1-3. (a) Ka ‘e rēko tese ta ö‘hön ta nā ‘on vahia la ‘on le‘ ta la ma‘ma‘? (e) Ka ‘e rēko tese tä Jihova pa ‘es famör agaga la ma‘ma‘ ma tes tä rue‘ạkia ‘is la nōnō ma‘ma‘ ma?

MUMUẠ la le‘ ta la la‘ se ta utut, ö‘hön ta matạ‘ la le‘ ta la kakou, ‘on hạ‘u la ma‘ma‘ ka fakeanean. Ö‘hön ta ‘inea ne ma‘ma‘a iạ tē pumuet se mȧür fakfor ne ‘on le‘ ta, ka iạ la kel‘ạkia tape‘ma ne iriạ ö‘ruạ tapene.

² ‘Os Ö‘fā faklạgi, Jihova, pa ‘es la ‘on lelea‘ e‘a la ma‘ma‘. ‘On Fäega ‘ea: “Se le‘et ne ag ma‘ma‘a, ‘äe täla no‘ạkia ‘ou ag ma‘ma‘a.” * (Salamo 18:26) Jihova hanis ‘e ‘isa; ma ‘inea ne ‘os la fe‘en la ma‘ma‘ la ‘es‘ao se ‘is.  Iạ pa ‘es tape‘ma la ‘on lelea‘ Uetnese la kel‘ạkia ta mạl lelei se iris ne tore la pō la iris la a‘häe ma fäeag‘ȧk ‘on ag lelei. ‘I, ‘os ag ma‘ma‘a ma ag lelei täla a‘kölör‘ạkia Jihova ka kal a‘masrag‘ȧk ra ‘on as ha‘a.—Isikeli 36:22; hat 1 Pita 2:12.

³ ‘Os ‘inea ne ‘Ạitu ‘oaf se famör ma‘ma‘a rue‘ạkia ‘is la ma‘ma‘. ‘Os hanisi se ‘Ạitu tä hele‘ue la ‘is ‘e‘ȧk iạ ‘e ‘os mạuri. Ma ‘is pa ‘es tape‘ma la nōnō ȧf‘ȧk ma ‘e ‘on hanisi. ‘Is täla sạkiroa hün het ne ‘is kop la ma‘ma‘, tes ta laloag‘ȧk ‘e ‘os ma‘ma‘a, ma ‘is la pō tapen la ma‘ma‘ ma kikia. Kạinag sạkior tē la pō la hạiasoagan ‘is la räe se ut ne ‘is kop la garue sin.

4, 5. (a) Ka tes ta hün het ne ‘is kop la ma‘ma‘? (e) Ka ma‘ma‘ ‘on Jihova no‘ȧk tapen ‘e tē ne iạ fup‘ạki?

⁴ Jihova rak‘ȧk tēan ‘is ‘e ‘on aga. ‘On Fäega hahan‘ȧk se ‘isa “la rakoa ‘Ạitu.” (Efeso 5:1) Te‘is hün het ne ‘is kop la ma‘ma‘: Jihova, ‘Ạitut ne ‘is agag sin ma‘ma‘ ka ha‘ ‘e te‘ ne tē ‘atakoa.—Hat Foh Ne Rạu‘ifi 11:44, 45.

⁵ Ma‘ma‘ ‘on Jihova fak ma se ‘on ag lelei ma‘oi ne kel‘ȧk ‘e ‘on fup‘ȧk tē. (Roma 1:20) Rȧn te‘ fup‘ȧk la hanuạ ma‘ma‘at se famori. Jihova fū‘ȧk ecological cycles la a‘ma‘ma‘an lȧg ta ma tạnu. Tape‘ma ma ‘on mạnmạn ne ‘is kal pō ra la kel ‘e ‘os maf rua ne hạiasoag se a‘ma‘ma‘ ne moaf ne la pō la mane‘ȧk ‘is. Sainisi garue‘ȧk kạinag mạnmạn riri‘i la a‘ma‘ma‘a lol jī ma tē ne la a‘pearperan rȧn te‘ ‘e rēko a‘häe ma ag ‘on famori fak se pu‘a ma a‘häe ke se ia. Kel‘ȧk ne ma‘ma‘a, iạ tē ‘es‘aot se iạ ne “Rēem rȧn te‘.” (Jeremaia 10:12) ‘Is tạu la a‘häe a‘mah se ‘os ma‘ma‘a.

