PUK HA‘A kat ‘ea ra se ‘isa terạnit ne Jisu a‘su e. Ka, av ne ‘is sạkior se te ne fȧ‘ ‘e Puk Ha‘a ma ‘is la pola aier‘ȧk ne iạ kat a‘su ra ‘e huạl ne Tisempa.

‘Is la a‘häe se lȧg ta ‘e huạl ne Tisempa ‘e utut ne Jisu a‘su e ‘e Petlehema. Puk huạl ‘on lelea‘ Jiu, huạl ne Chislev ta (tatạu se Novempa/Tisempa) iạ huạl mạtitit ka uạsuạs pạu. Ma hulet ne tohim se Tebeth ta, ta (Tisempa/Janueri). Laloag ne av heta‘ag ‘e fạu ta, iạ mạtit pạu, ma av ‘e ‘on rerege sinou ta vil se ut lamlama. ‘Is la ‘io ne tes tä Puk Ha‘a ‘ea se ‘isa ‘e reko lȧg ta ‘e ut ta‘ag.

Fāat ‘e iris ne fạ‘ia Puk Ha‘a Esera kel‘ȧk ne huạl ne Chislev ta ‘inea ti‘ pạu ‘e reko ‘on lȧg mạtiti ma uạsusa. Avat ne rak‘ạki e ne famör ma‘oi ‘opoag ‘esea se Jerusalemi “‘e rȧn ruạghul ne ‘on siav ne hulet ne [Chislev]” ta, Esera rak‘ȧk ne “uạs ta malol…pau ma te‘ ne iris ‘atakoa rutrut a‘ti‘.” ‘E reko lȧg ta ‘e laloag ne av heta‘ag ne fạu ta, famör ne ‘op se täe ‘ea: “uạs ta malol pau ma ‘amis kat vahia ra la a‘usȧg.” (Esera 10:9, 13; Jeremaia 36:22) Tạuạg famör huȧ‘ sipi matạ‘ pạu iris ma ‘oris sipi ma kat pupuạ ra ‘e sisi ‘e te‘ ne pogi, ‘e avat ne huạl ne Tisempa hạ‘ue!

Avat ne Jisu a‘su e, famör huȧ‘ sipi ma ‘oris sipi nono kikia ‘e ufa ‘e pög ta

Puk Ha‘a ‘ea ne, famör huȧ‘ sipi nono kikia ‘e sisi, ma matmatạ‘ua ‘oris sipi ‘e pogit ne Jisu a‘su e. ‘On aire, te ne Luke fȧ‘ ‘e Puk Ha‘a kel‘ȧk ne av heta‘ag, famör huȧ‘ sipi “nono kikia ‘e ufa, ka matạ‘ ‘e pög ‘oris sipi” ne ‘eleaf se Petlehema. (Luke 2:8-12) ‘Is räe ne famör huȧ‘ sipi ‘eake seksek ‘e sisi ‘e rȧn ta ma tä‘ma‘ie, ka nono kikia ‘e ufa. Iris ma ‘oris sipi täe ‘e ufa ‘e pög ta. Tei ka ‘oris nohnoh ‘e sisi ne kel‘ȧk vạhia, hạitạuạg se lȧg mạtitit ma uạsuset ne täe ‘e Petlehema ‘e Tisempa? ‘Igke‘, ia kat hạitạuạg ra. Ma ‘is pola taf sin ne tē ne sok ‘e avat ne Jisu a‘su e, kel‘ȧk ne iạ kat a‘su ra ‘e Tisempa.*

Fäeag ‘on ‘Ạitu foar a‘nonoj pạu terạnit ne Jisu ala e, ka rak‘ạkia tē he his ‘esea hün se avat ne iạ a‘su e. ‘Iạ ho‘am se ‘os a‘häe fäeag ‘on Sạu ta Solomone: “Pumuạ se‘ as rog lelei ‘e ta lol pen‘i‘is tög a‘noa het; ma pumuạ se‘ terạnit ne ‘äe ala ‘e terạnit ne ‘äe a‘sū e.” (Le‘ Marag ta 7:1) ‘Is kat ferehit ra ne Puk Ha‘a sui‘ȧk a‘taf se ‘isa te ma‘oi hün se garue marag ‘on Jisu ma ‘on alaga ka te he his ‘esea hün se avat ne iạ a‘su e.

*  Te hoi‘ȧk ne sui‘ȧk a‘tafan, ‘io se rạupeap 176-9 ne Reasoning From the Scriptures, ne Jihova Uetnes ta fạ‘i.

← Kel se ‘on väe ta