“JIHOVA tä ‘Ạit aier ta,” ta‘ag te ne parofiat ta Jeremaia rak‘ạkim. “‘Äe ‘Ạit mȧür ta.” (Jeremaia 10:10) La fakma, ne Jihova ‘Ạitu tä Hū ne mȧür ‘atakoa. Iris ‘ager ‘e Hevạni ‘eag se ia: “Ne ‘äe tä fup‘ạkim te‘ ne tē ‘atakoa, ka ‘oris noho ma ‘oris fup‘ạki hün ma se fiongar ‘on‘ou!” (Kel‘ȧk Tē 4:11) ‘E mak ne ‘uạ‘uạ‘ạki se ‘Ạitu, Sạu ta Tevita ‘eag: “Ko puạl ne tạn ne mạuri täe ‘e ‘äeag.” (Salamo 36:9) Ma mạuri, iạ, te fakhanisit ne takam ‘e ‘Ạitu.

² Jihova tä ‘on‘on mạuri. (Garue 17:28) Iạ ta na se ‘isa ‘es tela‘a, tạn la ‘imo, lȧg la huạg, ma pear ne ‘is noho e. (Garue 14:15-17) Jihova re te te‘is ‘e ta kạinag salat ne la ho‘am mȧür ‘oaf‘ofa. Ma ‘e ‘os la poag ne ‘atakoa ne mȧür ‘oaf‘ofa, ‘is kop la rakoa foh ‘on ‘Ạitu ma tạupir sin.—Aisea 48:17, 18.

‘E‘ẠKIAG NE MẠURI

³ ‘Ạitu pa ‘es la ‘is la ‘e‘ȧk mạuri—‘os mạuri ma mȧür ‘on iris famör ne tore. ‘E av ‘on ‘Atama ma ‘Ive, ‘oria le‘ fa ta Keni fek ti‘ pạu se ‘on sạsiag mea‘mea‘ heta ‘Epeli. Jihova fas‘ȧk se Keni, ne ‘on feke la pola re iạ la agraksa‘ ti‘ pạu. Keni kat a‘fại ra se fäeag fas‘ȧk ta‘ag. Iạ ‘für se‘ se ‘Epeli ‘on sạsiag heta ma al‘ạkia iạ.’ (Kamataga 4:3-8) Jihova tötög‘ȧk Keni ‘e reko ‘on al‘ạkiag ne ‘on sạsiạg heta.—Kamataga 4:9-11.

⁴ ‘E vạhiạg ne fạu 2,400, Jihova na se famör ‘Isireli foh ne la hạiasoagan iris ‘e ‘oris la agagat se ia. Ma ‘e reko foh ‘i na se parofiat ta Mosese, iris tä Foh ‘on Mosese. Foh ‘on Mosese ‘eag: “‘Au la se al‘ȧk famör.” (Nā Hoi‘ạkiag ne Foho 5:17) Te te‘is kel‘ȧk se famör ‘Isireli ne ‘Ạitu a‘ti‘ȧk pạu mȧür ‘on famori ma famori kop la kokon‘ȧk mȧür ‘on iris famör ne tore.

⁵ Tapen se mȧür ‘on le‘ mea‘mea‘ het ne täe ‘e ‘ef ne ‘on ö‘hön ta? La fakse te ne rak‘ạkim ‘e Foh ‘on Mosese, ne iạ te se nonojot la al‘ạkia le‘ het ne täe ‘e ‘ef ne ‘on ö‘hön ta. Aier pạu, ne kạinag mȧür ta‘ag, iạ te a‘pumuạ‘ạkit se Jihova. (Sại‘ạkiga 21:22, 23; Salamo 127:3) ‘On fuạga, la‘ȧk lele‘a kat nonoj ra.

⁶ ‘On la ‘e‘ȧk ne mạuri täe kikia ‘e räe ‘on famori. Puk Ha‘a ‘ea: “Le‘et ma ne fesia‘ se ‘on sạsigit, ia le‘ al‘ȧk famori: ma ‘aus ‘inea ne le‘ al‘ȧk famör ta kat puạ ra ne häe a‘moua mȧür se ‘es gata‘aga.” (1 Jone 3:15) Nono ka ‘is pa ‘es ‘e mȧür se ‘es a‘ofiga, ma ‘is kop la ‘ut‘ȧk pạu feke ‘e ‘os huga se ta sạsigit, po ‘e feke iạ ta hün pạu ne te raksa‘a. (1 Jone 3:11, 12) ‘Is kop la rak la noh hạihanisiag.

