‘Os huga rū ‘e avat ne le‘et ‘e ‘os kạinaga ne kạumane‘ag ‘elet ‘ut‘ȧk ‘e laloag ne kạurotuạg ta ‘e rēko iạ kat huạha‘ȧk ra ‘on ag raksa‘a. ‘Os räe se muạ‘ạkiạg fak Puk Ha‘a ‘e tekäe hete‘, täla kel‘ạkia ne tapen ‘on lal ne ‘os hanisi se Jihova ma ‘os huạg aire se ‘on fūfū‘ȧk tē. * ‘Is täla hạifäegag se tē ne ‘is a‘mou sạisại‘o.

Ka tes tä ‘os räe se iris ne ‘ut‘ȧk vạhia? Puk Ha‘a ‘ea: “‘Ạu se nonoag ‘esea ma ta le‘ ne iạ he‘ la sạsigit, ka iạ mös ‘e‘ev, ne küm tē, ne ‘ạit se tupuạ‘, ne fäefäeag sạm, ne a‘mou ‘oan, ne teak tē a‘ne‘ne‘: la se hele‘ la ‘ạus la ‘ā tē ma ta le‘ tapiạ‘.” (1 Korinita 5:11) ‘Ea tape‘ma se iạ “ne kat noh a‘mou ra ‘e puer‘ȧk tē ‘on Karisto”: “‘Ạu se a‘sok iạ se ‘omus rī, ne Rē ta ‘uạ‘uạ‘ȧk se ia: ko ‘äna le‘et ne rē ta ‘uạ‘ȧk se ia, iạ kạu ma ‘on garue raksa‘a.” (2 Jone 9-11) ‘Is kal tēag‘esea ra ma iris ne la hạifäeag‘ạkia tē fak‘ata ma irisa. The Watchtower ne 15 Sepitempa, 1981, rạu peap 25, ‘ea: “Fäeag he ta ‘Noa‘ia’ se ta le‘et iạ la pō la ta huạlā mumuet ne la kamatan ta hạifäegagat ne kop ma la hele‘ la ‘ou kạumane‘agat. Te ka ‘is ‘oaf la ‘is la famör mumuạ ne la a‘sok ta hạikạinagagat ma ta le‘et ne ‘ut‘ȧk vạhia?”

Ka te ka nonoj la ‘is la a‘sousou pạua ‘is ‘e ia? ‘I, se hün ma‘oi. ‘On tā, iạ kel‘ạkia ‘os aire se ‘Ạitu ma ‘on Fäega. ‘Is tovavhiạn se Jihova ‘eake ‘e av ne vavhina e ka tape‘ma ‘e avat ne noanoā e. ‘Os hanisi se ‘Ạitu rue‘ạkia ‘is la tovavhiạn se te‘ ne ‘on foho, ma la ‘inea‘ia ne iạ ‘atakoa ka ag hanis ma ‘on foho nāam ‘es‘ao ti‘ut. (‘Ạisea 48:17; 1 Jone 5:3) ‘On rue, ‘os kat hại‘uliạg ma iris ne kat roua ra ag raksa‘ ne iris rērē, iạ päregat se ‘isa ma iris ne tore ‘e kạurotuạg ta la se a‘pear­peran ‘oris fūfū ma ‘Ạitu ma ‘oris aga, ma hạiasoagan la sasap se as lelei ne kạurotuga. (1 Korinita 5:6, 7) ‘On folu, ‘os la fūmou se muạ‘ạkiạg ne Puk Ha‘a la pō la ‘es‘ao se iạ ne ‘ut‘ạki. Ka  ‘os la hạitokoag ne rē puer ‘on iris komiti ne puer‘ȧk tē, iạ la pō la täe se huạg ‘on iạ ne rē‘ia tē sar ta ka kat seminte tȧr ‘e ra hạiasoag ‘on fā mamfua ne nā ‘oris vahia la hạiasoagan iạ. ‘E ‘os toak‘ȧk ne ‘os hạikạinagag lelei ma iris ne ‘is hanis sin, iạ la pō la hạiasoag iạ la leum la “‘in‘inea se iạ,” ma la räe se ‘on mah ne tē sarat ne iạ rē, ma la rue se‘ la ho‘im se Jihova.—Luke 15:17.

