LA A‘TATẠU‘ẠKIA rạnit ne ‘is noho e, rȧnte‘ ma lạgi ma te‘ ne te ‘e ‘on laloga, ma iạ mea‘mea‘ fakapạu. Ma ‘on aire, se Jihova, “ia ne rē lāgi ma rȧn te‘,” lelea‘ ne te‘ ne hanua fakma ke se jer mea‘mea‘ pạu het ‘e ta pạket tạnut. (Salamo 115:15; Aisea 40:15) Ka, Puk Ha‘a ‘ea: “Jihova ‘el se te‘ ne iris ‘atakoa ne he‘ se iag, se te‘ ne iris tūtū ne he‘ se ia ‘e aier ne ‘oris huga. Ia täla a‘sokoa pa ‘es ‘on lelea‘ ne fea se ia; ia la a‘fại tape‘ma se ‘oris ouou, ma la a‘mạuria iris.” (Salamo 145:18, 19) Re a‘häe se fuạg ne te ‘i! Iạ ne Fup‘ȧk Te, ka ‘atakoa sema ‘on ne‘ne‘i ‘el se ‘is ma iạ la pola a‘fại se ‘isa kepoi ka ‘is la “he‘ se ia ‘e aier ne ‘os huga.” ‘Is ạlạlum ne ‘is la pola hạifäegag ma ‘Ạitu ‘e ‘os ro‘ạitu!

² Kepoi ka ‘is pa ‘es la Jihova la a‘fại se ‘os ro‘ạitu, ma ‘is kop la ro‘ạit se iag la fakma se ‘on ‘amnạki. ‘Is la pola re te te‘is, kepoi ka ‘is ‘inea te ne Puk Ha‘a ‘ea hün se ro‘ạitu? Iạ ‘es‘ao pạu se ‘isa la ‘inea‘ia tē ne Puk Ha‘a ‘ea ‘e reko te te‘is, ne ro‘ạitu pola hạiasoagan ‘is la ‘ut a‘el se Jihova.

HÜN SE TESET TÄ ‘IS RO‘ẠIT SE JIHOVA?

³ Hün ‘es‘ao het ne ‘is kop la ro‘ạit se Jihova, po ‘e iạ ‘ihia ‘is la re la fakma sin. ‘On fäegat ne a‘ne‘ne‘ạkia ‘is ‘ea tape‘: “‘Au se kokon ‘e ta tē ‘esea: ka ‘e te‘ ne tē tūtū ‘atakoa, ‘e ro‘ạit ma faksor ne reag ‘esea ma ‘uạ‘uạ‘ạki, ‘au la rak‘ạkia se ‘Ạitu ‘omus far tē: ma huạg fürmariet ne leum ‘e ‘Ạitu, ka purer se‘ ‘e te‘ ne ‘os a‘häe ‘atakoa, täla ȧf‘ạkia ma kikia ‘omus huga ma ‘omus masmasaro ‘e Karisto Jisu.” (Filipai 4:6, 7) Te aier pạu, ‘is kat ‘oaf ra la a‘sạunoa‘ȧk fas‘ȧk tēet ne na vạhia se ‘isa ‘e Puer Purer ne lagi ma rȧnte‘!

⁴ Hün hoi‘ȧk het ne ‘is kop la ro‘ạit hạisokoag se Jihova po ‘e iạ a‘ne‘ne‘ȧk ‘os hạikạinagagat ma iạ. Kạumane‘ag lelei aire ‘eake hạifäegag ma ‘e avat ne iris pa ‘es ta tēet. Ka, kạumane‘ag lelei kokon‘ȧk le‘et se le‘et, ma ‘oria hạikạinagaga ‘ut la ne‘ne‘ kepoi ka iriạ la hạifäegag ma rak‘ȧk a‘taf te ne täe ‘e ‘oria a‘häe, ma ‘oria huga. Ma ‘is la pola atatạu‘ȧk re kạumane‘ag te‘ se ‘os hạikạinagagat ma Jihova ‘Ạitu ‘e te ‘e ‘on rerege. Ma hạiasoagat ne täe ‘e puk hete‘, ‘äe rak vạhiạ te ma‘oi ‘e reko te ne Puk Ha‘a ‘ea hün se Jihova, ‘on aga, ma ‘on ‘amnạki. ‘Äe hele‘uen la ‘inea‘ia iạ, la fakma ne iạ famör airet se ‘äeag. ‘E ‘os ro‘ạitu ‘is pola rak‘ạkia tē ne täe ‘e ‘os a‘häe ma ‘os huga se ‘os Ö‘fa faklạgi. ‘E ‘ou reag ne te ‘i, ‘äe la pola ‘ut la ‘el se Jihova.—Jemesa 4:8.

