A KẠINAG famör tapenet ta ‘äe la ‘oaf la hil la ‘ou kạumane‘ag het? Kop ma ‘äe la ‘oaf la kạumane‘ag ma famorit ne ‘omuạr räe tatạu, ne te ne ‘ạuạr ‘oaf la re tatạu, ma te ne ‘ạuạr ‘amnȧk‘ạki tatạu pạu. Ma taf pạu ne ‘äe la ‘oaf la hại‘eleag ma ta famör ag pumuet, la fakse iạ famör ag nonojot ka mäeav hanis.

² ‘E av roa ‘atakoat ne ofiofuạ, ‘Ạitu hil famör la ‘on kạumane‘ag ‘el pạu. La fakse, Jihova ‘ea ne ‘Eprahama ‘on kạumane‘ag het. (Aisea 41:8; Jemesa 2:23) ‘Ạitu ‘ea ne Tevita ia “fāat ne fak ma se ‘otou huga” po ‘e iạ tä kạinag famorit ne Jihova hanis sin. (Garue 13:22) Ma Jihova hat la parofiat ta Taniela la iạ “le‘ a‘pumuạ‘ạkit.”—Taniela 9:23.

³ Po ‘e tes tä Jihova hat Eprahama, Tevita, ma Taniela la ‘on kạumane‘ag? Iạ ‘ea se ‘Eprahama: “ ‘E reko ‘äe tovavhian ma se ‘otou lio.” (Kamataga 22:18) Ma täe ‘on‘on Jihova ‘ut a‘el se iris ne huạg vạivại ma re te ne iạ ‘ea la iris la re. Jihova ‘ea se famör ‘Isireli la: “‘Aus la mā se goua, la pō la gou la hele‘uetou la ‘oris ‘Ạitut, ka ‘iris la ‘otou famör.” (Jeremaia 7:23) Ma nono ka ‘äe la tovavhian se Jihova, ma ‘äe tape‘ma la hat la ‘on kạumane‘agat!

JIHOVA A‘NE‘NE‘ȦK ‘ON KẠUMANE‘AGA

⁴ Re a‘häe se ‘on ‘es‘ao ne ‘ou la kạumane‘agat ma ‘Ạitu. Puk Ha‘a ‘ea ne Jihova ao sal ma kikia “la nā ne‘ne‘ se iris ne noh aier se iag.” (2 Puk Asoat se Puk ‘on Sạu 16:9) Jihova la kel‘ȧk tapen ‘on ne‘ne‘i ‘e reko ‘äea? Sal het ho‘am ‘e Salamo 32: 8, ne ‘ea tape‘: “Gou [Jihova] täla rak‘ȧk sal se ‘äea, ma rak‘ȧk tēan ‘äe ‘e salat la ‘äe la la‘o e. Gou täla puer‘ȧk tēan ‘äe ka matạ‘ ma kikia se ‘äea.”

⁵ Ut ne puk hete‘is a‘oaf ma a‘fürmaria ‘os huga ‘e reko iạ kel‘ȧk a‘taf ne Jihova kokon‘ȧk aier ‘is! Iạ la rak‘ȧk sal ma puer‘ȧk ‘is, ma la matạ’ ma kikia se ‘isa ‘e av ne ‘is tạupir se ‘on fäega. ‘Ạitu pa ‘es la hạiasoagan ‘äe la pola ‘äe la vahia la tạria ȧsȧs ma agại ne rēem se ‘äea. (Salamo 55:22) Ma nono ka ‘äe agag se Jihova ‘e ‘ou huạg ‘atakoa, ‘äe la pola tua‘nȧk la fakse iạ ne fȧ‘ salam ta ne ‘ea: “Gou puer vạhia ‘e ‘otou huga la Jihova la ‘e ‘otou mua ‘e te‘ ne av ‘atakoa. Ma ‘e rēko ia noh ma kikia ‘e ‘otou si‘ hap ‘atmại ta, gou kal rue‘ȧk‘ia ra.” (Salamo 16:8; 63:8) ‘I, Jihova la pola hạiasoagan ‘äe la noh mȧür ‘e kạinag salat ne la a‘oaf iạ. Ka, la fakse te ne ‘äe ‘inea, ‘Ạitu ma ‘on firit ne na vahia la fu‘ȧk ‘äe la se re‘ia te te‘is.

