«Kuko ata kintu na kimwe kidashoboka ku Mana.»​—Luka 1:37, Bibiliya y’isi nshasha.

 «Kuko ata kinanira Imana.»​—Luka 1:37, Bibiliya Nyeranda

 Imana Mushoboravyose irashoboye gukora ibintu abantu babona ko bidashoboka. Nta kintu na kimwe gishobora gutuma idashitsa ivyo yasezeranye.

 Mu rurimi rwo mu ntango, imvugo «ijambo» ishobora kwerekeza ku «kintu cavuzwe», ariko ng’aha kikaba ari icavuzwe n’Imana. Ishobora no kwerekeza ku vyo Yehova a Imana yavuze bikaranguka. Kubera ko ivyo Imana ivuga vyama biba, ibivugwa muri Luka 1:37 bishobora kandi kuvugwa ngo: «Kuko ivyo Imana isezerana bitigera bireka kuba» canke «Ku Mana vyose birashoboka.» Uko kuntu bahinduye ico gisomwa c’ikigiriki co mu ntango bitanga iki ciyumviro nyene: Nta jambo na rimwe canke ivyo Imana yasezeranye bitazoranguka kubera ko ata kintu na kimwe kiyinanira.​—Yesaya 55:10, 11.

 Imvugo zisa n’izo ku vyerekeye ivyo Imana yasezeranye ziraboneka muri Bibiliya. Nk’akarorero, Yehova abicishije ku mumarayika wiwe yaravuze ko Sara, umugore wa Aburahamu, akaba atavyara, yokwibungenze mu busaza bwiwe. Imana yongeyeko iti: «Hari ikidashoboka kuri Yehova?» (Itanguriro 18:13, 14) Amaze kwihweza ivyo Imana yaremye, sekuruza w’imiryango Yobu yavuze ati: «[Nta] kintu na kimwe ushatse gukora kikunanira.» (Yobu 42:2) Kandi igihe abigishwa ba Yezu babona ko batoshitsa ivyo Imana isaba kugira barokoke, Yezu yarabibukije yuko “ku Mana vyose bishoboka.”​—Matayo 19:25, 26. b

 Umumarayika yitwa Gaburiyeli yarabwiye umwigeme w’isugi w’umuyuda yitwa Mariya amajambo dusanga muri Luka 1:37. Gaburiyeli yari ahejeje kumubwira ko yovyaye «Umwana w’Imana Musumbavyose» kandi ko “yomwise Yezu.” Yezu yobaye umwami w’Ubwami bw’Imana, ubuzoganza ibihe bidahera.​—Luka 1:26-33; Ivyahishuwe 11:15.

 Mariya yarabajije ingene ikintu nk’ico coshobotse kubera ko atari yubatse kandi “ata mugabo yari afise.” (Luka 1:34, 35) Gaburiyeli yishuye ko Imana yokoresheje impwemu yayo nyeranda canke inguvu akoresha. Ico gihe Yezu yari mw’ijuru, ari umwana w’Imana afise umubiri w’impwemu. Rero Yehova yakoresheje impwemu yiwe nyeranda mu gukura ubuzima bwa Yezu mw’ijuru akabushira mu nda ya Mariya. (Yohani 1:14; Abafilipi 2:5-7) Mariya yaciye yibungenga ku gitangaro. Kugira uwo mumarayika atume Mariya yizera ko Imana ibishoboye, yamubwiye ko incuti yiwe Elizabeti yari aherutse kwibungenga umuhungu «mu busaza bwiwe.» Elizabeti n’umugabo wiwe Zekariya nta mwana bari bafise kuko Elizabeti atavyara. (Luka 1:36) Umuhungu wabo yari Yohani umubatizi, uwo Yehova yari yavuze imbere y’igihe ko yomukoreye.​—Luka 1:10-16; 3:1-6.

 Umumarayika Gaburiyeli rero yaciye avuga amajambo dusanga muri Luka 1:37, kumbure afise mu muzirikanyi Mariya na Elizabeti. Ayo majambo nyene arahumuriza abasavyi ba Yehova muri iki gihe ko azobandanya gushitsa ivyo yasezeranye. Muri ivyo hakaba harimwo ico yasezeranye ko izi ntwaro z’abantu azozisubiriza intwaro nziza iganzwa n’umwana wiwe Yezu kristu, umwami w’Ubwami bw’Imana bwo mw’ijuru.​—Daniyeli 2:44; 7:13, 14.

 Nurabe iyi videwo ngufi y’incamake y’igitabu ca Luka.