KU WA 5 MUNYONYO, 2021
UBURUSIYA

Kwiyegereza Yehova birafasha umuvukanyi Aleksey Yershov kudacika intege

VUZA

Ivyabaye n’igihe vyabereyeko

Vuba sentare ya Severskiy izosoma urubanza rw’umuvukanyi Aleksey Yershov. * Umushingwamanza yasavye ko yocirwa umunyororo w’imyaka itanu
Ku wa 22 Ruheshi 2021

Urubanza rwiwe rwarashinzwe muri sentare y’i Severskiy yo mu karere ka Tomsk
Ku wa 30 Ntwarante 2021

Aleksey yaragirijwe icaha bafatiye kw’ividewo yafashwe n’umuntu yamaze umwaka yigira ngo ariko ariga Bibiliya
Ku wa 14 Mukakaro 2020

Inyamiramabi (zikorera mu rwego rwitwa FSB) hamwe n’abakorera mu rwego rw’iperereza barateye Aleksey bamara amasaha indwi bariko barasaka inzu yiwe. Baratwaye udukarata twa banki, utwuma two mu buhinga bwa none, Bibiliya, impapuro z’inzira hamwe na routeurs za Wi-Fi

Amakuru amwerekeye

Aleksey Yershov

Yavutse: mu 1953 i Seversk (mu karere ka Tomsk)

Ibimuranga: Se wiwe yapfuye mu mwaka Aleksey yavukiyemwo. Yarezwe na nyina wiwe. Yarabaye umu enjeniyeri yongera yigisha kw’ishure ry’imyuga

Mu 1976, yarubakanye na Lyudmila. Bafise abana babiri

Inyuma y’aho umwe mu banyeshure yigisha amutumiriye kw’ikoraniro ry’Ivyabona vya Yehova, Aleksey yaciye ashaka kwiga Bibiliya. Yarashimishijwe n’impanuro ngirakamaro zo muri Bibiliya be n’icizigiro c’Ubwami. Mu 1994, yarabatijwe aba Icabona ca Yehova

Ivyo yivugiye

Ni ibiki vyagufashije gukomeza ubucuti ufitaniye na Yehova muri ibi bigeragezo?

Jewe n’umugore wanje turasenga kenshi turi kumwe. Narabonye ko ntari gushobora kuvyihanganira ntafashijwe na Yehova. Ni co gituma nabandanije kwiyegereza Yehova mu kwama niyigisha no mu gusoma Bibiliya buri musi. Buri gitondo, je n’umukenyezi wanje turaganira ku canditswe c’umusi tukongera tugasenga Yehova turi kumwe.

Ni ibiki bigufasha igihe uri mu bihe bica intege?

Kwiyigisha Bibiliya biramfasha igihe numva ncitse intege. Ndazirikana ku basavyi b’Imana bo muri kahise. Hari inkuru nyinshi zo muri Bibiliya zerekana ingene bihambaye kuguma utekanye no kwizigira Yehova. Igihe mba ndiko ndabizirikanako, ndagerageza gutahura ivyafashije abasavyi b’Imana kuguma batekanye. Mu Vyakozwe 5:29 havuga hati: “Dutegerezwa kugamburukira Imana nka yo mutware aho kugamburukira abantu.” Igihe Inama Nkuru yategeka intumwa guhagarika kwamamaza, ntizataye umutwe. N’igihe bakubitwa ntibagize ubwoba kubera bari bazi ko Yehova ari kumwe na bo kandi ko abashima.

Gusoma Bibiliya no gusenga ku musi ku musi bizobandanya gukomeza no guhumuriza abavukanyi na bashiki bacu bo mu Burusiya. Zaburi 9:9 iradukura amazinda ko “Yehova azocika ahantu hakirurutse hatagira inkomanzi kuri uwo wese ajanjaguwe, ahantu hakirurutse hatagira inkomanzi mu bihe vy’amarushwa.”

^ ing. 3 Ntivyama bikunda kumenya imbere y’igihe umusi Sentare izofata ingingo.

Raba kandi

AMAKURU AGEZWEHO

Bapfunzwe bazira ukwemera kwabo: Uburusiya

Ivyabona vya Yehova bo mu Burusiya barapfungwa bazira ukwemera kwabo. Nurabe amakuru aberekeye hamwe n’urutonde rw’Ivyabona vya Yehova bagipfunzwe. Urwo rutonde urashobora kurucapura.

AMAKURU AGEZWEHO