RESÖN 9
‘Ou Kạunohoag ta la Noh ‘Oaf‘oaf Tapen?
1. Hün se tese tä ‘inoso ‘es‘av pạu se kạunohoag ‘oaf‘ofa?
Rog heg ta leum ‘e Jihova, ‘Ạit ‘oaf‘ofat, ne pa ‘es la kạunohoga la ‘oaf‘oaf. (1 Timoti 1:11) Iạ ta kamatan ‘inoso. ‘Inos a‘lele ‘es‘av pạu se kạunohoag ‘oaf‘ofa ‘e reko iạ päregat ‘e avat ne iria putua ‘oria lä‘riri‘i. Famör fakKaristo kop la ‘e‘ȧk foh ne hanua, ‘e ut ne iris noh sin ‘e reko fȧ‘ as ne ‘inoso.—Hat Luke 2:1, 4, 5.
Tes ta räe ‘on ‘Ạitu ‘e reko ‘inoso? Iạ pa ‘es la mȧür fak‘inos ‘on ta faat ma hạnit la fumou. Jihova pa ‘es la vävän ta ma ‘on hạina la huạg aier le‘et se le‘et. (Hiperiu 13:4) Iạ fesiạ‘ se ufuạg ne ‘inoso. (Malakai 2:16) Ka iạ va‘ön‘ȧk famör fakKaristo la uf ma ‘inos hoi‘ȧk kepoi ka le‘et ‘e iriạ väe häk.—Hat Mataio 19:3-6, 9.
2. Tes ta vävän ta ma ‘on hạina kop la re le‘et se le‘et?
Jihova fup‘ạkia faat ma hạnit ma na väeag garue ne mou se ‘inoso la iria la hạigarueag. (Kamataga 2:18) Ma ‘e reko iạ tä filo‘ ne kạunohoag ta, iạ ta muạ‘ạkia, ‘e matạ‘ ne te fakfor ne mou se ‘on kạunohoag ta, ma rak‘ạkia se irisa ‘Ạitu. Iạ kat na‘ia ra ‘on ‘ofa la muạ hün ma se ‘on hanisi se ‘on hạina. Väväne ma ‘oris hạina kop la kel‘ȧk hanisi ma hại‘e‘ạkiạg iria. Ma ‘e reko vävän ‘atakoa ma ‘oris hạina ‘eake ‘atakoa, ma ‘oris rakoag ne hạifạu‘ạkiga, ta hü ne kạunohoag ‘oaf‘ofa.—Hat Efeso 4:31, 32; 5:22-25, 33; 1 Pita 3:7.
3. Teka ‘äe kop la roua ‘ou ‘inoso kepoi ka kat ‘oaf‘oaf ra?
Kepoi ka iriạ agtạu ma te noanoa ‘e ‘oria mȧür fak‘inoso ma iriạ kop la garue fe‘en la kel‘ạkia hanisi ‘e ‘oria hạireaga. (1 Korinita 13:4, 5) Fäeag ‘on ‘Ạitu kat aier‘ȧk ra väeag ne ‘inoso la ta teet ne la a‘leleia kạinag pefä‘ ne soksok se mȧür fak‘inoso.—Hat 1 Korinita 7:10-13.
4. Tes tä ‘Ạitu pa ‘es ‘e ‘ạus lä‘riri‘i?
Jihova pa ‘es la ‘ạus la noh ‘oaf‘oaf. Iạ ta na‘ia muạ‘ạkiạg ‘es‘av pumuet la ‘ạus haharagi la pola po ‘oaf‘ofa. Iạ pa ‘es la poto ma te ne sok ‘e mȧür ne ‘omus o‘o‘i la ‘es‘av se ‘ạusa. (Kolosa 3:20) Jihova pa ‘es tape‘ma la ‘ạu la ‘oaf‘oaf ‘e reko te ne ‘ạu re se iạ ne Fup‘ȧk te ma se ‘on Le‘ ta.—Hat Le‘ Marag Ta 11:9–12:1; Mataio 19:13-15; 21:15, 16.
5. ‘Ạus o‘o‘i, ‘omus lele‘a la po tapen ‘oaf‘ofa?
‘Ạus kop la garue fe‘en la na‘ia se ‘omus lele‘a tela‘a, ri, ma ‘oris hạ‘u. (1 Timoti 5:8) ‘Omus lele‘a ‘oris la poag ne noh ‘oaf‘ofa, ‘ạus kop la rak‘ȧk se irisa la hanis ‘e ‘Ạitu ma rak te ‘e iag. (Efeso 6:4) Mạl het ne ‘äe kel‘ȧk, ‘e ‘ou hanisi se ‘Ạitu la pola täe ka rue‘ȧk ‘on huga. Nono ka muạ‘ạkiga re ‘e Fäeag ‘on ‘Ạitu, ma iạ la pola re räe ne ‘ou le‘ ta la fak‘at.—Hat Nā Hoi‘ạkiag Ne Foho 6:4-7; Fäeag ‘Es Fuạga 22:6.
Lä‘riri‘i la po ‘on ‘es‘ao kepoi ka ‘is la ‘uạ‘uạ‘ȧk ma na fäeag ne la ane‘ne‘ạkia iris. Iris kop la a‘nonoj‘ạk ma fäeag puer‘ȧk. Muạ‘ạkiạg ‘i la pola pärea iris ‘e kạinag agat ne la mane‘ạkia ‘oaf‘ofat ne täe ‘e irisa. (Fäeag ‘Es Fuạga 22:15) Ka puer‘ạkit ne na kop la se sir foh ne mam‘as.—Hat Kolosa 3:21.
Jihova Uetnes ta tä pạnia puk he his ne fȧ‘ vạhiạ la hạiasoagan o‘o‘i ma ‘oris lä‘riri‘i. Te ne fȧ‘ ‘e puku ho‘am ‘e Puk Ha‘ heta.—Hat Salamo 19:7, 11.