TES TÄ ‘IS KOP LA RE LA ‘ẠITU LA TȦR ‘OS RO‘ẠITU?

⁵ Tei ka Jihova a‘fại se te‘ ne ro‘ạitu? Re a‘häe se te ne iạ ‘ea se lelea‘ ‘Isireli ne toa‘noa ‘e av ‘on parofiat ta Ạisea: “Nōnō ka ‘aus röj‘ạkim ‘omus si‘u, ma gou kal a‘fại ra sin: ne ‘omus si‘u foh se ma ‘e toto.” (Aisea 1:15) Ma te ‘e ‘on rerege ne ‘is re, la pola re ‘Ạitu la se a‘fại se ‘os ro‘ạitu. Ma ‘on te ‘is kop la re, kepoi ka ‘is pa ‘es la ‘Ạitu la a‘fại ma tȧr ‘os ro‘ạitu.

⁶ Tēet ne pa ‘es la ‘is la re la ‘is la garue‘ạkia pilifi. (Mareko 11:24) ‘Apostol ta Paula fȧ‘: “‘Äna kepoi ka le‘et kat ‘es pilif ra, ma noanoa pau la ia la a‘värvär se ‘Ạitu, ko ia ne ‘ut‘utuof se ‘Ạitu, kop la ia la pilif ne ‘Ạitu täe, ka pilif tape‘ma ne ia täla nā tög se iris ne aoa ia.” (Hiperiu 11:6) ‘Os poag ne pilif aire ‘eake tä‘ma ‘e ‘os ‘ineag ne ‘Ạit mạurit ne a‘fại ma tög ‘os ro‘ạitu. Pilifi kel‘ȧk ‘e ‘os garue. ‘Is pola aier‘ạkia ‘os pilifi ‘e tē ne ‘is re ‘e te‘ ne terạni ‘e ‘os mạuri.—Jemesa 2:26.

⁷ Jihova pa ‘es tape‘ma ‘e ‘is la hạifäegag ma iạ ‘e ro‘ạitu ‘e aier ma vạivại ne ‘os huga. Tei ka ma ‘on hün het ‘is kop la vạivại ‘e avat ne ‘is hạifäegag ma Jihova? ‘E avat ne famori pola hạifäegag ma ta sạut, ne le‘ puret, ma iris kel‘ȧk ‘e‘ạkiga, po ‘e iris a‘häe‘ȧk fūag lamlam het ne famör ta fu e. Ma nonoj la ‘is la fakte‘ȧk pạu Jihova ‘e av ne ‘is hạifäegag ma iạ ‘e ‘os ro‘ạitu! (Salamo 138: 6) ‘On hün pạu heta te‘is, po ‘e ia ta “‘Ạitut ne ‘Atakoa se ma ‘on Ne‘ne‘i.” (Kamataga 17:1) ‘E avat ne ‘is ro‘ạit se ‘Ạitu, ‘is kop la re ‘e salat la kel‘ạkia ne ‘is ‘inea fūag het ne ‘is täe ‘e ‘on rerege ‘e ‘on muạ. ‘Os huạg vạivại la pola rue‘ȧk ‘is la ro‘ạit ‘e aier ne ‘os huga ma ‘is la hȧ‘ạkia ‘is ‘e ro‘ạitut ne rạu hö‘ȧk hạisokoga.—Mataio 6:7, 8.

