“Yaraguhishuriye iciza ico ari co, ewe muntu yakuwe mw’ivu! None hari ikindi Yehova agusaba atari ugukurikiza ubutungane no gukunda ubuntu no kugendana n’Imana yawe wifashe ruto?”​—Mika 6:8, Bibiliya y’isi nshasha.

 “Ko yakweretse iciza ic’ari co, ga yewe muntu: mbega har’ikindi Uhoraho akugombako, atar’ugukora ibiroranye, no gukunda kugira imbabazi, no kugendana n’Imana yawe wicishije bugufi?”​—Mika 6:8, Bibiliya Yera.

 Umuhanuzi Mika arasigura ko guhimbara Yehova a Imana atari umuzigo. (1 Yohani 5:3) Muri uyu murongo, haravugwa ibintu bitatu Imana itwitezeko. Bibiri vya mbere bivuga ingene umuntu yofata abandi, ica gatatu na co cerekeye ubucuti umuntu afitaniye n’Imana.

 “Gukurikiza ubutungane.” Imana isaba abasavyi bayo gukora ibigororotse. Ivyo birimwo kwiyumvira no gukora ibihuye n’amategeko y’Imana yerekana iciza n’ikibi. (Gusubira mu vyagezwe 32:4) Nk’akarorero, abakurikiza amategeko y’Imana barihatira kutarenganya abandi. Vyongeye, barihatira gufata abandi kumwe bataravye kahise kabo, igihugu bakomokamwo canke uko ivyabo vyifashe.​—Abalewi 19:15; Yesaya 1:17; Abaheburayo 13:18.

 “Gukunda ubuntu.” Iyo mvugo irashobora kandi kuba “gukunda urukundo rudahemuka.” (Mika 6:8) Mu giheburayo, ijambo “ukudahemuka” ririmwo kuba umwizigirwa. Ariko kandi ririmwo no kugaragariza abandi ubuntu n’imbabazi kuruta uko amategeko abidusaba. Imana isaba abipfuza kuyihimbara kugaragaza ubuntu n’imbabazi, ikabasaba kandi guha agaciro canke gukunda izo kamere. Ivyo birakwiye gutuma abasavyi b’Imana bahimbarwa no gufasha abandi na canecane abari mu nkenero. Gutanga birazana agahimbare.​—Ivyakozwe 20:35.

 “Kugendana n’Imana yawe wifashe ruto.” Muri Bibiliya, ijambo “kugenda” rirashobora gusigura “gukurikira ingendo.” Umuntu agendana n’Imana mu kubaho mu buryo buyihimbara. Nowa yaratanze akarorero keza. “Yagendana n’Imana y’ukuri” kubera ko yari umugororotsi mu maso y’Imana kandi “[akerekana] ko atagira amahinyu mu bo mu gihe ciwe.” (Itanguriro 6:9) Muri kino gihe, ‘tugendana n’Imana’ mu kubaho twisunga ivyo Ijambo ryayo Bibiliya ryigisha. Ivyo bisaba ko twifata ruto ni ukuvuga tukemera ko turi n’aho tugarukiriza kandi ko ivyo dukora vyose tubikesha Imana.​—Yohani 17:3; Ivyakozwe 17:28; Ivyahishuwe 4:11.

 Mika yari umuhanuzi muri Isirayeli ya kera mu kinjana c’umunani imbere ya Kristu. Muri ico gihe, igihugu cari cuzuyemwo ugusenga ibigirwamana, amanyanga be n’agahahazo. (Mika 1:7; 3:1-3, 9-11; 6:10-12) Abisirayeli benshi barirengagiza amabwirizwa y’Imana, ayari mw’Itegeko Imana yari yahaye Musa, rikaba ryitwa Itegeko rya Musa. Muri ico gihe nyene, abantu benshi bariyumvira ko Imana yobemeye kubera imigenzo canke imigirwa y’idini be no kubera bashikana ibimazi.​—Imigani 21:3; Hoseya 6:6; Mika 6:6, 7.

 Imyaka amajana inyuma ya Mika, Yezu yaravuze ko Se wiwe ashima abagaragaza urukundo, ubutungane n’imbabazi ariko ko yanka abantu bakora ibintu bituma baboneka ko bihebeye Imana kandi atari vyo. (Matayo 9:13; 22:37-39; 23:23) Amajambo ya Yezu aradufasha gutahura ivyo Imana yiteze ku basavyi bayo muri iki gihe.

 Nurabe aka kavidewo kugira ubone incamake y’igitabu ca Mika.