‘OS KEL‘ȦK NE ‘E‘ẠKIGA ‘E REKO MẠURI

• kat la‘ȧk lelea‘ ra

• rouạg ne ag se ma‘ma‘a

• ‘ut‘ȧk pạua feke ‘e ‘os huga hün se famori

⁷ Ka tapen se ‘on la ‘e‘ȧk ne ‘os mạuri? Taf pạu ne kat ‘es ra ta famorit ‘oaf la al, ka iris ‘e ‘on rerege al ‘e reko iris re‘ia te la hö‘ ‘oaf‘oaf se irisa. La fakse, iris ma‘oi ne hȧ‘ sika, ne a‘es‘ao‘ȧk ne vại ‘ona, ne te ‘e ‘on rerege la a‘ofan ‘oris huga. Kạinag te ‘og mane‘ȧk foro ma a‘mou ho‘am ala se le‘et ne a‘es‘ao‘ạkia. Le‘et ne re‘ia te ‘i kat ‘e‘ȧk ra mạuri, tēet ne a‘pumuạ‘ȧk pạu. Kạinag te ‘i te se ma‘ma‘at ‘e maf ‘on ‘Ạitu. (Roma 6:19; 12:1; 2 Korinita 7:1) ‘Os la agag airet se ‘Ạitu, ‘is kop la rou pạu kạinag ag ‘i. Kop ma reag noanoa la roua te ‘i, ka Jihova la pola hạiasoag se ‘isa. Ma iạ ‘oaf ti‘ pạu ‘e reko ‘os fe‘eni la matạ‘ a‘lelei se ‘os mạuri ‘e reko iạ ta te fakhanis a‘pumuạ‘akit ne ‘Ạitu nāam.

⁸ Nono ka ‘is ‘e‘ȧk mạuri, ma ‘is la a‘häe‘ȧk te ne kat hö‘ raksa‘ ra se ‘isa. ‘Is kal sạunoa‘ȧk ra ne la re ta tēet ne la a‘ofan ‘is ka iạ la ho‘im ke raksa‘a se ‘is. ‘Is kop la se hoa‘ motoka väo ne la sir ‘e ‘on foho, ma manea‘ mamạr ne la ho‘am te a‘ru. (Salamo 11:5) Foh ‘on ‘Ạitu se lelea‘ ‘Isireli ‘e ‘on mumua rak‘ȧk ne: “ ‘E avat ne ‘äe fū‘ạki e ta ‘ou ri fo‘ou, ‘äe la rē fakapau ta pā se far ne hat ne ri ta. Ma ne kepoi ka le‘et vil, ma ‘on ala kat mou ra se ‘äea.” (Nā Hoi‘ạkiag ne Foho 22:8) ‘On la salag ‘eseat ma muạ‘ạkiag ne foho, matạ‘ la te ‘i la fakse molmoliga la lelei ‘e ‘ou hanue ta la se ‘es ta le‘et la safei ne vil ma agtạu raksa‘. Kepoi ka ‘äe ma ‘ou motoka, ma re a‘häe a‘lelei ne tei ka iạ la hạitạuạg la hoa‘ ne ‘igke‘. Matạ‘ lelei la ‘ou hanue ta ne ‘ou motoka ta la se te hö‘ pefä‘et se ‘äea ne se ta famör hoi‘ạkit.

⁹ Tapen se mȧür ‘on mạnmạnu? Fup‘ȧk Tē Ta, a‘pumuạ‘ȧk tape‘ma iris ‘i. ‘Ạitu va‘ön‘ȧk al‘ȧk ne mạnmạnu la ‘a ma re‘ia hạ‘u, ne ‘e avat ne iạ hö‘ mamạrue se famori. (Kamataga 3:21; 9:3; Sại‘ạkiga 21:28) Ag mam‘asa se mạnmạnu, ne al‘ạkia iris ‘e mane‘a te se nonojot, ma te‘i kel‘ạkia kikia ‘oris se ‘e‘ȧk ne mạuri.—Fäeag ‘Es Fuạga 12:10.

