fuạmamạu.‘E av ma‘oi, ‘oris togi ‘ea ne mamauạ te‘is ‘amnȧk ‘on ‘Ạitu ma iạ fu‘ȧk vạhia ‘e av roat ne öf se‘, te ne la sok ‘e ‘on fakmuri, ma tape‘ma se te mamạr titi‘ ne soksoko. Te‘is te ne iris rak‘ȧk se famori, ne ‘Ạitu garue ‘e sal ‘oroi ma iạ tä ho‘am ala se famori—ma tape‘ma se lä‘riri‘i—la pola iris la noh ma iạ ‘e hevạni. La fakma ne ‘äe rak vạhia, ne Jihova ‘Ạitu kat a‘hele‘ua ra ta tē raksa‘at. Puk Ha‘a ‘ea tape‘: “Iạ sousou ‘e ‘Ạit aier ta la re‘ia ag mam‘asa, ma ‘Ạitut ne ‘atakoa se ma ‘on ne‘ne‘i la re‘ia ag siri!”—Jope 34:10, NW.

⁶ Tei ka ‘äe ‘inea ne hün se tese tä iạ te se nonojot famori ‘oris keuạg ne sar ta se ‘Ạitu ‘e reko te a‘rū ‘atakoa ne soksok ‘e rȧnte‘? ‘E te ma‘oi ne soko, iris keu sar ta se ‘Ạitut ne Purere po ‘e iris a‘häe ne iạ ta puer aier se rȧnte‘. Iris kat ‘inea ra puer‘ȧk te ‘es‘aot ka vavhiạn ne Puk Ha‘a rak‘ạki. ‘Äe rak vạhiạ airet ne täe ‘e Väe 3 ne puk hete‘is. Iạ ne puer aier se rȧnte‘is ta Satan ta ka Tiapol ta.

⁷ Puk Ha‘a rak‘ȧk a‘taf pạu: “Ka rȧn te‘ ‘atakoa täe ‘e ia ne raksa‘a.” (1 Jone 5:19) ‘E avat ne ‘äe a‘häe se te te‘, tei ka iạ ‘es fuạg? Rȧnte‘ kel‘ạkia ag ‘on iạ te mạurit ne ‘is kat po ra la räe sin “ia ne hoa‘ sesean te‘ ne hanuạ ‘atakoa.” (Kel‘ȧk Tē 12:9) Iạ tä Satan ta ne hö‘ hạifiriga, ag rosrosi, ma ag mam‘asa. Ma rȧnte‘ ne täe ‘e ‘on fȧn pure, hoi sema ‘e hạifiriga, rosrosi, ma te mam‘asa. Ta‘ag hün het ne te a‘rū ti‘ pạu.

⁸ ‘On ruạ ne tēet ne kel‘ạkia hün het ne ‘is agtạu ma te a‘rū ne hạifäegag vȧh ‘e Väe 3 ta, famori kat ‘atakoa ra ma agraksa‘a kamata ma ‘e avat ne hạiagạiag ta re ‘e veko te ‘Iteni. Famör agraksa‘a kop ma fe‘en‘ȧk ‘e pa ‘ese la po fūag lamlama ma pelu hele‘ la fup, ag ne‘ne‘i, ma noh rū. (Le‘ Marag ta 4:1; 8:9) ‘On fol ne tēet ne kel‘ạkia hün het ne ‘is agtạu ma te a‘rū ta “ava ma tē ne kat ‘amnȧk‘ȧk ra la soko,” (Le‘ Marag ta 9:11, NW) Ma ‘e rạnit ne Jihova tokana ‘e Puer ma matạ‘ sin, famori la agtạu ma te a‘rū ‘e reko iris täe ‘e utut ma av het ne kat hạitạuag ra la ‘e täe.

⁹ Iạ te fürmariet se ‘isa la ‘inea ne ‘Ạitu kat ho‘am ra te a‘rū. ‘Eake iạ tä fup‘ạkim pelu, kao foho, ag ne‘ne‘i, ma lȧg hạ‘i, hoi, ne re famori la agtạu ma te a‘rū. Ka ‘is kop la ‘inea, hün ne Jihova va‘ön‘ạkie te a‘rū la soko? Kepoi ka iạ ‘Atakoa se ma ‘on ne‘ne‘i, ma iạ po sema la fu‘ạkia te ‘i. Hün se teset iạ kat fu‘ạkia ra te ‘i la se sok? ‘Ạit mäeav hanisit ne ‘is ‘inea ma ‘on hün lelei het.—1 Jone 4:8.

