KU WA 9 GITUGUTU 2013
UBUDAGI
Icibutso c’Icabona yarokotse rya Honyabwoko ryagirirwa Abayahudi gishikirizwa ku mugaragaro mu Budagi
Icibutso c’Icabona yarokotse rya Honyabwoko ryagirirwa Abayahudi gishikirizwa ku mugaragaro mu Budagi
I SELTERS mu Budagi, icibutso c’umuhisi Max Liebster, umwe mu Vyabona vya Yehova yihanganiye umunyororo w’imyaka irenga itanu mu makambi y’itunatuniro y’Abanazi, carashikirijwe ku mugaragaro ku wa 21 Ruheshi 2013, muri Lautertal-Reichenbach. Umukuru w’igisagara be n’abandi bategetsi barashikirije icese icibutso mu birori vyari vyitabwe n’abanyagihugu bo muri ako karere be n’umupfakazi asigwa na Liebster, umupfasoni Simone Liebster, na we nyene akaba ari Icabona ca Yehova.
Bwa Muyahudi yaba mu Budagi mu kiringo c’intwaro y’Abanazi ya Hitler, umushingantahe Liebster yarafashwe na ca gipolisi c’Abanazi citwa Gestapo mu 1939 maze mu nyuma arabonera amabi mu makambi y’itunatuniro atanu atandukanye: i Sachsenhausen, i Neuengamme, i Auschwitz, i Buna be n’i Buchenwald. Umunani mu bo mu muryango wiwe bapfiriye muri ayo makambi. Muri abo harimwo se wiwe, akaba ari we yajanye umuvyimba wiwe mu kizu batuririramwo imivyimba c’i Sachsenhausen.
Muri ayo makambi, umushingantahe Liebster yarahahuriye n’abapfungwa bagenzi we, bano bakaba bari Ivyabona vya Yehova. Yarabatijwe araba Icabona ca Yehova inyuma y’aho arekuriwe mu 1945. Nk’uko vyanditse kuri kimwe mu vyapa biri ku cibutso ciwe, ukwizera kw’umushingantahe Liebster “kwaramuhaye inkomezi n’umwiyemezo vyatumye arokoka.” Yarabayeho gushika ashikanye imyaka 93 imbere y’uko apfa mu 2008.
Ku butumire bwo gushikiriza icese ico cibutso havuga ko umushingantahe Liebster “yari yarajijutse bimwe bikomeye ko ingingo ngenderwako za gikirisu zishobora gutuma abantu barushiriza kumera neza.” Wolfram Slupina, umuvugizi w’Ivyabona vya Yehova mu Budagi, avuga ati: “Turahimbawe no kuba umutima rugabo w’umwe mu bo dusangiye ukwemera yafashe impagararo yisunze ijwi ryiwe ryo mu mutima mu gihe c’ukwinubana gushingiye kw’idini uriko uribukwa. Iki cibutso mu vy’ukuri ni icemeza ububasha bw’ubutumwa bwo muri Bibiliya bw’amahoro n’ubumwe, ubwo Ivyabona vya Yehova bihatira kudahemukira.”
Aderese z’ahavuye amakuru:
Ku rwego mpuzamakungu: J. R. Brown, wo mu Biro bijejwe amakuru, tel. +1 718 560 5000
Mu Budagi: Wolfram Slupina, tel. +49 6483 41 3110
Raba kandi
AMAKURU AGEZWEHO
Ibirori vyo kwibuka Icabona ca Yehova yagandaguwe n’Abanazi
Ku wa 16 Nyakanga 2014, ikigo cashinze icibutso kiri i Brandebourg caratunganije ibirori bidasanzwe vyo kwibuka imyaka 75 iheze August Dickmann agandaguriwe mw’ibohero ry’i Sachsenhausen. Ni we muntu wa mbere yishwe ku mugaragaro n’Abanazi mu gihe c’Intambara ya kabiri y’isi yose, azira ko yanse kuja mu gisoda abitumwe n’ijwi ryiwe ryo mu mutima..
Ibirori vyo kwibuka Ivyabona vya Yehova vyabereye mw’ibohero ry’i Gusen
Ku wa 13 Ndamukiza 2014, harabaye ibirori vyo gushira ahabona ikimenyetso co kwibuka Ivyabona 450 Abanazi bapfungiye mw’ibohero ry’i Mauthausen n’iry’i Gusen muri Otrishe.
AMAKURU AGEZWEHO
Richard Rudolph yarapfuye afise imyaka 102
Richard Rudolph yapfunzwe imyaka irenga 19 mu gihe c’intwaro y’Abanazi hamwe n’iy’Abakomunisita azira ukwemera kwiwe.