FAKMER TE ‘ON SATAN TA

⁶Väe 11 ne puk hete‘ sui‘ạkim te ne Satan ta ka Tiapol ta re ‘e ‘on fakmer ne puer purer ‘on ‘Ạitu. Satan ta ko‘ȧk ma ‘ea ne ‘Ạitu iạ sioksiok, ma iạ ‘ea tape‘ma ne Jihova hạitauạg la fue‘ la ‘Atama ma ‘Ive la repuer ‘e iriạ ne tes tä nonojo ma tes tä kat nonojo. ‘E vạhiag ne ‘Atama ma ‘Ive toa‘noa e ma agraksa´a e se ‘Ạitu ma rȧnte‘ kamat la hoi ‘e ‘oria tore, Satan ta kamat la fakmer ‘amnȧk ‘on famör ‘atakoa. Satan ta ko‘ȧk ne “Famori kat titi‘ȧk ra se ‘Ạitu ‘e reko iris hanis aier se ia.” Satan ta ‘ea hoi‘ȧk, “Nāam ta av het se goua, ma gou la po la für le‘et ma ne gou pa furi la agạia ‘Ạitu.” Tēet ne fȧ‘ ‘e fa ag nonoj ta Jope kel‘ȧk ne Satan ta mā pạu ne iạ la pola re te te‘is, Tē ne fȧ‘ ‘e Jope, kel‘ȧk ne Satan ta aier‘ȧk pạu ne iạ la pola re te te‘is. Sei ta Jope, ma iạ hại‘umiag tapen ma fakmer te ‘on Satan ta?

⁷ Jope mȧür ‘e tekäe ‘e fạu 3,600 ne vȧh se‘. Iạ fa leleit, po ‘e Jihova ‘ea tape‘: “Ne kat ‘es le‘et ra ‘e täe fūmou se gouag, ka ag nonoj la fak se iag. Ia agag ma se goua ka matạ‘ tape‘ma ia la ia la se a‘sok ta ag se leleit.” (Jope 1:8) Jope a‘oaf ‘Ạitu.

⁸ Satan ta sạio‘ ‘e pa ‘ineat ne tes tä Jope pa po‘ia ‘e ‘on agagat se ‘Ạitu. Satan ta ‘ea se Jihova: “Ne ‘äe matạ‘ ma kikia se iag [Jope], ma ‘on kạunohoag ta ka tape‘ma se te‘ ne tē ‘atakoa ne mou se iag. ‘Äe ạlạlum‘ȧk ia ‘e te‘ ne tē ‘atakoa ne ia a‘soko ka ‘äe nā tape‘ma se ia ta ‘on hag mạnmạn rạurạu paut, ne kop ma la pō se‘ ma la a‘hoia hanuạ ‘atakoa te‘. Ka tapen se nōnō ka ‘äe la tekạiof ‘e iag te‘ ne ‘on tē ‘atakoa, ma gou a‘häe ia la fäeag ha‘ so ma ‘äe se ‘ou mafa!”—Jope 1:10, 11.

⁹ Satan ta ko‘ȧk ne Jope agag ma se ‘Ạitu ‘e reko tē ne iạ la pōom. Tiapol ta ko‘ȧk tape‘ma ne kepoi ka faksara ne ȧsȧs ne‘ne‘i la re se Jope, ma kop ma iạ la rou ‘Ạitu. Tes tä Jihova re la a‘nonojoa uạkēet ne Satan ta kamat vạhia? Ma ‘e reko hạifäegag te‘is laloag‘ạkim titi‘ạkiag ‘on Jope se Jihova, Jihova fue‘ la Satan ta la faksar Jope. ‘E sal hete‘, hanis ‘on Jope se ‘Ạitu—ne ‘on kat hanisi se ‘Ạitu—täla Jope la pola kel‘ạkia ‘e te ne iạ la re.

