KU WA 5 RUHUHUMA 2024
UBURUSIYA

«Nuragize Yehova inzira yawe»

VUZA

Sentare ya Shadrinskiy yo mu karere ka Kurgan vuba izomenyesha urubanza yaciriye umuvukanyi Aleksandr Lubin. Umushingwamanza ntarahitamwo urubanza azomucira.

Amakuru amwerekeye

Aleksandr Lubin

Yavutse: mu 1956 (I Ogonek, mu karere ka Kurgan)

Ibimuranga: Yari umu enjeniyeri mu vyo kwirinda amasanganya mw’ishirahamwe ry’amasoko ntanganguvu yakoreramwo imbere y’uko akukuruka

Yubakanye na Tatyana muri Myandagaro 2001. Bafise abana babiri

Tatyana yaratanguye kwiga Bibiliya n’Ivyabona vya Yehova. Inyuma y’aho abereye pararize, umugabo wiwe Aleksandr yaramusomera Bibiliya kandi yaciye atangura gushimishwa. Aleksandr, Tatyana hamwe n’abana babo babiri babatirijwe rimwe mu 2003

Aleksandr arwaye indwara ya rumatizime ikaze mu mafyinga yompi, bigatuma abwirizwa kugendesha inkoni. Ararwaye kandi indwara iterwa n’uko abasoda b’umubiri batagikora neza

Ivyo yivugiye

Ni ibiki vyagufashije kugumana umunezero igihe wari upfunzwe urindiriye ko bagucira urubanza?

Kumara igihe mw’ibohero ntivyanyoroheye. Sinari nemerewe gufata imiti yo kugabanya ububabare bwaterwa na rumatizime. Mu ntango, nasenga Yehova amfashe bandekure ningoga. Ariko mu nyuma, nasenga ndamusaba ampe ukwihangana no kuguma ntekanye. Narashira mw’isengesho abandi bavukanyi na bashiki bacu bari mu mabohero. Nibwira nti: «Ibi n’ivy’umwanya muto.» Naca nitunira ku kuntu Yehova yariko arampezagira. Ivyo vyaramfashije kugumana umunezero. Amaherezo nararekuwe. Nararemeshejwe n’amajambo yo muri Zaburi 37:5 agira ati: «Nuragize Yehova inzira yawe. Numwizigire, na we azogufasha.» Ndemera ntakeka ko Yehova atigera areka ngo dushikirwe n’ibintu tudashobora kwihanganira. Nitwaguma tumwizigiye, azokwama adufasha kwihanganira ingorane iyo ari yo yose yodushikira.

Cokimwe na Aleksandr, nitwizigira ko Yehova azodushigikira, turazi neza ko tuzoshobora kuguma turi intahemuka tukongera tukihangana naho twoba turi mu ngorane zimeze gute.—Yesaya 38:14.

Ivyabaye n’igihe vyabereyeko

Ku wa 13 Mukakaro 2021

Ni ho Aleksandr yatangura gukurikiranwa n’amategeko
Ku wa 14 Mukakaro 2021

Baraje gusaka amazu umunani y’Ivyabona vya Yehova. Barafashe Aleksandr, baramusambisha baca baramupfunga ivy’agateganyo
Ku wa 16 Mukakaro 2021

Aleksandr yarungitswe mw’ibohero mu kurindira ko acirwa urubanza
Ku wa 19 Mukakaro 2021

Yarunguruje urubanza kubera yari aremvye cane
Ku wa 28 Myandagaro 2021

Sentare y’Abanyaburaya iharanira agateka ka zina muntu imaze gusaba ko Aleksandr yorekurwa, yararekuwe ariko baca bamubuza kugira ingendo
Ku wa 14 Mukakaro 2023

Yaratanguye kuburana
Ku wa 7 Nyakanga 2023

Ntivyakunze ko Aleksandr aja gusamba kubera ko yari arwariye mu bitaro

Raba kandi

AMAKURU AGEZWEHO

Bapfunzwe bazira ukwemera kwabo: Uburusiya

Ivyabona vya Yehova bo mu Burusiya barapfungwa bazira ukwemera kwabo. Nurabe amakuru aberekeye hamwe n’urutonde rw’Ivyabona vya Yehova bagipfunzwe. Urwo rutonde urashobora kurucapura.

AMAKURU AGEZWEHO