6, 7. Ka Foh ‘on Mosese a‘mah‘ȧk tapen ne iris ne titi‘ȧk se Jihova kop la ma‘ma‘?

 ⁶ Hün hoi‘ạkit la ‘is la ma‘ma‘ ma kikia ta Jihova,‘e rēko ‘os Puer Purere, pa ‘es la titi‘ạkiga se ia la a‘sok ‘e ma‘ma‘a. Foh ne Jihova nā se lelea‘ Isireli, ‘e rēko ma‘ma‘a ma titi‘ạkiga iriạ la‘oag‘esea. Foh ta a‘luạk ne Terȧn ne Fạu‘ạkiạg ta ape‘ạit ta kop la kakạu a‘ruạ. (Foh ne Rạu‘ifi 16:4, 23, 24) ‘Ape‘ạit ne muạ‘ạkia garue ta kop la ruk ‘oris si‘u ma ‘oris lā mumuạ la a‘sok ta rạu‘ifit se Jihova. (Sại‘ạkiga 30:17-21; 2 Puk Asoat se Puk ‘on Sạu 4:6) Foh ta tape‘ma sui‘ạkia kạinag tē 70 ne pō la a‘pearper‘ȧk ‘oris foro ma kato‘ag ne lelea‘ ‘Isirel ma‘ma‘a la se la‘ sin. Iris ne a‘pearpear‘ȧk, kal ‘es väeag ra ‘e tē ne mou se titi‘ạkiga—ka ‘e fūfū ‘on rereag kepoi ka iris kat matạ‘ ma la iris la al‘ȧk. (Foh Ne Rạu‘ifi 15:31) Le‘et ne fesiạ‘ȧk la a‘ma‘ma‘ȧk, ta‘ag laloag‘ȧk kakạu ma sopoa ‘on hạ‘u, iạ kal “hat hoi‘ȧk ra la famör ‘on ‘Ạitu.”—Hatag Ne Famori 19:17-20.

⁷ Aier ne ‘is tokana ‘e fȧn foh ‘on Mosese, ka iạ hạiasoagan ‘is la ‘inea a‘häe ‘on ‘Ạitu fūfū ‘on rereag. Foh ta a‘mah‘ȧk ne iris ne titi‘ȧk se ‘Ạitu kop la ma‘ma‘. Jihova kat fürfür ra. (Malakai 3:6) Iạ la aier‘ȧk ‘is kepoi ka ‘os titi‘ạkiga se iạ la “ma‘ma‘ ka kat ‘es tē pearpear ra.” (Jemesa 1:27) Iạ tē pumuet la ‘inea‘ia tē ne ‘Ạitu pa ‘es ‘e ‘isa.

8. Ka sal tese tä Jihova pa ‘es la ‘is la ma‘ma‘?

⁸ Fäeag ta ma‘ma‘a ‘e Puk Ha‘a kat ‘ạligen ma ‘os la ma‘ma‘ fakfor. ‘Ạitu pa ‘es la ‘os mạuri la ma‘ma‘. Ma ‘on sal he häk Iạ pa ‘es la ‘is la ma‘ma‘ ta‘ag— fak‘at, ‘e aga, a‘häe ma fakfor. ‘Is la sạkior se ne tes ta laloag‘ȧk ‘e tē ma‘ma‘ häke.

9, 10. Ka tes ta ‘on fuạg la ‘is la ma‘ma‘, ma tes ta lelea‘ rot fakKaristo aire kop la hȧ‘ȧk?

 ⁹ Ma‘ma‘ fak‘ata. Titi‘ạkiạg ma‘ma‘a ‘on fuạga titi‘ạkiạg aire ne kat la‘oag‘esea ra ma titi‘ạkiạg sioksiko. ‘E avat ne lelea‘ Isireli rou Papiloni la hö‘ se Jerusalemi, hahan‘ȧk se irisa: “‘Ạu la hotoamus ‘e ta‘ag. Ma ‘ạu se ‘atạk se ta tē se ma‘ma‘at! . . . Ma ‘ạu la ma‘ma‘.” (Aisea 52:11) Lelea‘ Isireli hö‘ hoi‘ȧk se ‘oris hanua la a‘leleia ‘oris titi‘ạkiga se Jihova. Titi‘ạkiạg te‘is kop la ma‘ma‘—ka la se laloag‘ȧk tē pearpear fak se rak‘ȧk tē sioksiko, ma ag fakhanuạ ne rot Papiloni.

