FAS‘ȦK tēet se famör rot fakkaristo la iris la a‘häe‘ȧk afag ne alag ‘on Jisu. A‘häe‘ạkiạg ne terȧn te‘ ta he‘ sin “‘omoe ‘on Gagaja.” (1 Korinita 11:20) Tes ta ‘on fuạga? Av het ne la a‘soko e, tes täla re ‘e ‘on la a‘häe‘akiag ne terȧn te‘is?

Jisu Karisto a‘fumou‘ȧk te te‘is ‘e pogit ne famör Jiu a‘soko e ‘oris Kato‘ag ne La‘sir‘ȧk ta ‘e 33 A.K. Kato‘ag ne La‘sir‘ȧk ta a‘sok a‘esea ma ‘e laloag ne fạut, ‘e rȧn 14 ne huạl ta Nisan ‘on iris famör Jiu. ‘On la a‘tạu‘ȧk ne terȧn ne huạl ta, iris famör Jiu tȧr se ao het ne pög ta ma rȧn ta la tatạu ‘oria roa. Te‘is terạnit ne tatạu pạu, aoa‘ 12 ‘e rȧn ta ma aoa‘ 12 ‘e pög ta. Huạl fo‘ou mumuet ne ‘el pạu se terȧn ta‘ag, ta iris a‘häe‘ȧk la ta ‘on kamatag ne Nisan. La‘sir‘ȧk ta kotä la sokoan ‘e vạhiạg ne terȧn 14, ‘e avat ne as ta la solo e.

Jisu a‘sok Kato‘ag ne La‘sir‘ȧk ta ma ‘on ‘apostolo, ‘ut‘ạkiạg ‘on Jutas Iskarioti ma a‘fumou‘ạkia la terȧn ‘Omoe ‘on Gagaja. ‘Omoe te‘ ta tög‘ạkia Kato‘ag ne La‘sir‘ȧk ‘on iris famör Jiu ma la a‘sok a‘esea ma ‘e laloag ne fạu ta.

Rog hegut ne Mataio fạ‘i ‘eag: “Jisu sap se faraoa het, ma fäeag ạlạlum‘ạkia, ma to‘to‘ia, ma tä ia nā se lelea‘ rak tē, ma ‘eag, ‘ ‘Au la sap sin, ma ‘ānia: ‘otou foro te‘is.’ Ma ia sap se ta ip, ma ‘uạ‘uạ‘ȧk se ‘Ạitu, ma nā se irisa, ma ‘eag, ‘ ‘Au la ‘imo e, te‘ ne ‘aus ‘atakoa: ko ‘äna te‘is ‘otou tot ne fäeag hạiporạkiag fo‘ou ta, totot ne ji ‘e rēko lelea‘ ma‘oi la fạu‘akiag ne ag raksa‘a.’ ”—Mataio 26:26-28.

Lelea‘ ‘e ‘on rerege mā ne Jisu furia faraoa ta se ‘on foro ma uạin ta se ‘on toto. Ka for ‘on Jisu nono ma se ‘e iạ ‘e avat ne iạ nā e faraoa ta se irisa. Tei ka ‘apostol ‘on Jisu ‘a aier ‘e ‘on foro ma ‘iom ‘e ‘on toto? ‘Igke‘, po ‘e la fakkikia se iris ‘a famör ma iris kaoa kikia foh ‘on ‘Ạitu. (Kamataga 9:3, 4; Foh ne Rạu‘ifi 17:10) ‘E Luke 22:20, Jisu ‘ea vạhia: “‘Äna ip te‘is fäeag hạiporạkiag fo‘ou ta ‘e ‘otou toto, totot ne ji ‘e rēko ‘aus.” Tei ka ip heta‘ag “ta fäeag hạiporạkiag fo‘ou ta”? Te ta‘ag la noanoa, ‘e reko fäeag hạipor‘ạkiget kop la ma ‘on haifäegagat la re la hugag ‘esea sin, ka ‘eake kạinag tēet ne ‘is la po la ‘atạk sin.