FAKSAR NE RE SE JOPE

¹⁰ Ma täe Satan ta faksar Jope ‘e te tutu ma‘oi pạu. Ma ‘on mạnmạnu hana‘, ma al‘ȧk. Ti‘ ne ‘on lelea‘ garue al‘ȧk. Ma Jope hele‘ la ökök ‘e te fakkoroa. Ma kat tạu ra sin, ka pefä‘ hoi‘ạkit sokoan, ma ‘on lele‘a, iris saghul ‘atakoa al ‘e ta lȧg hạ‘it. Te‘ ne te raksa‘ ‘atakoa ‘i sok se Jope “Jope ka ne ia kat a‘sokoa ra ta ag raksa‘at ne rē se‘ ta fäeag feket se ‘Ạitu.”—Jope 1:22.

¹¹ Satan ta kat na maro ra. Kop ma iạ a‘häe ne aier Jope vahia la tạria mao ne ‘on koroa ma kokon ma rū ne ‘on huga ‘e reko al‘ạkiag ne ‘on lele‘a ma ‘on lelea‘ garue, Jope la rou pạu ‘Ạitu nono ka iạ la ‘af‘af. Ma täe Jihova fue‘ la Satan ta la re ta ‘af‘af kelea‘efakian rūut se Jope. Ka te te‘is kat a‘af‘af‘ia ra mā ‘on Jope se ‘Ạitu. Ma ‘e ‘on fumou aire, Jope ‘ea pạu: “Ne gou la sap ma se ‘otou aier hete‘is se ‘otou terȧn al ta!”—Jope 27:5.

¹² Jope kat ‘inea‘ia ra ne Satan ta tä ho‘im ‘on pefä‘e. ‘E reko Jope kat ‘inea‘ia ra uạke‘ȧk te ‘on Satan ta hün se puer purer ‘on Jihova, Jope mamạr‘ȧk ne kop ma ‘Ạitu tä ho‘im ‘on pefä‘e. (Jope 6:4; 16:11-14) Ka, iạ kat a‘fại ra sin ma iạ aier ma kikia se Jihova. Ma ko‘ȧk te ‘on Satan ta ne ‘ea Jope agag ma se Ạitu ‘e reko te ne iạ la po, Jope kel‘ȧk ‘e ‘on aier fumou ne Satan ta sioksiok‘en!

¹³ ‘E reko huạg aier ‘on Jope, Jihova po ma tög a‘lelei pạu ko‘ȧk te sioksiok ‘on Satan ta. Jope hele‘ la iạ la kạumane‘ag airet ‘on Jihova, ma ‘Ạitu ạlạlum‘ȧk Jope ‘e reko ‘on mā ne‘ne‘i ma ‘on huạg aire.—Jope 42:12-17.

TÄE TAPEN SE ‘ÄEA

¹⁴ Uạkēet ‘e reko huạg aier ‘on Jope se ‘Ạitu ‘eake hün‘ȧk ma se Jope iạ ‘esea het. Te te‘is täe tape‘ma se ‘äea. Iạ kel‘ȧk a‘tafam ‘e Fäeag ‘on Jihova ‘e Fäeag ‘Es Fuạga 27:11, ne ‘ea tape‘: “‘Otou le‘e, ‘äe la huạg pot, ma a‘oaf‘ạkia ‘otou huga. La gou la pō la tög a‘lelei fäeag ‘on le‘et ne fatne‘ạkia gou.” Fäeag ‘i ne fȧ‘ ma fạu tarạu his vȧh‘ia ‘e vạhiag ne alag ‘on Jope, kel‘ȧk ne Satan ta faksekua ma kikia ‘Ạitu ma ko‘ȧk ma kikia ‘on lelea‘ e‘a. Ma ‘e av ne ‘os noh mạuri a‘oaf Jihova, ma ‘is hạiasoag tape‘ma la togia ko‘ȧk te sioksiok ‘on Satan ta, ma ‘e ‘os tovavhina ma ‘os aire se ‘Ạitu ‘is hö’ ririaf se ‘on huga. Tapen ‘ou a‘häe se te heta‘? Taf pạu iạ la te helavat la ‘is ‘atakoa la hạisapoag si‘ la togia ko‘ȧk te sioksiok ‘on Tiapol ta, ‘inea ne tes tä ne ‘is kop la jen ta te ‘e ‘os mạuri?