FAKMEREA ‘ON REPURE

¹⁰ La inea‘ia ‘e reko teset ‘Ạitu va‘ön‘ȧk te a‘rū la soko, ‘is la re a‘häe hö‘ se avat ne te a‘rū kamata e ‘e ‘on kamataga. ‘E avat ne Satan ta re ‘Atama ma ‘Ive la toa‘noa se Jihova, sạio‘ ‘es‘ao het tä fup‘ȧk sio. Satan ta kat agại ra ne‘ne‘ ‘on Jihova. Satan ta ‘inea ne ne‘ne‘ ‘on Jihova ‘atakoa ma kat ‘es tohiget ra. Satan ta fakmerea nonoj la puer ‘on Jihova. Iạ ‘ea ne ‘Ạitu siok, ma kat na ra te lelei se ‘on famori. Satan ta agại ma ‘ea ne Jihova Iạ puer raksa‘at. (Kamataga 3:2-5) Satan ta ‘ea ne famori la pola noh lelei, ka ‘eake kop la ‘e fȧn puer ‘on ‘Ạitu. Fäeag te‘ fakmerea puer purer ‘on Jihova, ‘on nonoj la pure.

¹¹ ‘Atama ma ‘Ive agạia Jihova. ‘On aire, iria ‘eag: ‘Eake kop la Jihova la puer se ‘ạmiar. ‘Ạmiar la pola re puer la‘ ma ‘e ‘ạmiar tēet ne nonojo ma te se nonoj ta.” Ka Jihova la a‘lelei tapen sūsū heta‘ag? Ka iạ la po tapen la rak‘ạkia se te‘ ne te maür ‘inea te, ne iriạ ne agại te ta siri, ka ‘on sala ta nonoj aire? Le‘et la ‘ea ne ‘Ạitu tạu la a‘raksa‘ȧk pạua iris ne agại ma kamat fo‘ou. Ka Jihova rak‘ȧk vahiạ ‘on ‘amnạki la rȧnte‘ la huȧ‘ ‘e tör ‘on ‘Atama ma ‘Ive, ma iạ pa ‘es la iris la noh ‘e parataisit ‘e rȧnte‘. (Kamataga 1:28) Jihova a‘sok ma kikia ‘on ‘amnạki. (Aisea 55:10, 11) Te hoi‘ạkit, ‘ut‘ạkiag ne iris ne agại te ‘e veko te ‘Iteni kal pora la togia sạio‘ het ne fup‘ȧk ‘e reko puer nonoj ‘on Jihova.

¹² ‘Is la re a‘häe se a‘tatạu‘ạkiag hete‘. Ma ‘on famör re rakot rak‘ạkia se ‘on lä‘riri‘ rako ta sal het ne la pola togia sạio‘ noanoa het. Ka ma ‘on le‘ ‘inea te het ne vahia uạke ‘ea ne sal het ne famör re rak ta ho‘am kat noj ra. ‘On fuạga le’ heta ‘ea ne famör re rak ta kat potsusun ra. Le‘ heta ‘ea ne iạ ‘inea ta sal het ne lelei se‘ la po‘ia tög noj heta. Lä‘riri‘ rak ‘e ‘on rerege a‘häe ne iạ ta nojo ma kạu ke ma iạ. Ma tes tä la famör re rak ta la re? Nono ka iạ la hot‘ȧk le‘ heta ‘e kilas ta, ma tes tä lä‘riri‘ ne tore la ‘ea? Ka tei ka iris kal a‘häe ra ne le‘ ‘inea te heta ma iris ne kạu ma ia tä nojo. Ma kop ma lä‘riri‘ ne tör sio ‘e kilas ta la toak ‘e ‘e‘ȧk ne famör re rak ta ma iris la a‘häe ne famör re rak ta la fea‘ȧk ne la räe ne iạ tä siri. Ka tapen nono ka famör re rak ta la na la le‘ het ne agạia iạ la a‘nojoa te noanoa heta?

¹³ Jihova re‘ia ma te ‘eseat ne le‘ rak‘ȧk te ta re. A‘häe‘ȧk iris ne agại ‘e ‘Iteni ‘eake iris ‘esea ta ‘inea te ne soko. ‘Ager miliön hisag hul täe ‘io‘iom. (Jope 38:7; Taniela 7:10) Ka te ne Jihova la re se iris ne agại la täe a‘ti‘ se iris ager ‘atakoa ma la täe tape‘ma se te‘ ne te ‘inea te ‘atakoa ne iạ fup‘ạki. Ka, tes tä Jihova re vạhia? Iạ fue‘ Satana la kel‘ȧk ne tapen ‘on pure se famori. ‘Ạitu fue‘ tape‘ma famori la puer se irisa ‘e fȧn puer ‘on Satan ta.