⁸ Te hoi‘ạkit ne pa ‘es la ‘is la re la ‘Ạitu la a‘fại se ‘os ro‘ạitu, ‘os aga kop la salag ‘esea ma ‘os ro‘ạitu. Jihova pa ‘es la ‘is la na ‘os vahia la garue ‘e ‘os ro‘ạitu. La fakse, av het ne ‘is ro‘ạit ma ‘ea e, “‘Äe la nāam se ‘ạmisa, ‘e terạnit ‘e ‘i, ta ‘etemis tē la‘ā la tau mar,” ‘is kop la na vahiạ ‘e garuet ma ne ‘is pola re. (Mataio 6:11; 2 Tesalonaika 3:10) Ma kepoi ka ‘is ro‘ạit ma far hạiasoag la ‘is la vahiạ la röt‘ạkia hea‘hea‘ raksa‘a, ma ‘is kop la matạ‘ la hȧ‘ȧk ‘is ‘e te ne la faksaran ‘is. (Kolosa 3:5) Kat vȧh ra se te ne ‘ea vạhia la kop la re ‘e ro‘ạitu, ka ma ‘on sạio‘ hoi‘ȧk kop la tög.

TÖG NE SAIO‘ ‘E ‘ON REREGE ‘E REKO RO‘ẠITU

⁹‘Is la ro‘ạit se seia? Jisu rak‘ȧk se ‘on lelea‘ rak te la ro‘ạit tape‘ “‘otomis Ö‘fāat täe ‘e lạgi.” (Mataio 6: 9) Ma ‘is kop la ro‘ạit ma se Jihova ‘Ạitu ‘esea. Jihova pa ‘es la ‘is la kel‘ȧk ne ‘is fakte‘ȧk fūag ne ‘on Le‘ ‘eseat ma ne iạ ‘ese Jisu Karisto fu e. Fakma ne ‘is rak vạhia ‘e Väe 5 ta, Jisu fekạu‘ạkim se rȧnte‘ la togia ‘os agraksa‘a ma sại‘ạkia ‘is ‘e ala. (Jone 3: 16; Roma 5: 12) Iạ tä hil vạhia la Apei‘ạit Ti‘ut ma Gagaj Puret. (Jone 5: 22; Hiperiu 6:20) Ma, Puk Ha‘a ‘ea se ‘isa la ‘is la ro‘ạit ‘e as ‘on Jisu. Iạ ‘eag tape‘: “Gou tä sal ta, ka aier ta, ka mȧür ta: tā kat pō ra la leuag se Ö‘fā ta ‘e ta sal tū, ‘e gou ‘esea ma.” (Jone 14:6) Ma iạ la tȧr ma a‘fại ‘os ro‘ạitu kepoi ka ‘is ro‘ạit se Jihova iạ ‘esea het ‘e ‘on Le‘ ta.

¹⁰Tei ka nonoj la ‘is la ma ‘os kạinag rere het ‘e avat ne ‘is ro‘ạitu? ‘Igke‘. Jihova pa kat ‘es ra ‘e ta kạinag rere het, se ‘os si‘u ne se ‘os foro. Puk Ha‘a ‘ea ne la pola ro‘ạit ‘e kạinag rere tutu ma‘oi. ‘Is pola päe, hao, ne lo‘ fu ma fu. (1 Puk Asoat Se Puk ‘On Sau 17:16; Nehemaia 8:6; Taniela 6: 10; Mareko 11:25) Te ‘es‘ao aier ta, ‘os huga kop la noj ma ‘eake kạinag rere het ne famori la voi‘ạkia. ‘E avat ne ‘is garue, ne ‘is agtạu ma ta pefä‘ het ne sok ‘e hitim, ma ‘is ro‘ạit näe ‘e ‘os huga ‘e utut ma ne ‘is ‘e ‘on rerege. Jihova iạ a‘fại se ‘os ro‘ạit tape‘ ta, kop ma te airet iris ne kạlum ‘is kat ‘inea ra.—Nehemaia 2:1-6.