‘E‘ẠKIẠG NE TOTO

¹⁰ ‘E vạhiag ne Keni ‘on al‘ạkiag ne ‘on sạsiag heta ‘Epeli, Jihova ‘eag se Keni: “Ana lio ne tot ne ‘ou sạsiag heta ououm se goua ‘e pear ta.” (Kamataga 4:10) ‘E avat ne ‘Ạitu fäeag‘ȧk tot ‘on ‘Epeli, iạ fäeag‘ạkia mȧür ‘on ‘Epeli. Keni ta a‘ofia mȧür ‘on ‘Epeli, ma ‘e ‘on ‘i‘i Keni kop la tötög‘ȧk. Iạ fakkikia se tot ‘on ‘Epeli, ne ‘on mạuri, ta ouou‘ạkia se Jihova la a‘sokoa ‘on pure. ‘On sok‘ạkiag ne mạuri ma toto kel‘ȧk hoi‘ạkim ‘e vạhiag ne Hoi ti‘ut ‘e av ‘on Noa. Mumuạ la Hoi ta, famori ‘a kikia ‘e hue ne ‘ại, rạu ne ‘ại, huạl ne ‘ại, ma niu mạfu. ‘E vạhiag ne Hoi ti‘ ta, Jihova ‘ea se Noa ma ‘on lele‘a: “Te‘ ne tē ‘es mȧür ‘atakoa ne ruerue la mou se ‘ausa la ‘emus tēla‘ā, la fak ma se ‘ại tūtū ne ‘ā‘ā: gou nā ‘atakoafua se ‘ausa.” Ka ‘Ạitu na sio fohot: “Nōnō ka ke tiok ma ‘on mạuri—‘on fuạga, tiok ma ‘on toto—ma ‘au la se ‘ānia.” (Kamataga 1:29; 9:3, 4) Taf pau, ne mạuri ma toto tatạu sema se Jihova.

¹¹ ‘Os kat ‘a ne toto ta kel‘ạkiag ne ‘os ‘e‘ạkiga. Fohot ne Jihova na se lelea‘ ‘Isireli, iạ fas‘ȧk pạu: “Ma kepoi ka ta le‘ Isirelit, ne ta le‘ helavat noh ‘e gasav ‘on kạinag Isirel ta, ke jạujạu ma pōom ta mạnmạn lā hap häket ne ta mạnmạn ferferet sại la a‘es‘ao‘ȧk, ka ia kop la ji‘ȧk tot ‘atakoa ta se pear ta, ma fạm tape‘ma…. Jihova rak‘ạki e se famör Isireli, ‘ne iris kop la se ‘ā ta tikot ma, ka ma ‘on totot noh la‘mo.” (Foh ne Rạu‘ifi 17:13, 14) Foh ‘on ‘Ạitu ne fas‘ȧk la se ‘a ‘e tot ne mạnmạnu, na se Noa ‘e fạu 800 mumua, ma hele‘um se terạnit ‘e ‘i. Se räe ‘on Jihova, ma taf pạu: ‘On famör ne agag se iạ la pola ‘a ‘e tiok ne mạnmạnu ka ‘eake ‘on toto. Iris kop la ji‘ȧk tot ta se pear ta—la ta‘ag, hö‘ạkiag ne mȧür ‘on mạnmạn ta se ‘Ạitu.

¹² Foh te‘is tuk kikia se iris famör rot fakKaristo aire. Iris ‘apostolo ma fa mamfua ne muạ‘ạkia iris ne tạupir se Jisu ‘e senjuri mumue ta, tạunȧ‘ la hạifäegagan ne foh tes ta la iris ne täe ‘e laloag ne kạurotuag rot fakKaristo ta la tạupir sin. Iris a‘vȧh: “Ne lelei se a‘häe ‘on ‘At Ha‘a, ma se ‘otomis a‘häe tape‘ma, la se töl‘ȧk se ‘ausag ta käveag ne ti‘ se‘ ‘e tē ‘es‘ao ‘i: la ‘au la mätea ‘aus ‘e tē ne rē rạu‘if‘ȧk se‘ se tupu‘a, ma ‘e toto, ma ‘e tē ne ‘oroua, ma ‘e mös ‘e‘eve.” (Garue 15:28, 29; 21:25) Ma ‘‘is kop la se a‘es‘ao‘ȧk pạu toto.’ ‘E maf ‘on ‘Ạitu, ‘os reag ne te lelei ta‘ag, tatạu se ma se ‘os hä‘ạkiạg ‘e tupu‘a ma mös ag‘esea ka kat a‘lel ra.