¹⁴ Le‘ rak‘ȧk te ta ne fäeag a‘tatạu‘ȧk se‘, ‘inea ne le‘et ne agạia iạ ma iris ne teag‘esea ma le‘ rak heta kat noj ra. Ka iạ ‘inea tape‘ma ne ‘on fue‘iạg ne iris la kel‘ạkia tē ne iris ‘ea noj ne ‘igke‘, la pola ‘es‘ao se te‘ ne iris ‘atakoa ne täe ‘e kilas ta. Avat ne iris ne agại kat pora la a‘sok te ne iris ‘ea, te‘ ne lä‘riri‘ ne huạg aire räe ne le‘ rak‘ȧk te ta noj la fu se fūạg het ne la muạ‘ạkia kilas ta. Täla taf‘ia se irisa ‘on hün het ne le‘ rak‘ȧk te ta täla ‘ut‘ạki e le‘ het ma ne agại te ‘e kilas ta ‘e ‘on fakmuri. La fakma sin, Jihova ‘inea ne la ‘es‘ao se te‘ ne famör ne huạg aire ma ‘agero ‘e avat ne iris räe e ne Satan ta ma te‘ ne iris ne teag‘esea ma iạ kal pora la puer se irisag. La fakse Jeremaia ‘e ‘on mumua, iris täla rakoa aier pumuạ teis: “Ko Tēgagatei, [Jihova] gou ‘inea ne kat ‘es le‘et ra puer se ‘on a‘ofiag heta; ma kat ‘es le‘et ra pō, la muạ‘ạkia ‘on lala‘o.”—Jeremaia 10:23, NW.

HÜN NE FUE‘ ROA E?

¹⁵ Ka hün se teset tä, Jihova fue‘ la te a‘rū la sok ‘e laloag ne ta av roat? Ma po ‘e teset ta iạ kat fu‘ạkia te raksa‘a la se sok? Sạkior se te ruạ ne le‘ rak‘ȧk te ta kat re‘ia ra ne fäeag a‘tatạu‘ak heta kel‘ạki. ‘On ta, iạ kat fu‘ạkia ra le‘ agại te heta la rak‘ạkia ‘on ‘inea. ‘On rue, le‘ rak‘ȧk te ta kat hạiasoag ra le‘et ne agạia iạ ‘e reko ‘on ‘inea. La fakma sin, sakior se te ruạ ne Jihova ‘amnȧk‘ȧk la se re‘ia. ‘On tā, ia kat fu‘ạkia ra Satan ta ma iris ne teag‘esea ma iạ la aier‘ạkia te ne iris fup‘ạki tä nojo. Ma ‘e ‘on va‘ön‘ạkiag ne ta av roat la siriag iạ te‘es‘ao pạut. ‘E laloag ne fạu äf his ne rogrog ‘on famori, famori ȧs‘ȧk vạhia te‘ ne kạinag puer fakfamori ma puer fakmatantu. Pot fakfamori ‘ut se muạ ‘e te ma‘oi , ka ag se nonojo, keia, kao foho ma pelu ‘ut se muạ ‘on raksa‘a. Puer fakfamori kel‘ȧk ‘e ‘on ‘i‘i ne famori kal pora la puer se irisa.

¹⁶ ‘On rue, Jihova kat hạiasoag ra Satan ta ‘e ‘on puret se rȧnte‘. Ma kepoi ka ‘Ạitu la a‘öf kaofoho, ma tei ka iạ kal kel‘ȧk ra ne iạ kạu‘ȧk te ne iris ne agại re? Ka tei ka ‘Ạitu kal re ra famori la a‘häe ne kop ma famori la po sema la puer se irisa ma kal agtạu ra ma te raksa‘a? Ma kepoi ka Jihova la garue‘ȧk sal he ta‘ag, ma iạ hele‘ la te ag‘esea ma siok ta. Ko ‘äna, “kat pō ra la ‘Ạitu la siko e.”—Hiperiu 6:18.