¹¹Tes täla ‘is la ro‘ait‘ạkia? Puk Ha‘a ‘ea tape‘: “Ne kepoi ka ‘is far‘ȧk ta tē ne fak ma se ‘on fiongaro, ma ia [Jihova] a‘fại se ‘isa.” (1 Jone 5:14) Ma ‘is pola far‘ȧk tēet ma ne la salag ‘esea ma ‘amnȧk ‘on ‘Ạitu. Tei ka ‘amnȧk ‘on ‘Ạitu la ‘is la ro‘ạit‘ạkia te ne ‘is kokon‘ạki? ‘I fakapau! ‘Os ro‘ạit se Jihova ia fakse ‘os hạihạifäegag ma kạumane‘ag ‘el het. Avat ne ro‘ạitu, ‘au la niguof ‘omus huga se ‘Ạitu. (Salamo 62:8) Iạ te nonojot la ‘is la far‘ia ‘at ha‘a, la hạiasoagan ‘is la re‘ia tēet ne nonojo. (Luke 11:13) ‘Is la pola far ‘on muạ‘ạkiga la ‘is la pola re‘ia hil te ‘atmại ma tape‘ma la vahiạ la tạria noanoa ne ‘is agtạu mar. (Jemesa 1: 5) Ma ‘e avat ne ‘is re‘ia ta agraksa‘at, ‘is la far‘ȧk la fạu‘ạkia ‘os sara ‘e rạu‘if ‘on Karisto. (Efeso 1:3, 7) ‘Eake ‘is la ro‘ạit‘ạkia ma te ne mou se ‘isa ma tä‘ma‘ie. Ka ‘e av ne ‘is ro‘ạitu ‘is la ro‘ạit‘ȧk tape‘ma iris ne tore—‘os kạunohoga ma iris ne titi‘ȧk ag‘esea ma ‘is.—Garue 12:5; Kolosa 4:12.

¹² Te ne mou se ‘Ạitu Jihova ta nonoj la ‘is la kokon‘ȧk mumuen ‘e ‘os ro‘ạitu. ‘Is la voivoi‘ạkia ma ‘uạ‘uạ‘ạkia iạ ‘e reko te‘ ne te lelei ne iạ re se ‘isa. (1 Puk Asoat Se Puk ‘On Sau 29:10-13) Jisu na vạhia ta a‘tatạu‘ạkiag het ‘e ‘on ro‘ạitut ne fȧ‘ vahia ‘e Mataio 6: 9- 13, ne iạ rak‘ȧk se ‘isa la ro‘ạit‘ạkia la as ‘on ‘Ạitu la ȧf‘ȧk la ma‘ma‘ ma ta‘ag ha‘ạkiag ne ‘on asa. Pure‘ag ‘on ‘Ạitu la leum ma ‘on rere la sok ‘e rȧnte‘ ka tape‘ma ‘e lạgi, ta tēet ne tohim sin ne rak‘ȧk vạhia. Ma ‘e vạhiag ne ‘on ‘eag ne te ‘es‘ao ‘i hün se Jihova ma täe Jisu ‘ea la ro‘ạit‘ạkia te ne mou se ‘isa. Avat ne ‘is na ‘Ạitu la muạ ‘e ‘os ro‘ạitu, ‘is kel‘ȧk ne ‘is ‘eake kokon‘ạkia ma te ne mou se ‘isa.

