URWARUKA RURIBAZA
Kubera iki nosenga?
Nk’uko itohoza rimwe ryavyerekanye, ibice 80 kw’ijana vy’abana b’imiyabaga bo muri Amerika barasenga, ariko ica kabiri cabo ni bo gusa basenga buri musi. Nta gukeka ko bamwe muri bo bibaza bati: ‘Isengesho coba ari ikintu gituma gusa umuntu yumva amerewe neza canke rirafise akandi kamaro?’
Isengesho ni iki?
Gusenga ni ukuganira koko n’Umuremyi w’ibiriho vyose. Ibaze nawe iryo teka! Yehova araruta abantu kure n’iyo, yamara “[n]tari kure y’umwe wese muri twebwe.” (Ivyakozwe 17:27) Wanashima, Bibiliya idutera aka kamo gatangaje iti: “Mwiyegereze Imana, na yo izobiyegereza.”—Yakobo 4:8.
Wokwiyegereza Imana gute?
Uburyo bumwe, ni mu gusenga: Aho ni wewe uba uriko urayagira Imana.
Ubundi buryo, ni mu kwiga Bibiliya: Aho ni Imana iba iriko irakuyagira.
Kuyaga n’Imana muri ubwo buryo (gusenga no kwiga Bibiliya) bizogufasha gukomeza ubucuti ufitaniye na yo.
“Kuganira na Yehova, Imana Musumbavyose, ni iteka rikomeye kuri twebwe abantu.”—Jeremy.
“Kubwira Yehova uko niyumva ata co ndamuhisha biratuma ndushiriza kumwiyegereza.”—Miranda.
Imana yoba itwumviriza?
Naho woba wemera Imana, mbere ukaba uyisenga, birashobora kukugora kwemera ko ikwumviriza vy’ukuri. Yamara rero, Bibiliya ivuga ko Yehova “[y]umva amasengesho.” (Zaburi 65:2) Mbere iragutera akamo ngo ‘uterere amaganya yawe yose kuri we.’ Kubera iki? ‘Kuko akubabara.’—1 Petero 5:7.
Zirikana kuri ibi bintu: None ntiwama urondera umwanya wo kuganira n’abagenzi bawe somambike? Woshobora rero no kurondera umwanya wo kuganira n’Imana. Niwame uyisenga, kandi ukoreshe izina ryayo Yehova. (Zaburi 86:5-7; 88:9) Kanatsinda, Bibiliya idusaba ‘gusenga ubudahengeshanya.’—1 Abatesalonika 5:17.
“Iyo ndiko ndasenga mba ndiko ndaganira n’Umuvyeyi wanje wo mw’ijuru, nkamusukira ibiri mu mutima wanje vyose.”—Moises.
“Yehova ndamubwira vyose ata co ndamuhisha, nk’aho noba ndiko nganira na mama canke umugenzi somambike.”—Karen.
Ni ibiki novuga mw’isengesho?
Bibiliya ivuga iti: “Muri vyose, mu gusenga no mu gutakamba hariko n’ugukenguruka, ivyo musaba bimenyeshwe Imana.”—Abafilipi 4:6.
Vyoba bisobanura ko ushobora kubwira Imana ingorane zawe? Cane nyene! Nkako, Bibiliya ivuga iti: “Terera umuzigo wawe kuri Yehova ubwiwe, na we ubwiwe azogushigikira.”—Zaburi 55:22.
Ariko ntiwumve, ntukwiye kwama ubwira Imana ingorane zawe gusa. Umwigeme yitwa Chantelle avuga ati: “Hamwe nokwama nsenga Yehova ndamusaba gusa ngo amfashe, ubwo ntibwoba ari ubugenzi nyabwo. Mbona ko gushima ari vyo bikwiye kuza imbere, kandi ivyo noshimira Yehova bikwiye kuba vyinshi.”
Zirikana kuri ibi bintu: Ni ibiki ushimira Imana mu buzima bwawe? Niwiyumvire ibintu bitatu woshimira Yehova uno musi.
“Mbere n’akantu gatoyi nko gutangarira ishurwe riryoheye ijisho, birashobora gutuma dutura isengesho ryo gushimira Yehova.”—Anita.
“Nuzirikane ikintu co mu vyaremwe kikuryohera cane canke umurongo wo muri Bibiliya ugukora ku mutima, uce ushimira Yehova kubera ico kintu.”—Brian.
Raba kandi
IMYIMENYEREZO
Ukuntu woryohora amasengesho yawe
Uwu mwimenyerezo uzogufasha gusuzuma ivyo ushira mu masengesho yawe hamwe n’ukuntu ameze.
IVYO URUNGANWE RWAWE RUVUGA
Imvo zituma twizera—Nahisemwo kwisunga ingingo ngenderwako z’Imana
Abakiri bato barasigura ukuntu birinze ingorane zashikira benshi mu bo bigana.
INYIGISHO Z'ISHIMIKIRO ZO MURI BIBILIYA
Imana yoba yumviriza amasengesho yose?
Imana yoba yemera amasengesho y’ubwikunzi? Bite hoho hamwe umugabo yoba afata nabi umugore wiwe, agaca asaba Imana ngo imuhezagire?
INYISHU Z’IBIBAZO BISHINGIYE KURI BIBILIYA
Kubera iki nosenga? Imana yoba izonyishura?
Kugira yishure isengesho ryawe canke ntiryishure, ahanini bivana na wewe.
UMUNARA W’INDERETSI
Imana yoba yumviriza amasengesho yacu?
Bibiliya iradukura amazinda yuko Imana itwumviriza igihe tuyisenze mu buryo bubereye.
UMUNARA W’INDERETSI