¹⁰ ‘E ‘on ‘i‘i, lelea‘ rot fakKaristo aire kop la matạ‘ la se mane‘ạkia iris ‘e titi‘ạkiạg sioksiko. (Hat 1 Korinita 10:21.) ‘Is kop la matạ‘ a‘lelei ‘e rēko ‘is kạl sema ‘e rot a‘sioksiko. Hanuạ ma‘oi, ‘oris aga, ma kato‘ag fakhanua la‘oag‘esea ma rak‘ȧk tē ne rot a‘sioksiko la fak se, tēet nōnō mȧür ma ‘e avat ne ‘is ala. (Le Marag Ta 9:5, 6, 10) Lelea‘ rot fakKaristo aire hȧ‘ȧk ‘e ag ma mā ne rot a‘sioksiko laloag‘ạki e iris. * ‘Is kal fue‘ ra la hashasa ne leum ‘e iris ne tore la mane‘ạkia titi‘ạkiạg ma‘ma‘a ne täe ‘e Puk Ha‘a.—Garue 5:29.

11. Ka tes tä laloag‘ȧk ‘e ag ma‘ma‘a, ma ‘e rēko tese iạ tē pumuet?

¹¹ Ag Ma‘ma‘a. Ag ma‘ma‘a laloag‘ȧk ‘os la hȧ‘ȧk ne ‘is ‘e te‘ ne kạinag mös ‘e‘eve. (Hat Efeso 5:5.) Iạ tē pumuet la ‘os aga la ma‘ma‘ ma kikia. ‘Is täla räea ‘e väe ne tohiof sin ‘e puk te‘is, ne ‘os la nōnō ȧf‘ȧk ma ‘is ‘e hanis ‘on ‘Ạitu ‘is kop la “joniomus ‘e mös ‘e‘eve.” Ka iris ne kat huạha‘ ra ‘e a‘sok ne ag te‘is “kal a‘mou ra ‘e Pure‘ag ‘on ‘Ạitu.” (1 Korinita 6:9, 10, 18) ‘E maf ‘on ‘Ạitu, iris ‘i täe ‘e laloag ne “iris ne ag riạria.” Kepoi ka  iris kal ma‘ma‘ ra ma, “tē ne iris pō . . . ruạ ne ala.”—Kel‘ȧk Tē 21:8.

12, 13. Ka a‘häe ma aga la‘oag‘esea tapen, ma ‘os a‘häe la pō la ma‘ma‘ tapen?

¹² A‘häe Ma‘ma‘a. A‘häe ta muạ‘ạkia ‘os aga. Kepoi ka ‘is fue‘ la tē raksa‘a la sur se ‘os a‘häe ma huga, ‘e ‘on fakmuri ‘is la pō la a‘sok ta ag raksa‘at. (Mataio 5:28; 15:18-20) Ka kepoi ka ‘is a‘häe se tē lelei ne ma‘ma‘a, tē te‘is täla rue‘ạkia ‘os aga la ma‘ma‘ ma kikia. (Hat Filipai 4:8.) Ka ‘os a‘häe la pō tapen la ma‘ma‘? Sal het la ‘is la sạkior sin, ta ‘os la hȧ‘ȧk ‘e tēfak‘oaf‘oaf ne a‘pearpear‘ȧk ‘os a‘häe. * Ka, ‘is la pō la a‘hoia ‘os a‘häe ‘e tē ma‘ma‘a ‘e rakoag ne Fäeag ‘on ‘Ạitu.—Salamo 19:8, 9.

¹³ La nōnō ma ‘e hanis ‘on ‘Ạitu, iạ tē pumuet la ȧf‘ȧk a‘lelei ‘os mȧür fak‘ata, aga, ma a‘häe la ma‘ma‘. Sal ne laloag‘ȧk ma‘ma‘a täla sạkior a‘lelei ‘e väe his ne puk te‘. ‘On häk ne sala ‘is täla sạkior sin—ma‘ma‘ fakforo.