¹³Tapen ‘on roa ne‘ os ro‘ạitu? Puk Ha‘a kat foh av ra ‘on roa ne ro‘ạit näe ne ro‘ạit ofrạu. Ma ‘on kạinag ro‘ạit ma‘oi, la fakse ro‘ạit luạk het mumuạ la ‘ate ne ro‘ạit roa näe het ‘e avat ne ‘is rak‘ȧk ‘atakoa te ne täe ‘e ‘os huga se Jihova. (1 Samuela 1:12, 15) Ka, Jisu iạ fäeag a‘raksa‘ạkia lelea‘ ne kelkeleag fakrot ne re ro‘ạit roa ‘e muạ ‘on famori. (Luke 20:46, 47) Jihova kat kạu‘ȧk ra kạinag ro‘ạit tape‘ ta. Te ‘es‘ao ta, ta ro‘ạitut ne rēem ‘e ‘os huga. Ma täe ‘on‘on ‘on roa ne ro‘ạit ta täe kikia ‘e te ne pa ‘ese ma te ne soko.

¹⁴Tapen ‘os fa‘ ro‘ạitu? Puk Ha‘a a‘ne‘ne‘ạkia ‘is la “ro‘ạit hạisokoag,” la “marös ma kikia ‘e ro‘ạitu,” ma la “ro‘ạit ma se toak.” (Mataio 26:41, NW; Roma 12:12; 1 Tesalonaika 5:17) Te ne fȧ‘ sio ‘eake ‘on fuạga ‘is kop la ro‘ạit se Jihova ‘e te‘ ne av ‘atakoa ne terȧn ta. Ka Puk Ha‘a fas‘ȧk la ‘is la ro‘ạit hạisokoag ma ‘uạ‘uạ‘ȧk ma kikia Jihova ‘e reko te lelei ne iạ re se ‘isa, ma ‘is tuạn‘ȧk se iạ la na‘ia muạ‘ạkiga, furmaria, ma ne‘ne‘i. Ka ‘eake iạ te ne hö‘ furmariet la ‘is la ‘inea ne Jihova kat fu‘ạkia ra ‘on roa ma ‘on ti‘ ne ‘os pa hạifäegag ma iạ ‘e ro‘ạitu? ‘Is la kel‘ạkia ‘os ‘uạ‘uạ‘ạkiga se te a‘helav te‘isi ro‘ạitu, ma ‘is täla na av ma‘oi la ro‘ạit se ‘os Ö‘fa faklạgi.

¹⁵Hün se teset tä ‘is kop la ‘ea “Emen” ‘e vạhiạg ne ro‘ạit ta? Fäeag heta “emen” ‘on fuạga “i” ne, “la sok la fak ma sin.” Kel‘ạkiag ma‘oi ne täe ‘e Puk Ha‘a ‘ea ne iạ te nojot la ‘is la ‘ea “Emen” ‘e avat ne le‘et a‘vȧh ‘on ro‘ạit ta, ne ro‘ạit e famör ma‘oi. (1 Puk Asoat Se Puk ‘On Sau 16:36; Salamo 41:13) ‘Os ‘eag ne “Emen” ‘e vạhiạg ne ro‘ạitu, ‘is a‘fumou‘ạkia ne tē ne ‘is ‘ea leum ‘e ‘os huga. ‘E avat ne le‘et ro‘ạit ‘e muạ ‘on famör ma‘oi ma ‘is ‘ea “Emen”—a‘mea‘mea‘ ne a‘ti‘—‘e vạhiạg ne ro‘ạit ta, ‘is kel‘ȧk ne ‘is te ag‘esea ma te ne iạ ‘ea vạhia.—1 Korinita 14:16.

‘ẠITU TÖG TAPEN ‘OS RO‘ẠITU

¹⁶ Tei ka Jihova tög aier ‘os ro‘ạitu? ‘I, fakapau! ‘Is ma ‘os hün leleit la aier‘ạkia ne iạ ne “A‘fại se ro‘ạitu” täla togia ro‘ạit ‘on famör miliön ma‘oi ne re ‘e huạg aire. (Salamo 65:2) Jihova ia tög ‘os sại‘o ‘e sal tutu ma‘oi.