¹⁷ Ka, tapen se te‘ ne te mane‘ȧk ‘atakoa ne sok vạhia ‘e laloag ne av roat ne agại re se ‘Ạitu? ‘Is la a‘häe‘ȧk ne Jihova iạ tä ‘atakoa sema ‘on ne‘ne‘i. Ta ‘on‘on, iạ la pola ‘ut‘ạkia te a‘rū ne sok se maür ‘on famori. La fakma ne ‘is rak vạhia, rạnit ne a‘raksa‘ȧk vạhia täla a‘lelei ma la für la parataisit. ‘E reko ‘os pilifit se rạu‘if ‘on Jisu, te ne agraksa‘a ho‘am täla ‘ut‘ạkia ma pefä‘ ne ala ho‘am täla a‘öf pạu ‘e fu hoi‘ạkiag ta. ‘Ạitu täla a‘es‘ao‘ạkia Jisu “la huạr‘ạkia te‘ ne garue ‘on tiapol ta.” (1 Jone 3:8) Jihova täla a‘sokoa te‘ ne te ‘atakoa ‘i ‘e ‘on av pạu heta. ‘Is ạlạlum ne Jihova kat a‘sokoa ra te ‘i ‘e avat ne ofiofua ‘e reko ‘on vahiạ la röt‘ȧk te ma iạ na av se ‘isa la rakoa aier ta ma agag se iag. (2 Pita 3:9, 10) ‘Is räe ne ‘Ạitu aoaoa iris ne pa agag aier se iag ma hạiasoag tape‘ma se iris la vahia la röt‘ạkia te‘ ne te a‘rū ne sok se iris ‘e rȧn noanoa te‘.—Jone 4:23; 1 Korinita 10:13.

¹⁸ Ka iris ‘e ‘on rerege a‘häe ne ‘Ạitu po sema la fu‘ạkia te‘ ne te a‘rū kepoi ka ia ‘Ạitu fup‘ȧk ‘Atama ma ‘Ive ‘e kạinag salat ne iria kal pora la agại iạ? La togia sạio‘ heta, ‘is kop la a‘häe‘ȧk se tefakhanis pumuet ne Jihova na vạhia se ‘isa.

‘ÄE LA A‘ES‘AO‘ȦK TAPEN TEFAKHANISIT NE ‘ẠITU NA?

¹⁹ La fakma ne rak vạhia ‘e Väe 5 ta, famori fup‘ȧk vạhia la iris la pola hil te. Tei ka ‘äe ‘inea ne te ta‘ag, iạ tefakhanis pumuet? ‘Ạitu fup‘ȧk se‘ mạnmạnu ma na se irisa kạinag rērē het, ma iris kal pora la re a‘häe ne hil te fakse ‘is famori. (Fäeag ‘Es Fuạga 30:24) Famör rak lamlama fup‘ạkia misin ne ȧr se famori [robots] ne fu‘ȧk a‘vȧh la tạupir se te‘ ne fäeag fas‘ạki. Tei ka ‘is la ‘oaf la ‘Ạitu la fup‘ȧk ‘is la fakse te ‘og? ‘Igke‘, ‘is ‘oaf ne ‘is pola hil te ne ‘äe la kạinag famör tapenet, ma kạinag mȧür tapen het tä ‘äe ‘oaf sin, ma kạinag famör tapenet ta ‘äe la re kạumane‘ag mar, ma te his hoi‘ȧk ne tore. ‘Is ‘oaf pạu ne ‘is pola hil te ‘e ‘isa ma ‘is ‘inea ne ‘Ạitu pa ‘es la ‘is la noh ‘oaf‘oaf.

²⁰ Jihova kat ‘oaf ra se titi‘ạkiget ne re se iạ ‘e hasaga. (2 Korinita 9:7) La a‘tatạu‘ạkia: Ka tes täla a‘oaf a‘ti‘ua ö‘ruạ ‘on ta le‘et—le‘ heta ‘on ‘eag ne “gou hanis ‘e ‘äea” hün se iạ kop la ‘ea se ‘on ö‘rua, ne iạ ‘ea ‘e hanis aier ne ‘on huga? Te‘is sạio‘ ‘es‘ao het la sạkior sin, Ka ‘äe la garue‘ȧk tapen tefakhanisit ne ‘Ạitu na vạhia la ‘äe la pola hil te la‘ ma ‘e ‘äea? Satan ta, ‘Atama, ma ‘Ive kat ‘es‘ao‘ȧk a‘nonoj ra puer hanis te‘is la iris la pola hil te. Iris fạ‘ se ‘Ạitu Jihova. Tes ta ‘äe la re?

²¹ ‘Äe la po pạu la ‘es‘ao‘ạkia tefakhanis pumuet ne ‘Ạitu na, la ‘äe la hil te potsosun la‘ ma ‘e ‘äea. Ma ‘äe la pola teag‘esea ma iris miliön his ne fumou ‘e ‘oris teag‘esea ma Jihova. Iris a‘ofan ‘Ạitu ‘e reko iris ‘es väeag ‘e ‘oris aier‘ạkiag ne Satan ta sioksiok ma ‘on re pure kat lelei ra. (Fäeag ‘Es Fuạga 27:11) ‘Äe la po sema la re tape‘ ‘e ‘ou hiliạg ne sal nojot se mȧür ta. ‘Is la hạifäegag se te te‘ ‘e väet ne tohim.