Ma faraoa ta ma uạin ta, ta ‘on a‘tatạu‘ạkiag het. Faraoa ta a‘tatạu‘ȧk se for ‘on Jisu ne ‘atakoa pau. Jisu a‘es‘ao‘ȧk faraoa het ne tör ‘e ‘oris ‘omoe ne Kato‘ag ne La‘sir‘ȧk ta. Faraoa heta rēem ka kat ‘es levenet ne isit na sin. (Sại‘ạkiga 12:8) Puk Ha‘a a‘es‘ao‘ȧk leven ta la iạ ta a‘tatạu‘ạkiạg ne agraksa‘a. Faraoa ta, ta a‘tatạu‘ạkiag ne for ‘on Jisu ne ia rạu‘if‘ạki. Kat ‘es ra ta agraksa‘ ‘eseat.—Mataio 16:11, 12; 1 Korinita 5:6, 7; 1 Pita 2:22; 1 Jone 2:1, 2.

Uạin mie‘ ta, ta a‘tatạu‘ạkiạg ne tot ‘on Jisu. Tot ta‘ag ta aier‘ạkiạg ne fäeag hạipor‘ạkiag fo‘ou ta. Jisu ‘ea ne ‘on toto ji‘ȧk la “sại‘ạkiag ne agraksa‘a.” Famori la pola ma‘ma‘ ‘e ‘oris agraksa‘a ‘e muạ ‘on ‘Ạitu ma la po la fu ‘e fäeag hạipor‘ạkiag fo‘ou ta ma Jihova. (Hiperiu 9:14; 10:16, 17) Hạifäegag a‘fumou‘ȧk te‘ a‘vaohian se iris 144,000 ne rot fakKaristo aire ‘e ‘oris la la‘oag se hevạni. Iris la sạu ma ape‘ạit ‘e täe ‘e reko ạlạlum‘ạkiag ne na se famori.—Kamataga 22:18; Jeremaia 31:31-33; 1 Pita 2:9; Kel‘ȧk Tē 5:9, 10; 14:1-3.

Sei ta iris ne po la ‘iom ‘e ip ne Afagan al ‘on Jisu? Kop la iris ne täe ‘e fäeag hạipor‘ạkiag fo‘ou ta—iris ne ‘ạiröt‘ȧk la sur se hevạni—‘esea täla po la ‘a ‘e faraoa ta ma ‘iom ‘e uạin ta. ‘At Ha‘ ‘on ‘Ạitu a‘fumou‘ȧk vạhia se iris ‘i, ne iris hil vạhia la sạu ‘e hevani. (Roma 8:16) Iris ‘i tape‘ma täe ‘e laloag ne fäeag hạipor‘ạkiag ne Matantu ta ma Jisu.—Luke 22:29.

Tapen se iris ne ‘ạiröt‘ȧk la noh mȧür ma kat ‘es tohiget ra ‘e Parataisi te rȧnte? Iris tạupir se fas‘ȧk te ‘on Jisu, ma teag‘esea ‘e ‘Omoe ‘on Gagaja, ma iris leum ‘e ‘oris ‘e‘ạkiạg ne terȧn ta, ka iris kat po ra la ‘a ‘e faraoa ta ma ‘iom ‘e uain ta tape‘ma. Jihova Uetnes ta a‘sok ‘Omoe ‘on Gagaja, ka re a‘eseama ‘e te‘ ne fau ‘i, ‘e Nisan 14 ‘e vạhiag ne soloag ne as ta. Kop ma äf his ‘esea ‘e iris famör ne rȧnte‘ ‘ea, ne iris ma ‘oris ‘ạiröt‘ạkiget se mạuri ‘e hevani, ka ‘e ‘oris a‘häe‘ạkiag ne terȧn te‘ iạ te ‘es‘aot se te‘ ne iris famör rot fakKaristo. Iạ ta teranit ne famör ‘atakoa la po la ‘io hö‘ se hanis fuạmamạu ‘on Jihova ‘Ạitu ma Jisu Karisto.—Jone 3:16.

← Kel se ‘on väe ta