Ka tapen se kepoi ka ‘os kạinag ‘elet ‘ut‘ȧk? Kepoi ka tē te‘is sok, hại‘eleag ‘on iris ‘e kạunohoag ta la pō la hele‘ la ȧsȧs airet se ‘oris huạg aire se foh ‘on Jihova. Ka tes ta iạ la rē se ‘on kạinag ‘elet ne ‘ut‘ȧk vạhia? ‘Is kat po ‘e ra la hạifäegag se te‘ ne tē ‘atakoa ne soko ‘e puk hete‘, ka ‘is la ‘io se ta tē ‘es‘ao he ruạ.

‘E av ma‘oi, iạ ne ‘ut‘ạki a‘mou noh ma ‘on kạunohoag ta ‘e rī ‘esea ma. ‘E rēko ‘on ‘ut‘ạkiga kat fū‘ạkia ra ‘on hạikạinagagat ma ‘on kạunohoag ta, ka ‘oris garue ma tē hoi‘ȧk ne mou se kạunohoag ta a‘sok ma kikia. ‘I, ka ‘e tē ne soko, iạ re puer la iạ la väea tētēag‘esea ‘on iạ ‘e pilif ne ‘on kạunohoag ta. Ma ta ‘on‘on, ne kepoi ka ‘is pā ‘es la kel‘ȧk ‘os huạg aire se Jihova ‘is kal pō ra la aier‘ȧk ta le‘et ‘e ‘os kạunohoag ta ne ‘ut‘ȧk vạhia la ‘es väeag ‘e tē ne la rē ma ‘os titi‘ạkiga se Jihova. La fak se avat ne kạunohoag ta ‘opoag‘esea se titi‘ȧk ne kạunohoga, iạ ne ‘ut‘ạki kal pō ra la ‘es väeag kepoi ka iạ täe ‘e ‘on laloga. Ka kepoi ka iạ ne ‘ut‘ạki iạ le‘ mea‘mea‘ het, ka nōnō ma se ö‘rua ta mou sin la muạ‘ạkia ma puer‘ạkia le‘ he ta. Ta ‘on‘on, ö‘ruạ mäeavhanisit la pō la ösös la a‘sokoa ta rak Puk Ha‘at ma le‘ he ta. *—Fäeag ‘Es Fuạga 6:20-22; 29:17.

‘E tē hoi‘ȧk ne soko, iạ ne ‘ut‘ạki kop ma kat noh ag‘esea ra ma ‘on kạunohoag ‘el pạu ta. Aier kop ma av ‘on re­reag iris kat pō ra la hạipoag a‘mama‘oi ‘e rēko ta tēet ne kop la a‘sok ‘e kạunohoag ta, ka kạinag hạipoag tape‘i nonoj la matạ‘ la se fa‘ hạipoag. Iris ne kạunohoag rot fakKaristo ka huạg aire kat rē siok‘ạkiạg ra la sui‘ạkia hün het ne famör ta ‘ut‘ạki la kelkeleag fak se tē ne iạ rē kat raksa‘ sir ra. Ka ‘oris huạg aire se Jihova ma ‘on kạutạunạ‘iạg ta rue‘ạkia iris la sasap la mou se fūfū‘ȧk tē ‘e fäeag ‘on ‘Ạitu hün se ‘ut‘ạkiạg ‘on ta le‘et. ‘Oris fūmou ‘e rēko ‘oris hanisit se Jihova iạ lelei se iạ ne a‘sokoa tē sir ta ma iạ la pō la hạiasoagan iạ la pō‘ia ‘es‘ao ne fäeag puer‘ȧk ne rē se ia. *—Hiperiu 12:11.