‘ONASOA
Sei tä Maikeli ‘Ager Gagaj ta?
TE FAK‘AT fup‘ạkit ne he‘ Maikeli kat fa‘ fäeag‘ȧk ra ‘e Puk Ha‘a. Ka, ‘e av ne fäeag‘ạki e iạ, iạ popot pạu. ‘E puk ‘on Taniela, Maikeli peluạ ‘ager raksa‘a; ‘e pukut ne Juta fạ‘i, ia uạke ma Satan ta, ma ‘e Kel‘ȧk Tē, iạ hạipeluạg ma Tiapol ta ma ‘on timonio. ‘E av ne iạ pel‘ạkia puer purer ‘on Jihova ma hạipeluạg ma fir ‘on ‘Ạitu, Maikeli a‘sok pạu fuạg ne ‘on as ta—“Ka Sei Ta Fak Se ‘Ạitu?” Sei tä Maikeli?
‘E av ‘e ‘on rerege, ma ‘on lelea‘ ma as his ‘atakoa. La fakse, fa puer ne ‘on kạunohoag ta Jekope iạ he‘ tape‘ma ‘Isireli, ma ‘apostol ta Pita, ne he‘ Saimoni. (Kamataga 49:1, 2; Mataio 10:2) Ma tape‘ma, Puk Ha‘a kel‘ȧk ne Maikeli iạ as hoi‘ạkit ‘on Jisu Karisto, mumuạ ne iạ la leum se rȧnte‘ ma ‘on vạhiag ne ‘on noh mạurit ‘e rȧnte‘. ‘Is la re a‘häe se hün ne Puk Ha‘a a‘fumou‘ạki e te te‘is.
‘Ager Gagaj ta. Fäeag ‘on ‘Ạitu ‘ea ne Maikeli iạ tä “‘ager gagaj ta.” (Juta 9) ‘On fuạga “‘ager puer ta.” ‘Äe la räe ne iạ he‘ ‘ager gagaj ta. Iạ kel‘ạkim ne ma ‘on ‘ager tape‘ ‘eseat. Puk Ha‘a kel‘ȧk pạu ne ‘e av ne ‘ea e “‘ager gagaj ta” iạ ‘ạligen ‘ager tape‘ ‘eseat, kat ruạ‘ia ra. Hoi‘ȧk, fūạg heta ‘ager gagaj ta hün‘ȧk se Jisu. ‘E reko Gagaj Jisu Karisto ne fū‘ȧk hoi‘ȧk vạhia, 1 Tesalonaika 4:16 ‘ea tape‘: “Ko ‘äna Gagaja täla mariu sio ‘e lạgi, ma ‘ohōot, ma lio ‘on ‘ager gagaj ta.” Ma tä ‘on‘on ‘ea e ne lio ‘on Jisu ta lio ‘on ‘ager gagaj ta. Kop ma ut ne puk hete‘ tä kel‘ạkim ne Jisu iạ ta ‘ager gagaj ta Maikeli.
Gagaj Puer ne Kạupelu. Puk Ha‘a ‘ea ne “Maikeli ma ‘on kạu ‘agero hạipeluag ma tarak ta.” (Kel‘ȧk Tē 12:7) Tä ‘on‘on, Maikeli iạ tä Gagaj Puer ‘on kạupel ‘ager huạg aire. Kel‘ȧk Tē tape‘ma ‘ea ne Jisu tä Gagaj ‘on kạupel ‘ager huạg aire. (Kel‘ȧk Tē 19:14-16) Ma ‘apostol ta Paula ‘ea pạu “Gagaj Jisu, ma iris ‘ager ne ‘on ne‘ne‘i.” (2 Tesalonaika 1:7) Ma ‘is räe ne Puk Ha‘a ‘ea tape‘ma Maikeli ma “‘on ‘agero” ma Jisu ma “‘on ‘agero.” (Mataio 13:41; 16:27; 24:31; 1 Pita 3:22) Puk Ha‘a kat ‘ea ra ‘e ta utut ne ‘ager huạg aire ‘e hevạni ma ‘oris kạupel ruạ, ma Maikeli muạ‘ȧk kạut ka Jisu muạ‘ȧk ‘on rue. ‘On fuạga, ma kạupel ‘eseat, ma ‘on Gagaj Puer ne Kạupel ‘eseat. Ma te‘is hün lelei het la pola a‘vȧh pạu ne Maikeli iạ ta Jisu Karisto ‘e ‘on fuạg fakhevạni.*
* Te hoi‘ȧk ne kel‘ạkim ne as ta Maikeli a‘es‘ao‘ȧk tape‘ma se Le‘ ‘on ‘Ạitu täe ‘e, rạupeap 393-4, ne Insight on the Scriptures, Volume 2, ne Jihova Uetnes ta fạ‘i.