¹⁵ ‘Io a‘lelei se te ne Satan ta ‘ea: “Nōnō ka [“fāat,” NW] pa mȧür ma ia la pō se‘ ma la fue‘ te‘ ne ‘on tē ‘atakoa.” (Jope 2:4) ‘E ‘on ‘eag ne ta “fāat,” Satan ta ‘ea pạu ne ‘on ko‘ȧk te ta kat hün‘ȧk ra se Jope iạ ‘esea het ka täe tape‘ma se te‘ ne famör ‘atakoa. Te mah pạu hete‘. Satan ta uạke‘ạkia ‘ou fumou aire se ‘Ạitu. Tiapol ta pa ‘es la ‘äe la toa‘noa se ‘Ạitu ma roua sal nonoj ta ‘e av ne ‘äe agtạu ma te noanoa. Ma Satan ta la re tapen te te‘is?

¹⁶ La fakma ne ‘is hạifäegag vạhia ‘e Väe 10 ta, Satan ta garue‘ȧk pot ma‘oi la für tuen famori é ‘Ạitu. ‘E ta ut het, iạ agại ne‘ne‘, “la fak ma se ta läean ne ouou, ka ia aoao ne sei tä ia la pō la ‘ānia.” (1 Pita 5:8) Ma täe ‘is la pola räe se füt ‘on Satan ta ‘e av ne ‘ou kạumane‘aga, ‘ou kạinaga, ne sei hoi‘ȧk ȧs‘ȧk la fu‘ạkia ‘ou fe‘enit la rakoa Puk Ha‘a ma garue‘ạkia te ne ‘äe rako.* (Jone 15:19, 20) Ma ‘e ta ut hoi‘ạkit, Satan ta “rē ia la keleag fak ‘ager ne taf.” (2 Korinita 11:14) Tiapol ta la pola hoa‘ sal sousou la tȧk tuen ‘äe ma potoa ‘äe la roua mȧür fak‘ạitu. Iạ la pola re ‘ou huga la araruạ, la kop ma ‘äe la a‘häe ne ‘ou fūfū heta kat potsusun ra la ‘äe la pola a‘ofan ‘Ạitu. (Fäeag ‘Es Fuạga 24:10) Ma ‘inea ne tes tä se Satan ta la la‘ kạl‘ȧk la fakse “ta läeanat ne ouou” ne ȧr‘ȧk iạ se “ta ‘ager ne taf,” ‘on uạke‘ȧk te ta kat jen‘ia ra: Iạ ‘ea ne ‘e avat ne ‘äe la agtạu ma ạsạsi ne faksara, ‘äe la toak ‘e agag se ‘Ạitu. Ma ‘äe la tög tapen uạke‘ȧk te te‘ ma kel‘ȧk pạu ‘ou huạg aire se ‘Ạitu, la fakse tē ne Jope re?

TOVAVHIAN SE FAS‘ȦK TE ‘ON JIHOVA

¹⁷ ‘Äe la pola tög agại te ‘on Satan ta nono ka ‘ou mȧür ta la a‘oaf Ạitu. Tes tä ‘äe kop la re? Puk Ha‘a tög tape‘: “‘Au la ‘oaf se Jihova ‘omus ‘Ạitu ‘e ‘omus huạg ‘atakoa, ma ‘omus ‘at ‘atakoa, ma ‘omus ne‘ne‘ ‘atakoa.” (Nā Hoi‘ạkiag ne Foho 6: 5) Ma ‘e av ne ‘ou hanisi se ‘Ạitu ‘ut ma kikia la ti‘, ma ‘ou huga la hoi ‘e ‘ofa ma ririfa la re te‘ ne te ‘atakoa ne iạ pa ‘es la ‘äe la re. “Ne te‘is hanisit se ‘Ạitu te‘is,” ‘apostol ta Jone fȧ‘ vạhia, “la ‘is la ȧf‘ạkia ‘on fäeag fas‘ạki.” Nono ka ‘äe la hanis se Jihova ‘e ‘ou huạg ‘atakoa, ma ‘äe la räe ne ‘on “fäeag fas‘ạki kat häeag ‘e noa ra.”—1 Jone 5:3.