14. Ka ‘e rēko tese ta ma‘ma‘ fakforo kat täe ra se ‘isa ‘esea?

¹⁴ Ma‘ma‘ fakforo täe kikia se ‘os matạ‘ a‘lelei ne ‘os foro ma ‘os nohoga la ma‘ma‘. Ka te ka iạ kat noj ra la ta le‘ hoi‘ạkit la kokon‘ạkia ‘os ma‘ma‘a? ‘Is ne agag se Jihova ‘inea ne tē te‘is kat aier ra. Fak se tē ne sui‘ȧk ma vȧh se, Jihova a‘mah‘ȧk ‘os ma‘ma‘a ‘e rēko iạ la ‘es‘ao se ‘isa, ka tape‘ma iạ kel‘ạkia ‘on ma‘ma‘a. Rē a‘häe se kel‘ạkiạg het ne täe ‘e kamatag ne väe te‘. Kepoi ka le‘ ta keleag pearpear, sar ta la keu se ‘on o‘o‘i. ‘Is kal ‘oaf ra la ‘os kelkelega ne aga la ho‘am ta as raksa‘at se ‘os Ӧ‘fā faklạgi ne la mane‘ȧk rog hegut ne ‘is marag‘ạkia.  Fäeag ‘on ‘Ạitu ‘ea: “Ma ‘ạmis kat nānā ra se famori ta hū ne safeiạg ‘e ta tē ‘esea, la tā se fakmerea ‘otomis garue agaga. Kane fak ma ne ‘ạmis lelea‘ garue ‘on ‘Ạitu.” (2 Korinita 6:3, 4) Ka ‘is la pō tapen la ma‘ma‘ fakfor?

15, 16. Ka tes ta laloag‘ȧk ‘e ‘os la noh ma‘ma‘a, ma ‘os hạ‘hạ‘u noj la tapen?

¹⁵ ‘Os noh ma‘ma‘a ma kelkelega. Aier ne ‘os ag fakhanua ma ‘os nohnoho kat tatạu ra, ka ‘is garue‘ȧk sopo ma tạnu la kakạua ‘is ma ‘os lele‘a la ma‘ma‘. ‘Os la noh ma‘ma‘a ma kelkelega laloag‘ȧk ‘os sor ne ‘os ‘uhapa ‘e sopo ma tạnu mumuạ la ‘ā tē ma garue se tēla‘ā, ne vạhiạg ne garue‘ȧk ne rī la‘oga ma jen ne ta napin ‘on ta le‘ mea‘mea‘ he. Sor ne ‘os ‘uhapa ‘e sopo ma tạnu pärea ‘os mạuri ‘e ‘af‘afa ‘on rereag. Pär  tape‘ma ‘is ‘e mạnmạn riri‘ ne ho‘am ‘af‘afa ma sana. La fak se Isireli ‘e ‘on mumua, tē ne rī la‘oaga ne pearpera nonoj la fạm kepoi ka kat ‘es rī la‘oag tạn ra.—Nā Hoi‘ạkiạg Ne Foho 23:12, 13.

¹⁶ ‘Os hạ‘u tape‘ma kop la sop ‘e te‘ ne ava la pō la ma‘ma‘ ka keleag lelei. Hạ‘ ‘on ta le‘ rot fakKaristo kal a‘noa ra la tög a‘noa ne kop la hạ‘ fo‘out, ka ‘on hạ‘u noj la keleag lelei, ma‘ma‘ ka fak‘ag. (Hat 1 Timoti 2:9, 10.) ‘E utut ma ne ‘is ‘e ‘on rerege ka ‘os kelkelega la “a‘keleag leleia puer‘ȧk ‘on ‘Ạitu, ‘os A‘mạurige.”—Taito 2:10.

17. Ka ‘e rēko tese ta ‘os rī nohoga ma lag pā kop la ma‘ma‘?

¹⁷ ‘Os rī nohoga ma lag pā. ‘Os rī kal a‘noa ra la ti‘ ne keleag lelei sirien, ka tē fita‘ ta la ma‘ma‘, te‘ ne tē fūfū‘ȧk a‘lelei se ‘ou pōpō heta. Motokā ne ‘is garue‘ạkia se tạunạ‘i ma garue marag ta noj la ma‘ma‘ ‘e ‘on laloag heta ma sisi tape‘ma. ‘Is la a‘häe‘ȧk ne rī ma‘ma‘a ma lag pā ma‘ma‘a uetnes‘ȧk ‘Ạitut ne ‘is titi‘ȧk se. ‘E rēko ‘is rak‘ȧk se famori ne Jihova ‘Ạitu ma‘ma‘ ma iạ täla “a‘raksa‘ạki e iris ne a‘raksa‘ạkia rȧn ta,” ma avat ‘elemea la ‘on Pure‘ag ta la a‘leleia rȧn te‘ la parataisi. (Kel‘ȧk Tē 11:18; Luke 23:43) Ta ‘on‘on ‘is pa ‘es la ‘os rī nohoga ma lag pā la ma‘ma‘ la mạl lelei het se iris ne tore, kel‘ạkia ne ‘is tape‘ma ososia ‘is se rȧn fo‘ou ta.