¹³ Ka tei ka fohot ne na la hȧ‘ȧk ‘e toto, täe tape‘ma se ‘ou la tạriag ne toto? ‘I. Tapen se, nono ka tạk ta la ‘ea la ‘äe se ‘iom te ‘oan. Ma tei ka ‘on fuaga ‘äe kal pora la ‘iom te ‘oan ka la po sema la ko‘ȧk se ‘ou uạua? ‘Igke‘! Tatạu sema, ‘e ‘ou ha‘ag ne ‘äe ‘e toto ‘on fuạga, ‘äe kal po pạu ra la sur‘ȧk ta totot se ‘ou foro ‘e ta kạinag sal hoi‘ạkit. Ma ‘on fuạga fohot ne fas‘ȧk ‘e reko toto ‘is kal pora la aier‘ȧk la famorit la sur‘ȧk se ‘os foro.

¹⁴ Tapen se nono ka ta famör rot fakKaristōot ke ra‘ raksa‘an ma kop la ser? Ma nono ka tạku la ‘ea ne iạ kop la na tot, ne iạ la al. Taf pau, iạ famör rot fakKaristo ta kal ‘oaf ra la al. Ma ‘e reko ‘on äf‘ȧk ne tefakhanis pumuạ pạu ‘on ‘Ạitu, toto, iạ la pola hoa‘ ta kạinag sal hoi‘ạkit ne kal ho‘am ra garue‘ȧk se nonoj ne toto. Iạ la pola ao hạiasoag fak tạku nono ka täe ‘e irisa, ma la tär ta sal hoi‘ạkit la tög‘ạkia.

¹⁵ Ka tei ka famör rot fakKaristo ta la kaoa foh ‘on Aitu, la iạ la mȧür roa ‘e av te‘? Jisu ‘eag: “Ko ‘äna le‘et ma ne pa ȧf‘ȧk ‘on mạuri, ia täla mao‘ạkia, ka le‘et ma ne la mao‘ạkia ‘on mạuri ‘e rēko gou, ia täla räe sin.” (Mataio 16:25) ‘Is kat ‘oaf ra la al. Ka nono ka ‘is pa mȧür, ma ‘is kaoa foh ‘on ‘Ạitu, ma ‘is la agtạu ma pefä‘ titi‘ pạu ‘e ‘os mao‘ạkiag ne mȧür se ‘es a‘ofige. ‘Is ‘inea, ne ‘e ‘os tuan‘ạkiạg ne ‘os mạuri se foh nonoj ‘on ‘Ạitu, ma ‘e ‘os aier‘ạkiag ne kepoi ka ‘is la al, ka Iạ ne na se ‘isa mạuri, la a‘häe‘ȧk ‘is ‘e fū hoi‘ạkiag ta. Ma ia la fu‘ȧk hoi‘ȧk se ‘is, ma la na se ‘isa te fakhanis ti‘ pumue te‘is mạuri.—Jone 5:28, 29; Hiperiu 11:6.

¹⁶ ‘E ‘on ‘i‘i, iris lelea‘ ea‘ aier ‘on ‘Ạitu a‘häe‘ȧk a‘mah pạu la tạupir se ‘on sala ‘e reko toto. Iris kal ‘a tot ra ‘e ta kạinag sal hoi‘ạkit. Ne iris la tär ‘e ta kạinag salat ‘e pot faktạku.* Iris aier‘ȧk ne iạ ne Fup‘ạkim toto ‘inea te ne lelei se irisa. Ka tei ka ‘äe mā sin?

