Abavukanyi na bashiki bacu bo bisagara vya Mariupol, Kharkiv, Hostomel hamwe n’ibindi bariko barashikirwa n’ibihe bitoroshe kubera ibitero vy’amabombe bibandanya muri Ukraine. Bamwe baramaze indwi bidakunda ko bava aho bari canke aho bari bikinze ivyo bibombe. Nta bifungurwa bikwiye bafise kandi umuyagankuba, internet n’amarezo ya telefone ntibiriko bikora neza. Ivyo bituma guhanahana amakuru n’abandi bavukanyi bibagora.

Ikibabaje, umuvukanyi Dmytro Rozdorskyi w’imyaka 28, akaba yari umukurambere w’i Myrnohrad yarapfuye. Yari yakomeretse cane bivuye kuri mine yahonyoye. Turashira mu masengesho ababuze ababo hamwe n’abavukanyi na bashiki bacu bari mu turere turiko tuberamwo ivyo bitero vy’amabombe.​—2 Abatesalonika 3:1.

Gushika ku wa 7 Ntwarante 2022, amakuru akurikira ni yo twari dufise ku bijanye na Ukraine:

• Abamamaji 2 bari bamaze gupfa

• Abamamaji 8 barakomeretse

• Abamamaji 20.617 barataye izabo, bahungira mu tundi turere two mu gihugu dutekanye

• Inzu 25 zarasambutse

• Inzu 29 zarononekaye cane

• Inzu 173 zarononekaye bibayabaye

• Ingoro z’Ubwami 5 zarononekaye

• Muri Ukraine, harashinzwe Amakomite ajejwe gutabara abashikiwe n’ivyago 27

• Abamamaji 6.548 baramaze gufashwa n’ayo makomite kugira baronswe uburaro mu turere dutekanye

• Abamamaji 7.008 barahungiye mu bindi bihugu kandi bariko bitwararikwa n’abandi bavukanyi bagenzi babo

• Ingoro y’amateraniro 1 hamwe n’Ingoro z’Ubwami hafi 30 zo mu burengero bwa Ukraine, nk’iziri i Chernevtsi, Ivano-Frankivsk, Lviv no mu turere twa Transcarpatie, zarategekanijwe kugira zakire impunzi