18. Ka ‘is kel‘ȧk tapen ne ‘is ‘e‘ȧk Rī ne Pure‘aga?

¹⁸ ‘Os ut ne titi‘ạkiga. ‘Os hanisi se Jihova ta rue‘ạkia ‘is la kel‘ȧk ‘e‘ạkiga se Rī ne Pure‘aga, utut ne titi‘ạkiạg aire a‘soko e. ‘E av ne iris ne ‘is ‘ihi leum se ‘os tạunạ‘i ‘is pa ‘es la iris la ‘oaf se ‘on ma‘ma‘ heta. ‘Os la a‘ma‘ma‘ ma a‘leleiạg ne Rī ne Pure‘aga hạiasoag se ‘on keleag lelei. Ma tape‘ma iạ kel‘ạkia ‘os ‘e‘ạkiga. Iạ tē a‘oaf huget la nā av se a‘ma‘ma‘a ma “a‘leleiạg” ne utut ne titi‘ạkiga a‘soko e. (2 Puk Asoat Se Puk ‘On Sạu 34:10)  Muạ‘ạkiạg ‘eseat ma garue‘ȧk se utut ne ‘is tạunȧ‘ se kato‘aga ma tạunȧ‘ titi‘u.

19. ‘Os la matạ‘ a‘lelei se ‘os mȧür fakforo, tes ta ‘is nonoj la hȧ‘ȧk ma Puk Ha‘a hạiasoagn tapen ‘is ‘e tekäe te‘?

¹⁹ ‘Os la ma‘ma‘ fakfor ma kikia, ‘is kop la hȧ‘ȧk ‘e ag ma garue pearpera, la fak se hạ‘i, garue‘ȧk a‘sirsir ne tē ‘ona, ma vại ‘ona ne tạku kat aier‘ȧk ra la a‘es‘av‘ȧk. Puk Ha‘a kat sui‘ȧk a‘riri‘ ‘atakoa ra te‘ ne kạinag ag ma garue pearpera ne sok a‘ti‘ ‘e ‘on ‘i‘i, ka iạ laloag‘ȧk muạ‘ạkiạg ne hạisaoagan ‘is la pō la kel se räe ‘on Jihova se kạinag ag ma garue ‘i. ‘E rēko ‘is ‘inea räe ‘on Jihova, hanisi rue‘ạkia ‘is la a‘sok tēet ne iạ värvär se. ‘Is la sạkior se muạ‘ạkiạg fak Puk Ha‘ liạm.

20, 21. Ka Jihova pa ‘es la ‘is la sại ‘e garue tese, ma hün se tese ‘is noj la noh tovavhiạn?

²⁰ “Ko ‘ạus ne gou hanis sin, ‘e rēko ‘is pō se‘ea te‘ ne fäeag porȧk ‘i, lelei ke la ‘is la a‘ma‘ma‘ạkia ‘is ‘e te‘ ne tē ‘atakoa ne a‘pearpear‘ạki e ‘os foro ma ‘os ata, ma ‘atakoa‘ạkia ‘os ha‘ag ne ‘isa ‘e rēko ‘os fea se ‘Ạitu.” (2 Korinita 7:1) Jihova pa ‘es la sại‘ạkia ‘is ‘e tē ne la a‘pearperan ‘os mȧür fakforo, mȧür fak‘ata ma ‘os a‘häe.

²¹ Puk Ha‘a a‘mah‘ȧk a‘lelei hün het la “a‘ma‘ma‘ạkia ‘is ‘e te‘ ne tē ‘atakoa ne ‘pearpear‘ạki e ‘os foro ma ‘ata.” Rē a‘häe se 2 Korinita 7:1 ‘ea: “‘Is pō se‘ea te‘ ne fäeag porȧk ‘i.” Ka tes ta fäeag porȧk ‘i? La fak se utut ne ‘is sạkior vȧh, Jihova porȧk: “Ma gou täla a‘sokoa ‘ạus, Ma gou täla ‘omus ö‘fā.” (2 Korinita 6:17, 18) Rē a‘häe se: Jihova fäeag porȧk la matạ‘ ma hanis ‘e ‘äe la fak se ta ö‘fā mäeav hanisi se ‘on le‘ ta. Jihova la a‘sok ‘on fäeag porạki kepoi ka ‘äe la hȧ‘ȧk ‘e tē ne la  a‘pearperan ‘ou “foro ma ‘ata.” Iạ la tē sesevat la fue‘kia ta ag ma garue kelea‘efakina la mane‘ạkia ‘ou hạikạinagaga ma Jihova!