¹⁸ Tes tä fas‘ȧk te ‘on Jihova? Te ‘e ‘on rerege iris mou se ag ne ‘is ha‘ la re. La fakse te ne fȧ‘ ‘e kes heta, ne ‘on filo‘ heta ‘ea tape‘ “A‘sousou ‘E Tē Ne Jihova Fesia‘ Sin.” Ma ‘äe la räe ‘e täe ag ne Puk Ha‘a ha‘ȧk pạu. ‘E ‘ou hat a‘mumue ta kop ma ‘äe la a‘häe ne te ‘e ‘on rerege kat raksa‘ sir ra. Ka ‘e av ne ‘äe la sạkior a‘lal se ut ne puk ne juj‘ạkim, ma kop ma ‘äe täla räea ‘on ‘atmại ne foh ‘on Jihova. ‘Ou jeneag ne ‘ou mạuri kop ma iạ täla te noanoa pạut ne ‘äe po ma hạipoag mar. Ma la aier, ka nono ka ‘äe la pola jen ‘ou nohnoho se ta kạinag mạurit ne a‘oaf ‘Ạitu, ma ‘äe la po mȧür furmaria ma ‘oaf‘ofa. (Aisea 48:17, 18) Ma ‘äe la po sema la re‘ia. ‘Is ‘inea tapen te ta‘ag?

A‘SOUSOU ‘E TE NE JIHOVA FESIA‘ SIN

• Al‘ȧk famori.—Sại‘ạkiga 20:13; 21:22, 23.
• Ag fak‘inos se ma‘ma‘a.—Foh ne Rạu‘ifi 20:10, 13, 15, 16; Roma 1:24, 26, 27, 32; 1 Korinita 6:9, 10.
• Garue faktimonio.—Nā Hoi‘ạkiag ne Foho 18:9-13; 1 Korinita 10:21, 22; Kalatia 5:20, 21.
• ‘Ạit‘ạkiag ne tupu‘a.—1 Korinita 10:14.
• ‘Ona.—1 Korinita 5:11.
• Hana‘o.—Foh ne Rạu‘ifi 6:2, 4; Efeso 4:28.
• Sioksiko.—Fäeag ‘Es Fuạga 6:16, 19; Kolosa 3:9; Kel‘ȧk Tē 22:15.
• Küm tē.—1 Korinita 5:11.
• Ag ne‘ne‘i.—Salamo 11:5; Fäeag ‘Es Fuạga 22:24, 25; Malakai 2:16; Kalatia 5:20, 21.
• Fäeag se ‘atmại.—Foh ne Rạu‘ifi 19:16; Efeso 5:4; Kolosa 3:8.
• Garue‘ȧk se nonoj ne toto.—Kamataga 9:4; Garue 15:20, 28, 29.
• Kat matạ‘ ra ‘on kạunohoag ta.—1 Timoti 5:8.
• Te ag‘esea ma pelu ne politik ne rȧnte‘.—Aisea 2:4; Jone 6:15; 17:16.
• A‘es‘ao‘ȧk ne rạu ma vại ‘ona ma mạ‘usu.—Mareko 15:23; 2 Korinita 7:1.

¹⁹ Jihova kal po pạu ra la ‘ea la ‘is la re ta tēet ne sir se‘ ‘e ‘os vahia. (Nā Hoi‘ạkiag ne Foho 30:11-14) Jihova iạ ‘inea se‘ ma ‘os pōpō heta ma ‘os vahia ‘e ‘isa. (Salamo 103:14) Ma tape‘ma, Jihova la pola na ‘os ne‘ne‘ la ‘is la tovavhian se ia. ‘Apostol ta Paula fȧ‘ tape‘: “Ma ‘Ạitu aier, ma ia kal nā ra la hele‘ se ‘ausa ta faksar ne ti‘ se‘ ‘e ‘omus vahia; ka ‘e av ne faksara ia täla rē tape‘ma ta sal la ‘au la pō la sại e, la ‘au la vahia la röt‘ạkia.” (1 Korinita 10:13) La hạiasoagan ‘äe la vahia la röt‘ạkia, Jihova la pola na tape‘ma se ‘äea “ne‘ne‘ man ti‘ ta la pō ke ‘e ‘Ạitu.” (2 Korinita 4:7) ‘E reko ‘on vahia ma tȧr ma röt‘ȧk ne ȧsȧs ma‘oi ne re se ia, tä ‘on‘on Paula po ma ‘ea e: “Gou vahia te‘ ne tē ‘atakoa ‘e Ia ne a‘ne‘ne‘ạkia gou.”—Filipai 4:13.