‘ON GARUE‘ȦK NONOJ PẠU NE TOTO

¹⁷ Foh ‘on Mosese foar a‘lelei pạu ‘on garue‘ȧk nonoj ne toto. ‘E reko agag ‘on iris lelea‘ ‘Isireli ‘e ‘on mumua, Jihova fas‘ȧk pạu se irisa: “Ne mȧür ‘on te‘ ne tē ‘es mȧür ‘atakoa täe kikia ‘e tot ta, ma täe ‘on‘on Jihova fas‘ạki e la tot ‘atakoa ta la ji‘ȧk ‘atakoa se rer ne fūag ne rạu‘if ta la hoa‘ tū e ag raksa‘ ‘on famori. Ne toto, ‘ea‘ea hoi‘ȧk het, mạuri, tä hoa‘ tūume ag raksa‘a.” (Foh ne Rạu‘ifi 17:11) ‘E avat ne famör ‘Isireli agraksa‘a e, iris la po sại‘ạkiga ‘e ‘oris rạu‘if‘ạkiag ne ta mạnmạnut ma ‘on toto la ji‘ȧk se rer ne fūag ta ‘e tapernakul ‘on ‘Ạitu, ut reag rạu‘if ta. Tä‘ma garue‘ȧk nonoj ne toto ‘e rạu‘ifi.

¹⁸ Famör rot fakKaristo aire kat puạ ra ‘e fȧn Foh ‘on Mosese ma ta ‘on‘on iris kat rạu‘if‘ȧk mạnmạn ra ma kat ji‘ȧk tot ra se rer ne fūag ta. (Hiperiu 10:1) Ka tä‘ ma tēet, ‘on garue‘ȧk ne toto ‘e rer ne fūag ta ‘e ‘on mumua ‘e ‘Isireli, kel‘ạkim rạu‘if a‘pumuạ‘ȧk pạut —ta‘ag Le‘ ‘on ‘Ạitu, Jisu Karisto. ‘E ‘os rakoag ‘e Väe 5 ne puk hete‘is, Jisu na ‘on mȧür fakfamori ‘e reko ‘is ‘e ‘on ji‘ạkiag ne ‘on toto la rạu‘ifit. Ma iạ hö‘ se hevạni, ma na a‘eseama ‘es‘ao ne ji‘ạkiag ne ‘on toto se ‘Ạitu. (Hiperiu 9:11, 12) Ta‘ag tēet ne aier‘ạkia ‘os la sạit ‘e ‘os agraksa‘a ma säea salat la ‘is la po mȧür se ‘es tohiget. (Mataio 20:28; Jone 3:16) ‘On ‘es‘ao aier pạu ne garue‘ȧk ne toto kel‘ȧk vạhia! (1 Pita 1:18, 19) Ma ‘e pilifi se tot hanis ‘on Jisu ne ji‘ạki la po la na se ‘isa a‘mȧür‘ạkiga.

¹⁹ ‘Is pola ‘uạ‘uạ‘ȧk a‘ti‘ pạu se ‘Ạitu Jihova ‘e reko tefakhanis hanis te‘is hün se mạuri! Ma tei ka te te‘is kat rue‘ạkia ra ‘os huga la fäeag‘ạkia se famori ‘on la poag ne mȧür se ‘es tohiget ‘e ‘oris pilifi se rạu‘ifit ne Jisu re? ‘Os räe fak‘Ạitu ‘e reko mȧür ‘on famori täla rue‘ạkia ‘is la fe‘en pạu se garue te‘. (Isikeli 3:17-21) Nono ka ‘is a‘sok a‘lelei te ne nonoj la ‘is la re, ma ‘is la pola ‘ea, la fakma se te ne ‘apostol ta Paula ‘ea: “Gou ma‘ma‘ ‘e tot ‘on te‘ ne famör ‘atakoa: pō ‘e gou kat hehne‘ ra ‘e la no‘ạkia se ‘ausag puer ‘atakoa ‘on ‘Ạitu.” (Garue 20:26, 27) ‘On la rak‘ạkiag se famori ‘Ạitu ma ‘on ‘amnạki, tä sal lelei pạut la kel‘ạkia ne ‘is ‘e‘ȧk pạu mạuri ma toto.

*  Te ne rak‘ȧk ‘e reko sal ma‘oi ne pola re ka ‘eake ‘e na toto, ‘io se rạupeap 13-17 ne puk het ne Jihova Uetnes ta fạ‘i How Can Blood Save Your Life?