¹⁷ Jihova a‘es‘ao‘ạkia ‘on ‘agero ma ‘on lelea‘ ea‘ ne täe ‘e rȧnte‘ la togia ‘os ro‘ạitu. (Hiperiu 1:13, 14) ‘Is a‘fại se rogrog ‘on famör ma‘oi ne ro‘ạit ma far hạiasoag se ‘Aitu la ‘inea‘ia Puk Ha‘a ma kat roa ra ka iris hạipoag ma famör ea‘ ‘on Jihova. Te tape‘ ne soko aier‘ȧk ne ‘agero ta muạ‘ạkia garue hoa‘ marag ne Pure‘ag ta. (Kel‘ȧk Tē 14:6) Ro‘ạit ne ‘is na ‘e reko pa ‘es pạu ‘e hạiasoaga, Jihova täla togia ‘e ‘on la a‘es‘ao‘ạkiag ne ‘on famör e‘a la hạiasoagan ‘is.—Fäeag ‘Es Fuạga 12:25; Jemesa 2:16.

¹⁸ Jihova ‘Ạitu a‘es‘ao‘ȧk tape‘ma ‘on ‘at ha‘a ma ‘on Fäega, Puk Ha‘a, la togia ro‘ạit ne ‘on famör e‘a. ‘Os far ne ‘on hạiasoaga la tạria te a‘ru, iạ na se ‘isa muạ‘ạkiga ma ne‘ne‘i, ‘e reko hạiasoag ne ‘on ‘at ha‘a la togia ‘os ro‘ạitu. (2 Korinita 4:7) A‘ti‘ se, muạ‘ạkiget ne na la togia ‘os ro‘ạitu leum kikia ‘e Puk Ha‘a ne Jihova hạiasoagan ‘is la re‘ia hil te ‘atmại. Ma ‘on ut ne puk ma‘oi la pola hạiasoagan ‘is ‘e avat ne ‘is rakoa Puk Ha‘a ma hat‘ia puk fakKaristo la fakse puk hete‘isi. ‘Is la pola a‘häe‘ȧk te ‘es‘ao ne täe ‘e Puk Ha‘a ne ‘is a‘fại ‘e tạunạ‘ fakKaristo, ne tēet ne fa mafuạ fak‘at ne kạurotuag ta rak‘ạkim.—Kalatia 6:1.

¹⁹ Kepoi ka Jihova keleag la fep ‘e ‘on tög ne ‘os ro‘ạitu ma ‘is la se a‘häe ne iạ kal tög ra ‘os ro‘ạitu. Ka, ‘is la a‘häe‘ȧk ne Jihova la tög ‘os ro‘ạitu la fakma se ‘on ‘amnạki ma ‘e ‘on ava. Iạ ‘inea sema ‘os pa ‘ese ma iạ ‘inea a‘lelei se‘ te ne iạ la re‘ia. Av ma‘oi pạu iạ va‘ön‘ȧk ‘is la “far ma kikia, ao ma kikia, tüktük ma kikia.” (Luke 11:5-10) Ma ‘os huạg könös ‘e far te la pola kel‘ȧk se ‘Ạitu ne ‘os far te leum ‘e lal pạu ne ‘os huga ma ‘os pilifi aier. Te hoi‘ạkit, Jihova kop ma la tög ‘os ro‘ạitu ‘e salat ne kat taf ra se ‘isa. La fakse, iạ kop ma la tög ‘os ro‘ạitu hün se ta pefȧ‘ het ne soko ma iạ na ‘os ne‘ne‘ la tạria ka ‘eake iạ ‘ut‘ạkia pefȧ‘ heta.—Filipai 4:13.

²⁰ Nonoj la ‘is la ‘uạ‘uạ‘ȧk pạu se iạ ne Fup‘ạkia lạgi ma rȧnte‘ ma te‘ ne te ‘e ‘on laloga, ‘e reko iạ ‘el se te‘ ne iris ‘atakoa ne ro‘ạit se iạ ‘e sal nonojo! (Salamo 145:18) ‘E reko ro‘ạitu iạ te pumuet ma ‘is tạu la ro‘ạit hạisokoag. Ma kepoi ka ‘is re la faksin ma ‘is la pola ‘ut la ‘el pạu se Jihova Iạ ne A‘fại se ro‘ạitu.