RERE MA KIKIA AG FAK‘ẠITU

²⁰ Ma ‘on te ma‘oi hoi‘ȧk ne ‘äe kop la re la a‘oaf Jihova ma tape‘ma se ‘ou la hȧ‘ạkiag ne ‘äe ‘e te ne ‘Ạitu fesia‘ sin. ‘Äe kop la hanis ma ‘oaf tape‘ma se te ne ‘Ạitu hanis ma ‘oaf sin. (Roma 12:9) Ma tei ka ‘äe kat hại‘eleag ma iris ne ‘omus räe tatạu, ma te ne ‘ạus ‘oaf la re tatạu ma tape‘ma se te ne ‘ạus kokon‘ȧk a‘maha? Ma tatạu sema se Jihova. Ma ‘is kop la rak la hanis ma ‘oaf se te ne Jihova a‘ti‘ȧk ma kokon‘ạki. Ma ‘on te ‘e te ‘i f‘ạ‘im ‘e Salamo 15:1-5, ma ‘is po ma hat ‘e iris ne ‘Ạitu hat la ‘on kạumane‘ag. Kạumane‘ag ‘on Jihova kel‘ȧk te ne Puk Ha‘a ‘ea “hue ‘on ‘At Ha‘a.” Te‘is aglelei la fakse “mäeav hanisi, ‘ofa, hạia‘leleiga, huạg lala, ag figalelei, ag hanisi, huạg aire, huạg vạivại, ‘ot puer a‘leleiag ne ‘ita.”—Kalatia 5:22, 23.

²¹ Ma lelei la ‘is la hat ma sạkior ma kikia Puk Ha‘a la hạiasoagan ‘is la po‘ia ag fakạit ‘i. ‘E av ne ‘is rak ma ‘inea e tē ne ‘Ạitu pa ‘es la ‘is la re, te te‘is la hạiasoag ‘is la re la ‘os a‘häe la la‘oag ‘esea ma a‘häe ‘on ‘Ạitu. (Aisea 30:20, 21) Ma ‘e reko ti‘ ne ‘ou hanisi se Jihova, iạ hele‘ la a‘ti‘ se‘ ‘ou pa ‘ese la ‘ou mạuri la a‘oaf ‘Ạitu.

²² ‘Is kop la garue fe‘en pạu la pola ‘is la noh ‘e kạinag mạurit ne la a‘oaf Jihova. Puk Ha‘a a‘tatạu‘ȧk jeneag ne ‘ou mạuri la fakse av ne ‘äe sui se‘ famör ne roa ta ma hạ‘ȧk se‘ famör fo‘ou ta. (Kolosa 3:9, 10) Ma ‘e reko foh ‘on ‘Ạitu, Salamo 19:11 ‘ea tape‘: “Ma tög ti‘ut la pō ‘e ‘ot ȧf‘ạkiag ne irisa.” ‘Äe tape‘ma la pola räe ạlạlum ti‘ut ne ‘äe la po kepoi ka ‘äe la mȧür‘ȧk kainag mạurit ne la a‘ofan ‘Ạitu. Ma ‘e av ne ‘äe re te ta‘ag ‘äe la tög a‘lelei pạu siok ‘on Satan ta ma hö‘ ‘oaf ma ririaf se huạg ‘on Jihova!

*  ‘Eake ‘on fuạga te‘ ne iris ne agại ‘äe, iris ‘i puer kikia ‘e Satan ta. Ka Satan ta iạ tä ‘ạit ne av te‘is, ma rȧnte‘ ‘atakoa täe ‘e iạ ne raksa‘a. (2 Korinita 4:4; 1 Jone 5:19) Ma ‘is kop la noh iạtiạt la tạria agại ne la rēem se ‘isa po ‘e mȧür fak‘ạitu kat a‘ti‘ȧ‘ạk‘ia ra ‘e rȧnte‘.