22-25. Ka muạ‘ạkiạg fak Puk Ha‘ tese pō la hạiasoagan ‘is la hȧ‘ȧk ‘e ag ma garue pearpera?

²² “‘Äe la ‘oaf se Jihova, ‘ou ‘Ạitu, ‘e ‘ou huạg ‘atakoa, ma ‘e ‘ou ‘at ‘atakoa ma ‘e ‘ou a‘häe ‘atakoa.” (Mataio 22:37) Jisu ‘ea ne iạ fäeag fas‘ạkit ne ti‘ ka pumuạ. (Mataio 22:38) Kạinag hanis ne ‘is noj la nā se Jihova. ‘Os la hanis ‘e iạ ‘e ‘os ‘at ‘atakoa, huạg ‘atakoa ma a‘häe ‘atakoa, ‘is kop la hȧ‘ȧk ‘e garue ma ag ne la a‘luạk ‘os mạuri ma mane‘ạkia ‘os a‘häe lelei.

²³ “[Jihova] tä nānā, se te‘ ne lelea‘ ‘atakoa, mạuri, ma rạgi, ma te‘ ne tē ‘atakoa.” (Garue 17:24, 25) Mạuri tēfakhanis ‘on ‘Ạitu se ‘is famori. ‘Is hanis ‘e iạ ne Nā tē, ma ‘is pa kel‘ạkia ‘os ‘e‘ạkiga se tēfakhanis ta. ‘Is hȧ‘ȧk ‘e ag ma garue ne raksa‘ se ‘os mạuri ‘e rēko ‘is ‘inea ne ag ‘i kat ‘e‘ȧk ra tēfakhanis ta mạuri.—Salamo 36:9.

²⁴ “‘Äe la hanis se ‘ou kạinaga la fakruạ ma ‘ou hanisi se ‘äeag.” (Mataio 22:39) Ag ma garue pearpear ne le‘et a‘soko kat täe ra se iạ ‘esea het ka täe tape‘ma se iris ne tore. Kel‘ạkiạg het, raksa‘ ne hạ‘i la pō la täe se le‘ se hȧ‘ ta ‘e rēko ‘on la huạg ne ạs ne sikā ‘on le‘et ne hạ‘i. Le‘et ne a‘rū‘ạkia iris ne tore kaoa fas‘ȧk tē ‘on ‘Ạitu ‘e ‘on la hanis se ‘on kạinaga. Ma tape‘ma ‘on hanisi se ‘Ạitu ‘eake tē aire.—1 Jone 4:20, 21.

²⁵ “‘Ạu la hahan‘ȧk se irisa, la iris la noh a‘fại se gagaj muạ‘ȧk tē ma gagaj ‘es pure.” (Taito 3:1) Hanuạ ma‘oi, a‘es‘av‘ȧk ne mạ‘us ‘ona kao foh ne hanue ta. Ka lelea‘ rot fakKaristo aire kat garue‘ȧk ra mạ‘us ‘ona.—Roma 13:1.

26. (a) Ka tes ta ‘is noj la rē la ȧf‘ȧk ma kikia ‘is ‘e hanis ‘on ‘Ạitu? (e) Ka ‘e rēko tese ‘os la ma‘ma‘ ma kikia ‘e maf ‘on ‘Ạitu salat se mȧür lelei ta?

 ²⁶ ‘Os la ȧf‘ȧk ma kikia ‘is ‘e hanis ‘on ‘Ạitu, ‘eake la ma‘ma‘ ma ‘e sal he his ma tä‘ma ‘ie ka la ma‘ma‘ ma kikia ‘e te‘ ne tē ‘e mȧür te‘. Rou ne ag ma garue ne la a‘pearperan ‘is ‘eake tē vavhine, ka ‘is la pō sema. * Kat ‘es ra ta mȧür a‘helavat, ‘e rēko Jihova gat ke av rak‘ȧk tēan ‘is la ‘is la pō ‘on ‘es‘ao. (Hat Aisea 48:17.) Tēet ne pumuạ se‘, iạ ho‘am ‘ofa se ‘isa ‘e rēko ‘is tạupir se Jihova ‘e ‘os la ma‘ma‘a ma ‘is nōnō ȧf‘ȧk ma ‘e ‘on hanisi.